1. Khotso eo Molimo a re fang eona ke’ng, hona e re tsoela molemo joang? (Bafilipi 4:6, 7)

 HO NA le khotso eo batho ba bangata ba sa tsebeng letho ka eona. Ke khotso eo re e fuoang ke Molimo eo re bang le eona hobane re le metsoalle ea Ntate oa rona ea leholimong. Re ikutloa re sireletsehile ha re e-na le khotso eo Molimo a re fang eona. (Bala Bafilipi 4:6, 7.) Hape re thabela ho ba metsoalle le batho ba mo ratang le ho ba metsoalle ea “Molimo oa khotso.” (1 Bathes. 5:23) Ha re tseba Ntate oa rona, re mo tšepa ebile re mo mamela, khotso eo a re fang eona e tla re thusa hore re se ke ra tšoenyeha ha re e-na le mathata.

2. Ke hobane’ng ha re kholisehile hore Molimo a ka re fa khotso?

² Na hoa khoneha hore re be le khotso e tsoang ho Molimo leha re hlaheloa ke mathata a kang mafu a seoa, likoluoa, ha ho e-ba le merusu kapa re hlorisoa? Mathata ana kaofela a ka etsa hore re tšohe. Jesu o ile a eletsa balateli ba hae a re: “Le se ke la itumella ho khathatseha kapa la itumella ho nyahamisoa ke ho tšoha.” (Joh. 14:27) Ntho e thabisang ke hore bara le barali ba bo rona ba latela keletso ea Jesu. Ka thuso ea Jehova, ba khonne ho ba le khotso ha ba ntse ba sebetsana le mathata a boima.

3. Ke joang mafu a seoa a ka etsang hore re se ke ra ba le khotso?

³ Mafu a seoa a ka fetola bophelo ba rona haholo. Nahana kamoo COVID-19 e ammeng batho ba bangata kateng. Lipatlisiso tse ling li bontša hore batho ba bangata ba ne ba hlobaela nakong ea seoa sena. Ka nako eo, batho ba bangata ba ile ba e-ba le mathata a kang ho tšoenyeha haholo, khatello ea maikutlo, ho noa joala haholo, ho sebelisa lithethefatsi, tlhekefetso ea ka  malapeng le ho leka ho ipolaea. Ha ho e-na le lefu la seoa moo u lulang teng, u ka etsa’ng hore u se ke oa tšoenyeha haholo ’me u be le khotso e tsoang ho Molimo?

4. Ke hobane’ng ha ho tseba boprofeta ba Jesu bo buang ka matsatsi a ho qetela ho etsa hore re be le khotso?

⁴ Jesu o ile a re matsatsing a ho qetela ho tla ba le mafu a seoa kapa maloetse “sebakeng se seng ka mor’a se seng.” (Luka 21:11) Ho tseba seo ho ka etsa hore re be le khotso joang? Mafu a seoa ha a re makatse. Rea hlokomela hore lintho tsena li etsahala feela joalokaha Jesu a boletse. Kahoo, re na le lebaka le utloahalang la ho latela keletso eo Jesu a ileng a e fa batho ba phelang nakong ea bofelo, e reng: “Le se ke la tšoha.”—Mat. 24:6.

5. (a) Ho ea ka Bafilipi 4:8, 9, ke’ng eo re lokelang ho e rapella ha ho e-na le mafu a seoa? (b) Ho mamela Bibele e rekotiloeng ho re tsoela molemo joang?

⁵ Mafu a seoa a ka etsa hore re tšoenyehe re be re tšohe. Sena ke se ileng sa etsahalla morali oa bo rona ea bitsoang Desi. b Ka mor’a hore rangoane oa hae, motsoala oa hae le ngaka ea hae kaofela ba bolaoe ke COVID-19, o ne a tšaba hore le eena e tla mo tšoara ebe o e fetisetsa ho ’mè oa hae ea neng a se a holile. Ka lebaka la seoa sena, o ne a tšoenyehile hore o tla felloa ke mosebetsi le hore na o tla reka lijo le ho patala rente ka eng. Lintho tsena li ne li mo tšoenya hoo a neng a sa khone ho robala bosiu. Empa hamorao morali oa bo rona Desi o ile a boela a ba le khotso. Joang? O ile a rapela Jehova a mo kopa ka ho toba hore a mo thuse hore a se ke a tšoenyeha le hore a se ke a nahana ka lintho tse nyahamisang. (Bala Bafilipi 4:8, 9.) O ne a mamela Bibele e rekotiloeng ’me ka tsela eo, e ne eka o mametse Jehova ha a bua le eena. O re: “Mantsoe a monate a batho ba balang a ne a nthoba maikutlo ’me a nkhopotsa hore Jehova oa ntsotella.”—Pes. 94:19.

6. Ho ithuta Bibele u le mong le ho ea libokeng ho ka u thusa joang?

⁶ Ha ho e-na le lefu la seoa, ho ka ’na ha e-ba thata ho etsa lintho tseo u neng u tloaetse ho li etsa empa u se ke oa lumella boemo boo ho u sitisa ho ithuta Bibele le ho ea libokeng. Lipale tsa bophelo tse hlahang lingoloeng le livideong tsa rona, lia re hopotsa hore bara le barali ba bo rona ba ntse ba sebeletsa Jehova ka botšepehi ho sa tsotellehe liteko tseo ba tobanang le tsona. (1 Pet. 5:9) Liboka li tla u thusa hore u lule u nahana ka lintho tse khothatsang tse hlahang Bibeleng. Hape li tla u fa monyetla oa hore u khothatse ba bang ’me le uena u khothatsoe. (Bar. 1:11, 12) Ha u nahana kamoo Jehova a ileng a tšehetsa bahlanka ba hae ha ba kula, ba tšohile kapa ba ikutloa ba le bang, tumelo ea hao e tla matlafala ebile u tla kholiseha le ho feta hore le uena Jehova u tla u tšehetsa.

7. U ka ithuta’ng mohlaleng oa moapostola Johanne?

 ⁷ Leka ho buisana le bara le barali ba bo rona. Ha ho e-na le mafu a seoa, re ka ’na ra hloka ho siea sebaka lipakeng tsa rona le batho ba bang ho akareletsa le Bakreste-’moho le rona. Ka linako tseo tse joalo u ka ’na oa ikutloa joaloka moapostola Johanne. O ne a batla ho kopana le motsoalle oa hae Gaiase a bue le eena ba shebane. (3 Joh. 13, 14) Leha ho le joalo, Johanne o ne a tseba hore o ne a tl’o qeta nako e itseng a sa khone ho kopana le Gaiase. Kahoo, Johanne o ile a etsa seo a neng a khona ho se etsa, o ile a ngolla Gaiase lengolo. Ha ho sa khonahale hore u etele bara le barali ba bo rona, u ka leka ho ba founela le bue le butse livideo kapa u ba romelle molaetsa. Ha u tloaetse ho buisana le Bakreste-’moho le uena u ke ke oa ikutloa eka u mong ebile u tla ba le khotso. Hape ha u ikutloa u tšoenyehile, buisana le baholo ’me u mamele likhothatso tsa bona.—Esa. 32:1, 2.

8. Koluoa e ka senya khotso ea hao joang?

⁸ Haeba moo u lulang teng ho kile ha e-ba le likhohola, tšisinyeho ea lefatše kapa mollo, u ka ’na oa qeta nako e telele u ntse u tšoenyehile ka lintho tseo le haeba li se li fetile. Haeba u ile oa hlokahalloa ke motho eo u mo ratang kapa ntlo le thepa ea hao tsa senyeha, ho ka etsahala hore u ile oa utloa bohloko haholo, oa felloa ke tšepo oa ba oa ikutloa u koatile. Taba ena ha e bolele hore u rata thepa ea hao haholo kapa hore ha u na tumelo. U hlahetsoe ke ntho e bohloko haholo ’me batho ba bang ba ka ’na ba lebella hore u etse lintho tse fosahetseng. (Jobo 1:11) Empa ho sa tsotellehe maemo ao a nyahamisang, u ntse u ka khona ho ba le khotso. Joang?

9. Jesu o ile a re’ng ho re lokisetsa likoluoa?

⁹ Hopola seo Jesu a ileng a se bua. Batho ba bang ba nahana hore ba ke ke ba hlaheloa ke likoluoa empa rona rea tseba hore likoluoa li tl’o eketseha le hore tse ling tsa tsona li ka ’na tsa re ama. Jesu o ile a bolella balateli ba hae hore “litšisinyeho tse kholo tsa lefatše” le likoluoa tse ling li ne li tla etsahala pele bofelo bo tla. (Luka 21:11) O ile a boela a profeta hore ‘tlolo ea molao e tla ata’ ’me ke sona se etsahalang kajeno. Ka mohlala, ho na le bokebekoa, lintoa le bokhukhuni. (Mat. 24:12) Jesu ha aa ka a re lintho tsena li tla hlahela batho ba sa mameleng Jehova feela. Bahlanka ba bangata ba tšepahalang ba Jehova le bona ba ile ba hlaheloa ke likoluoa. (Esa. 57:1; 2 Bakor. 11:25) Jehova a ka ’na a se ke a re sireletsa ka mohlolo ha re hlaheloa ke likoluoa empa o tla re fa lintho tsohle tseo re li hlokang e le hore re lule re khobile matšoafo.

10. Ke hobane’ng ha re ka re ho itokiseletsa hona joale bakeng sa likoluoa ho bontša hore re na le tumelo? (Liproverbia 22:3)

¹⁰ Ha re itokiselitse maemo a tšohanyetso ho tla ba bonolo hore re sebetsane le ’ona re khobile matšoafo. Empa na ho itokisa ho bolela hore ha re tšepe Jehova? Ha ho joalo. Ha e le hantle, ho itokiseletsa likoluoa ho bontša hore re na le tumelo ea hore a ka khona ho re hlokomela. Joang? Lentsoe la Molimo le re khothaletsa hore re itokiseletse likoluoa tse ka ’nang tsa re hlahela. (Bala Liproverbia 22:3.) Ka makhetlo mokhatlo oa Molimo o sebelisa lihlooho tsa limakasine, liboka le litsebiso ho re khothaletsa hore re lule re itokiselitse maemo a tšohanyetso. c Na re tšepa Jehova? Haeba ho joalo re tla mamela keletso ena hona joale pele koluoa e hlaha.

11. U ithuta’ng mohlaleng oa morali oa bo rona Margaret?

¹¹ Nahana ka mohlala oa morali oa bo rona  Margaret. O ile a laeloa hore a tlohe ntlong ea hae ka mor’a hore ho be le mollo sebakeng seo a lulang ho sona. Kaha batho ba bangata ba ne ba baleha, ho ne ho tletse likoloi tse ngata tseleng hoo li neng li sa khone ho tsamaea. Ho ne ho e-na le mosi o mongata tseleng ’me morali oa bo rona Margaret o ne a sa khone ho tsoa ka koloing ea hae. Empa o ile a pholoha hobane o ne a itokiselelitse koluoa. Ka mokotleng oa hae o ne a kentse ’mapa o neng o mo bontša tsela e ’ngoe eo a ka e nkang. Hape o ne a kile a ea tseleng eo ho ea bona hore na a ka khona ho e sebelisa ha ho hlaha boemo ba tšohanyetso. Kahoo, morali oa bo rona Margaret o ile a pholoha hobane o ne a itokiselelitse boemo ba tšohanyetso.

12. Ke hobane’ng ha re mamela litaelo tse re thusang ho lula re sireletsehile?

¹² Ka linako tse ling balaoli ba ka ’na ba re kopa hore re khutlele hae ka nako e itseng, re tlohe moo re lulang teng kapa hore re latele litaelo tse itseng e le hore rona le batho ba bang re sireletsehe. Batho ba bang ba lieha ho mamela litaelo tsena hobane ha ba batle ho siea lintho tsa bona. Bakreste bona ba lokela ho etsa’ng boemong boo? Bibele e re: “Mamelang Morena ka hore le ikokobeletse bohle ba nang le bolaoli, ebang ke marena hobane a le phahametse kapa babusisi hobane ba rometsoe ke eena.” (1 Pet. 2:13, 14) Mokhatlo oa Molimo o boetse o re fa litaelo tse re thusang hore re lule re sireletsehile. Re lula re khothaletsoa hore re fe baholo linomoro tsa rona e le hore ba tle ba re letsetse ha ho hlaha boemo ba tšohanyetso. Na u se u ba file tsona? Re ka ’na ra fuoa litaelo tsa hore re lule sebakeng se itseng kapa re tlohe sebakeng se itseng kapa litaelo tsa hore na re ka fumana liphallelo joang kapa hore na re thuse batho ba bang joang. Ha re sa mamele litaelo tseo re ka ’na ra beha bophelo ba rona le ba baholo kotsing. Re lokela ho hopola hore banna bana ba tšepahalang ba lula ba re hlokometse. (Baheb. 13:17) Morali oa bo rona Margaret o re: “Ke kholisehile hore ho mamela litaelo tsa baholo le tsa mokhatlo oa Molimo ho pholositse bophelo ba ka.”

13. Ke’ng e thusitseng Bakreste ba bangata hore ba lule ba thabile ’me ba e-na le khotso le hoja ba tlohile malapeng a bona?

¹³ Bara le barali ba bo rona ba bangata ba ileng ba tlameha ho tloha malapeng a bona ka lebaka la likoluoa kapa lintoa, ba lekile ho tloaela maemo a macha ’me ba sebeletsa  Jehova haholoanyane. Ba etsisa Bakreste ba khale ba neng ba “bolela litaba tse monate tsa lentsoe la Molimo” le hoja ba ne ba hasane ka lebaka la mahloriso. (Lik. 8:4) Ho ruta batho Bibele ho ba thusa hore ba nahane ka ’Muso oa Molimo ho e-na le ho nahana ka mathata a bona. Ka lebaka leo ba lula ba thabile ’me ba e-na le khotso.

14. Ho hlorisoa ho ka re sitisa ho ba le khotso joang?

¹⁴ Ha re hlorisoa re ka lahleheloa ke lintho tse ngata tse re thusang ho ba le khotso. Rea thaba ebile rea khotsofala ha re kopana ka bolokolohi, re ruta batho Bibele ebile re etsa mesebetsi e meng eo re tloaetseng ho e etsa re sa tšohe hore re ka ’na ra tšoaroa. Ha re sa khone ho etsa lintho tseo, re ka ’na ra tšoenyeha, ra ipotsa hore na ho tl’o etsahala’ng nakong e tlang. Ha ho phoso ho ikutloa ka tsela ena. Empa re lokela ho ba hlokolosi. Jesu o ile a re mahloriso a ka etsa hore balateli ba hae ba felloe ke tumelo. (Joh. 16:1, 2) Kahoo, re ka lula re e-na le khotso joang ha re hlorisoa?

15. Ke hobane’ng ha re sa lokela ho tšaba ho hlorisoa? (Johanne 15:20; 16:33)

¹⁵ Lentsoe la Molimo le re: “Barutuoa bohle ba Kreste Jesu ba batlang ho sebeletsa Molimo ka botšepehi ba tla hlorisoa.” (2 Tim. 3:12) Mor’abo rona Andrei o ne a sa lumele hore bahlanka ba Jehova ba ka hlorisoa kaofela ka mor’a hore mosebetsi oa ho ruta Bibele o thibeloe naheng ea bona. O ne a re: ‘Ho na le Lipaki tse ngata haholo mona. Ba busang ba ka khona joang ho re tšoara kaofela?’ Ho e-na le hore mor’abo rona Andrei a be le khotso, ho nahana ka tsela ena ho ile ha etsa hore a lule a tšoenyehile. Bara ba bang ba bo rona ba ne ba tšepile Jehova ’me ha baa ka ba nahana hore ba ke ke ba tšoaroa. Ba ne ba tseba hore ba ka ’na ba tšoaroa empa ba ne ba sa tšoenyeha haholo joaloka mor’abo rona Andrei. O ile a ba etsisa ka hore le eena a tšepe Molimo ka ho feletseng. Ka mor’a moo, o ile a ba le khotso le hoja ho ne ho e-na le mathata a mangata. Sena se ka re etsahalla le rona. Ha Jesu a re bolella hore re lebelle mahloriso, o ile a re kholisa hore le rona re ka khona ho lula re tšepahala.—Bala Johanne 15:20; 16:33.

16. Ke litaelo life tseo re lokelang ho li mamela ha re hlorisoa?

¹⁶ Ha mosebetsi oa rona o thibetsoe, re ka ’na ra fumana litaelo tse tsoang ofising ea lekala  le ho baholo. Litaelo tsena lia re sireletsa, li re thusa hore re ’ne re fumane lingoloa le livideo ebile li re thusa hore re ’ne re rute batho Bibele. Leka kahohle hore u mamele litaelo tseo u li fuoeng le haeba u sa utloisise hore na hobane’ng ha u li fuoe. (Jak. 3:17) Re se ke ra fana ka boitsebiso ba bara le barali ba bo rona kapa ra bua ka mesebetsi eo re e etsang ka phuthehong ho batho ba sa tšoanelang ho tseba.—Moek. 3:7.

17. Joaloka baapostola ba mehleng ea khale, re ikemiselitse ho etsa’ng?

¹⁷ Lebaka le ka sehloohong leo Satane a loantšang bahlanka ba Molimo ka lona ke hore ke bona “ba filoeng mosebetsi oa ho paka ka Jesu.” (Tšen. 12:17) U se ke oa lumella hore Satane le batho bao a ba busang ba u tšose. Ho ruta batho Bibele le hoja re hanyetsoa ho etsa hore re thabe ’me re be le khotso. Mehleng ea baapostola ha babusi ba Bajuda ba ne ba re baapostola ba tlohele ho bolela litaba tse monate, baapostola bao ba ile ba khetha ho mamela Molimo. Ba ile ba tsoela pele ka ho ruta ’me mosebetsi oo o ile oa ba thabisa. (Lik. 5:27-29, 41, 42). Ke ’nete hore ha mosebetsi oa rona o thibetsoe re lokela ho ba hlokolosi ha re ruta batho Bibele. (Mat. 10:16) Ha re etsa sohle seo re ka se khonang re tla ba le khotso e tlisoang ke ho thabisa Jehova le ho fa batho molaetsa o tla ba pholosa.

18. Re ka fumana khotso ea ’nete hokae?

¹⁸ Re ka kholiseha hore le linakong tse thata re ka lula re e-na le khotso. Linakong tseo tse joalo re lokela ho hopola hore khotso eo re e hlokang ke khotso ea Molimo, e leng khotso eo re ka e fuoang ke Jehova feela. Itšetlehe ka eena ha u kopana le mathata a kang mafu a seoa, likoluoa kapa mahloriso. Lula u le haufi le mokhatlo oa hae. Nahana ka bokamoso bo monate boo re tl’o bo thabela. Ha u etsa joalo, ‘Molimo oa khotso o tla ba le uena.’ (Bafil. 4:9) Sehloohong se latelang re tl’o bona hore na re ka thusa Bakreste-’moho le rona joang ho ba le khotso ea Molimo le hoja ba e-na le mathata.