Na u balile lihlooho tsa Molula-Qhooa tsa selemong see ka hloko? Haeba ho joalo, leka ho bona hore na u ka araba lipotso tse latelang:

Re tla fumana melemo efe ha re qeta nako re mamela Jehova, re bua le eena re bile re nahana ka eena?

Re tla etsa liqeto tse bohlale, re tla ba matichere a hloahloa, tumelo ea rona e tla matlafala hape re tla rata Jehova le ho feta.—w22.01, leq. 30-31.

Re tla fumana molemo ofe ha re ithuta ho tšepa Jehova le batho ba etellang pele ka mokhatlong oa hae?

Hona joale ke nako ea ho ithuta ho tšepa tsela eo Molimo a etsang lintho ka eona ka hore re se ke ra belaella tataiso eo baholo ba fanang ka eona le liqeto tseo ba li etsang. Nakong ea matšoenyeho a maholo, re tla nolofalloa ho mamela esita le haeba re ka ’na ra fuoa litaelo tseo re ka utloang ho le thata ho li utloisisa kapa ho li mamela.—w22.02, leq. 4-6.

Lengeloi le ne le bolela’ng ha le ne le re Bajuda ba ne ba tla “thaba ’me ba bone sekitiloto letsohong la [’Musisi] Zorobabele”? (Zak. 4:8-10)

Lengeloi le ile la tiisetsa bahlanka ba Molimo hore le hoja tempele ena e ne e le ea maemo a tlase ha e bapisoa le ea pele, e ne e tla fela ’me e be ka tsela eo Jehova a batlang hore e be ka eona.—w22.03, leq. 16-17.

Ke joang re ka bang “mohlala ho bueng”? (1 Tim. 4:12)

Re bua le batho ka tsela e mosa le e hlomphang ha re le tšimong ’me re bina ho tsoa pelong ebile re araba kamehla ha re le libokeng. Hape re bua ’nete le ho bua ka tsela e khothatsang batho ba bang ’me re qoba ho ba bua hampe.—w22.04, leq. 6-9.

Ke hobane’ng ha litšobotsi tsa libata (mebuso) tse ’ne‵ tse hlahang lengolong la Daniele khaolo ea 7 li hlaha sebateng se le seng ho Tšenolo 13:1, 2?

Sebata se hlahang ho Tšenolo khaolo ea 13 ha se tšoantšetse ’muso o le mong joaloka oa Roma. Ho e-na le hoo, se emela mebuso eohle ea lipolotiki e ’nileng ea busa batho.—w22.05, leq. 9.

Re ka bontša joang hore re kholisehile hore Jehova o tla phethahatsa toka?

Haeba motho e mong a re bua hampe, a re foselitse kapa a re utloisitse bohloko, re leka hore re se ke ra koata ebile ha re mo jare ka pelo. Empa re tlohela lintho matsohong a Jehova. O tla lokisa lintho tsohle tse re utloisitseng bohloko ka lebaka la sebe.—w22.06, leq. 10-11.

Mor’abo rona o lokela ho hopola’ng ha a rapela libokeng?

Mor’abo rona ha aa lokela ho khalemela le ho etsa litsebiso nakong eo a rapelang. Ha aa lokela ho bua “mantsoe a mangata,” haholo-holo qalong ea liboka. (Mat. 6:7)—w22.07, leq. 24.

Ho boleloa’ng ha ho thoe batho ba ileng ba “tloaela ho etsa lintho tse mpe” ba tla ea “tsohong ea kahlolo”? (Joh. 5:29)

Ba ke ke ba ahloleloa lintho tseo ba li entseng pele ba hlokahala. Ba tla ahloloa ho latela lintho tseo ba tla li etsa ka mor’a hore ba tsosoe.—w22.09, leq. 18.

J. F. Rutherford o ile a etsa khothaletso efe e thabisang kopanong ea September 1922?

Kopanong e neng e le Cedar Point, Ohio, Amerika, o ile a re: “Morena oa busa! Le na le boikarabelo ba ho bolella motho e mong le e mong ka taba ena. Kahoo, phatlalatsang, phatlalatsang, phatlalatsang Morena le ’Muso oa hae!”—w22.10, leq. 3-5.

Ke litsela life tse tharo tseo Molimo a re thusang ka tsona hore re mamelle tse hlahang ho Esaia khaolo ea 30?

Khaolo ena e bontša hore (1) o mamela ka hloko ha re mo rapela ebile o arabela lithapelo tsa rona, (2) o re fa likeletso, le (3) oa re hlohonolofatsa hona joale ’me o tla re hlohonolofatsa le nakong e tlang.—w22.11, leq. 9.

Ke hobane’ng ha re ka re mantsoe a fumanoang ho Pesaleme ea 37:10, 11, 29 a ile a phethahala nakong e fetileng ’me a tla boela a phethahale ka moso?

Mantsoe a Davida a ne a bontša hore na bophelo bo tla ba joang Iseraele ha Solomone e le morena. Jesu le eena o ile a qotsa temana ea 11 ha a ne a bua ka paradeise e tlang. (Mat. 5:5; Luka 23:43)—w22.12, leq. 8-10, 14.