Na u balile lihlooho tsa Molula-Qhooa tsa selemong see ka hloko? Haeba ho joalo, leka ho bona hore na u ka araba lipotso tse latelang:

Ho ‘fetola tsela eo re nahanang ka eona’ ho bolela eng? (Bar. 12:2)

Ha ho bolele ho etsa lintho tse seng kae feela tse ntle. Re lokela ho itseba hantle hore na re batho ba joang ’me re etse liphetoho tse hlokahalang e le hore re ka mamela melao ea Jehova kahohle kamoo re ka khonang.—w23.01, leq. 8-9.

Re ka ba hlokolosi joang ha re bona lintho tse etsahalang lefatšeng?

Re na le mabaka a utloahalang a ho thahasella ho bona hore na lintho tse etsahalang lefatšeng li phethahatsa boprofeta ba Bibele joang. Ha rea lokela ho inahanela hore na ho tla etsahala’ng hobane seo se ka etsa hore ho be le ho se utloane ka phuthehong. Re lokela ho bua lintho tse thehiloeng lingoloeng tsa rona. (1 Bakor. 1:10)—w23.02, leq. 16.

Kolobetso ea Jesu le ea balateli ba hae li fapane joang?

Jesu o ne a sa hloke ho inehela ho Jehova joaloka rona hobane o ne a tsoaletsoe sechabeng se inehetseng ho Molimo. Kaha o ne a phethahetse ’me a se na sebe, o ne a sa hloke ho baka.—w23.03, leq. 5.

Re ka etsa’ng e le hore re thuse batho ba bangata hore ba be le monyetla oa ho arabela libokeng?

Re ka fana ka likarabo tse khutšoanyane e le hore ba bang ba ka arabela. Hape re ka qoba ho bua ka lintlha tse ngata. Ha re etsa joalo, ba bang ba tla ba le lintlha tseo ba tla arabela ka tsona.—w23.04, leq. 23.

“Tsela ea Khalalelo” eo ho buuoang ka eona ho Esaia 35:8 ke eng?

Mehleng ea Baiseraele, tsela ena e kholo ea tšoantšetso e ne e le tsela eo Bajuda ba ileng ba tsamaea ka eona ho tloha Babilona ho ea habo bona. Mehleng ee teng “Tsela ea Khalalelo” ke eng? Lilemo tse makholo pele ho 1919, ho ile ha etsoa mosebetsi o neng o hlokahala o akareletsang ho fetoleloa le ho hatisoa ha Libibele. Haesale batho ba Molimo ba tsamaea ‘Tseleng ea Khalalelo’ e ba thusitseng ho lula ba rapela Jehova. Tsela eo e tla ba lebisa litlhohonolofatsong tse tla tlisoa ke ’Muso oa Molimo.—w23.05, leq. 15-19.

Liproverbia khaolo ea borobong e fana ka keletso e buang ka basali bafe ba babeli?

Liproverbia e bua ka “mosali ea se nang kelello” eo memo ea hae e lebisang “Lebitleng.” Hape e bua ka mosali ea tšoantšetsang “bohlale ba ’nete” eo memo ea hae e lebisang bophelong le “tseleng ea kutloisiso.” (Liprov. 9:​1, 6, 13, 18)—w23.06, leq. 22-24.

Jehova o ile a bontša joang hore o ikokobelitse le hore o fetoha le maemo ha a ne a thusa Lota?

Jehova o ile a laela Lota hore a tlohe Sodoma a balehele lithabeng. Ha Lota a ne a kopa hore a balehele Zooare, Molimo o ile a mamela kopo ea hae.—w23.07, leq. 21.

Mosali a ka etsa’ng ha monna oa hae a shebella pornography?

A hopole hore ha aa lokela ho ipeha molato. O lokela ho nahana haholo ka kamano ea hae le Molimo le ho nahanisisa ka litlaleho tsa Bibele tsa basali ba neng ba e-na le mathata ba ileng ba tšelisoa ke Molimo. A ka thusa monna oa hae hore a qobe ho ipeha tekong ea ho shebella pornography.—w23.08, leq. 14-17.

Ha motho a re botsa lipotso ka lintho tseo re li lumelang, ho ba le temoho ho tla re thusa joang hore re mo arabe ka bonolo?

Re lokela ho nahana hore na potso ea hae e ka re thusa joang hore re tsebe hore na o nahanne eng le hore na ke lintho life tseo a li nkang e le tsa bohlokoa. Ho etsa joalo ho tla re thusa hore re mo arabe ka bonolo.—w23.09, leq. 17.

Mohlala oa Maria o ka re ruta eng ka ho matlafatsoa?

Ka mor’a hore a tsebe hore e tl’o ba ’mè oa Mesia, o ile a matlafatsoa ke batho ba bang. Gabariele le Elizabetha ba ile ba matlafatsa Maria ka ho mo khothatsa ka Mangolo. Le rona re ka matlafatsoa ke Bakreste-’moho le rona.—w23.10, leq. 15.

Jehova a ka araba lithapelo tsa rona joang?

O tšepisa hore o tla mamela lithapelo tsa rona le ho sheba hore na li amana joang le morero oa hae. (Jer. 29:12) A ka araba lithapelo tse tšoanang ka litsela tse fapaneng empa kamehla o tla re thusa.—w23.11, leq. 21-22.

Baroma 5:2 e bua ka “tšepo.” Joale ke hobane’ng ha tšepo e hlaha hape temaneng ea bone?

Ha motho a utloa litaba tse monate, a ka ’na a ba le tšepo ea ho phela paradeiseng lefatšeng. Empa ha motho a e-ba le mathata, a a mamella ebile a bona hore Molimo oa mo amohela, ho ka etsahala hore tšepo ea hae e be matla le ho feta ’me e be ea sebele ho eena.—w23.12, leq. 12-13.