1. Ke’ng e etsang hore re thabe?

REA thaba ha re bona batho ba Jehova ba ntse ba eketseha. Selemong se fetileng re khannile lithuto tsa Bibele tse ka holimo ho limilione tse leshome. Bona ke bopaki ba hore batho ba Jehova ba lumella hore leseli la bona le khanye. Nahana hape ka batho ba limilione ba ratang Molimo ba bileng teng Sehopotsong. Ba ile ba ithuta kamoo Molimo a re ratang kateng ka hore ebe o fane ka thekollo.—1 Joh. 4:9.

2, 3. (a) Ke lintho life tse ke keng tsa re sitisa ‘ho khanya re le maseli’? (b) Ho latela Matheu 5:14-16, re tla ithuta’ng sehloohong see?

² Lefatšeng ka bophara, re le batho ba Jehova re bua lipuo tse fapaneng. Leha ho le joalo, taba eo ha e re thibele hore re rorise Jehova re momahane. (Tšen. 7:9) Ho sa tsotellehe hore na re bua puo efe kapa re lula hokae, re ka ‘khanya re le maseli lefatšeng.’—Bafil. 2:15.

³ Ha re bona batho ba Jehova ba ntse ba eketseha, ba momahana le ho loanela ho lula ba falimehile, re tlotlisa Jehova.  Sehloohong sena re tla hlahloba hore na re ka finyella lintho tsena joang.—Bala Matheu 5:14-16.

4, 5. (a) Ke joang re ka etsang hore leseli la rona le khanye ha re ntse re bolela litaba tse molemo? (b) Ho ka etsahala’ng haeba re le mosa ho batho? (Sheba setšoantšo se qalong.)

⁴ Molula-Qhooa oa June 1, 1925 o neng o e-na le sehlooho se reng “Leseli Lefifing,” o ile oa re: “Ha ho na motho ea ka tšepahallang Morena matsatsing ana a setseng . . . ntle le haeba a sebelisa monyetla o mong le o mong hore a khantše leseli la hae. O lokela ho etsa joalo ka hore a bolelle batho litaba tse molemo le hore a tsamaee ka tsela ea leseli.” Ho hlakile hore re etsa hore leseli la rona le khanye ka hore re bolelle batho litaba tse molemo le ho etsa barutuoa. (Mat. 28:19, 20) Hape, re ka tlotlisa Jehova ka hore re itšoare ka tsela eo Bakreste ba lokelang ho itšoara ka eona. Batho bao re ba fumanang malapeng hammoho le bao re kopanang le bona tseleng, ba sheba tsela eo re itšoarang ka eona. Haeba re bososela le batho re bile re ba lumelisa ka mosa, ba tla ba le maikutlo a nepahetseng ka rona le Molimo eo re mo rapelang.

⁵ Jesu o ile a re ho balateli ba hae: “Ha le kena ka tlung, le lumelise ba ntlo eo.” (Mat. 10:12) Batho ba sebaka seo Jesu le baapostola ba hae ba neng ba atisa ho bolela litaba tse molemo ho sona, ba ne ba tloaetse ho amohela baeti ka matlong a bona. Libakeng tse ngata mehleng ena ha se hangata batho ba etsang joalo. Leha ho le joalo, haeba re le mosa ha re ba hlalosetsa sepheo sa rona sa ho ba etela, ba ka phutholoha. Ho bososela le batho ke tsela e ’ngoe ea ho qalisa moqoqo le bona. Taba ena e bonahala ka ho hlaka ha bara le barali babo rona ba etsa bopaki ba phatlalatsa ba sebelisa litoroli. Ha re bososela le batho re bile re ba lumelisa, ho tla ba bonolo hore ba atamele ’me ba nke tse ling tsa lingoliloeng tsa rona. Haeba re le mosa, ho tla ba bonolo hore re qalise moqoqo le batho.

6. Banyalani ba bang ba holileng ba etsa’ng ho eketsa tšebeletso ea bona?

⁶ Banyalani ba bang ba holileng ba lulang Engelane ba ne ba e-na le mathata a bophelo a ba sitisang hore ba ee ka ntlo le ntlo. Ba ile ba beha tafole ea lingoliloeng pel’a jarete ea bona e le hore ba tsoele pele ho khantša leseli la bona. Kaha ba lula haufi le sekolo, ba ne ba beha lingoliloeng holim’a tafole e le hore batsoali ba tl’o lata bana ba ka li bona. Kaha lingoliloeng tsena lia ba khahla, ba bangata ba nka libuka tsa Lipotso Bacha Baa Botsa—Likarabo tse Sebetsang buka ea pele le ea bobeli hammoho le libukana tse ling. Hangata morali’abo rona e mong oa pula-maliboho phuthehong ea habo bona o sebetsa le bona. Batsoali bao baa hlokomela hore o botsoalle le hore banyalani bao ba holileng ba sebetsa ka thata ho thusa batho. E mong oa batsoali o ile a qala ho ithuta Bibele.

7. Re ka thusa batho ba tsoang linaheng tse ling joang?

⁷ Lilemong tsa morao tjena batho ba bangata ba batla bojaki linaheng tse ling. Re ka etsa’ng hore re thuse batho bao hore ba ithute ka Jehova? Re ka qala ka ho ithuta ho ba lumelisa ka puo ea habo bona. Hape lenaneo la JW Language le ka re thusa ho ithuta lipolelo tse seng kae tse ka etsang hore ba thahaselle molaetsa oa Bibele. Ka mor’a moo u ka ba bontša livideo le lingoliloeng tse hlahang ho jw.org ka puo ea habo bona.—Deut. 10:19.

8, 9. (a) Liboka tsa har’a beke li re thusa joang? (b) Batsoali ba ka thusa bana ba bona joang hore ba ntlafatse likarabo tsa bona?

 ⁸ Jehova o re thusa ka Seboka sa Bophelo le Tšebeletso e le hore re etse mosebetsi o tsoileng matsoho ha re ruta batho Bibele. Thuto eo re e fumanang sebokeng sena e ka re thusa ho etsa maeto a ho boela le ho qala lithuto tsa Bibele.

⁹ Batho ba qalang ho tla libokeng tsa rona ba hlokometse hore bana le bona baa arabela. Batsoali, thusang bana ba lona hore leseli la bona le khanye ka hore le ba rute ho fana ka likarabo ho tsoa pelong. Likarabo tsa bona tse bonolo tse tsoang pelong, li thusa batho ba qalang ho tla libokeng hore ba batle ho ithuta Bibele.—1 Bakor. 14:25.

10. Borapeli ba lelapa bo ka thusa lelapa joang hore le momahane?

¹⁰ Tsela e ’ngoe eo u ka etsang hore leseli la hao le khanye ke ka ho thusa hore ho be le bonngoe ka lapeng le ka phuthehong. Batsoali ba ka etsa joalo ka hore ba behe nako e tsitsitseng ea ho tšoara borapeli ba lelapa. Ba bangata ba boetse ba shebella Khaso ea JW e le lelapa. Ka mor’a hore uena le lelapa la hao le shebelle Khaso ea JW, buisanang ka lintho tseo le ithutileng tsona le hore na le ka li sebelisa joang bophelong ba lona. Bakeng sa borapeli ba lelapa, batsoali ba lokela ho hopola hore keletso e fuoang ngoana e lokela ho fapana le e fuoang mocha. Ba lokela ho etsa hore lintho tseo ba ithutang tsona borapeling ba lelapa li tsoele lelapa lohle molemo.—Pes. 148:12, 13.

11-13. Re ka etsa joang hore ho be le bonngoe ka phuthehong?

¹¹ Bacha ba ka etsa hore phutheho e momahane ka hore ba etse setsoalle le batho ba holileng. Ha ba etsa joalo, batho ba holileng ba tla ikutloa e le ba bohlokoa. Mocha a ka kopa motho ea holileng hore a mo phetele hore na ho ne ho le joang ha a ntse a sebeletsa Jehova lilemong tse ngata tse fetileng. Pale eo e tla ruta mocha thuto ea bohlokoa ’me e ba matlafatse ka bobeli. Ntho e ’ngoe eo kaofela re ka e etsang ke ho amohela batho ba qalang ho tla libokeng. Ha re etsa joalo, re tla etsa hore phutheho e momahane ’me le batho ba qalang ho tla libokeng ba tla khantša leseli la bona. U ka bososela le batho ba qalang ho  tla libokeng ha u ba lumelisa, ebe u ba bontša moo ba ka lulang. Leka ho ba tsebisa batho ba bang e le hore ba tle ba ikutloe ba amohelehile.

¹² Haeba u tšoara seboka sa tšebeletso ea tšimo, ho na le lintho tse ngata tseo u ka li etsang ho thusa batho ba holileng. U ka lokisetsa hore batho ba holileng ba sebetse tšimo e haufi. Ka linako tse ling u ka ba fa mocha eo ba ka sebetsang le eena e le hore a sebelise matla a hae ho ba thusa. U ka boela oa nahanela batho ba kulang le bao maemo a bona a sa ba lumelleng ho sebetsa haholo. Ha u etsa joalo, u tla thusa batho ba holileng, bacha, ba nang le boiphihlelo ba ho sebetsa tšimo hammoho le ba se nang bona hore ba chesehele ho bolela litaba tse molemo.—Lev. 19:32.

¹³ Baiseraele ba ne ba thabela ho rorisa Jehova ’moho. Ke kahoo mopesaleme a ileng a re: “Bonang! Kamoo ho leng hotle le kamoo ho khahlisang kateng ha bara ba motho ba lula hammoho bonngoeng!” (Bala Pesaleme ea 133:1, 2.) O ile a bapisa bonngoe bona le oli ea ho tlotsa, e khathollang. Kahoo, u lokela ho thusa ho etsa hore ho be le bonngoe ka phuthehong. Haeba u se u ntse u qalile ho etsa joalo, u etsa ntho e ntle. U lokela ho ‘atoloha’ e le hore u tsebe bara le barali babo rona.—2 Bakor. 6:11-13.

14. U ka khantša leseli joang ho baahisani ba hao?

¹⁴ U ka sebetsa ka thata hore u khantše leseli ho baahisani ba hao. Mantsoe a hao a mosa le liketso tsa hao li ka etsa hore baahisani ba hao ba batle ho ithuta Bibele. Ipotse: Baahisani ba ka ba ntalima ke le motho ea joang? Na ke boloka sebaka seo ke lulang ho sona se le makhethe ka linako tsohle, e leng ntho e ka khahlang baahisani ba ka? Na ke lula ke leka ho thusa batho ba bang?’ Ha u ntse u qoqa le Bakreste-’moho le uena, u ka ba bolella kamoo mosa oa bona le boitšoaro ba bona bo botle bo thusitseng batho ba bang kateng ebang ke baahisani, basebetsi-’moho kapa batho bao u kenang sekolo le bona. U ka utloa liphihlelo tsa bona tse monate.—Baef. 5:9.

15. Ke hobane’ng ha ho le bohlokoa hore re lule re falimehile?

¹⁵ Boitšoaro ba rona boa ameha ha re ntse re leka ho etsa hore leseli la rona le khanye haholoanyane. Ka makhetlo a mangata Jesu o ile a re barutuoa ba hae ‘ba lule ba lebetse’ kapa ba falimehile. (Mat. 24:42; 25:13; 26:41) Ho hlakile hore haeba re lumela hore “matšoenyeho a maholo” a sa le hole haholo ebile a ke ke a fihla re ntse re phela, re ke ke ra etsa mosebetsi oa boboleli ka potlako. (Mat. 24:21) Ho fapana le hore leseli la rona le khanye, le tla fifala butle-butle ’me qetellong le time.

16, 17. U ka etsa’ng e le hore u lule u falimehile?

¹⁶ Kaofela ha rona re lokela ho lula re falimehile kaha matsatsi a ntse a mpefala. Re kholisehile hore Jehova o tla nka khato ka nako e nepahetseng. (Mat. 24:42-44) Hona joale re lokela ho ba le mamello ’me re lule re falimehile. Re lokela ho bala Bibele letsatsi le letsatsi ’me re lule re rapela Jehova. (1 Pet. 4:7) Re lokela ho etsitsa mehlala ea bara le barali babo rona ba lulang ba thabile ka lebaka la hore ba lula ba falimehile ’me ba tsoela pele ho khantša leseli la bona. Mohlala o mong ke o hlahang ho Molula-Qhooa oa April 15, 2012 maqephe 18-21 o neng o e-na le sehlooho se reng: “Ke Itšoareletse Seaparong sa Mojuda ka Lilemo Tse 70.”

¹⁷ Lula u e-na le batho ba u khothatsang ’me u phathahane ka mesebetsi e u matlafatsang. Ho etsa joalo ho tla etsa hore u thabe ’me u tla bona nako e tsamaea kapele.  (Baef. 5:16) Lilemong tse lekholo tse fetileng barab’abo rona ba ne ba phathahane ka ho sebeletsa Jehova ’me ba finyeletse lintho tse ngata. Le kajeno, Jehova o ntse a re thusa ho finyella lintho tse ngata. Leseli la rona le khanya ho feta leha e le neng pele.

18, 19. Baholo ba ka re thusa joang hore re sebeletse Jehova ka cheseho? Fana ka mohlala.

¹⁸ Tumelo ea rona ea matlafala ha re hopola hore Jehova o amohela tšebeletso ea rona le hoja re sa phethahala. Kahoo, re ananela hore ebe Jehova o re file “limpho [tseo e leng] banna,” kapa baholo ba phutheho. (Bala Baefese 4:8, 11, 12.) Ha moholo a u etetse, sebelisa monyetla oo hore u ithute ho hong ho eena ’me u sebelise keletso ea hae.

¹⁹ Baholo ba babeli ba Engelane ba ile ba thusa lelapa le leng le neng le e-na le mathata. Morali’abo rona e ne e le eena ea lekang ho thusa lelapa hore le lule le ntlafatsa kamano ea lona le Molimo. Monna oa hae o ile a lumela hore ha a khone ho ruta hantle ebile ha a tšoare borapeli ba lelapa hangata. Baholo bao ba ile ba sebelisa mohlala oa Jesu ho thusa lelapa leo. Jesu o ne a tsotella barutuoa ba hae a bile a ba hlokomela. Baholo ba ile ba khothalletsa hlooho ea lelapa ho etsisa Jesu. Ba boela ba khothalletsa mosali oa hae hore a be le mamello. Ba ile ba ba bolella lintho tseo ba ka li etsang e le hore ba thabele borapeli ba lelapa le bana ba bona ba babeli. (Baef. 5:21-29) Hamorao baholo ba ile ba babatsa mor’abo rona ka lebaka la boiteko ba hae. Kaha baholo bao ba ne ba le lerato ba bile ba le mosa, ba ile ba atleha ho thusa lelapa leo.

20. Ho tla etsahala’ng ha u khantša leseli?

²⁰ Mopesaleme o ile a bina a re: “Ho thaba e mong le e mong ea tšabang Jehova, ea tsamaeang litseleng tsa hae.” (Pes. 128:1) U tla thaba haholo ha u khantša leseli ka hore u rute batho ka Jehova, u sebetse ka thata hore lapeng la hao hammoho le phuthehong ho be le bonngoe. U boetse u lokela ho lula u falimehile. Ha batho ba bang ba hlokomela hore u etsa joalo, ba tla tlotlisa Jehova.—Mat. 5:16.