1. Ho latela Baheberu 12:1, ke’ng eo re lokelang ho e etsa e le hore re fihle qetellong ea peiso ea bophelo?

 BIBELE e tšoantša bophelo ba Bakreste le peiso. Limathi tse fihlang qetellong ea peiso li tla fumana bophelo bo sa feleng. (2 Tim. 4:7, 8) Re lokela ho sebetsa ka thata hore re ’ne re mathe peisong ena hobane re se re le haufi le ho e qeta. Moapostola Pauluse o ile a qeta ho matha peiso ea hae ea bophelo ’me o ile a bua ka lintho tse ka re thusang hore re hlole peisong. O ile a re khothaletsa hore ‘re lahle lintho tsohle tse ka re imelang ’me . . . re mathe ka mamello peisong e ka pel’a rona.’—Bala Baheberu 12:1.

2. Ho ‘lahla lintho tsohle tse re imelang’ ho bolela’ng?

² Ha Pauluse a ne a re re lokela ho ‘lahla lintho tsohle tse ka re imelang,’ na o ne a bolela hore ha ho na lintho tseo Mokreste a lokelang ho li etsa? Che empa o ne a bolela hore re lokela ho tlohela ho etsa lintho tse ka re imelang ho sa hlokahale. Lintho tsena li ka re sitisa ’me tsa etsa hore re khathale. E le hore re mamelle, re lokela ho sheba hore na ho na le lintho tseo re ikimetsang ka tsona ho sa hlokahale ebe re tlohela ho li etsa. Leha ho le joalo, ha re batle ho lebala lintho tseo re lokelang ho li etsa, ho seng joalo re ke ke ra fihla qetellong ea peiso ena. (2 Tim. 2:5) Ke lintho life tseo re lokelang ho li etsa?

3. (a) Ho latela Bagalata 6:5, ke’ng eo re lokelang ho e etsa? (b) Re tl’o ithuta’ng sehloohong see, hona hobane’ng?

³ Bala Bagalata 6:5. Pauluse o ile a bua ka ntho eo re lokelang ho e etsa. O ile a re “e mong le e mong o tla ikarabella ka  lintho tseo a li etsang.” Pauluse mona o ne a bua ka lintho tseo Molimo a li lebeletseng ho rona e leng lintho tseo batho ba bang ba ke keng ba re etsetsa tsona. Sehloohong sena re tl’o ithuta hore na ke lintho life tseo re lokelang ho iketsetsa tsona le hore na re ka li etsa joang. Re tla boela re tsebe lintho tseo re lokelang ho khaotsa ho li etsa le hore na re ka etsa seo joang. Ho etsa lintho tseo Jehova a li lebeletseng ho rona le ho khaotsa ho etsa tseo a sa lebellang hore re li etse ho tla re thusa hore re mathe peisong ena ea bophelo re be re e qete.

4. Ke hobane’ng ha ho se thata ho phethahatsa tšepiso eo re e entseng ea hore re tla lula re sebeletsa Jehova? (Sheba setšoantšo.)

⁴ Tšepiso ea ho sebeletsa Jehova. Ha re ne re tšepisa hore re tla sebeletsa Jehova, re ile ra ikana ka hore re tla mo rapela re be re etse thato ea hae. Re lokela ho phethahatsa tšepiso eo. Ho etsa seo re se tšepisitseng ke boikarabelo bo boholo empa ha se ntho e thata ho e etsa. Jehova o re bopetse hore re etse thato ea hae. (Tšen. 4:11) Kaha o re bopile ka setšoantšo sa hae, re batla ho mo tseba le ho mo rapela.  Kahoo, re khona ho ba metsoalle ea hae ebile rea thaba ha re etsa thato ea hae. (Pes. 40:8) Hape ha re etsa thato ea Molimo ’me re latela Mora oa hae re “tla khatholoha.”—Mat. 11:28-30.

5. Ke’ng e ka u thusang hore u phethe tšepiso eo u e entseng? (1 Johanne 5:3)

⁵ U ka phetha tšepiso ea hao joang? Ho na le lintho tse peli tse ka u thusang. Ea pele ke hore u etse lintho tse u thusang hore u lule u rata Jehova. U ka etsa joalo ka hore u nahanisise ka lintho tsohle tseo Jehova a u etselitseng tsona le ka litlhohonolofatso tseo a tl’o u fa tsona. Ha u ntse u tsoela pele u rata Jehova, ho tla ba bonolo hore u mo mamele. (Bala 1 Johanne 5:3.) Ea bobeli ke hore u etsise Jesu. O ile a khona ho etsa thato ea Molimo hobane o ne a kopa thuso ho Jehova ka thapelo ebile a lula a nahana ka litlhohonolofatso tseo a tl’o li fumana. (Baheb. 5:7; 12:2) Re ka etsisa Jesu ka hore re kope Jehova ka thapelo hore a re fe matla le ka ho lula re nahana ka tšepiso ea bophelo bo sa feleng. Ha u ntse u rata Molimo le ho feta le ho etsisa Mora oa hae, u tla khona ho phethahatsa tšepiso eo u e entseng.

6. Ke hobane’ng ha re lokela ho phetha boikarabelo ba rona ka lapeng? (Sheba setšoantšo.)

⁶ Boikarabelo boo re nang le bona ka lapeng. Ha re ntse re matha peisong ea bophelo, re lokela ho rata Jehova le Jesu ho feta ba malapa a rona. (Mat. 10:37) Empa sena ha se bolele hore ha rea lokela ho hlokomela ba malapa a rona hobane e le hore re amoheloe ke Molimo le Kreste, re tlameha ho phetha boikarabelo ba rona ka lapeng. (1 Tim. 5:4, 8) Ha re etsa joalo re tla thaba. Jehova oa tseba hore lelapa le tla thaba haeba monna le mosali ba ratana ebile ba hlomphana, ha batsoali ba rata bana ba bona ebile ba ba ruta le ha bana ba mamela batsoali ba bona.—Baef. 5:33; 6:1, 4.

7. U ka phetha boikarabelo ba hao joang ka lapeng?

⁷ U ka phetha boikarabelo ba hao joang ka lapeng? Sebelisa keletso eo Bibele e fanang ka eona ho sa tsotellehe boikarabelo boo u nang le bona ka lapeng. U se ke oa etsa lintho ho latela maikutlo a hao, ho latela seo litsebi li se buang kapa ho ea ka tloaelo ea sebaka seo u lulang ho sona. (Liprov. 24:3, 4) Bala lingoloa tsa rona tse thehiloeng Bibeleng. Lingoloa tsena li na le likeletso tse tsoang ka Bibeleng tse ka u thusang. Ka mohlala, websaete ea rona ea jw.org e na le lintlha tse etselitsoeng ho thusa banyalani, batsoali le bacha ka mathata a bona. b Ikemisetse ho sebelisa likeletso tse tsoang Bibeleng le haeba litho tse ling tsa lelapa li sa etse joalo. Ha u etsa joalo, lelapa le tla thaba ebile Jehova o tla u hlohonolofatsa.—1 Pet. 3:1, 2.

8. Liqeto tseo re li etsang li ka re ama joang?

⁸ Rea ikarabella ka liqeto tseo re li etsang. Jehova o re lumella hore re iketsetse liqeto ebile o batla hore re thabe ha re etsa liqeto tse nepahetseng. Empa ha a thibele hore re se ke ra hlaheloa ke litla-morao tsa liqeto tse mpe tseo re li entseng. (Bagal. 6:7, 8) Kahoo, rea ikarabella ka liqeto tse mpe tseo re li etsang, lintho tse fosahetseng tseo re li buang le lintho tse mpe tseo re li etsang. Letsoalo la rona le ka ’na la re tšoenya ka lebaka la ntho e itseng eo re e entseng empa ha re tseba hore rea ikarabella ka liqeto tseo re li entseng, seo se ka etsa hore re bolele libe tsa rona, re lokise liphoso tseo re li entseng ’me re qobe ho li  pheta. Ho etsa joalo ho ka re thusa hore re lule re le peisong ea bophelo.

9. U ka etsa’ng haeba u entse qeto e fosahetseng? (Sheba setšoantšo.)

⁹ U ka bontša joang hore u ikarabella ka liqeto tseo u li entseng? U ka etsa’ng haeba u sa khone ho fetola qeto e mpe eo u e entseng? Amohela hore u ke ke oa fetola lintho tseo u li entseng nakong e fetileng. U se ke oa ikimetsa ka ho ipeha molato le ho beha batho ba bang molato ka qeto eo u e entseng kapa oa ipehela mabaka a hore na ke hobane’ng ha u e entse. Amohela liphoso tseo u li entseng ’me u leke ho etsa lintho ka tsela e nepahetseng hona joale. Haeba u ikutloa u le molato ka ntho e mpe eo u e entseng, rapela Jehova, u lumele hore u entse phoso ’me u mo kope hore a u tšoarele. (Pes. 25:11; 51:3, 4) Kopa tšoarelo ho batho bao u ba utloisitseng bohloko ’me haeba ho hlokahala, bua le baholo u kope hore ba u thuse. (Jak. 5:14, 15) Ithute liphosong tseo u li entseng ’me u leke hore u se ke oa li pheta. Haeba u etsa joalo u ka kholiseha hore Jehova o tla u hauhela a be a u thuse.—Pes. 103:8-13.

10. Ke hobane’ng ha ho se khotsofalle lintho tseo re khonang ho li etsa ho ka etsa hore re imeloe? (Bagalata 6:4)

¹⁰ Ho se khotsofalle lintho tseo u khonang ho li etsa. Re ka ’na ra ikimetsa ka ho ipapisa le batho ba bang. (Bala Bagalata 6:4.) Ha re lula re ipapisa le batho ba bang, re ka ba mona ’me ra batla ho hlolisana le bona. (Bagal. 5:26) Haeba re leka ho etsa lintho tseo batho ba bang ba li etsang le hoja re tseba hore re ke ke ra khona ho li etsa, re tla be re ikutloisa bohloko. Bibele e re: “Ha ntho eo motho a e lebeletseng e lieha ho phethahala, e kulisa pelo.” (Liprov. 13:12) Kahoo, re ka inahanela hore na re ka nyahama hakae haeba re batla ho etsa lintho tseo re ke keng ra khona ho li etsa. Re ka khathala ’me ra felloa ke matla a ho matha peisong ena ea bophelo.—Liprov. 24:10.

11. Ke’ng e ka u thusang hore u se ke oa batla ho etsa lintho tseo u ke keng oa khona ho li etsa?

¹¹ U ka etsa’ng ha u sa khotsofalle lintho tseo u khonang ho li etsa? U se ke oa batla ho etsa lintho tse fetang tseo Jehova a lebeletseng hore u li etse. Jehova ha aa lebella hore u mo etsetse lintho tseo u ke keng oa khona ho li etsa. (2 Bakor. 8:12) Ha a bapise lintho tseo u mo etsetsang tsona le tseo batho ba bang ba li etsang. (Mat. 25:20-23) O ananela tsela eo u mo sebeletsang ka eona ka pelo eohle, u tšepahalang ka eona le eo u mameletseng ka eona. Kahoo, u lokela ho ikokobetsa ka hore u amohele hore u ka ’na oa se ke oa khona ho etsa lintho tsohle tseo u batlang ho li etsa hona joale hobane u se u holile, u kula kapa ka lebaka la maemo a mang. Etsisa Barzilai ka hore u se ke oa amohela mesebetsi e itseng ka phuthehong haeba u ke ke oa khona ho e etsa ka lebaka la ho hola kapa ho kula. (2 Sam. 19:35, 36) Etsisa Moshe ka hore u lumelle batho ba bang hore ba u thuse ka mesebetsi e meng haeba ho hlokahala. (Ex. 18:21, 22) Ha u ikokobelitse, u ke ke oa batla ho etsa lintho tseo u ke keng oa khona ho li etsa tse ka etsang hore u khathale ha u ntse u matha peisong ena ea bophelo.

12. Ke hobane’ng ha re sa ikarabelle ka liqeto tse fosahetseng tseo batho ba bang ba li etsang?

¹² Ho ikutloa u le molato ka lebaka la liqeto tse fosahetseng tseo batho ba bang ba li etsang. Re ke ke ra etsetsa batho ba bang liqeto kapa ho ba sireletsa hore ba se ke ba hlaheloa ke litla-morao tsa liqeto tse fosahetseng tseo ba li entseng. Ka mohlala, ngoana a ka etsa qeto ea hore a tlohele ho sebeletsa  Jehova. Qeto eo e ka utloisa batsoali ba hae bohloko haholo. Leha ho le joalo, batsoali ha baa lokela ho ikutloa ba le molato ka lebaka la qeto e fosahetseng eo ngoana oa bona a e entseng hobane ha ba etsa joalo ba tla be ba itjarisa mojaro o boima oo Jehova a sa lebellang hore ba o jare.—Bar. 14:12.

13. Motsoali a ka etsa’ng haeba ngoana oa hae a entse qeto e fosahetseng?

¹³ U ka etsa’ng e le hore u se ke oa ikutloa u le molato ka lebaka la liqeto tsa ba bang? Jehova ha a re qobelle ho mo sebeletsa. O lumeletse batho bohle hore ba iketsetse liqeto. Taba ena e akareletsa le hore na u tla mo sebeletsa kapa che. Jehova oa tseba hore batsoali ha baa phethahala. O batla hore u mo sebeletse ka matla ao u nang le ’ona. Ngoana oa hao ke eena ea ikarabellang ka liqeto tseo a li etsang eseng uena. (Liprov. 20:11) Ho ntse ho le joalo, u ka ’na oa tšoenyeha ka liphoso tseo u ileng oa li etsa. Haeba ho le joalo, bolella Jehova hore na u ikutloa joang ’me u kope hore a u tšoarele. Oa tseba hore u ke ke oa khona ho fetola lintho tseo u li entseng nakong e fetileng. Leha ho le joalo, ha aa lebella hore u sireletse ngoana oa hao e le hore a se ke a fumana litla-morao tsa lintho tseo a li entseng. Hopola hore haeba ngoana oa hao a khutlela ho Jehova, Jehova o tla mo amohela.—Luka 15:18-20.

14. Ke hobane’ng ha re sa lokela ho lula re ikutloa re le molato?

¹⁴ Ha u lula u ikutloa u le molato. Hoa utloahala hore re ikutloe re le molato ha re entse sebe. Leha ho le joalo, Jehova ha a batle hore re lule re ikutloa re le molato. Re lokela ho lahla boima bona. Re ka tseba joang haeba re e-na le bothata ba ho ikutloa re le molato? Haeba re ile ra bolela sebe sa rona, ra baka eaba re leka ka litsela tsohle ho qoba ho pheta sebe seo, re ka tšepa hore Jehova o re tšoaretse. (Lik. 3:19) Ka mor’a hore re etse lintho tsena, Jehova ha a batle hore re ikutloe re le molato. Oa tseba hore ho lula re ikutloa re le  molato ho ka re utloisa bohloko. (Pes. 31:10) Ha re lula re utloile bohloko, re ka ’na ra tlohela ho matha peisong ea bophelo.—2 Bakor. 2:7.

15. U ka thusoa ke’ng ha u ikutloa u le molato? (1 Johanne 3:19, 20) (Sheba setšoantšo.)

¹⁵ U ka etsa’ng haeba u lula u ikutloa u le molato? Ha u ikutloa u le molato, hopola hore Molimo “o tšoarela e le kannete.” (Pes. 130:4) Ha Jehova a tšoarela batho ba baketseng libe tsa bona, o tšepisa hore ‘ha a sa tla hlola a hopola libe tsa bona.’ (Jer. 31:34) Ka mantsoe a mang Jehova a ke ke a nahana ka libe tsa hao hobane o u tšoaretse. Kahoo, u se ke oa nahana hore ha u hlaheloa ke mathata ka lebaka la libe tseo u li entseng, Jehova ha aa u tšoarela. Ha oa lokela ho ikutloisa bohloko ka lebaka la liphoso tseo u ileng oa li etsa hobane u se u sa khone ho mo sebeletsa joaloka pele. Jehova ha a lule a nahana ka libe tseo u li entseng, le uena ha oa lokela hore u lule u nahana ka tsona.—Bala 1 Johanne 3:19, 20.

16. Ke lintho life tseo re lokelang ho li hopola ha re ntse re matha peisong ea bophelo?

¹⁶ Ha re matha peisong ena ea bophelo, re lokela hore re ‘mathe ka tsela e tla etsa hore re hlole.’ (1 Bakor. 9:24) Re ka etsa sena ka hore re tsebe phapang pakeng tsa lintho tseo re lokelang ho li etsa le tseo re sa lokelang ho li etsa. Sehloohong sena re buile ka lintho tseo re lokelang ho li etsa le tseo re sa lokelang hore re li etse. Empa ho ntse ho e-na le lintho tse ling. Jesu o ile a re re ka “imeloa ke ho ja ho tlola, ho noa haholo le mathata a bophelo.” (Luka 21:34) Mangolo ana le a mang a ka u thusa hore u tsebe hore ke hokae moo u lokelang ho ntlafatsa teng ha u ntse u matha peisong ena ea bophelo.

17. Re ka kholiseha ka’ng ha re ntse re matha peisong ea bophelo?

¹⁷ Re ka kholiseha hore re tla hlola peisong ena ea bophelo hobane Jehova o tla re fa matla ao re a hlokang. (Esa. 40:29-31) U se ke oa nyahama ha u ntse u matha peisong ena. Etsisa moapostola Pauluse ea ileng a sebetsa ka thata hore a fumane moputso oo a neng a o tšepisitsoe. (Bafil. 3:13, 14) Ha ho na motho ea ka u mathelang peiso ena empa Jehova o tla u thusa hore u atlehe. Jehova a ka u thusa hore u etse lintho tseo u lokelang ho li etsa le hore u se ke oa etsa lintho tse sa hlokahaleng. (Pes. 68:19) Jehova o tla u thusa hore u mamelle ha u ntse u matha peisong ena le hore u hlole.