HO BA MOSA ke ntho e ntle haholo. Rea thaba ha re hlokomela hore motho e mong oa re tsotella. Ebe rona ke eng e ka re thusang hore re be mosa?

Ho ba mosa ha se feela ho ba bonolo empa ho akarelletsa ho nahanela batho ba bang, ho ba khothatsa le ho ba thusa. Ho susumetsoa ke ho rata batho le ho ba utloela bohloko. Ho ekelletsa moo, ke e ’ngoe ea litholoana tsa moea eo Bakreste ba lokelang ho ba le eona. (Bagal. 5:22, 23) Kaha re hloka ho ba mosa, sehloohong sena re tl’o ithuta kamoo Jehova le mora oa hae ba leng mosa kateng.

Jehova o mosa ho rona kaofela ho akarelletsa le batho ba “se nang teboho le ba khopo.” (Luka 6:35) Ka mohlala, “o chabisetsa batho ba khopo le ba molemo letsatsi la hae ’me o nesetsa batho ba lokileng le ba sa lokang pula.” (Mat. 5:45) Esita le batho ba sa mo sebeletseng o mosa ho bona kaha o ba file bophelo.   

Mohlala oa Adama le Eva o re bontša hantle hore Jehova o mosa. Ka mor’a hore ba etse sebe ba ile “ba rokahanya makhasi a feiga eaba ba iketsetsa liaparo.” Jehova o ne a tseba hore ba hloka liaparo tse hantle kaha ba ne ba se ba il’o phela kantle ho serapa sa Edene moo ho nang le “meutloa le lihlabahlabane.” Eaba o ba etsetsa “liaparo tse telele tsa letlalo.”—Gen. 3:7, 17, 18, 21.

Le hoja Jehova a le mosa ho “ba lokileng le ba sa lokang,” empa o mosa haholo ho batho ba mo sebeletsang. Mohlala, mehleng ea moprofeta Zakaria, lengeloi le ile la utloa bohloko ha le bona Baiserale ba emisa ho tsosolosa tempele. Jehova o ile a mamela lengeloi leo eaba o le araba ka ‘mantsoe a molemo, a tšelisang.’ (Zak. 1:12, 13) O ile a ba mosa le ho moprofeta Elia. Ka lekhetlo le leng moprofeta enoa o ile a ikutloa a nyahame hoo a ileng a kopa hore Jehova a mo bolaee. Jehova o ile a mo utloela bohloko eaba o romela lengeloi hore le mo khothatse. A ba a mo tiisetsa hore ha a mong. Ka mor’a moo, moprofeta Elia o ile a tiea ’moko eaba o tsoela pele ka mosebetsi oa hae. (1 Mar. 19:1-18) Ho bahlanka bohle ba Jehova, Jesu o li hula nthau tabeng ena ea ho ba mosa.

Ha a le lefatšeng mona o ne a tumme ka ho ba mosa le ho utloela batho bohloko. Ho ne ho se na mohla a tšoarang batho hampe. Ka lekhetlo le leng o ile a re: “Tloong ho ’na, lona bohle ba sehlang le ba imetsoeng, ’me ke tla le khatholla. . . . Etsoe joko ea ka e mosa.” (Mat. 11:28-30) Ka lebaka leo batho ba ne ba lula ba tsamaea le eena. O ne a “susumetsoa ke khauho” eaba oa ba fepa, oa ba phekola a ba a ba ruta “lintho tse ngata” ka Ntate oa hae.—Mar. 6:34; Mat. 14:14; 15:32-38.

Kaha o mosa o ne a utloisisa hore na batho ba bang ba ikutloa joang a bile a ba tšoara hantle. O ne a le “mosa” le maemong ao batho ba sa mo nahaneleng, a lula a ba thusa. (Luka 9:10, 11) Mohlala, o ile a folisa ’mè e mong ea neng a bile le phallo ea mali ka lilemo tse 12 ea ileng a tšoara seaparo sa hae le hoja a ne a sa hloeka. (Lev. 15:25-28) Jesu o ile a re ho eena: “Morali, tumelo ea hao e u folisitse. Tsamaea ka khotso, ’me u fole boloetseng ba hao bo bohloko.” (Mar. 5:25-34) A! Mosa o mokaakang.

Mehlala eo ho buuoeng ka eona ka holimo ea paka hore mosa o bontšoa ka liketso. Jesu o ile a tiisa taba ena ha a etsa papiso ea Mosamaria. Le hoja Bajuda le Basamaria ba ne ba hloeane, Mosamaria ea hlahang papisong ena o ile a utloela monna oa Mojuda bohloko ea neng a khakhathetsoe lefu eaba oa mo thusa. Mosamaria enoa o ile a susumetsoa ke mosa. O ile a tlamisa maqeba a monna eo eaba o mo isa moo a tla thusoa. A mo patalla a ba a tšepisa hore o tla eketsa chelete haeba ho hlokahala.—Luka 10:29-37.

Tsela e ’ngoe ea ho bontša mosa ke ka ho nahanela le ho bua mantsoe a khothatsang. Bibele e re: “Ho tšoenngoa ke lipelaelo ka pelong ea motho ho tla etsa hore e thulame, empa lentsoe le molemo le etsa hore e thabe.” (Liprov. 12:25) Re ka tsosa batho ba bang molota ha re bua le bona ka mosa ebile re le molemo ho bona. * Ha re etsa joalo re tla be re bontša hore rea ba tsotella. Ka tsela eo, ba tla khona ho mamella mathata a ba hlahelang.—Liprov. 16:24.

Kaha re bopiloe ka “ka setšoantšo sa Molimo,” kaofela re ka khona ho ba mosa. (Gen. 1:27) Ka mohlala, lesole la Roma le bitsoang Juliase leo Pauluse a neng a ikarabella ho lona ha a le chankaneng, le ile la mo tšoara ‘ka mosa ’me la mo lumella ho ea ho metsoalle ea hae le ho thabela tlhokomelo ea eona’ Sidone. (Lik. 27:3) Nakoana ka mor’a moo, Pauluse le batho ba bang ba ile ba senyeheloa ke sekepe eaba batho ba neng ba lula Malta ba ba tšoara ka “mosa o fetang o tloaelehileng.” Ba boela ba ba besetsa mollo hore ba futhumale. (Lik. 28:1, 2) Ke ’nete hore ba entse ntho e ntle haholo, empa ho ba mosa ke ntho e lokelang ho tsoela pele e sa etsoeng hanngoe feela.

E le hore re khahlise Molimo, ho ba mosa e lokela ho ba papa ea rona. Ke ka lebaka leo a reng re “ikapese” mosa. (Bakol. 3:12) Leha ho le joalo, ka linako tse  ling ho ka ba thata ho ba mosa. Lebaka e ka ba hobane re le lihlong, re itšaba, re hanyetsoa kapa re ntse re e-na le boikhohomosonyana le hoja re leka ho bo loantša. Ntho e ka re thusang ke ho kopa hore Jehova a re fe moea oa hae o halalelang le ho leka ho mo etsisa.—1 Bakor. 2:12.

Re lokela ho sheba hore na re haelloa hokae re tsebe ho lokisa. Re ipotse lipotso tse ka’ng: Na kea mamela ha motho a bua le ’na? Na ke ee ke shebe hore na nka thusa batho ba bang joang? Ke qetetse neng ho bontša motho eo ke sa amaneng le eena kapa eo e seng motsoalle oa ka mosa? Ntho e ’ngoe e ka re thusang ke ho ikemisetsa ho tseba batho ba bang haholo-holo Bakreste-’moho le rona. Ka tsela eo, re tla tseba hore na ba ea joang le hore na ba hloka’ng. Hape re lokela ho tšoara batho ba bang ka tsela eo re ka ratang hore ba re tšoare ka eona. (Mat. 7:12) Re lokela ho hopola hore Jehova o tla re hlohonolofatsa haeba re ba mosa le hore o tla re thusa ka moea oa hae haeba re mo kopa.—Luka 11:13.

Moapostola Pauluse o ile a re e ’ngoe ea lintho tse mo khethollang e le Mokreste ke ho ba “mosa.” (2 Bakor. 6:3-6) Batho ba ne ba rata Pauluse hobane o ne a ba bontša mosa ka lipuo le liketso. (Lik. 28:30, 31) Le hona joale batho ba ka batla ho sebeletsa Jehova haeba re le mosa. Batho ba re hanyetsang le bona ba ka nolofala haeba re ba mosa ho bona. (Bar. 12:20) Ba ka ba ba qetella ba batla ho ithuta ka Jehova.

Le Paradeiseng batho ba tsositsoeng ba tla utloa ba sa kholoe ha ba bona lefatše le tletse ka batho ba mosa. Ba tla utloa ba thabile hoo ba tla batla ho ba mosa le bona. Ka nako eo, Molimo a ke ke a lumella batho hore ba se ke ba ba mosa. Batho bao a tla ba lumella hore ba phele ka ho sa feleng ba tla bontšana mosa. (Pes. 37:9-11) Kannete lefatšeng ho tla rena khotso. Ebe ho ba mosa hona joale ho ka re tsoela molemo joang?

Bibele e re motho ea mosa o itsoela molemo. (Liprov. 11:17) Ha motho a le mosa ba bang baa mo rata hape ba ba mosa ho eena. Jesu o itse: “Tekanyo eo le lekanyang ka eona, ba tla le lekanyetsa ka eona ka ho tšoanang.” (Luka 6:38) Ka lebaka leo, motho ea mosa o ba le metsoalle ea sebele.

Moapostola Pauluse o ile a khothalletsa Bakreste ba Efese hore ba ‘bontšane mosa, ba be le qenehelo e bonolo hape ba tšoarelane ka bolokolohi.’ (Baef. 4:32) Phutheho e rua molemo haholo ha litho tsa eona li bontšana mosa li bile li thusana. Ha li hlabane ka mantsoe, ha li sebane empa li bua lintho tse molemo ka linako tsohle. (Liprov. 12:18) Phutheho e joalo e lula e rata Molimo.

Ha hona tsela e ’ngoe ea ho bontša mosa kantle ho lipuo le liketso. Ha re etsa joalo re tla be re etsisa Jehova kaha o lerato hape o seatla se bulehileng. (Baef. 5:1) Ho ekelletsa moo, phutheho ea rona ea momahana hape le batho ba bang ba tla rata ho sebeletsa Molimo. E se eka re ka lula re le mosa.