1. Ke’ng e ka u thusang hore u thabele ho ithuta boprofeta ba Bibele?

 BEN eo e leng mocha oa Paki o re: “Ke rata ho ithuta boprofeta ba Bibele.” Na u lumellana le eena kapa u utloa ho le thata ho utloisisa boprofeta ba Bibele? E ka ’na eaba u utloa eka ho ithuta boprofeta ha ho monate. Leha ho le joalo, ha u ithuta ka hore na ke hobane’ng ha Jehova a ngotse boprofeta ka Lentsoeng la hae, u ka ’na oa fetola maikutlo a hao.

2. Re tl’o bua ka’ng sehloohong see?

² Sehloohong sena re tl’o bua ka hore na ke hobane’ng ha re lokela ho ithuta boprofeta ba Bibele le hore na re ka ithuta bona joang. Re tla boela re bue ka litlaleho tse peli tsa boprofeta tse hlahang bukeng ea Daniele e le ho bona hore na ho bo utloisisa ho ka re thusa joang.

3. Re lokela ho etsa’ng haeba re batla ho utloisisa boprofeta ba Bibele?

³ Re lokela ho kopa thuso haeba re batla ho utloisisa boprofeta ba Bibele. Nahana ka mohlala ona. A re re u etetse sebaka seo u sa se tsebeng empa motsoalle oa hao eo u tsamaeang le eena o se tseba hantle. O tseba hantle hore na le hokae le hore tsela e ’ngoe le e ’ngoe e ea hokae. U ne u tla thaba hore ebe motsoalle oa hao o lumetse ho tsamaea le uena. Ka tsela e tšoanang, Jehova o tšoana le motsoalle eo ’me o tseba bokamoso ba rona hantle. Kahoo, e le hore re utloisise boprofeta ba Bibele, re lokela ho ikokobetsa ’me re kope thuso ho Jehova.—Dan. 2:28; 2 Pet. 1:19, 20.

4. Ke hobane’ng ha Jehova a entse hore boprofeta bo ngoloe ka Lentsoeng la hae? (Jeremia 29:11) (Sheba setšoantšo.)

⁴ Jehova o joaloka motsoali ea molemo, o batla hore re thabele  bophelo nakong e tlang. (Bala Jeremia 29:11.) Ha a tšoane le batho hobane ke motsoali ea khonang ho re bolella hantle hore na ho tl’o etsahala’ng nakong e tlang ebile o lula a nepile. Jehova o khethile batho hore ba ngole boprofeta ka Lentsoeng la hae e le hore re ka tseba ka liketsahalo tsa bohlokoa pele li etsahala. (Esa. 46:10) Boprofeta bo tsoang Bibeleng ke mpho e bontšang hore Ntate oa rona ea leholimong oa re rata. Empa re ka kholisoa ke’ng hore lintho tseo Bibele e reng li tla etsahala e fela e le ’nete?

5. Bacha ba ka ithuta’ng ho Max?

⁵ Hangata bacha ba Lipaki ba kopana le bana ba bang sekolong ba sa hlompheng Bibele. Bana bao ba etsa hore bacha ba Lipaki ba be le lipelaelo. Utloa hore na mor’abo rona e mong eo lebitso la hae e leng Max o re’ng. O re batsoali ba hae ba ne ba mo ruta hore Bibele ke Lentsoe la Molimo le hore bolumeli ba bona ke ba ’nete. Empa ha e e-ba mocha o ile a qala ho belaella lintho tseo batsoali ba hae ba neng ba mo ruta tsona. Batsoali ba hae ba ile ba mo thusa joang? O re batsoali ba hae ba ne ba khobile matšoafo le hoja ba ne ba tšoenyehile. Ba ile ba araba lipotso tseo a neng a e-na le tsona kaofela ka Bibele empa ho na le ntho eo Max le eena a ileng a e etsa. O re o ile a ithuta boprofeta ba Bibele eaba o qoqela bana ba bang lintho tseo a ithutileng tsona. Ka mor’a moo, o ile a kholiseha hore Bibele ke Lentsoe la Molimo.

6. U lokela ho etsa’ng haeba u na le lipelaelo, hona hobane’ng?

⁶ Haeba joaloka Max re belaella linnete tse ka Bibeleng, ha ho hlokahale hore re ikutloe re le molato. Empa ha rea lokela ho belaella linnete tse ka Bibeleng hobane lipelaelo li tšoana le mafome. Haeba re sa li tlose, li ka senya tumelo ea rona. E le hore re ka tlosa lipelaelo, re hloka ho ipotsa, ‘Na ke lumela seo Bibele e se buang ka bokamoso?’ Haeba u sa kholiseha, u hloka ho ithuta boprofeta bo ka Bibeleng bo seng bo phethahetse. Seo u ka se etsa joang?

7. Daniele o re behetse mohlala ofe oa ho ithuta boprofeta? (Daniele 12:10) (Sheba setšoantšo.)

⁷ Daniele o re behetse mohlala o motle oa ho ithuta boprofeta. O ne a e-na le lebaka le utloahalang la ho ithuta boprofeta hobane o ne a batla ho bo utloisisa. Daniele o ne a ikokobelitse hape a tseba hore Jehova o ne a tla mo thusa hore a utloisise boprofeta haeba a ne a mo mamela a bile a phela ka melao ea hae. (Dan. 2:27, 28; bala Daniele 12:10.) O ile a bontša hore o ikokobelitse ka hore a kope Jehova hore a mo thuse. (Dan. 2:18) Daniele o ne a boetse a etsa lipatlisiso. O ne a bala Mangolo a neng a le teng ka nako eo. (Jer. 25:11, 12; Dan. 9:2) Rona re ka etsisa Daniele joang?

8. Ke hobane’ng ha batho ba bang ba ithuta boprofeta ba Bibele?

⁸ Ke hobane’ng ha u ithuta boprofeta ba Bibele? Na ke hobane u batla ho bo utloisisa? Haeba ho joalo, Jehova o tla u thusa.  (Joh. 4:23, 24; 14:16, 17) Ke hobane’ng ha batho ba bang ba ithuta boprofeta? Ba ithuta boprofeta hobane ba na le tšepo ea hore ba tla fumana bopaki ba hore Bibele ha se Lentsoe la Molimo. Ba etsa sena hobane ba na le boikutlo ba hore haeba Bibele ha se Lentsoe la Molimo ba ka phela ka tsela eo ba e batlang. Leha ho le joalo, kaofela ha rona re hloka mabaka a utloahalang a hore na ke hobane’ng ha re ithuta boprofeta ba Bibele. Hape ho na le boikutlo boo re lokelang ho ba le bona e le hore re utloisise boprofeta ba Bibele.

9. Hlalosa hore na re lokela ho ba le boikutlo bofe e le hore re utloisise boprofeta ba Bibele.

⁹ Ikokobetse. Jehova o tšepisa batho ba ikokobelitseng hore o tla ba thusa. (Jak. 4:6) Re lokela ho kopa hore a re thuse ho utloisisa boprofeta ba Bibele ka hore re mo rapele. Hape re lokela ho lumela hore re hloka thuso ea mokhatlo oo a o sebelisang ho re fa lingoloa le livideo ka nako e tšoanetseng. (Luka 12:42) Jehova ke Molimo ea hlophisehileng. Kahoo, hoa utloahala hore ebe o sebelisa mokhatlo o le mong ho re thusa ho utloisisa lithuto tse ka Lentsoeng la hae.—1 Bakor. 14:33; Baef. 4:4-6.

10. U ithuta’ng ho Morali oa bo rona Esther?

¹⁰ Etsa lipatlisiso. Khetha boprofeta boo u bo ratang ebe u qala ho etsa lipatlisiso ka bona. Ke sona seo Esther a ileng a se etsa. O ne a rata boprofeta bo buang ka hore Mesia o ne a tla tla. O re ha a le lilemo li 15, o ile a qala ho etsa lipatlisiso ka boprofeta boo hobane o ne a batla bopaki ba hore boprofeta boo bo ngotsoe pele Jesu a tla lefatšeng. Lintho tse neng li ngotsoe meqolong e fumanoeng Leoatleng le Shoeleng li ile tsa etsa hore a kholisehe hore boprofeta boo ke ’nete. O re bo bong ba bona bo ne bo ngotsoe pele ho mehla ea Kreste, kahoo e tlameha ebe boprofeta boo bo ne bo tsoa ho Molimo. Esther o boetse o re o ne a tlameha ho bala boprofeta boo ka makhetlo a mangata e le hore a bo utloisise ’me o thabisoa ke hore o ile a etsa joalo. O re ka mor’a ho etsa lipatlisiso tse ngata ka boprofeta ba Bibele, o ile a bona hore Bibele e bua ’nete.

11. Ke hobane’ng ha re lokela ho kholiseha hore Bibele e bua ’nete?

¹¹ Ha re bona boprofeta ba Bibele bo phethahala, re khona ho tšepa Jehova le ho feta ebile re tšepa le tsela eo a re tataisang ka eona. Hape boprofeta ba Bibele bo re thusa hore re lule re e-na le tšepo ea hore mathata ao re nang le ’ona hona joale a tla fela. A re bueng ka litlaleho tse peli tsa boprofeta ba Bibele tseo Daniele a buileng ka tsona tseo re li bonang li phethahala hona joale. Ho utloisisa boprofeta bona ho tla re thusa hore re etse liqeto tse nepahetseng.

12. Maoto a boprofeteng bo buang ka ‘tšepe e kopaneng le letsopa le bonolo’ a emela’ng? (Daniele 2:41-43)

¹² Bala Daniele 2:41-43. Torong eo Daniele a ileng a e hlalosetsa Morena Nebukadnezare,  maoto a setšoantšo seo morena a se boneng a ne a entsoe ka ‘tšepe e kopaneng le letsopa le bonolo.’ Ha re bapisa boprofeta bo bukeng ea Daniele le ea Tšenolo, re ka re maoto a emela ’Muso oa Manyesemane le Maamerika e leng ’muso o matla ka ho fetisisa lefatšeng mehleng ena. Daniele o re “’muso oo o tla ba le likarolo tse matla le tse fokolang.” Ke hobane’ng ha o na le likarolo tse fokolang? Ke hobane batho ba tšoantšetsoang ke letsopa le bonolo ba sitisa ’muso ona hore o bonahatse matla a oona a kang tšepe. b

13. Re ka ithuta lintlha life tsa bohlokoa boprofeteng boo?

¹³ Re ithuta lintlha tsa bohlokoa tlhalosong ea setšoantšo se seholo seo Daniele a se boneng torong. Re boetse re ithuta lintlha tse ngata karolong ea maoto ea setšoantšo seo. Ntlha ea pele, re ka ithuta tsela eo ’Muso oa Lefatše oa Manyesemane le Maamerika o ileng oa bontša matla a oona kateng. Ka mohlala, ke oona o ka sehloohong o ileng oa hlola Ntoeng ea Pele le ea Bobeli ea Lefatše. Leha ho le joalo, ’muso ona oa Manyesemane le Maamerika haesale o ntse o fokola ’me o tla tsoela pele o fokola. O fokolisoa ke hobane batho ba busoang ke oona baa loantšana ebile ba loantša ’muso ona. Ntlha ea bobeli eo re ka ithutang eona ke hore ’Muso oa Lefatše oa Manyesemane le Maamerika e tla ba ’muso oa ho qetela o busang pele ’Muso oa Molimo o busa lefatšeng. Le hoja linaha tse ling li leka ho loantša ’muso ona, li ke ke tsa o hlola. Re tseba sena hobane “lejoe” le emelang ’Muso oa Molimo le tla silakanya maoto a setšoantšo seo se seholo a emelang ’Muso oa Manyesemane le Maamerika.—Dan. 2:34, 35, 44, 45.

14. Ho utloisisa boprofeta bo buang ka maoto a tšepe le letsopa ho ka re thusa joang hore re etse liqeto tse bohlale?

¹⁴ Na u kholisehile hore boprofeta ba Daniele bo buang ka maoto a tšepe le letsopa bo tla phethahala? Tsela eo u phelang ka eona e tla bontša hore u kholisehile ka taba ena. Haeba u kholisehile, u ke ke oa batla ho etsa chelete e ngata kapa ho ba le lintho tse ngata hobane oa tseba hore haufinyane lefatše lena le tl’o felisoa. (Luka 12:16-21; 1 Joh. 2:15-17) Ho utloisisa boprofeta bona ho tla u thusa hore u bone kamoo mosebetsi oa boboleli o leng bohlokoa kateng. (Mat. 6:33; 28:18-20) Ka mor’a ho ithuta boprofeta bona, u ka ipotsa hore na liqeto tseo u li etsang li bontša hore u kholisehile hore haufinyane ’Muso oa Molimo o tla felisa mebuso eohle ea batho.

15. “Morena oa leboea” le “morena oa boroa” ke bo-mang mehleng ee? (Daniele 11:40)

¹⁵ Bala Daniele 11:40. Khaolo ea 11 ea Daniele e bua ka marena a mabeli a loantšanang. Ha re bapisa boprofeta bona le boprofeta bo bong bo hlahang ka Bibeleng, re khona ho bona hore “morena oa leboea” ke naha ea Russia le linaha tse e tšehetsang le hore “morena oa boroa” ke ’Muso oa Lefatše oa Manyesemane le Maamerika. c

16. “Morena oa leboea” o tšoara batho ba Molimo joang?

¹⁶ Batho ba Molimo ba busoang ke “morena oa leboea” ba hlorisoa ke morena enoa. Lipaki tse ling tsa Jehova lia shapuoa ebile li koalloa literonkong ka lebaka la seo li se lumelang. Bana ba bo rona ha ba tšosoe ke mahloriso ana. Tsela eo “morena oa leboea” a ba  tšoarang ka eona e etsa hore ba be le tumelo e matla hobane baa tseba hore lintho tseo a li etsang li phethahatsa boprofeta bo bukeng ea Daniele. d (Dan. 11:41) Ho tseba taba ena ho ka re thusa hore re lule re e-na le tšepo ebile re tšepahalla Jehova.

17. Batho ba Molimo ba ile ba hlaheloa ke mathata afe pusong ea “morena oa boroa”?

¹⁷ Nakong e fetileng “morena oa boroa” le eena o ile a hlorisa batho ba Jehova. Ka mohlala, o ile a ba hlorisa nakong ea Ntoa ea Pele le ea Bobeli ea Lefatše ha ba bangata ba bona ba ne ba koalloa literonkong hobane ba sa kenelle lipolotiking. Le bana ba bona ba ne ba lelekoa likolong. Lilemong tsa morao tjena, Lipaki Tsa Jehova tse lulang moo morena oa boroa a busang, le tsona li ile tsa e-ba le mathata a mang. Ka mohlala, ha e le nako ea likhetho Mokreste a ka ’na a utloa eka a ka tšehetsa mokha o itseng kapa ralipolotiki ea itseng. Le hoja a ke ke a vouta, a ka ’na a tšehetsa mokha oo ka pelong ea hae. Kahoo, ke  habohlokoa hore re se ke ra kenella lipolotiking esita le ka pelong.—Joh. 15:18, 19; 18:36.

18. Re ikutloa joang ha re bona ho se utloane ho pakeng tsa “morena oa leboea” le “morena oa boroa”? (Sheba setšoantšo.)

¹⁸ Batho ba sa lumeleng hore boprofeta ba Bibele ke ’nete ba ka ’na ba tšoenyeha haholo ha ba bona “morena oa boroa” ‘a thulana ka manaka’ le “morena oa leboea.” (Dan. 11:40, nal.) Marena ana a mabeli a na le libetsa tse ngata tse matla tse ka bolaeang batho bohle lefatšeng. Empa rea tseba hore Jehova a ke ke a lumella hore ntho ena e etsahale. (Esa. 45:18) Ha re tšoenyehe ha re bona ho se utloane ho pakeng tsa “morena oa leboea” le “morena oa boroa.” Ho e-na le hoo, tumelo ea rona ea matlafala hobane taba ena e bontša hore bofelo ba lefatše lena bo atametse.

19. Ke’ng eo re lokelang ho e tseba ka boprofeta ba Bibele?

¹⁹ Ha re tsebe hore na boprofeta bo bong ba Bibele bo tl’o phethahala joang. Moprofeta Daniele le eena o ne a sa utloisise hore na lintho tsohle tseo a neng a li ngola li bolela’ng. (Dan. 12:8, 9) Taba ea hore ha re tsebe hantle hore na boprofeta bo itseng bo tla phethahala joang ha e bolele hore bo ke ke ba phethahala. Re kholisehile hore Jehova o tla re thusa ho utloisisa lintho tseo re hlokang ho li tseba ka nako e loketseng feela joalokaha a ile a etsa nakong e fetileng.—Amose 3:7.

20. Ke boprofeta bofe ba Bibele bo thabisang boo re tl’o bona ha bo phethahala haufinyane ’me re lokela ho lula re etsa’ng?

²⁰ Ho na le nako eo ho tla etsoa phatlalatso ea “khotso le tšireletseho.” (1 Bathes. 5:3) Ka mor’a moo, mebuso ea lefatše e tla hlasela bolumeli ba bohata ebe ea bo felisa. (Tšen. 17:16, 17) Mebuso ena e tla boela e hlasele batho ba Molimo. (Ezek. 38:18, 19) Liketsahalo tsena li tla etsa hore ntoa ea ho qetela e leng ea Armagedone e qale. (Tšen. 16:14, 16) Re kholisehile hore liketsahalo tsena li tl’o etsahala haufinyane. Hona joale a re bontšeng hore re ananela boprofeta boo Ntate oa rona ea re ratang a re fileng bona ka hore re ithute bona le ho thusa batho ba bang hore ba bo tsebe.