1. Hangata Jehova o araba lithapelo tsa bahlanka ba hae joang?

 JEHOVA a ka u sebelisa ho araba thapelo ea motho e mong. A ka u sebelisa ebang u moholo, u mohlanka ea sebeletsang, u pula-maliboho kapa u mohoeletsi. A ka boela a u sebelisa ebang u mocha, u se u holile, u mora kapa morali oa bo rona. Ha motho ea ratang Jehova a kopa thuso ho eena, hangata o sebelisa baholo le bahlanka ba bang ba hae ho mo ‘tšelisa haholo.’ (Bakol. 4:11) Re thabela ho sebeletsa Jehova ka tsela ena le ho thusa Bakreste-’moho. Re ka khona ho thusa le ho khothatsa Bakreste-’moho le rona ha ho e-na le mafu a seoa, likoluoa kapa ba hlorisoa.

2. Ke hobane’ng ha ho ka ba thata ho thusa ba bang ha ho e-na le lefu la seoa?

² Ho ka ba thata hore re thusane ha ho e-na le lefu la seoa. Ka mohlala, ho ka ba kotsi ho chakela metsoalle ea rona le hoja re batla ho etsa joalo. Re ka ’na ra batla ho mema batho ba sokolang ebe ha re khone ka lebaka la seoa. Re ka batla ho thusa ba bang empa ho ka ba thata haeba lelapa la rona le lona le e-na le mathata. Leha ho le joalo, re batla ho thusa Bakreste-’moho le rona ’me Jehova oa thaba ha re etsa sohle seo re ka se khonang ho ba thusa. (Liprov. 3:27; 19:17) Re ka ba thusa joang?

3. Re ithuta’ng mohlaleng oa baholo ba phuthehong ea bo Morali oa bo rona Desi? (Jeremia 23:4)

³ Lintho tseo baholo ba ka li etsang. Haeba u moholo, tseba linku hantle. (Bala Jeremia 23:4.) Morali oa bo rona Desi eo re buileng ka eena sehloohong se fetileng o re: “Baholo ba sehlopheng sa rona sa tšimo ba ne ba lula ba sebetsa le rona tšimong  ’me ba ne ba e-ba teng ha re ithabisa.” b Sena se ile sa etsa hore ho be bonolo hore ba thuse Morali oa bo rona Desi ka mor’a hore ba bang ba lelapa labo ba hlokahale ka lebaka la seoa sa COVID-19.

4. Ke hobane’ng ha baholo ba khonne ho thusa Morali oa bo rona Desi, hona baholo ba ka ithuta’ng?

⁴ Morali oa bo rona Desi o re: “Ho ne ho le bonolo hore ke bolelle baholo hore na ke ikutloa joang le lintho tse ntšoenyang hobane e ne e le metsoalle ea ka.” Baholo ba ka ithuta’ng? Hlokomelang Bakreste-’moho pele ba hlaheloa ke mathata. E-ba motsoalle oa bona. Haeba u sa khone ho ba etela ka lebaka la lefu la seoa, batla litsela tse ling tsa ho buisana le bona. Morali oa bo rona Desi o re: “Ka linako tse ling, baholo ba fapaneng ba ne ba founa kapa ba nthomella melaetsa ka letsatsi le le leng. Litemana tseo ba ileng ba mpalla tsona li ile tsa nkama maikutlo haholo le hoja e le litemana tseo ke li tsebang.”

5. Baholo ba ka tseba joang hore na Bakreste-’moho le bona ba hloka eng, hona ba ka ba thusa joang?

⁵ Tsela e ’ngoe eo u ka tsebang hore na Bakreste-’moho le uena ba hloka eng ke ka ho ba botsa lipotso ka bohlale. (Liprov. 20:5) Na ba na le lijo tse lekaneng, meriana le lintho tse ling tseo ba li hlokang? Na ba ka ’na ba lahleheloa ke mosebetsi kapa sebaka seo ba lulang ho sona? Na ba hloka ho thusoa ho ngolisa hore ’muso o ba thuse? Morali oa bo rona Desi o ile a thusoa ke Bakreste-’moho le eena ho fumana lintho tseo a li hlokang empa ntho e ileng ea mo thusa haholo ha a le mathateng, ke lerato leo baholo ba ileng ba mo bontša lona le ho mo khothatsa ba sebelisa Bibele. O re: “Baholo ba ile ba nthapella. Le hoja ke sa hopole hantle hore na ba ile ba re’ng empa ke hopola hantle tsela eo ke ileng ka ikutloa ka eona. Ke tsela eo Jehova a neng a re ho ’na ka eona, ‘Ha u mong.’”—Esa. 41:10, 13.

6. Bakreste-’moho ba ka thusana joang? (Sheba setšoantšo.)

⁶ Lintho tseo ba bang ba ka li etsang. Le hoja baholo ba ikarabella ka ho hlokomela Bakreste-’moho, Jehova o batla hore kaofela ha rona re khothatse le ho thusa Bakreste-’moho le rona. (Bagal. 6:10) Ntho leha e le efe eo re ka e etsang ho thusa motho ea kulang, ho sa tsotellehe hore na e nyenyane hakae e ka mo khothatsa haholo. Ngoana a ka khothatsa mor’abo rona ka ho mo ngolla karete kapa ho mo toroeela setšoantšo. Mocha a ka thusa morali oa bo rona ka ho e’o mo rekela  lintho tseo a li hlokang. Ba bang ba ka phehela motho ea kulang lijo ebe ba mo isetsa tsona. Batho bohle ka phuthehong ba hloka ho khothatsoa ha ho e-na le seoa. Ka mor’a liboka, mohlomong re ka qoqa le Bakreste-’moho ha re le Holong ea ’Muso kapa ka marangrang. Baholo le bona ba hloka ho khothatsoa. Bara le barali ba bo rona ba bang ba rometse baholo ba sebetsang ka thata nakong ea seoa likarete tse nang le melaetsa e ba lebohang. Hoa thabisa ha re ‘tsoela pele ho khothatsana le ho matlafatsana.’—1 Bathes. 5:11.

7. Ke mathata afe a ka hlahelang batho ka mor’a koluoa?

⁷ Koluoa e ka etsa hore bophelo ba motho bo fetohe ka ho panya ha leihlo. Batho ba ka lahleheloa ke lintho tsa bona, matlo a bona kapa ba hlokahalloa. Lintho tsena tse utloisang bohloko li etsahalla le Bakreste-’moho le rona. Re ka ba thusa joang?

8. Baholo le lihlooho tsa malapa ba ka etsa’ng pele koluoa e hlaha?

⁸ Lintho tseo baholo ba ka li etsang. Baholo, thusang Bakreste-’moho hore ba itokisetse koluoa pele e hlaha. Etsang bonnete ba hore batho bohle ka phuthehong baa tseba hore na ba lokela ho etsa’ng e le hore ba lule ba sireletsehile le hore ba founela baholo nakong ea koluoa. Morali oa bo rona Margaret eo re buileng ka eena sehloohong se fetileng o re: “Puong ea litlhoko tsa phutheho, baholo ba ile ba fana ka puo e neng e bontša hore ho ntse ho tla ba le mollo sebakeng seo re lulang ho sona. Ba ile ba re re lokela ho tsoa hang-hang haeba ba boholong pusong ba ka re laela hore re etse joalo kapa haeba ho ka ba kotsi.” Lintlha tseo baholo ba ileng ba li bolella phutheho li ne li le nakong hobane ho ile ha e-ba le mollo o kotsi libeke tse hlano ka mor’a moo. Nakong ea borapeli ba lelapa, lihlooho tsa malapa li ka bua ka hore na motho e mong le e mong o lokela ho etsa’ng ha koluoa e hlaha. Haeba uena le bana ba hao le itokisitse, le tla khona ho khoba matšoafo ha koluoa e ka hlaha.

9. Baholo ba ka etsa’ng pele ho koluoa le ka mor’a eona?

⁹ Haeba u molebeli oa sehlopha sa tšimo, etsa bonnete ba hore u na le linomoro le liaterese tsa batho ba sehlopheng sa hao pele koluoa e hlaha. Li ngole fatše ’me u lule u li sheba hore na li nakong. Seo se tla u thusa hore u khone ho fumana mohoeletsi e mong le e mong ho bona hore na o hloka eng nakong ea koluoa. Bolella mohokahanyi oa sehlopha sa baholo hang-hang hore na bahoeletsi ba hloka eng ’me eena o tla tsebisa molebeli oa potoloho. Ha bara bana ba bo rona ba sebetsa hammoho, ba ka khona ho thusa bahoeletsi. Ka mor’a mollo oo o bileng teng, molebeli oa potoloho ea bo Morali oa bo rona Margaret o ile a nka lihora tse 36 a sa robale, a thusa baholo ba neng ba leka ho founela le ho hlokomela bara le barali ba bo rona ba 450 ba ileng ba tlameha ho tsoa matlong a bona. (2 Bakor. 11:27) Kahoo, bara le barali ba bo rona ba ile ba fumana sebaka seo ba ka lulang ho sona.

10. Ke hobane’ng ha baholo ba nka ho hlokomela Bakreste-’moho le bona e le ntho ea bohlokoa? (Johanne 21:15)

¹⁰ Baholo ba lokela ho khothatsa Bakreste-’moho ka Bibele le ho thusa ba tšoenyehileng. (1 Pet. 5:2) Nakong ea koluoa, baholo ba lokela ho etsa bonnete ba hore bara le barali ba bo rona ba sireletsehile le hore ba na le lijo, liaparo le moo ba lulang teng. Le ka mor’a likhoeli tse ngata ka mor’a koluoa, Bakreste-’moho ba ntse ba hloka ho khothatsoa ka Bibele le ho tšelisoa. (Bala Johanne 21:15.) Mor’abo rona Harold eo e leng setho sa Komiti ea Lekala, ea kopaneng le bara le barali ba bo rona ba bangata ba hlahetsoeng ke likoluoa  o re: “Ho nka nako hore ba be hantle. Ba ka ’na ba lebala ka lintho tse ba lahlehetseng empa ho ka ba thata hore ba lebale moratuoa oa bona ea hlokahetseng, ntho ea bohlokoa eo ba neng ba e-na le eona le boemo bo kotsi boo ba neng ba le ho bona. Ha ba hopola lintho tsena, li ka boela tsa ba utloisa bohloko. Taba ena ha e bolele hore ha ba na tumelo empa e bolela hore le bona ba na le maikutlo joaloka ’na le uena.”

11. Malapa a ka ’na a lula a hloka ho thusoa ka eng?

¹¹ Baholo ba sebelisa keletso e reng “llang le ba llang.” (Bar. 12:15) Baholo ba lokela ho kholisa batho ba hlahetsoeng ke koluoa hore Jehova le Bakreste-’moho ba ntse ba ba rata. Ba lokela ho thusa malapa hore a tsoele pele ho rapela, ho ithuta Bibele, ho ea libokeng le ho etsa mosebetsi oa ho ruta batho Bibele. Baholo ba boetse ba lokela ho khothaletsa batsoali hore ba thuse bana ba bona ho nahana haholo ka lintho tseo koluoa e ke keng ea li senya. Batsoali, hopotsang bana ba lona hore Jehova e tla lula e le Motsoalle oa bona ebile o tla lula a ba thusa. Hape le ba hlalosetse hore ba tla lula e le karolo ea lelapa la Jehova le leholo la Bakreste-’moho ba lulang ba ikemiselitse ho ba thusa ka linako tsohle.—1 Pet. 2:17.

12. Ba bang ba ka thusetsa joang nakong ea koluoa? (Sheba setšoantšo.)

¹² Lintho tseo ba bang ba ka li etsang. Haeba ho e-ba le koluoa pel’a moo u lulang teng, botsa baholo hore na u ka thusetsa joang. Mohlomong u ka amohela Bakreste-’moho ba lahlehetsoeng ke matlo lelapeng la hao kapa oa amohela batho ba thusang ha ho e-na le likoluoa. U ka isetsa bahoeletsi lijo le lintho tse ling tseo ba li hlokang. U ntse u ka khona ho thusa leha ho hlahile koluoa sebakeng se hole. Joang? Ka ho rapella batho ba anngoeng ke koluoa. (2 Bakor. 1:8-11) U ka khona ho thusetsa mosebetsing oa liphallelo ka ho fana ka monehelo mosebetsing oa lefatše lohle. (2 Bakor. 8:2-5) Haeba u khona ho ea sebakeng seo koluoa e hlahileng ho sona, botsa baholo hore na u ka thusetsa joang. Haeba u mengoa hore u e’o thusetsa, u tla fumana koetliso e le hore u tle u khone ho thusa moo ho hlokehang teng.

13. Bakreste-’moho le rona ba tobana le mathata afe linaheng tseo mosebetsi oa rona o thibetsoeng?

¹³ Linaheng tseo mosebetsi oa rona o thibetsoeng, ho hlorisoa ho etsa hore bophelo bo be thata le ho feta bakeng sa Bakreste-’moho  le rona. Le bona ba ba le mathata a lichelete, baa kula ebile ba hlokahalloa ke baratuoa ba bona. Empa ka lebaka la hore mosebetsi oa rona o thibetsoe, ho ka etsahala hore ebe baholo ha ba khone ho ba etela kapa ho bua le bona e le hore ba ba khothatse. Ke eona ntho e ileng ea etsahalla Mor’abo rona Andrei eo re buileng ka eena sehloohong se fetileng. Morali oa bo rona e mong ea sehlopheng sa hae sa tšimo o ne a e-na le mathata a lichelete. Hape o ile a hlaheloa ke kotsi ea koloi. O ne a lokela ho etsa liopereishene tse ’maloa. Kahoo, o ne a sa khone ho sebetsa. Ho sa tsotellehe lithibelo tseo le seoa, Bakreste-’moho le eena ba ile ba etsa seo ba ka se khonang ho mo thusa ’me Jehova o ne a bona se etsahalang.

14. Baholo ba ka beha mohlala joang tabeng ea ho itšetleha ka Jehova?

¹⁴ Lintho tseo baholo ba ka li etsang. Mor’abo rona Andrei o ile a rapela ’me a etsa seo a ka se khonang ho thusa morali eo oa bo rona. Jehova o ile a mo thusa joang? O ile a susumetsa Bakreste-’moho le eena ba neng ba e-na le bolokolohi ba ho etela ba bang hore ba mo thuse. Ba bang ba ne ba isa morali oa bo rona ngakeng. Ba bang bona ba mo thusa ka ho mo fa chelete. Jehova o ile a ba susumetsa hore ba thuse morali eo oa bo rona ’me o ile a hlohonolofatsa boiteko ba bona. (Baheb. 13:16) Baholo, ha mosebetsi oa rona o thibetsoe kopang ba bang hore ba le thuse. (Jer. 36:5, 6) Ntho ea bohlokoa ka ho fetisisa ke hore le itšetlehe ka Jehova. A ka etsa hore u thuse Bakreste-’moho ka lintho tseo ba li hlokang.

15. Ke joang re ka lulang re e-na le khotso le Bakreste-’moho le hoja re hlorisoa?

¹⁵ Lintho tseo ba bang ba ka li etsang. Ha mosebetsi oa rona o thibetsoe, re ka ’na ra lokela ho kopana re le lihlopha tse nyenyane. Kahoo, ke ha bohlokoa hore re lule re e-na le khotso le ba bang. Loantšang Satane eseng bana ba bo lona. Iphapanyetseng liphoso tsa ba bang empa ha ho hlaha bothata le bo lokise kapele. (Liprov. 19:11; Baef. 4:26) Ikemisetseng ho thusana. (Tite 3:14) Tsela eo ba bang ba ileng ba thusa morali oa bo rona eo re buileng ka eena lirapeng tse fetileng ka eona, e ile ea thusa bohle sehlopheng sa bona sa tšimo. Ba ile ba momahana joaloka lelapa.—Pes. 133:1.

16. Ho ea ka Bakolose 4:3, 18, re ka thusa Bakreste-’moho le rona ba hlorisoang joang?

¹⁶ Bakreste-’moho le rona ba bangata ba tsoela pele ho sebeletsa Jehova le hoja ’muso o thibetse mosebetsi oa rona linaheng tseo ba  lulang ho tsona. Ba bang ba isitsoe literonkong ka lebaka la ho emela tumelo ea bona. Re ka rapella bona le ba malapa a bona. Re ka boela ra rapella bana ba bo rona ba behang bophelo ba bona kotsing e le hore ba thuse ba literonkong ka ho ba matlafatsa tumelo, ho ba thusa ka lintho tseo ba li hlokang le ka ho ba emela makhotleng a linyeoe. c (Bala Bakolose 4:3, 18.) Le ka mohla a re se keng ra lebala hore ho rapella Bakreste-’moho le rona bana ho ka ba thusa haholo.—2 Bathes. 3:1, 2; 1 Tim. 2:1, 2.

17. U ka itokisetsa ho hlorisoa joang hona joale?

¹⁷ Uena le lelapa la hao le ka itokisa hona joale bakeng sa ho hlorisoa. (Lik. 14:22) Qobang ho nahana ka lintho tsohle tse bohloko tse ka etsahalang. Ho e-na le hoo, matlafatsang setsoalle sa lona le Jehova ’me le thuse le bana ba lona ho etsa joalo. Haeba ka linako tse ling u ikutloa u tšoenyehile, bolella Jehova lintho tsohle tse ka pelong ea hao. (Pes. 62:7, 8) Buisanang le le lelapa ka mabaka ’ohle a etsang hore le mo tšepe. d Ho itokisetsa koluoa le ho tšepa Jehova ho tla thusa bana ba hao hore ba be sebete ’me ba be le khotso.

18. Re lebeletse’ng nakong e tlang?

¹⁸ Khotso eo Molimo a re fang eona e etsa hore re ikutloe re sireletsehile. (Bafil. 4:6, 7) Jehova o sebelisa khotso ena ho etsa hore re khobe matšoafo le hoja re hlaheloa ke mafu a seoa, likoluoa ebile re hlorisoa. O sebelisa baholo hore ba re hlokomele. Hape o fa e mong le e mong oa rona monyetla oa ho thusa ba bang. Khotso eo re nang le eona hona joale e tla re thusa hore re mamelle liteko tse kholo tse tlang hammoho le “mahlomola a maholo.” (Mat. 24:21) Ka nako ea mahlomola a maholo, re tla lokela ho loanela ho lula re e-na le khotso ’me re thuse ba bang ho etsa se tšoanang. Ka mor’a ’ona, ha re sa tla ba le mathata ao re tobanang le ’ona hona joale. Qetellong, re tla fumana seo Jehova esale a re batlela sona e leng bophelo bo phethahetseng le khotso ea ’nete .—Esa. 26:3, 4.