1. Motho ha a bakile o etsa’ng?

 RE LOKELA ho bakela lintho tsohle tse mpe tseo re li etsang. Ho ea ka Bibele, ha motho a fetola tsela eo a ikutloang ka eona ka ketso e itseng e mpe, a khaotsa ho e etsa ebile a ikemiselitse ho se e phete, ke hona ha a bakile.—Sheba Lentsoe “Pako” tlas’a Litlhaloso Tsa Mantsoe a Bibele.

2. Ke hobane’ng ha re lokela ho baka? (Nehemia 8:​9-11)

² Kaofela ha rona re lokela ho baka hobane re etsa libe letsatsi le leng le le leng. Kaha re bana ba Adama le Eva, re futsitse sebe ho bona ’me rea shoa. (Bar. 3:23; 5:12) Ha ho na motho ea ka reng eena ha se moetsalibe. Esita le batho ba neng ba e-na le tumelo e matla joaloka moapostola Pauluse ba ne ba etsa libe. (Bar. 7:​21-24) Na see se bolela hore re lokela ho lula re utloile bohloko ka lebaka la libe tsa rona? Ho hang. Kaha Jehova o mohau, o batla hore re thabe. Nahana ka Bajuda ba mehleng ea Nehemia. (Bala Nehemia 8:​9-11.) Jehova o ne a sa batle hore ba lule ba utloile bohloko ka lebaka la libe tseo ba li entseng nakong e fetileng empa o ne a batla hore ba lule ba thabile ha ba ntse ba mo sebeletsa. Oa tseba hore ho baka ho tla etsa hore re thabe, ke ka hona a reng re lokela ho baka. Ha re bakela libe tsa rona, re ka kholiseha hore Ntate oa rona ea mohau o tla re tšoarela.

3. Re tl’o ithuta lintho life sehloohong see?

³ Sehloohong sena re tl’o ithuta haholoanyane ka ho baka. Re tl’o hlahloba lintho tse tharo. Re tla qala pele ka ho ithuta hore na Jehova o ile a re’ng ho Baiseraele ka ho baka. Re tla boela re ithute hore na Jehova o ile a thusa batho joang hore  ba bake. Qetellong re tla bua ka hore na Jesu o ile a ruta barutuoa ba hae eng ka ho baka.

JEHOVA O ILE A RE’NG HO BAISERAELE KA HO BAKA?

4. Jehova o ile a re’ng ho Baiseraele nakong eo a neng a ba fa melao?

⁴ Nakong eo Jehova a neng a fa Baiseraele melao, o ile a etsa selekane le bona. Selekane seo se ne se re haeba feela ba ka mamela melao ea hae, o ne a tla ba sireletsa le ho ba hlohonolofatsa. Ha a ne a bua le bona ka melao ea hae o ile a re: “Taelo ena eo ke le laelang eona kajeno ha e thata haholo hore le ka e utloisisa kapa la e phetha.” (Deut. 30:​11, 16) Empa haeba ba ne ba ka mo fetohela ka hore ba rapele melimo e meng, le eena o ne a tla khaotsa ho ba hlohonolofatsa ebe ba hlaheloa ke mathata. Leha ho le joalo, ba ne ba ntse ba ka khona ho lokisa litaba le Molimo ka hore ba ‘khutlele ho Jehova Molimo oa bona’ le ka hore ba ‘mamele lentsoe la hae.’ (Deut. 30:​1-3, 17-20) Ka mantsoe a mang ba ne ba e-na le monyetla oa ho baka. Haeba ba ne ba ka etsa joalo, Jehova o ne a tla ba rata a be a ba hlohonolofatse.

5. Ke’ng e bontšang hore Jehova ha aa ka a fella Baiseraele pelo? (2 Marena 17:​13, 14)

⁵ Baiseraele ba ile ba fetohela Jehova ka makhetlo a mangata. Ba ile ba rapela litšoantšo le ho etsa lintho tse ngata tse nyonyehang, eaba qetellong ba utloa ka letlalo. Empa Jehova ha aa ka a ba fella pelo. O ile a romela baprofeta ka makhetlo a mangata ho ba thusa hore ba bake le ho khutlela ho eena.—Bala 2 Marena 17:​13, 14.

6. Jehova o ile a re baprofeta ba hae ba re’ng ho batho ba hae ka ho baka? (Sheba setšoantšo.)

⁶ Jehova o ne a roma baprofeta ba hae hangata hore ba lemose le ho khalemela batho ba hae. Ka mohlala, o ile a roma Jeremia hore a re ho bona: “Khutla, uena Iseraele oa mokoenehi. Nke ke ka u halefela hobane kea tšepahala . . . Nke ke ka lula ke u halefetse ho ea ho ile. Amohela feela hore u entse phoso hobane u sitetsoe Jehova.” (Jer. 3:​12, 13)  O ile a boela a re Joele a re ho bona: “Le khutlele ho ’na ka lipelo tsohle.” (Joele 2:​12, 13) Hape o ile a roma Esaia hore a re ho bona: “Itlhatsoeng, itlhoekiseng, tlosang mesebetsi ea lona e khopo mahlong a ka. Khaotsang ho etsa bobe.” (Esa. 1:​16-19) O ile a ba a re Ezekiele a re: “Ha ke thabele ho bona motho ea khopo a shoa. Nka thabela hore a fetole litsela tsa hae tse mpe ’me a tsoele pele a phela. . . . Ha ke thabele ho bona motho leha e le ofe a shoa. Ka lebaka leo, fetolang lintho tseo le li etsang e le hore le phele.” (Ezek. 18:​23, 32) Jehova oa thaba ha batho ba bakela libe tsa bona hobane o batla hore ba phele ka ho sa feleng. Kahoo, ha a phuthe matsoho feela, a emetse hore batho ba bake ebe ke hona a ba thusang. A re boneng mehlala e meng e tiisang taba ena.

7. Jehova o ile a sebelisa mohlala oa Hosea le mosali oa hae ho ruta batho ba hae thuto efe?

⁷ Jehova o ile a sebelisa mohlala oa Gomere mosali oa moprofeta Hosea ho ruta batho ba hae thuto ea bohlokoa. Ka mor’a ho etsa bofebe o ile a siea Hosea eaba o ea ho banna ba bang. Na Jehova o ne a nka Gomere e se e le ba-e-hlotse? Che! Kaha Jehova o khona ho bona lipelo, o ile a re ho Hosea: “Tsamaea hape, u rate mosali ea ratoang ke monna e mong a bile a etsa bofebe joalokaha Jehova a rata sechaba sa Iseraele leha se ntse se ea ho melimo e meng.” (Hos. 3:1; Liprov. 16:2) Hlokomela hore mosali oa Hosea o ne a ntse a tsoela pele ka boitšoaro bona ba hae bo bobe. Ho ntse ho le joalo, Jehova o ile a re Hosea a ee ho eena, a mo tšoarele a be a khutlelane le eena. a Mohlala ona oa bontša hore Jehova o ne a sa qhalla batho ba hae matsoho. Le hoja ba ne ba ntse ba tsoela pele ho etsa lintho tse mpe, o ne a ntse a ba rata. O ile a ’na a leka ka litsela tsohle ho ba thusa hore ba bake le ho fetola mekhoa ea bona. Mohlala ona o re ruta hore Jehova o ‘hlahloba lipelo’ ’me o ikemiselitse ho thusa motho leha a ntse a tsoela pele ho etsa sebe se tebileng hore qetellong a bake. (Liprov. 17:3) A re bone hore na o ile a etsa seo joang.

JEHOVA O THUSITSE BATHO JOANG HORE BA BAKE?

8. Jehova o ile a etsa’ng ho thusa Kaine hore a bake? (Genese 4:​3-7) (Sheba setšoantšo.)

⁸ Kaine e ne e le mora oa letsibolo oa Adama le Eva. O ile a futsa mekhoa e mebe ho batsoali ba hae. Bibele e boetse e re ka eena: “Mesebetsi ea hae e ne e le mebe.” (1 Joh. 3:12) E ka ’na eaba ke lona lebaka le entseng hore Jehova a se ke “a amohela Kaine le nyehelo ea hae.” Ho e-na le hore Kaine a fetole mekhoa ea hae, o ile “a halefa haholo ’me a utloa bohloko.” Jehova o ile a etsa’ng ka mor’a moo? O ile a bua le Kaine. (Bala Genese 4:​3-7.) Jehova o ile a eletsa Kaine ka mosa ’me a mo bolella hore o tla mo hlohonolofatsa haeba a ka fetoha. O ile a boela a mo lemosa hore khalefo ea hae e tla etsa hore qetellong a etse sebe. Ka masoabi Kaine o ile a hana ho mamela. Ha aa ka a lumella Jehova hore a mo thuse ho baka. Empa na manganga a Kaine a ile a etsa hore Jehova a khaotse ho thusa baetsalibe ba bang hore ba bake? Le letho!

9. Jehova o ile a thusa Davida joang hore a bake?

⁹ Jehova o ne a rata Morena Davida haholo hoo a ileng a ba a re ke ‘monna ea mo khahlisang.’ (Lik. 13:22) Empa Davida o ile a etsa libe tse tebileng tse kang bofebe le ho bolaea. Ho ea ka Molao oa Moshe, Davida o ne a lokela ho bolaoa. (Lev. 20:10; Num. 35:31) Empa  Jehova o ile a ba mosa a batla ho thusa Davida hore a bake. b O ile a etsa seo ka hore a romele moprofeta Nathane ho Davida le hoja Davida a ne a e-s’o ka a etsa letho le bontšang hore o bakile. Nathane o ile a bolella Davida papiso e entseng hore a bone na o entse lintho tse mpe hakae. Ka mor’a moo, Davida o ile a soaba haholo eaba o qetella a bakile. (2 Sam. 12:​1-14) O ile a ngola Pesaleme e amang pelo e bontšang hore o ne a bakile. (Pes. 51, sehlooho) Pesaleme eo e khothalitse batho ba bangata ba ileng ba etsa libe ’me ea ba susumeletsa hore ba bake. Kannete re thaba haholo hore ebe Jehova o ile a thusa Davida hore a bake.

10. U ikutloa joang ka tsela eo Jehova a re mamellang le ho re tšoarela ka eona?

¹⁰ Jehova o hloile mefuta eohle ea libe ebile ha a lumellane le eona ka tsela leha e le efe. (Pes. 5:​4, 5) Leha ho le joalo, oa tseba hore kaofela re baetsalibe ’me kaha oa re rata, o khetha ho re thusa hore re qobe ho etsa sebe. Ho khothatsa haholo ho tseba hore o lula a leka ho re thusa hore re bake le hore re be metsoalle ea hae ho sa tsotellehe hore na re etsa libe tse tebileng hakae. Kahoo, ho nahanisisa ka mamello ea Jehova le tsela eo a re tšoarelang ka eona, ho re susumeletsa hore re ikemisetse ho lula re mo tšepahalla le ho potlakela ho baka ha re entse sebe. Hona joale a re boneng hore na Jesu o ile a ruta barutuoa ba hae eng ka ho baka.

JESU O ILE A RUTA BARUTUOA BA HAE ENG KA HO BAKA?

11, 12. Jesu o ile a etsa papiso efe ho ruta batho ka tsela eo Jehova a tšoarelang ka eona? (Sheba setšoantšo.)

¹¹ Nako e ile ea fihla ea hore Mesia a tle. Joalokaha re ithutile sehloohong se fetileng, Jehova o ile a sebelisa Johanne Mokolobetsi le Jesu Kreste ho hlokomelisa batho hore na ho baka ho bohlokoa hakae.—Mat. 3:​1, 2; 4:17.

¹² Ha Jesu a ntse a etsa tšebeletso ea hae, o ile a ruta batho hore Ntate oa hae o  ikemiselitse ho ba tšoarela ha ba etsa libe. O ile a ba ruta thuto ena ea bohlokoa ka ho etsa papiso ea mora ea lahlehileng. Mohlankana eo o ile a khetha ho tloha hae eaba o phela bophelo bo litšila. Hamorao o ile a “hlaphoheloa” eaba o khutlela hae. Ntate oa hae o ile a mo tšoara joang? Jesu o ile a re: “Ha a sa le hole ntate oa hae a mo bona, a mo utloela bohloko, a matha a ea ho eena a mo haka eaba oa mo suna.” Mora eo o ile a kopa hore ntate oa hae a mo etse e mong oa bahiruoa ba hae empa ntate oa hae o ile a mo bitsa “mora enoa oa ka” a ba a mo amohela. Ntate oa hae o ile a re: “O ne a lahlehile empa o fumanoe.” (Luka 15:​11-32) Ha Jesu a ntse a le leholimong, e tlameha ebe o ne a ile a bona ka makhetlo a mangata ha Ntate oa hae a hauhela baetsalibe ba bakileng ka tsela e tšoanang. Papiso ena ea mora ea lahlehileng e re khothatsa haholo ebile e re ruta kamoo Ntate oa rona Jehova a leng mohau kateng.

13, 14. Moapostola Petrose o ile a ithuta eng ka ho baka, hona o ile a ruta batho ba bang eng? (Sheba setšoantšo.)

¹³ Moapostola Petrose o ile a ithuta thuto ea bohlokoa ho Jesu ka ho baka le ho tšoarela. O ne a etsa liphoso tse ngata empa Jesu o ne a lula a mo tšoarela. Ka mohlala, ka mor’a hore Petrose a latole ka makhetlo a mararo hore o tseba Jesu, o ile a utloa bohloko haholo. (Mat. 26:​34, 35, 69-75) Empa ka mor’a hore Jesu a tsosoe bafung, o ile a hlaha ho Petrose ’me ho bonahala eka o ile a hlaha ho eena moo ba leng bang. (Luka 24:​33, 34; 1 Bakor. 15:​3-5) E tlameha ebe ka nako eo Jesu o ile a mo kholisa hore o mo tšoaretse kaha o ne a tseba hore o bakile.—Sheba Mareka 16:7.

¹⁴ Kaha Petrose o ne a se a ile a tšoareloa, o ne a se a ka khona ho ruta batho ba bang ka ho baka le ho tšoarela. Nakoana ka mor’a mokete oa Pentekonta, Petrose o ile a bua le letšoele la Bajuda a le bolella hore le ile la bolaea  Mesia. Leha ho le joalo, o ile a re ho bona: “Bakang ’me le sokolohe, libe tsa lona li tle li hlakoloe e le hore Jehova a ka le khatholla.” (Lik. 3:​14, 15, 17, 19) Ka mantsoe ao, Petrose o ile a ba ruta hore ha motho a sokoloha, e leng ha a fetola tsela eo a nahanang ka eona le mekhoa ea hae e mebe ’me a etsa lintho tse thabisang Molimo, ke hona ha a bakile. O ile a boela a re Jehova o ne a tla hlakola libe tsa bona. Lilemo tse mashome hamorao o ile a re ho Bakreste-’moho le eena: “Jehova . . . ha a le felle pelo hobane ha a lakatse hore mang kapa mang a timetsoe empa o lakatsa hore bohle ba bake.” (2 Pet. 3:9) Ho khothatsa haholo ho tseba hore ho sa tsotellehe hore na re etsa libe tse tebileng hakae, haeba feela re baka, Jehova o ikemiselitse ho re tšoarela.

15, 16. (a) Moapostola Pauluse o ile a ithuta’ng ka tsela eo Jehova le Jesu ba tšoarelang ka eona? (1 Timothea 1:​12-15) (b) Re tl’o bua ka’ng sehloohong se latelang?

¹⁵ Saule oa Tarsase ke e mong oa batho ba ileng ba etsa lintho tse mpe ka tsela e makatsang. O ne a hlorisa barutuoa ba Jesu ka sehloho. Ho ka etsahala hore ebe Bakreste ba bangata ba ne ba bona e le motho ea ke keng a baka le ka mohla. Empa tsela eo Jesu a neng a sheba Saule ka eona e ne e fapane hole le eo batho ba neng ba mo sheba ka eona. Eena le Ntate oa hae ba ile ba bona makhabane ao Saule a neng a e-na le ’ona. Jesu o ile a re: “Monna enoa ke sejana seo ke se khethileng.” (Lik. 9:​15, nal.) Jesu o ile a ba a etsa mohlolo ho thusa Saule hore a bake. (Lik. 7:58–8:3; 9:​1-9, 17-20) Saule e ile ea e-ba Mokreste ’me hamorao a tsejoa e le moapostola Pauluse. O ile a leboha hore ebe Jehova le Jesu ba mo hauhetse le ho ba mosa ho eena. (Bala 1 Timothea 1:​12-15.) Hamorao Pauluse o ile a re ho Bakreste-’moho le eena: ‘Ka mosa Molimo o leka ho le thusa hore le bake.’—Bar. 2:4.

¹⁶ Ka mor’a hore Pauluse a utloe hore ho hlahile boemo bo tšosang phuthehong ea Korinthe ba monna ea neng a entse boitšoaro bo bobe, o ile a etsa’ng? O ile a rarolla bothata boo ka tsela e bontšang hore Jehova o re khalemela hobane a re rata haholo ’me o batla hore le rona re hauhele ba bang ha ba bakile. Sehloohong se latelang re tla bua haholoanyane ka taba ena e ileng ea etsahala phuthehong ea Korinthe.