1. Matthew o ile a bontša joang hore o na le tumelo e matla ea hore bafu ba tla tsoha?

 MOSHANYANA e mong ea bitsoang Matthew o kula haholo ebile o ile a tlameha ho etsoa liopereishene tse ngata. Ha a ne a le lilemo li supileng, ka letsatsi le leng eena hammoho le lelapa labo ba ne ba shebeletse JW Broadcasting^®. Ha lenaneo leo le se le ntse le tl’o fela, ho ile ha hlaha video ea ’mino e buang ka nako eo ka eona re tla beng re amohela batho ba tsositsoeng. b Ha lenaneo leo le qeta ho fela, Matthew o ile a tšoara batsoali ba hae ka matsoho eaba o re: “’Mè le Ntate, lea bona hore le haeba nka shoa, ke tla tsoha? Le nkemele, ho tla loka.” U se u ka inahanela hore na batsoali bao ba ne ba thabile hakae ha ba hlokomela hore ngoana oa bona o na le tumelo e matla ea hore bafu ba tla tsoha.

2, 3. Ke hobane’ng ha re lokela ho itloaetsa ho nahana ka tšepiso ea hore bafu ba tla tsoha?

² Re tla rua molemo ha re itloaetsa ho nahana ka tšepiso ea hore bafu ba tla tsoha. (Joh. 5:28, 29) Ke hobane’ng ha re ka cho joalo? Ke hobane re ka kula hampe kapa ra hlokahalloa ke motho eo re mo ratang neng kapa neng. (Moek. 9:11; Jak. 4:13, 14) Haeba re ka hlaheloa ke maemo ao, re tla khona ho mamella haeba re na le tšepo ea hore bafu ba tla tsoha. (1 Bathes. 4:13) Bibele ea re tiisetsa hore Ntate oa rona ea leholimong o re tseba hantle ebile o re rata haholo. (Luka 12:7) E le hore Jehova Molimo a re tsose re e-na le botho bo tšoanang ebile re ntse re hopola ntho e ’ngoe le e ’ngoe, o lokela ho re tseba hantle. Jehova o re rata haholo hoo a re fileng monyetla oa ho phela ka ho sa feleng. Le haeba re ka shoa, o tla re tsosa.

 ³ Sehloohong sena re tl’o bua ka hore na ke hobane’ng ha re ka lumela hore bafu ba tla tsoha. Ka mor’a moo, re tla hlahloba tlaleho ea Bibele e matlafatsang tumelo e nang le mantsoe a hlahang temaneng ea rona ea sehlooho a reng: “Khaitseli ea hao e tla tsoha.” (Joh. 11:23) Re tla qetella ka ho bona hore na re ka etsa’ng hore re kholisehe hore tsoho e tla fela e be teng.

4. Etsa mohlala o bontšang hore na ke eng e ka u kholisang hore motho a ka phethahatsa tšepiso eo a e entseng.

⁴ U ka lumela hore motho o tla phethahatsa tšepiso ea hae haeba u kholisehile hore motho eo o batla ho etsa joalo. Hape u ka mo kholoa haeba a e-na le matla a ho e phethahatsa. Ka mohlala, a re nke hore ntlo ea hao e sentsoe ke sefefo. Motsoalle e mong oa hao o u tšepisa hore o tla e lokisa. Oa bona hore ehlile o batla ho u thusa. Ke sehahi se ipabolang ebile o na le lisebelisoa tsohle tse hlokahalang bakeng sa ho lokisa ntlo eo. Hape oa tseba hore a ka khona ho u thusa. Kahoo, oa lumela hore o tla fela a phethahatse seo a se tšepisang. Na le rona re ka lumela hore tšepiso ea Molimo ea ho tsosa bafu e tla phethahala? Na ehlile o batla ho tsosa bafu? Hape na o na le matla a ho ba tsosa?

5, 6. Ke eng e re kholisang hore Jehova o batla ho tsosa bafu?

⁵ Na Jehova o batla ho tsosa bafu? Kannete o batla ho ba tsosa. O ile a susumeletsa batho ba ’maloa hore ba ngole ka tšepiso ena ka Bibeleng. (Esa. 26:19; Hos. 13:14; Tšen. 20:11-13) Jehova o lula a phethahatsa lintho tseo a li tšepisitseng. (Josh. 23:14) Ha e le hantle Jehova o labalabela ho tsosa bafu. Ke hobane’ng ha re cho joalo?

⁶ Nahana ka seo Jobo a ileng a se bua. O ne a kholisehile hore le haeba a ne a ka shoa, Jehova o ne a tla hloloheloa ho mo bona hape. (Jobo 14:14, 15, nal.) Jehova o ikutloa ka tsela e tšoanang ka bahlanka bohle ba hae ba hlokahetseng. O labalabela ho ba tsosa ba phetse hantle ebile ba thabile. Empa ho tla etsahala’ng ka batho ba libilione ba hlokahetseng ba sa ka ba fumana monyetla oa ho ithuta ka Jehova? Le bona Molimo oa rona ea lerato o batla ho ba tsosa. (Lik. 24:15) O batla ho ba fa monyetla oa hore e be metsoalle ea hae le oa hore ba phele ka ho sa feleng lefatšeng. (Joh. 3:16) Ho hlakile hore Jehova o batla ho tsosa bafu.

7, 8. Ke eng e re kholisang hore Jehova o na le matla a ho tsosa bafu?

⁷ Na Jehova o na le matla a ho tsosa bafu? O na le ’ona hobane o “Matla ’Ohle.” (Tšen. 1:8) O na le matla a ho hlola sera leha e le sefe, ho akareletsa le lefu. (1 Bakor. 15:26) Ho tseba taba ena hoa re tšelisa ebile hoa re matlafatsa. Nahana ka se ileng sa etsahalla Morali oa bo rona Emma Arnold. Nakong ea Ntoa ea Bobeli ea Lefatše, eena le lelapa la hae ba ile ba kopana le mathata a boima a ileng a leka tumelo ea bona. Ka mor’a ho hlokahalloa ke baratuoa ba bona likampong tsa mahloriso tsa Manazi, Morali oa bo rona Emma o ile a tšelisa morali oa hae a re: “Haeba batho ba hlokahetseng ba ne ba ke ke ba tsoha, e ne e tla ba lefu le matla ho feta Molimo. Empa taba eo ha se ’nete.” Ha ho na letho le matla ho feta Jehova. Kaha Molimo ea Matla ’Ohle ke eena ea faneng ka bophelo, a ka phelisa batho hape ha ba hlokahetse.

⁸ Hape rea tseba hore Molimo a ka tsosa bafu hobane o hopola ntho e ’ngoe le e ’ngoe. O bitsa naleli e ’ngoe le e ’ngoe ka lebitso. (Esa. 40:26) O boetse o hopola batho ba  hlokahetseng. (Jobo 14:13; Luka 20:37, 38) O hopola ntho e ’ngoe le e ’ngoe ka batho bao a tla ba tsosa. O hopola botho ba bona, hore na ba ne ba shebahala joang, lintho tse ba etsahaletseng bophelong le lintho tseo ba neng ba li tseba.

9. Ke hobane’ng ha u lumela hore tšepiso ea Jehova ea hore bafu ba tla tsoha e tla phethahala?

⁹ Ho hlakile hore re ka lumela hore Jehova o tla tsosa bafu nakong e tlang hobane rea tseba hore o batla ho ba tsosa ebile o na le matla a ho etsa joalo. Nahana ka lebaka le leng la ho lumela hore tšepiso ena e tla phethahala. Jehova o se a ile a tsosa batho ba bang. Mehleng ea ha ho ne ho ngoloa Bibele, o ile a fa banna ba ’maloa ba tšepahalang ho akareletsa le Jesu matla a ho tsosa bafu. Hona joale re tla hlahloba tlaleho ea e mong oa batho ba ileng ba tsosoa ke Jesu e hlahang ho Johanne khaolo ea 11.

10. Ho ile ha etsahala’ng ha Jesu a ntse a ruta ka mose ho Jordane, hona o ile a etsa’ng? (Johanne 11:1-3)

¹⁰ Bala Johanne 11:1-3. Nahana ka se ileng sa etsahala motseng oa Bethani ho elella mafelong a selemo sa 32. Motseng oo ho ne ho lula metsoalle ea Jesu e haufi e leng Lazaro le likhaitseli tsa hae tse peli, Maria le Maretha. (Luka 10:38-42) Lazaro o ile a kula ’me likhaitseli tsa hae li ne li tšoenyehile. Li ile tsa romella Jesu molaetsa a le ka mose ho Jordane, bohole ba leeto le ka nkang matsatsi a mabeli ka maoto ho tloha Bethani. (Joh. 10:40) Ka masoabi, moromuoa o ile a fihla ho Jesu ha Lazaro a shoa. Le hoja Jesu a ne a tseba hore motsoalle oa hae o shoele, o ile a ea Bethani ka mor’a matsatsi a mabeli. Nakong eo a fihlang Bethani, Lazaro o ne a se a e-na le matsatsi a mane a shoele. Jesu o ne a tl’o etsa ntho e ’ngoe e neng e tla thabisa metsoalle ea hae e be e tlotlise Molimo.—Joh. 11:4, 6, 11, 17.

11. Re ka ithuta’ng ka botsoalle tlalehong ee?

¹¹ Re ka ithuta’ng ka botsoalle tlalehong ee? Nahana ka taba ena: Ha Maria le Maretha ba romella Jesu molaetsa, ha baa ka ba mo kopa hore a tle Bethani. Ba mo boleletse feela hore motsoalle oa hae oa kula. (Joh. 11:3) Ka mor’a hore Lazaro a shoe, Jesu o ne a ka khona ho mo tsosa a ntse a le hole. Ho ntse ho le joalo, Jesu o ile a khetha ho ea Bethani e le hore a e’o ba le metsoalle ea hae Maria le Maretha. Na u na le motsoalle ea ka u thusang leha u sa mo kopa? Haeba ho joalo, oa tseba hore o tla u thusa “linakong tsa mahlomola.” (Liprov. 17:17) E se eka re ka etsisa Jesu ’me ra ba metsoalle e joalo ho batho ba bang. Joale a re khutleleng tlalehong e buang ka Lazaro re bone hore na ho ile ha etsahala’ng hamorao.

12. Jesu o ile a tšepisa Maretha eng, hona ke hobane’ng ha Maretha a ne a ka mo kholoa? (Johanne 11:23-26)

¹² Bala Johanne 11:23-26. Maretha o ile a utloa hore Jesu o haufi le Bethani. Hang-hang o ile a e’o mo khahlanyetsa eaba o re: “Morena, hoja u ne u le teng khaitseli ea ka e ka be e sa shoa.” (Joh. 11:21) Ke ’nete hore Jesu a ka be a folisitse Lazaro. Empa o ne a batla ho etsa  ntho e hlollang ho feta moo. O ile a re: “Khaitseli ea hao e tla tsoha.” Hape o ile a fa Maretha lebaka la ho lumela tšepiso ena, a re: “Ke ’na tsoho le bophelo.” Molimo o file Jesu matla a ho tsosa bafu. Pejana ho moo, o ne a ile a tsosa ngoanana e mong nakoana ka mor’a hore a shoe hape o ile a tsosa mohlankana e mong letsatsing leo a shoeleng ka lona. (Luka 7:11-15; 8:49-55) Empa na o ne a ka khona ho tsosa motho ea nang le matsatsi a mane a shoele a bile a se a ntse a qalile ho bola?

13. Ho latela Johanne 11:32-35, Jesu o ile a etsa’ng ha a bona Maria le batho ba bang ba lla? (Sheba setšoantšo.)

¹³ Bala Johanne 11:32-35. Nahana hore na ho ile ha etsahala eng ka mor’a moo. Khaitseli ea Lazaro e ’ngoe e leng Maria, o ile a ea ho Jesu. O ile a bua mantsoe a tšoanang le a ngoan’abo, a re: “Morena, hoja u ne u le teng khaitseli ea ka e ka be e sa shoa.” Maria le batho ba neng ba e-na le eena ba ne ba utloile bohloko haholo. Ha Jesu a ba bona ’me a ba utloa ba lla, o ile a sareloa haholo. O ile a ba utloela bohloko eaba oa lla. O ne a utloisisa hore na ho bohloko hakae ho shoeloa ke motho eo u mo ratang. E tlameha ebe o ne a labalabela ho ba tšelisa ka hore a tsose Lazaro.

14. Tsela eo Jesu a ileng a itšoara ka eona ha a bona Maria a lla e re ruta’ng ka Jehova?

¹⁴ Seo Jesu a ileng a se etsa ha a bona Maria a lla se re ruta hore Jehova ke Molimo ea nang le kutloelo-bohloko. Ke hobane’ng ha re cho joalo? Joalokaha re ithutile sehloohong se fetileng, Jesu o etsisa Ntate oa hae hantle ka tsela eo a nahanang ka eona le eo a ikutloang ka eona. (Joh. 12:45) Ha metsoalle ea Jesu e shoetsoeng e lla, o ile a e utloela bohloko eaba oa lla. Kahoo, rea bona hore Jehova le eena o re utloela bohloko ha a bona re lla. (Pes. 56:8) E tlameha ebe taba ena e etsa hore u ikutloe u batla ho atamela haufi le Molimo oa rona ea nang le kutloelo-bohloko.

15. Ho latela Johanne 11:41-44, ho ile ha etsahala’ng ha Jesu a fihla lebitleng la Lazaro? (Sheba setšoantšo.)

¹⁵ Bala Johanne 11:41-44. Ha Jesu a fihla lebitleng la Lazaro o ile a re ba tlose lejoe le neng le koahetse lebitla. Leha ho le joalo, Maretha o ile a hanana le taba eo, a re e tlameha ebe setopo sa Lazaro se se se nkha. Jesu a re  ho eena: “Na ha kea u bolella hore ha u ka lumela u tla bona matla a Molimo?” (Joh. 11:39, 40) Ka mor’a moo Jesu o ile a sheba holimo eaba o rapela phatlalatsa. O ne a batla hore ho rorisoe Jehova bakeng sa ntho eo a neng a tl’o e etsa. Jesu o ile a hoeletsa a re: “Lazaro, tsoa!” Lazaro a tsoa ka lebitleng. Jesu o ile a etsa ntho eo batho ba bangata ba neng ba nahana hore e ke ke ea etsahala.

16. Tlaleho e hlahang ho Johanne khaolo ea 11 e matlafatsa tumelo eo re nang le eona ea hore ho tla ba le tsoho joang?

¹⁶ Tlaleho e hlahang ho Johanne khaolo ea 11 e matlafatsa tumelo ea rona ea hore ho tla ba le tsoho ea bafu. Ke hobane’ng ha re cho joalo? Hopola hore Jesu o ile a re ho Maretha: “Khaitseli ea hao e tla tsoha.” (Joh. 11:23) Joaloka Ntate oa hae, Jesu o batla ho tsosa bafu ebile o na le matla a ho etsa joalo. Ha a ne a lla, o ile a bontša hore o labalabela ho tsosa bafu le ho tlosa bohloko bo bakiloeng ke lefu. Jesu o ile a bontša hore o na le matla a ho tsosa bafu ha a ne a tsosa Lazaro. Hape hopola hore Jesu o ile a re ho Maretha: “Na ha kea u bolella hore ha u ka lumela u tla bona matla a Molimo?” (Joh. 11:40) Re na le mabaka a utloahalang a ho lumela hore Molimo o tla phethahatsa tšepiso ea hae ea ho tsosa bafu. Re ka etsa’ng e le hore re kholisehe le ho feta hore ho tla ba le tsoho?

17. Re lokela ho hopola’ng ha re ntse re bala litlaleho tse buang ka tsoho?

¹⁷ Bala litlaleho tse buang ka tsoho u be u nahanisise ka tsona. Ka Bibeleng ho na le litlaleho tse robeli tse buang ka batho ba ileng ba tsosoa bafung. c Li bale ka hloko. Ha u ntse u li bala, u hopole hore batho bao ba kile ba phela mona lefatšeng. Leka ho bona hore na u ka ithuta’ng ha u ntse u bala litlaleho tseo. Nahana hore na tlaleho e ’ngoe le e ’ngoe e bontša joang hore Jehova o batla ho tsosa bafu le hore o na le matla a ho etsa joalo. Etsa  bonnete ba hore u nahanisisa ka tlaleho e buang ka tsoho ea Jesu kaha ke eona ea bohlokoa ka ho fetisisa. Hopola hore batho ba bangata ba ile ba bona Jesu ka mor’a hore a tsosoe le hore tumelo ea rona e thehiloe tsohong ea hae.—1 Bakor. 15:3-6, 20-22.

18. Lipina tse buang ka tsoho li ka u thusa joang? (Sheba naletsana.)

¹⁸ Mamela lipina tsa rona tsa bolumeli tse buang ka tsoho, li bine u be u nahane ka tsona. d (Baef. 5:19) Lipina tsena li etsa hore re kholisehe le ho feta hore ho tla ba le tsoho hape li matlafatsa tumelo ea rona. Li mamele, u ithute ho li bina hantle. Hape le ka buisana ka mantsoe a lipina tseo borapeling ba lelapa. Li tšoare ka hlooho, u nahanisise ka mantsoe a tsona e le hore li ka u ama pelo tsa ba tsa matlafatsa tumelo ea hao. Ha u etsa joalo, nakong eo u hlaheloang ke mathata kapa u shoeloang ke motho eo u mo ratang, moea oa Jehova o tla u thusa hore u hopole lipina tseo ’me u tla matlafala u be u tšelisehe.

19. U ka nahana ka lintho life tse tla etsahala tsohong? (Sheba lebokose le reng “ U Tla ba Botsa’ng?”)

¹⁹ Iketsetse setšoantšo sa hore na ho tla ba joang tsohong. Jehova o entse hore re khone ho ipona re se re le Paradeiseng. Morali e mong oa bo rona o re: “Ke qeta nako e ngata ke ipona ke le Paradeiseng hoo ke ee be ke utloe eka ke se ke ntse ke fofonela monko o monate oa lipalesa.” Ak’u nahane u se u kopana le banna le basali ba tšepahalang ba phetseng ha ho ne ho ngoloa Bibele. U tatetse ho kopana le mang? Hona u tla mo botsa lipotso life? Hape nahana u se u kopana le batho bao u ba ratang ba hlokahetseng. Nahana hore na ho tla ba joang ha le kopana. Nahana hore na le tla bua ka’ng, hore na ho tla ba joang ha le hakana le hore na u tla be u thabile hakae ho boela u ba bona.

20. Re lokela ho ikemisetsa ho etsa’ng?

²⁰ Re ananela haholo hore ebe Jehova o re tšepisa hore o tla tsosa bafu. Re kholisehile hore tšepiso ena e tla phethahala hobane Jehova o batla ho tsosa bafu ebile o na le matla a ho etsa joalo. A re ikemisetseng ho matlafatsa tumelo ea rona ea hore tšepiso ena e tla phethahala. Ha re etsa joalo, re tla atamela haufi le Molimo ea re tšepisang hore baratuoa ba rona ba tla tsoha.