1. Ho ea ka Matheu 24:9, ke hobane’ng ha re sa lokela ho makala ha batho ba re hloile?

JEHOVA o re bopile re e-na le takatso ea ho rata le ho ratoa. Kahoo, ha motho e mong a re hloile, re utloa bohloko ’me ka linako tse ling rea tšoha. Mohlala, Morali’abo rona Georgina oa Europe o re: “Ha ke ne ke le lilemo li 14 ’mè oa ka o ne a ntlhoile hobane ke sebeletsa Jehova. Ke ne ke utloa ke le motoai-toai eaba ke qala ho nahana hore mohlomong ke motho ea mobe.” * Mor’abo rona Danylo eena o re: “Nakong eo masole a neng a nkotla, a nthohaka a bile a re a tla ntematsa hobane ke le Paki ea Jehova, ke ne ke tšohile ebile ke ikutloa ke tlotlolotsoe.” Ho hlouoa ka tsela eo ho utloisa bohloko empa ho boetse ha ho makatse. Jesu o ile a hla a cho hore re tla hlouoa.​—Bala Matheu 24:9.

2-3. Ke hobane’ng ha balateli ba Jesu ba hloiloe?

² Ke hobane’ng ha batho ba hloile balateli ba Jesu? Hobane joaloka Jesu ha re “karolo ea lefatše.” (Joh. 15:17-19) Kahoo, le hoja re hlompha mebuso ea batho, re hana ho e rapela kapa ho rapela litšoantšo tse e emelang. Re rapela Jehova feela. Re tšehetsa taba ea hore Molimo o na le tokelo ea ho busa batho empa Satane le “peo” ea hae ba khahlanong le taba eo. (Gen. 3:1-5, 15) Re bolella batho hore ’Muso oa Molimo ke oona feela o tla rarolla mathata a batho le hore haufinyane o tla felisa batho bohle ba khahlanong le oona. (Dan. 2:44; Tšen. 19:19-21) Molaetsa oo ke litaba tse monate ho batho ba bonolo empa li bosula ho batho ba khopo.​—Pes. 37:10, 11.

³ Re boetse re hlouoe hobane re mamela melao ea Molimo. Melao ea hae e fapane hole le ea lefatše lena. Mohlala, mehleng  ena batho ba bangata ba lumela hore ha se phoso ho etsa boitšoaro bo bobe bo tšoanang hantle le bo neng bo etsoa ke batho ba Sodoma le Gomora bo ileng ba etsa hore Molimo a ba felise. (Juda 7) Kaha re mamela melao e hlahang ka Bibeleng e buang ka lintho tseo, batho ba bangata baa re soma ebile ba re bitsa ka mabitso-bitso.​—1 Pet. 4:3, 4.

4. Ke makhabane afe a ka re thusang ha batho ba re hloile?

⁴ Ke eng e ka re thusang hore re mamelle ha batho ba re hloile ebile ba re rohaka? Re lokela ho ba le tumelo e matla ea hore Jehova o tla re thusa. Feela joaloka thebe, tumelo ea rona e tla “tima metsu eohle e tukang ea ea khopo.” (Baef. 6:16) Empa ho ba le tumelo feela ha hoa lekana. Re boetse re hloka ho ba le lerato. Hobane’ng? Hobane lerato “ha le halefe.” Lea tiisetsa le ho mamella lintho tsohle tse bohloko. (1 Bakor. 13:4-7, 13) Hajoale a re boneng hore na ho rata Jehova, Bakreste-’moho esita le lira tsa rona ho ka re thusa joang hore re mamelle ha batho ba bang ba re hloile.

5. Kaha Jesu o ne a rata Ntate oa hae, o ile susumeletseha hore a etse’ng?

⁵ Bosiung ba pele lira tsa hae li mo bolaea, Jesu o ile a re ho balateli ba hae ba tšepahalang: “Ke rata Ntate, esita le joalokaha Ntate a mphile taelo hore ke etse, ke etsa joalo.” (Joh. 14:31) Ho rata Jehova ho ile ha thusa Jesu hore a mamelle liteko tse boima. Le rona ha re rata Jehova, re tla khona ho mamella mathata.

6. Ho ea ka Baroma 5:3-5, bahlanka ba Jehova ba ikutloa joang ka ho mamella ho hlouoa ke batho?

⁶ Haesale tsela eo bahlanka ba Jehova ba mo ratang ka eona e ba thusa ho mamella liteko. Ka mohlala, ha lekhotla le phahameng la Bajuda le ne le laela baapostola hore ba khaotse ho bolela, lerato leo ba neng ba rata Molimo ka lona le ile la ba susumetsa hore ba ‘mamele Molimo e le ’Musi ho e-na le batho.’ (Lik. 5:29; 1 Joh. 5:3) Barab’abo rona ba hlorisoang ke mebuso e matla le e khopo, le bona ba thusoa ke ho rata Molimo haholo hore ba lule ba tšepahala. Ho e-na le hore re nyahame, rea thaba ha re hlouoe ke batho.​—Lik. 5:41; bala Baroma 5:3-5.

7. Re lokela ho etsa’ng ha ba lelapa ba re hanyetsa?

⁷ Haeba re hanyetsoa ke litho tsa lelapa, ho ka ba thata haholo hore re mamelle. Ha ba bang ba lelapa ba hlokomela hore re batla ho ithuta ka Jehova ba ka ’na ba nahana hore re khelositsoe. Ba bang ba ka ’na ba nahana hore re lahlehetsoe ke kelello. (Bapisa Mareka 3:21.) Hape ba ka ’na ba re hanyetsa ka matla. Ha rea lokela ho makatsoa ke lintho tsena. Jesu o ile a re: “Lira tsa motho e tla ba batho ba ntlo ea hae.” (Mat. 10:36) Ke ’nete hore ho sa tsotellehe hore na ba malapa a rona ba re tšoara joang, ha re ba nke e le lira tsa rona. Leha ho le joalo, ha re ntse re rata Jehova le ho feta, re boetse re rata le batho. (Mat. 22:37-39) Empa re ke ke ra khaotsa ho mamela melao le melao-motheo e ka Bibeleng hore feela re khahlise batho.

8-9. Ke eng e thusitseng morali’abo rona e mong hore a tšepahale leha a hanyetsoa ka sehloho?

⁸ Morali’abo rona Georgina eo re buileng ka eena o ile a khona ho lula a tšepahala le hoja ’mè oa hae a ne a mo hanyetsa ka sehloho. O re: “ ’Na le ’mè oa ka re ile ra qala ho ithuta Bibele le Lipaki. Empa likhoeli tse tšeletseng hamorao ha ke ne ke batla ho ea libokeng, ’mè oa ka o ile a qala ho nkhanyetsa. Ke ile ka hlokomela hore o ntse a buisana le bakoenehi ’me o ne a ntjoetsa mashano a bona. O ne a boetse a nthohaka, a nkhula ka moriri, a  nkhama a bile a lahla lingoliloeng tsa ka. Ke ile ka kolobetsoa ha ke le lilemo li 15. ’Mè oa ka o ile a leka ho etsa hore ke khaotse ho sebeletsa Jehova ka hore a nkise lehaeng leo ho lulang bacha ba tsoileng taolong ’me ba bang ba bona ba ne ba tsuba lithethefatsi ebile ba etsa tlolo ea molao. Ho thata haholo ho mamella ha u hanyetsoa ke motho ea lokelang ho u rata le ho u hlokomela.”

⁹ Morali’abo Georgina o thusitsoe ke’ng hore a mamelle? O re: “Letsatsing leo ’mè oa ka a ileng a mphetohela ka lona, ke leo ke neng ke se ke qetile ho bala Bibele kaofela. Ke ne ke se ke kholisehile hore ke fumane ’nete ebile ke ne ke ikutloa ke le haufi-ufi le Jehova. Ke ne ke lula ke mo rapela ’me o ne a utloa lithapelo tsa ka. Ha ke ntse ke lula lehaeng leo, morali’abo rona e mong o ile a re ke ee ha hae eaba re ithuta Bibele ’moho. Ka nako eo, ke ne ke matlafatsoa ke bara le barali ba bo rona ha ke le libokeng. Ba ile ba etsa ke ikutloe ke le karolo ea malapa a bona. Ke ile ka bona ka ho hlaka hore Jehova o matla ho feta bahanyetsi ba rona ho sa tsotellehe hore na ke bo-mang.”

10. Re ka kholiseha hore Jehova Molimo oa rona o tla etsa’ng?

¹⁰ Moapostola Pauluse o ile a re ha ho letho le ka re arohanyang “le lerato la Molimo le leng ho Kreste Jesu Morena oa rona.” (Bar. 8:38, 39) Le hoja re ka utloa bohloko ka nako e itseng, Jehova o tla lula a re tšelisa le ho re matlafatsa. Hape joalokaha re bone ho Morali’abo rona Georgina, Jehova o boetse o re thusa a sebelisa bara le barali ba bo rona.

11. Fana ka mohlala oa hore na lerato leo Jesu a buileng ka lona ho Johanne 15:12, 13 le ne le tla thusa barutuoa ba hae joang.

¹¹ Bosiung ba ho qetela pele Jesu a shoa, o ile a hopotsa barutuoa ba hae hore ba lokela ho ratana. (Bala Johanne 15:12, 13.) O ne a tseba hore haeba ba itela ebile ba ratana, ba ne ba tla lula ba momahane hape ba e-na le mamello ha batho ba bang ba ba hloile. Nahana ka mohlala oa phutheho ea Thesalonika. Haesale Bakreste ba phutheho eo ba hlorisoa ho tloha ha e ne e thehoa. Leha ho le joalo, ba ile ba beha mohlala o motle oa ho tšepahala le ho bontša lerato. (1 Bathes. 1:3, 6, 7) Pauluse o ile a ba khothalletsa hore ba tsoele pele ba ratana haholo. (1 Bathes. 4:9, 10) Lerato le ne le tla ba susumelletsa ho khothatsa ba tepelletseng maikutlo le ho tšehetsa ba fokolang.  (1 Bathes. 5:14) Ba ile ba mamela litaelo tsa Pauluse hobane selemo hamorao ha a ne a ngola lengolo la hae la bobeli o ile a re ho bona: “Lerato la e mong le e mong le la lona kaofela lea eketseha e mong ho e mong.” (2 Bathes. 1:3-5) Lerato leo ba neng ba e-na le lona le ile la ba thusa hore ba mamelle mathata le ho hlorisoa.

12. Bara le barali ba bo rona ba naheng e ’ngoe ba ile ba bontša lerato joang ha ho ne ho e-na le ntoa naheng eo?

¹² Nahana ka mohlala oa Mor’abo rona Danylo eo re buileng ka eena qalong le mosali oa hae. Ha ho ne ho e-na le ntoa toropong eo ba lulang ho eona, ba ile ba lula ba e-ea libokeng, ba etsa mosebetsi oa boboleli kahohle kamoo ba ka khonang ba bile ba arolelana lijo le bara le barali ba bo rona. Ka letsatsi le leng, masole a hlometseng a ile a tla ha Mor’abo rona Danylo. O re: “A ile a re ke tlohelle ho ba Paki. Ha ke hana ba ile ba nkotla eaba ba etsa eka baa nthunya ka ho thunyetsa ka holim’a hlooho ea ka. Pele ba tsamaea ba ile ba ntšosa ka hore ba tl’o khutla ba tl’o beta mosali oa ka. Empa barab’abo rona ba ile ba re potlakisetsa toropong e ’ngoe ka terene. Nke ke ka lebala lerato leo bara bao ba bo rona ba ileng ba re bontša lona. Ha re fihla toropong eo, barab’abo rona ba moo ba ile ba re fa lijo, ba nthusa ho fumana mosebetsi le moo re ka lulang teng. Hamorao, le rona re ile ra khona ho lula le Lipaki tse ling tse neng li baleha ntoa.” Lipale tse kang tsena li etsa hore re bone hore ho ratana ho re thusa hore re mamelle ha batho ba bang ba re hloile.

13. Moea o halalelang o re thusa joang hore re mamelle ha re ntse re sebeletsa Jehova esita leha batho ba bang ba re hloile?

¹³ Jesu o ile a bolella balateli ba hae hore ba rate lira tsa bona. (Mat. 5:44, 45) Na ho bonolo ho etsa joalo? Che, ha ho bonolo. Empa re ka khona ka thuso ea moea o halalelang oa Molimo. Litholoana tsa moea oa Molimo li akarelletsa lerato, mamello, mosa, bonolo le boitšoaro. (Bagal. 5:22, 23) Makhabane ana a re thusa hore re mamelle ha re hloiloe. Batho ba bangata ba ile ba khaotsa ho re hanyetsa hobane monna, mosali, ngoana kapa moahisane a bontšitse makhabane ao. Hape bahanyetsi ba bang e se e le bara le barali ba bo rona ba ratehang. Kahoo, haeba u thatafalloa ke ho rata batho ba u hloileng hobane feela u sebeletsa Jehova, rapella moea o halalelang.  (Luka 11:13) Hape u kholisehe hore ho mamela Molimo kamehla ke ntho e molemo eo u ka e etsang.​—Liprov. 3:5-7.

14-15. Baroma 12:17-21 e thusitse Morali’abo rona Yasmeen joang hore a bontše monna oa hae hore oa mo rata esita leha a mo hlorisa ka sehloho?

¹⁴ Nahana ka mohlala oa Morali’abo rona Yasmeen ea lulang Bochabela bo Hare. Ha e e-ba Paki ea Jehova, monna oa hae o ne a nahana hore o thetsitsoe eaba o leka ho etsa hore a khaotse ho sebeletsa Molimo. O ile a mo rohaka, a khothalletsa ba lelapa hammoho le moruti le ntate e mong oa moloi hore ba mo tšose le ho mo qosa ka hore o arohanya lelapa la hae. Monna oa hae o ile a ba a rohaka barab’abo rona liboka li ntse li kene. Morali’abo rona Yasmeen o ne a lula a lla hobane o ne a tšoeroe hampe.

¹⁵ Ha a le libokeng, Morali’abo rona Yasmeen o ile a tšelisoa le ho matlafatsoa ke bara le barali ba bo rona. Baholo ba ile ba mo khothalletsa hore a sebelise keletso e ho Baroma 12:17-21. (E bale.) Morali’abo rona Yasmeen o re: “Ho ne ho le boima. Empa ke ile ka kopa Jehova hore a nthuse eaba ke leka kahohle ho latela keletso ea Bibele. Kahoo, ha monna oa ka a lahlela matlakala ka kichineng hore feela a nkutloise bohloko, ke ile ka hloekisa. Ha a ne a nthohaka, ke ne ke mo araba ka bonolo. Ke ne ke mo hlokomela le ha a kula.”

16-17. U ithuta’ng mohlaleng oa Morali’abo rona Yasmeen?

¹⁶ Morali’abo rona Yasmeen o ile a fumana moputso oa ho rata monna oa hae. O re: “Monna oa ka o ile a qala ho ntšepa haholoanyane hobane o ne a tseba hore ke lula ke bua ’nete. O ile a qala ho ’mamela ka tlhompho ha re bua ka litaba tsa bolumeli a ba a lumela hore re be le khotso. Ha ke e-ea libokeng, o se a re ke li thabele. Hona joale, ’na le mohatsa oa ka re se re utloana ebile re na le khotso. Ke na le tšepo ea hore ka letsatsi le leng o tla amohela ’nete ebe re sebeletsa Jehova hammoho.”

¹⁷ Mohlala oa Morali’abo rona Yasmeen o bontša hore lerato le “jara lintho tsohle . . . le tšepa lintho tsohle, le mamella lintho tsohle.” (1 Bakor. 13:4, 7) Lehloeo le matla hape le utloisa bohloko empa ha se letho ha le bapisoa le lerato. Lerato le hapa lipelo tsa batho. Hape ha re lula re bontša batho ba bang lerato, re thabisa Jehova. Empa re ka lula re thabile esita le haeba bahanyetsi ba rona ba lula ba re hloile. Ka tsela efe?

18. Ke hobane’ng ha re ka thaba leha re hloiloe?

¹⁸ Jesu o itse: “Ho thaba lona neng kapa neng ha batho ba le hloea.” (Luka 6:22) Ha re ikhethele hore batho ba re hloee. Ebile ha re thabele ho hlorisoa ka lebaka la tumelo ea rona. Kahoo, ke hobane’ng ha re ka thaba leha re hloiloe? Nahana ka mabaka ana a mararo. La pele, ha re mamella, Jehova oa re amohela. (1 Pet. 4:13, 14) La bobeli, tumelo ea rona e matlafala le ho feta. (1 Pet. 1:7) La boraro, re tla fumana moputso o moholo oa ho phela ka ho sa feleng.​—Bar. 2:6, 7.

19. Ke hobane’ng ha baapostola ba ne ba thabile ka mor’a ho shapuoa?

¹⁹ Nakoana ka mor’a hore Jesu a tsosoe, baapostola ba ile ba ba le thabo eo a ileng a bua ka eona. Ka mor’a hore ba shapuoe le ho bolelloa hore ba khaotse ho bolela, ba ile ba thaba. Hobane’ng? “Hobane ba ne ba nkiloe e le ba tšoaneloang ke ho hlompholloa ka lebaka la lebitso la [Jesu].” (Lik. 5:40-42) Ba ne ba rata Mosuoe oa bona hoo ba neng ba sa tšabe ho hlouoa ke lira tsa bona. Hape ba ile ba bontša hore baa mo rata ka hore ba bolele litaba tsa ’Muso “ba sa khaotse.” Bara le barali ba bo rona ba bangata kajeno ba ntse ba sebeletsa Jehova ka botšepehi leha ba e-na le mathata. Baa tseba hore Jehova a ke ke a lebala mosebetsi oa bona le lerato leo ba ileng ba le bontša bakeng sa lebitso la hae.​—Baheb. 6:10.

20. Re tl’o bua ka’ng sehloohong se latelang?

²⁰ Hafeela re ntse re phela lefatšeng lena le busoang ke Satane, batho ba tla re hloea. (Joh. 15:19) Leha ho le joalo, ha rea lokela ho tšoha. Joalokaha re tla bona sehloohong se latelang, Jehova “o tla tiisa le ho . . . boloka” ba tšepahalang ba hae. (2 Bathes. 3:3) Kahoo, a re tsoeleng pele re rata Jehova, bara le barali ba bo rona esita le lira tsa rona. Ha re mamela keletso ena re tla lula re momahane, re e-na le tumelo e matla hape re tla tlotlisa Jehova re be re bontše hore lerato le matla ho feta lehloeo.