1. Ke hobane’ng ha Jesu a ile a kopa Jehova hore a sireletse barutuoa ba hae?

BOSIUNG ba ho qetela pele a bolaoa, Jesu o ne a ntse a nahana ka mathata ao barutuoa ba hae ba neng ba tla thulana le ’ona. Kaha Jesu o ne a rata metsoalle ea hae, o ile a kopa Ntate oa hae hore a e “lebele ka lebaka la ea khopo.” (Joh. 17:14, 15) Jesu o ne a tseba hore ka mor’a hore a khutlele leholimong, Satane Diabolose o ne a tla tsoela pele ho loantša mang kapa mang ea batlang ho sebeletsa Jehova. Ho hlakile hore bahlanka ba Jehova ba ne ba tla hloka ho sireletsoa.

2. Re kholisoa ke’ng hore Jehova o tla araba lithapelo tsa rona?

² Jehova o ile a araba thapelo ea Jesu hobane o ne a rata Mora oa hae. Ha re leka ka matla hore le rona re khahlise Jehova, o tla re rata a be a arabe lithapelo tsa rona ha re mo kopa hore a re thuse le hore a re sireletse. Joaloka Hlooho ea lelapa e tsotellang, Jehova o tla tsoela pele a hlokomela bana ba hae ka lerato. Haeba a ke ke a etsa joalo, o tla senya lebitso la hae le botumo ba hae.

3. Ke hobane’ng ha mehleng ee re hloka hore Jehova a re sireletse?

³ Kajeno re hloka hore Jehova a re sireletse ho feta neng kapa neng. Satane o lelekiloe leholimong “a halefile haholo.” (Tšen. 12:12) O entse hore batho ba bang ba nahane hore ha ba re hlorisa ba etsetsa “Molimo tšebeletso e halalelang.” (Joh. 16:2) Ba bang ba sa lumeleng ho Molimo ba re hlorisa hobane re sa tšoane le bona. Ho sa tsotellehe hore na re hlaheloa ke eng, ha re tšohe. Hobane’ng? Hobane Lentsoe la Molimo le re: “Morena oa tšepahala, ’me o tla le tiisa le ho le boloka  ho ea khopo.” (2 Bathes. 3:3) Jehova o re sireletsa joang? A re ke re bueng ka litsela tse peli tseo a re sireletsang ka tsona.

4. Ho ea ka Baefese 6:13-17, Jehova o fane ka eng ho re sireletsa?

⁴ Jehova o re file lihlomo tsa ntoa tse tla re sireletsa ha Satane a re hlasela. (Bala Baefese 6:13-17.) Lihlomo tsena li matla ebile li sebetsa hantle. Empa li tla re sireletsa haeba re lula re li apere kamehla. Ebe karolo ka ’ngoe e emela’ng? A re ke re bueng ka tsona.

5. Lebanta la ’nete ke’ng, hona ke hobane’ng ha re lokela ho itlama ka lona?

⁵ Lebanta la ’nete le emela ’nete eo re e fumanang ka Lentsoeng la Molimo Bibele. Ke hobane’ng ha re lokela ho itlama ka lebanta lee? Hobane Satane “ke ntate oa leshano.” (Joh. 8:44) Haesale Satane a bua leshano ka lilemo tse likete ’me o khelositse “lefatše lohle leo ho ahiloeng ho lona.” (Tšen. 12:9) Empa ’nete eo re e fumanang ka Bibeleng ea re sireletsa hore re se ke ra khelosoa. Re ka tlama lebanta la ’nete joang? Re etsa joalo ka ho ithuta ’nete ka Jehova, ka ho mo rapela “ka moea le ka ’nete” le ka ho itšoara ka botšepehi linthong tsohle.​—Joh. 4:24; Baef. 4:25; Baheb. 13:18.

6. Tšireletso ea sefuba ea ho loka ke’ng, hona ke hobane’ng ha re lokela ho e apara?

⁶ Tšireletso ea sefuba ea ho loka e emela melao ea Jehova. Ke hobane’ng ha re lokela ho e apara? Kaha tšireletso ea sefuba e sireletsa pelo ea lesole, le rona tšireletso ea sefuba ea ho loka e sireletsa lipelo tsa rona kapa batho bao re leng bona ka hare e le hore re se ke ra senngoa ke tšusumetso e mpe ea lefatše lena. (Liprov. 4:23) Jehova o lebeletse hore re mo rate re be re mo sebeletse ka pelo eohle. (Mat. 22:36, 37) Kahoo, Satane o leka hore re khaotse ho sebeletsa Jehova ka pelo eohle ka hore re rate lintho tseo Jehova a li hloileng. (Jak. 4:4; 1 Joh. 2:15, 16) Ha a sa atlehe, o tla leka ho re tšosa e le hore re se ke ra mamela melao ea Jehova.

7. Re ka apara tšireletso ea sefuba ea ho loka joang?

⁷ Re apara tšireletso ea sefuba ea ho loka ka hore re mamele melao ea Jehova ea hore na ntho nepahetseng le e fosahetseng ke efe, re be re phele ka eona. (Pes. 97:10) Batho ba bang ba ka ’na ba nahana hore melao ea Jehova e thata. Empa haeba re tlohela ho sebelisa melao-motheo ea Bibele bophelong ba rona, re tla tšoana le lesole le hlobolang tšireletso ea lona ea sefuba ntoeng hobane le nahana hore e boima haholo. Ho etsa joalo e tla be e le booatla bo tšabehang. Litaelo tsa Jehova ha li “boima” ho batho ba mo ratang empa lia ba sireletsa.​—1 Joh. 5:3.

8. Ho roala lihlomo tsa litaba tse molemo maotong ho bolela’ng?

⁸ Pauluse o ile a re khothalletsa hore maoto a rona a roale lihlomo tsa litaba tse molemo tsa khotso. Ka mantsoe a mang, re lokela ho lula re itokisellelitse ho bolela litaba tsa ’Muso oa Molimo. Tumelo ea rona ea matlafala ha re bolella batho ba bang molaetsa oa Bibele. Hoa khothatsa ho bona kamoo batho ba Jehova lefatšeng lohle ba sebelisang menyetla eohle e hlahang ho ruta batho Bibele. Mohlala, ba etsa joalo ha ba le mesebetsing kapa sekolong, ba le ka ntlo le ntlo kapa libakeng tsa khoebo, ha ba le mabenkeleng, ha ba etetse ba leloko bao e seng Lipaki kapa ba e-na le batho bao ba ba tsebang le ha ba sa khone ho tloha hae. Haeba re tšoha hoo re tlohelang ho bolella batho ka ’Muso oa Molimo, re tla tšoana le lesole le rolang lieta tsa lona ntoeng ’me le beha maoto a lona kotsing. Ha le etsa joalo,  le tla imeloa ke ntoa hape ho tla ba thata hore le itšireletse le hore le mamele litaelo tsa molaoli oa lona.

9. Ke hobane’ng ha re lokela ho nka thebe e kholo ea tumelo?

⁹ Thebe e kholo ea tumelo e emela tumelo eo re nang le eona ho Jehova. Re na le tumelo ea hore o tla phethahatsa litšepiso tsohle tsa hae. Tumelo eo e tla re thusa hore re ‘time metsu eohle e tukang ea ea khopo.’ Ke hobane’ng ha re lokela ho nka thebe ena e kholo? Hobane e re sireletsa lithutong tsa bakoenehi tse thetsang le hore re se ke ra nyahamisoa ke batho ba re somang ka lebaka la tumelo ea rona. Haeba re se na tumelo, re ke ke ra ba le matla a ho hana ha batho ba bang ba re susumelletsa hore re se ke ra mamela melao ea Jehova. Nako le nako ha re hana ho etsa ntho eo Jehova a sa e batleng, ebang ke sekolong kapa mosebetsing, re tla be re bontša hore re nkile thebe ea rona. (1 Pet. 3:15) Kamehla ha re hana mosebetsi o re patalang chelete e ngata hobane o sa re lumelle ho sebeletsa Jehova hantle, re tla be re bontša hore re nkile thebe ea rona. (Baheb. 13:5, 6) Nako le nako ha re sebeletsa Jehova ho sa tsotellehe likhanyetso, taba eo e bontša hore thebe ea rona ea tumelo e re sirelelitse.​—1 Bathes. 2:2.

10. Helmete ea poloko ke’ng, hona ke hobane’ng ha re lokela ho e roala?

 ¹⁰ Helmete ea poloko ke tšepo eo Jehova a re fang eona ea hore o tla re tsosa le ho putsa bohle ba etsang thato ea hae. (1 Bathes. 5:8; 1 Tim. 4:10; Tite 1:1, 2) Feela joalokaha helmete e sireletsa hlooho ea lesole, tšepo ea poloko eo re nang le eona e sireletsa tsela eo re nahanang ka eona. Ka tsela efe? E re thusa hore re lule re nahana ka litšepiso tseo Molimo a re tšepisitseng tsona hape e re thusa hore re se ke ra ikutloa re imetsoe ke mathata ao re nang le ’ona. Helmete ee e roaloa joang? Re e roala ka hore re etse bonnete ba hore re nahana ka tsela eo Molimo a nahanang ka eona. Ka mohlala, re tšepa Molimo e seng maruo a sa tsitsang.​—Pes. 26:2; 104:34; 1 Tim. 6:17.

11. Sabole ea moea ke’ng, hona ke hobane’ng ha re lokela ho e sebelisa?

¹¹ Sabole ea moea ke Bibele Lentsoe la Molimo. Sabole ena e na le matla a ho pepesa leshano le ha e le lefe le ho lopolla batho lithutong tse fosahetseng le mekhoeng e ka ba ntšang kotsi. (2 Bakor. 10:4, 5; 2 Tim. 3:16, 17; Baheb. 4:12) Re ithuta ho sebelisa sabole eo hantle ka ho ithuta Bibele re le bang le ka koetliso eo re e fumanang ka mokhatlong oa Molimo. (2 Tim. 2:15) Ntle le lihlomo tsa ntoa tseo Jehova a re fileng tsona, ho na le tsela e ’ngoe hape eo a re sireletsang ka eona. Ke efe?

12. Ke’ng hape eo re e hlokang, hona hobane’ng?

¹² Lesole le nang le boiphihlelo lea tseba hore le hloka thuso ea masole a mang hobane le ke ke la atleha ho loana le masole a mangata le le leng. Ka ho tšoanang, re ke ke ra atleha ho hlola Satane le balateli ba hae re le bang, re hloka tšehetso ea bara le barali ba bo rona. Jehova o re file “mokhatlo oohle oa barab’abo rona” lefatšeng lohle bakeng sa ho re thusa.​—1 Pet. 2:17.

13. Ho ea ka Baheberu 10:24, 25, ho ea libokeng ho re thusa joang?

¹³ Tsela e ’ngoe eo re fumanang tšehetso ka eona ke ka ho ea libokeng. (Bala Baheberu 10:24, 25.) Ka linako tse ling ha re nyahame, joalokaha e mong le e mong oa rona a ka ikutloa joalo, ha rea libokeng re tla khothala. Re khothatsoa ke likarabo tse tsoang pelong tsa bara le barali ba bo rona. Lipuo tse thehiloeng Bibeleng le lipontšo tse fanoang libokeng lia re matlafatsa hore re tsoele pele re sebeletsa Jehova. Hape ha re qoqa le bara le barali ba bo rona pele ho liboka le ka mor’a tsona, rea khothala. (1 Bathes. 5:14) Ho feta moo, liboka li re fa monyetla oa ho ba le thabo e tlisoang ke ho thusa batho ba bang. (Lik. 20:35; Bar. 1:11, 12) Liboka li re thusa ka litsela tse ling hape. Li re thusa hore re atlehe ha re ruta batho Bibele. Ka mohlala, re ithuta ho sebelisa lithulusi tseo re li fumanang ka har’a Teaching Toolbox hantle. Kahoo, lokisetsa hantle bakeng sa liboka. Ha u le libokeng u mamele ka hloko. Ka mor’a liboka, etsa lintho tseo u ithutileng tsona. Ha u etsa lintho tsena, u tla ba “lesole le khabane la Kreste Jesu.”​—2 Tim. 2:3.

14. Re fumana thuso efe hape?

¹⁴ Re boetse re thusoa ke limilione tsa mangeloi a matla. U nahana lengeloi le le leng le ka etsa’ng? (Esa. 37:36) Joale, u nahana hore ha e le lebotho le leholo teng a ka etsa’ng? Ha ho na motho kapa modemona ea ka o besang oa tuka khahlanong le lebotho la ntoa la Jehova. Paki e le ’ngoe ha e kopana le Jehova e ba bongata bo tšabehang. (Baahl. 6:16) Re ka kholiseha hore taba ena ke ’nete. Lula u hopola taba ena nakong eo u tšosoang ke ntho eo motho eo u sebetsang le eena, eo u kenang  sekolo le eena kapa oa leloko eo e seng Paki a e buang kapa a e etsang. Hopola hore ha u loane u le mong. Empa u latela tataiso ea Jehova.

15. Ho ea ka Esaia 54:15, 17, ke hobane’ng ha ho se na motho ea ka khonang ho koala batho ba Molimo melomo?

¹⁵ Batho ba phelang lefatšeng lena le busoang ke Satane ba na le mabaka a mangata a ho re hloea. Ha re tšehetse eng kapa eng e amanang le lipolotiki hape ha re kenelle lintoeng. Re tsebahatsa lebitso la Molimo, re phatlalatsa hore ke ’Muso oa Molimo feela o tla tlisa khotso lefatšeng hape re mamela melao ea Molimo. Re pepesa ’musi oa lefatše lena e le raleshano ebile e le ’molai ea sehloho. (Joh. 8:44) Hape re phatlalatsa hore lefatše la Satane le haufi le ho felisoa. Ho ntse ho le joalo, Satane le batho ba hae ba ke ke ba etsa hore re khaotse ho ruta batho Bibele. Ho e-na le hoo, re tla tsoela pele re rorisa Jehova kahohle kamoo re ka khonang. Le hoja Satane a le matla, o hlolehile ho thibela batho ba Molimo hore ba bolelle batho molaetsa oa ’Muso lefatšeng lohle. Lebaka ke hobane re sirelelitsoe ke Jehova.​—Bala Esaia 54:15, 17.

16. Jehova o tla sireletsa batho ba hae joang nakong ea matšoenyeho a maholo?

¹⁶ Re lebelletse’ng? Nakong ea matšoenyeho a maholo, Jehova o tla re sireletsa ka litsela tse peli tse ikhethang. O tla qala pele ka ho sireletsa bahlanka ba hae ba tšepahalang nakong eo a etsang hore marena a lefatše a felise Babylona e Moholo e leng ’muso oa bolumeli ba bohata. (Tšen. 17:16-18; 18:2, 4) Ka mor’a moo, o tla sireletsa batho ba hae nakong eo a felisang puso eohle ea Satane ka Armagedone.​—Tšen. 7:9, 10; 16:14, 16.

17. Re rua molemo ofe ha re lula re e-na le kamano e ntle le Jehova?

¹⁷ Ha re lula re e-na le kamano e ntle le Jehova, Satane a ke ke a re utloisa bohloko ho ea ho ile. Ho e-na le hoo, e tla ba eena ea tla felisoa ka ho felletseng. (Bar. 16:20) Kahoo, lula u apere lihlomo tsa hao tse feletseng tsa ntoa. U se ke oa leka ho loantša Satane le lefatše la hae u le mong. Tšehetsa Bakreste-’moho le uena. Latela tataiso ea Jehova. Haeba u etsa joalo, u tla kholiseha hore Ntate oa hao ea lerato o tla u matlafatsa le ho u sireletsa.​—Esa. 41:10.