HA HO pelaelo hore u thabela lintho tse ngata tseo Jehova a u fileng tsona le bolokolohi ba hore u ka thabela limpho tseo joang. Bibele e re veine ke mpho e tsoang ho Molimo. E boetse e re: “Lijo li etselitsoe ho re thabisa, veine e natefisa bophelo.” (Moek. 10:19; Pes. 104:15) Leha ho le joalo, mohlomong u hlokometse hore batho ba bang ba se ba noa joala haholo. Hape batho ba na le maikutlo a fapaneng ka hore na ba lokela ho noa joala hakae. Ke’ng e ka thusang Bakreste hore ba etse liqeto tse nepahetseng ka ho noa joala?

Ha re etsa liqeto ha rea lokela ho ea ka hore na batho ba moo re lulang teng ba nahana joang empa re lokela ho latela keletso ea Molimo. Haeba re etsoa joalo, re tla thabela bophelo.

Mohlomong u hlokometse hore batho ba bangata ba se ba noa joala hangata ebile ba bo noa haholo. Batho ba bang ba noa joala hobane bo etsa hore ba ikutloe ba khatholohile. Ba bang ba noa joala hore ba itebatse mathata a bona. Libakeng tse ling batho ba nahana hore ho noa joala bo bongata ho bontša hore motho o holile ebile o na le matla.

’Mopi oa rona ea lerato o re file keletso e ka re thusang tabeng ena. Ka mohlala, o re lemositse ka litla-morao tse bohloko tseo re ka li fumanang ha re noa joala haholo. E ka ’na eaba re ile ra bala Liproverbia 23:​29-35 moo ho buuoang ka motho ea tahiloeng le mathata a mang a ileng a mo hlahela. a Mor’abo rona Daniel eo e leng moholo Europe o hopola kamoo bophelo ba hae bo neng bo le kateng pele e e-ba Mokreste. O re: “Ke ne ke noa joala haholo ’me seo se ne se etsa hore ke etse liqeto tse fosahetseng. Ke ile ka hlaheloa ke lintho tse bohloko ’me ke ntse ke utloa bohloko le hona joale ha ke nahana ka tsona.”

Ke joang re ka etsang liqeto tse nepahetseng ka ho noa joala le ho qoba mathata a ka re hlahelang haeba re noa haholo? Re lokela ho susumetsoa ke tsela eo Molimo a shebang lintho ka eona ha re etsa liqeto.

A re boneng hore na Bibele e re’ng ka joala le mabaka a mang a etsang hore batho ba bang ba noe joala.

Lentsoe la Molimo ha le re ho phoso ho noa joala. Ha e le hantle Bibele e bontša hore ho noa veine e ka ba ntho e thabisang motho. E re: “U je lijo tsa hao u nyakaletse ’me u noe veine ea hao ka pelo e thabileng.” (Moek. 9:7) Ho na le nako eo Jesu le eena a ileng a noa veine, esita le bahlanka ba bang ba tšepahalang ba Jehova ba ile ba noa veine.—Mat. 26:​27-29; Luka 7:34; 1 Tim. 5:23.

Leha ho le joalo, Lentsoe la Molimo le bontša hore ho na le phapang pakeng tsa ho noa joala le ho tahoa. E re: “Le se ke la tahoa ke veine.” (Baef. 5:18) Hape e re ‘matahoa . . . a ke ke a kena ’Musong oa Molimo.’ (1 Bakor. 6:10) Jehova o nka ho noa joala haholo le ho tahoa ho fosahetse. Kahoo, ho e-na le hore re etsise batho bao re lulang le bona ha re etsa qeto ea hore na re tla noa hakae, re lokela ho etsa qeto eo re itšetlehile ka hore na Molimo o batla hore re etse’ng.

Batho ba bang ba re ba ka noa joala bo bongata ntle le hore ba tahoe. Leha ho le joalo, ho etsa joalo ho kotsi haholo. Mangolo a bontša hore batho bao e leng “makhoba a veine” ba ka etsa liphoso tse kholo ’me ba senya setsoalle sa bona le Jehova. (Tite 2:3; Liprov. 20:1) Jesu le eena o  ile a re lemosa hore “ho noa haholo” ho ka etsa hore re se ke ra kena lefatšeng le lecha la Molimo. (Luka 21:​34-36) Joale ke’ng e ka thusang Mokreste hore a qobe mathata a ka hlahang ka lebaka la ho noa joala?

Ha re etsa qeto ea ho noa joala, ho kotsi hore re susumetsoe ke tsela eo batho bao re lulang le bona ba noang ka eona. Bakreste ba batla ho thabisa Jehova ha ba ja le ha ba noa. Bibele e re: “E-bang lea ja, lea noa kapa le etsa ntho efe kapa efe, le etse lintho tsohle ka tsela e tla etsa hore Molimo a rorisoe.” (1 Bakor. 10:31) A re bueng ka lipotso tse ling tseo u ka ipotsang tsona le litemana tsa Bibele tse ka u thusang:

Na ke noa joala e le hore ke be le metsoalle? Exoda 23:2 e re: “U se ke oa latela bongata.” Jehova o ne a lemosa Baiseraele hore ba se ke ba etsisa batho ba neng ba sa mo thabise. Keletso ena ke ea bohlokoa le ho Bakreste mehleng ena. Haeba re lumella batho ba bang hore ba susumetse tsela eo re nahanang ka eona le liqeto tseo re li etsang ka ho noa joala, re ka khaotsa ho mamela melao ea Jehova ’me ra senya setsoalle sa rona le eena.—Bar. 12:2.

Na ke noa joala hobane ke batla ho bontša hore ke motho ea matla? Libakeng tse ling ho noa joala hangata le ho noa haholo ke ntho e tloaelehileng le e amohelehang. (1 Pet. 4:3) Empa 1 Bakorinthe 16:13 e re: “Lulang le falimehile, le eme le tiile tumelong, le be sebete ’me le be matla.” Na ho noa joala ho ka etsa hore motho a be matla? Che. Ho noa joala ho ka etsa hore motho a se ke a nahana le ho etsa lintho hantle. Kahoo, ho noa joala bo bongata ha ho bontše hore motho o matla empa ho bontša hore motho ke leoatla. Esaia 28:7 e hlalosa motho ea tsoileng tseleng ka lebaka la joala e le motho ea thekeselang le ea khoptjoang ha a etsa qeto.

Jehova ke eena ea re fang matla ao re a hlokang e le hore re ka etsa lintho tse nepahetseng. Ho ba matla ho akareletsa ho lula re falimehile le ho ema re tiile tumelong. (Pes. 18:32) Re ka etsa sena ka hore re lule re falimehile le ka hore re qobe ho etsa liqeto tse tla senya setsoalle sa rona le Jehova. Jesu o ile a bontša hore o matla hobane o ne a e-na le kamano e ntle le Jehova hape batho ba ne ba mo hlompha hobane o ne a  le sebete ’me a lula a ikemiselitse ho etsa se nepahetseng.

Na ke noa joala ho itebatsa mathata a ka? Mopesaleme o ile a re: “Ha ke tšoenyehile haholo, u [Jehova] ile oa ntšelisa oa ba oa etsa hore ke thabe.” (Pes. 94:19) Haeba u tšoenyehile ka ntho e itseng, u se ke oa noa joala empa u kope Jehova hore a u thuse. Ntho e ka u thusang ke hore u rapele Jehova hangata. Hape batho ba bangata ba hlokometse hore ho kopa keletso ho Mokreste-’moho ea nang le boiphihlelo ho ba thusitse haholo. Ho e-na le hore joala bo thuse motho ho rarolla mathata a hae, ha e le hantle bo etsa hore a se ke a ikemisetsa ho etsa lintho tse nepahetseng. (Hos. 4:11) Daniel eo re buileng ka eena qalong o re: “Ke ne ke tšoenyehile ebile ke ikutloa ke le molato. Kahoo, ke ne ke noa joala e le hore ke sebetsane le bothata bona empa ho e-na le hore ho loke, mathata a ka a ile a eketseha. Ke ile ka lahleheloa ke metsoalle ’me ka lahleheloa ke seriti.” Ke’ng e ileng ea thusa Daniel? O re: “Ke ile ka hlokomela hore ha ke hloke joala empa ke hloka thuso ea Jehova. Qetellong ke ile ka khona ho mamella mathata a ka le ho a hlola.” Jehova o lula a ikemiselitse ho re thusa le haeba boemo ba rona bo bonahala eka bo ke ke ba loka.—Bafil.4:​6, 7; 1 Pet. 5:7.

Haeba ka linako tse ling u noa joala, u ka hlahloba hore na ke hokae moo u lokelang hore u etse liphetoho ka hore u ipotse lipotso tse latelang: ‘Na e mong oa lelapa kapa e mong oa metsoalle ea ka o bontša hore o tšoenyehile ka tsela eo ke noang ka eona?’ Haeba ho joalo, sena se ka bontša hore u se u e-ba le bothata ba ho noa u sa hlokomele. ‘Na ke noa ho feta kamoo ke neng ke tloaetse?’ Le hoja u se lekhoba la ho noa joala, ena e ka ba ntho e bontšang hore u haufi le ho ba lona. ‘Na ho thata hore ho fete matsatsi a itseng kapa ho feta ke sa noe?’ Haeba ho joalo, sena se ka bolela hore motho e se e le lekhoba la joala ’me o hloka ho ea sebakeng seo ho thusoang batho ba nang le bothata ba ho noa joala haholo.

Bakreste ba bang ba entse qeto ea hore ba se ke ba noa joala ho hang hobane bo baka mathata a mangata. Ba bang ba khetha hore ba se ke  ba noa joala hobane ba sa rate tatso ea bona. Haeba motsoalle oa hao a entse qeto ea hore a se ke a noa joala, u ka bontša mosa ka hore u hlomphe qeto ea hae le hore u se ke oa mo tšoaea phoso.

Mohlomong u hlokometse hore ho ipehela hore na u tla noa joala bo bokae ho u tsoela molemo. Kapa u ipehetse moeli oa hore u tla noa hakae, mohlomong ha ’ngoe ka beke kapa nakong eo u jang ka eona. Ba bang ba ipehetse meeli ea hore ba tla noa joalo bofe ka tekanyo, bo kang veine kapa biri empa ba ka etsa qeto ea hore ba ke ke ba noa joala bo nang le liphesente tse ngata tsa tahi kapa joala bo tsoakiloeng le lino tse ling. Ha motho a ipehela meeli ea hore o tla noa hakae, ho tla ba bonolo hore a se ke a e tlola. Ha ho hlokahale hore Mokreste a khathatsehe ka hore na batho ba bang ba tla re’ng ka qeto eo a e entseng.

Ha re etsa qeto ea hore re tla noa joala, re lokela ho nahanela maikutlo a batho ba bang. Baroma 14:21 e re: “Ho molemo hore u se ke oa ja nama, oa noa veine kapa oa etsa eng kapa eng e tla etsa hore ngoan’eno a fokolloe ke tumelo.” U ka latela keletso ee joang? E-ba motho ea nang le lerato. Haeba u utloa eka ho noa joala ho ka khopisa motho e mong, lerato le ka u susumetsa hore u se ke oa noa joala ka nako eo. Ha u etsa joalo, u tla be u bontša hore u rata batho ba bang le ho hlompha maikutlo a bona le hore oa ba tsotella ’me ha u inahane bouena feela.—1 Bakor. 10:24.

E ka ’na eaba ’muso o na le melao e mabapi le ho noa joala ’me Mokreste o lokela ho mamela melao ena. Melao eo e ka ’na ea bontša hore na motho o lokela ho ba lilemong life e le hore a ka noa joala kapa e ka thibela batho hore ba noe joala haeba ba khanna kapa ba sebelisa mechini e itseng.—Bar. 13:​1-5.

Jehova o re file limpho tse ngata tse thabisang ’me e ’ngoe ea tsona ke bolokolohi ba hore na re ka li sebelisa joang. Li akareletsa bolokolohi ba hore na re tla ja’ng le hore re tla noa’ng. E se eka liqeto tsa rona li ka bontša hore re ananela bolokolohi bona ka hore re thabise Ntate oa rona ea leholimong.