Ke hlahetse Paris, Fora ka 1941 ’me lapeng re ne re se barui. Ke ne ke rata sekolo haholo kahoo u se u ka inahanela hore na ke ile ka utloa bohloko hakaakang ha ke le lilemo li leshome ’me ke fumana hore ke tšoeroe ke lefuba joale ke tlameha ho tlohela sekolo! Lingaka li ile tsa nkhothalletsa hore ke phomole e le hore ke se ke ka khathala ka sefubeng. Ke ile ka qeta likhoeli tse ’maloa ke bala buka e hlalosang mantsoe ebile ke mamela mananeo a se-ea-le-moea sa univesithi ea Paris. Ke ile ka thaba haholo ha ngaka ea ka e mpolella hore ke folile ’me nka khutlela sekolong. Ke ile ka bona hore mosebetsi oa lingaka ke oa bohlokoa. Ho tloha ka nako eo, toro ea ka e ne e le ho ba ngaka. Nako eohle ha ntate oa ka a ne a mpotsa hore na ke batla ho ba eng ha ke hola, ke ne ke lula ke re ke batla ho ba ngaka. Kahoo ho ba ngaka e ile ea e-ba ntho ea bohlokoa haholo ho ’na.

Heso re ne re le Mak’hatholike empa ke ne ke sa tsebe hakaalo ka Molimo ’me ke ne ke e-na le lipotso tse ngata. Ke ile ka qala ho kholiseha hore lintho li bopiloe ha ke ne ke ithutela ho ba ngaka univesithi.

Ke hopola ka lekhetlo la pele ha ke ne ke qala ho sheba palesa ka mochini o holisang lintho tseo re sa khoneng ho li bona ka mahlo. Ke ile ka hlolloa ha ke bona tsela eo sele e itšireletsang ka eona ha e utloa mocheso le serame. Ke ile ka boela ka hlokomela hore lero la sele lea kopana ha le utloa letsoai ebe lea saroloha ha le utloa metsi a hloekileng. Ka lebaka lena le a mang, lintho tse phelang li ka khona ho phela maemong a sa tšoaneng. Ha ke hlokomela kamoo  sele e ’ngoe le e ’ngoe e rarahaneng kateng, ke ile ka hlokomela hore bophelo ha boa e-ba teng feela tjee.

Ha ke le selemong sa ka sa bobeli sa ho ithutela ho ba ngaka, ke ile ka bona bopaki bo eketsehileng ba hore Molimo o teng. Ha re ntse re ithuta ka tsela eo ’mele oa motho o entsoeng ka eona, re ile ra bona hore sephaka se khona ho lumella menoana ea letsoho hore e kobehe le ho otloloha. Tsela eo mesifa le masapo li kopantsoeng ka eona le tsela eo li sebetsang ’moho ka eona ea hlolla. Mohlala, ke ile ka ithuta hore sephaka se na le mosifa o arohanang hore o be le mesifa e ’meli e eang menoaneng ea matsoho e mene ntle le o motona, e e thusang hore e se ke ea nyebella. Mesifa ena e kopane le menoana eo ea matsoho. Haeba mesifa e ne e sa sebetse ka tsela ena, ho ne ho ke ke ha e-ba bonolo hore menoana ea letsoho e otlolohe le ho kobeha. Kahoo ke ile ka bona ka ho hlaka hore Moetsi oa motho o bohlale hona hoo!

Ke ile ka hlolloa le ho feta ke mosebetsi oa Moqapi oa bophelo ha ke ithuta kamoo ngoana a hemang kateng ha a qeta ho hlaha. Ke ile ka ithuta hore pele lesea le hlaha, le fumana moea o hloekileng ho ’mè oa lona ka lelana la mokhubu. Ke ka lebaka leo masobana a matšoafong a e-s’o kang a e-ba le moea. Empa libeke tse seng kae pele ngoana a hlaha, ho ba le lero le kenang ka har’a masobana ao. Joale ha ngoana a hlaha ’me a qala ho hema, ho etsahala ntho e hlollang haholo. Lesobana le pelong ea ngoana le ea koaleha ’me sena se etsa hore mali a phallele matšoafong. Nakong eo ea bohlokoa, lero lane le keneng ka masobaneng a matšoafong le thibela masobana ao hore a kopane ’me ntho eo e etsa hore moea o kene habonolo. Hang-hang fela lesea leo le se le khona ho hema ka bo-lona le sa thusoe ke letho.

Ke ne ke batla ho tseba hore na ke mang ea entseng lintho tsena tse hlollang kahoo ke ile ka bala Bibele ka ho teba. Ke ile ka hlolloa haholo ke melao ea bohloeki eo Molimo a neng a e file Baiseraele lilemo tse 3 000 tse fetileng. Molimo o ile a laela Baiseraele hore ba koahele mantle a bona, ba itlhatsoe ka metsi khafetsa le hore ba behelle batho ba nang le mafu a tšoaetsanang ka thoko. (Lev. 13:50; 15:11; Deut. 23:13) Bibele e ile ea bua ka ho hlaka hore na mafu a tšoaetsana joang e leng ntho eo bo-rasaense ba ileng ba tseba ka eona lilemong tse 150 tse fetileng. Ke ile ka hlokomela hore melao ea thobalano e fumanoang bukeng ea Levitike e ne e thusa Baiseraele hore ba phele hantle. (Lev. 12:1-6; 15:16-24) Ke ile ka etsa qeto ea hore ’Mopi ea fileng Baiseraele melao ena o ne a amehile ka bophelo ba bona ’me o ne a hlohonolofatsa bohle ba neng ba mamela melao ea hae. Ke ile ka kholiseha hore Bibele ke buka e tsoang ho Molimo, eo ke neng ke sa tsebe lebitso la hae ka nako eo.

Ha ke ntse ke le univesithi ke ithutela ho ba ngaka, ke ile ka kopana le ngoanana ea bitsoang Lydie eo ke ileng ka ratana le eena. Ka 1965 ha ke le haufi le ho qeta univesithi, re ile ra nyalana. Ka 1971, ho bana ba rona ba tšeletseng re ne re se re e-na le ba bararo. Mosali oa ka o ntšehelitse haholo mosebetsing oa ka le ka lapeng.

 Ke sebelitse sepetlele lilemo tse tharo pele ke bula tleliniki ea ka. Nakoana ka mor’a moo, banyalani bao ke buileng ka bona qalong ea pale ea ka ba ile ba tla tleliniking ea ka. Nakong eo ke neng ke ba ngolla meriana, mosali o ile a etsa kopo ea hore meriana eo e se ke ea e-ba le mali. Ke ne ke maketse, kahoo ka mo botsa hore na hobane’ng. O ile a ntjoetsa hore ke Lipaki Tsa Jehova. Ke ne ke sa tsebe hohang ka Lipaki Tsa Jehova le hore na ba lumela eng tabeng ea mali. ’Mè eo o ile a sebelisa Bibele ho mpontša mabaka a ho se sebelise mali. (Lik. 15:28, 29) Ka mor’a moo, eena le monna oa hae ba ile ba mpontša seo ’Muso oa Molimo o tla se finyella e leng ho felisa mahlomola, ho kula le lefu. (Tše. 21:3, 4) Ke ile ka ba bolella ke thabile hore ntho eo ba mpolellang eona haesale e le toro ea ka ho tloha ke sa le monyenyane! Ke bile ngaka hobane ke batla ho thusa batho. Ke ne ke thabile hoo re ileng ra buisana nako e ka etsang hora le halofo. Ka nako eo ke qetang ho buisana le bona, ke ne ke kholisehile hore ha ke sa le Mok’hatholike, joale ka ithuta hore ’Mopi eo esale ke mo rata o na le lebitso e leng Jehova!

Ke ne ke kopana le banyalani bao hararo tleliniking ea ka, ’me nako le nako re ne re buisana ka nako e fetang hora. Ke ile ka re ba tle lapeng ha ka e le hore re ka buisana haholoanyane ka Bibele. Le hoja mosali oa ka a ile a lumela ho ithuta Bibele, o ne a sa batle ho lumela hore lithuto tse ling tse neng li rutoa K’hatholike li ne li fosahetse. Kahoo, ke ile ka kopa moruti hore a tle ha rona. Re ile ra buisana ka lithuto tsa kereke ho fihlela e e-ba bosiu re sebelisa Bibele feela. Puisano eo e ile ea kholisa mohats’aka hore Lipaki Tsa Jehova li ruta ’nete. Ka mor’a moo re ile ra rata Jehova haholo hoo re ileng ra kolobetsoa ka 1974.

Seo ke ileng ka ithuta sona ka morero oa Molimo ka batho se ile sa fetola lintho tse tlang pele bophelong ba ka. Ho sebeletsa Jehova e ile ea e-ba ntho e tlang pele bophelong ba ka le mohats’aka. Re ne re ikemiselitse ho holisa bana ba rona re tataisoa ke Bibele. Re ile ra etsa hore molao oa ho rata Molimo le ho rata moahelani e be oona o momahanyang lelapa la rona.​—Mat. 22:37-39.

’Na le Lydie re na le ho tšeha ha re hopola kamoo bana ba rona ba neng ba tseba kamoo re lumellanang kateng ha re etsa liqeto. Ba ne ba tseba hore taelo ea Jesu e reng “lentsoe la lona E le mpe le bolele E, Che ea lona, Che” e ne e le molao oa lapeng. (Mat. 5:37) Mohlala, mohats’aka  ha aa ka a lumella morali oa rona e moholo hore a intše le bacha ba bang ha a ne a le lilemo li 17. Ngoanana e mong o ile a re ho eena: “Haeba ’mè oa hao ha a batle, tsamaea u il’o kopa ho ntate oa hao.” Morali oa rona o ile a mo araba a re: “Hoa tšoana, ba lula ba lumellana.” Kahoo bana ba rona ba tšeletseng ba ne ba tseba hore re lula re lumellana ha re sebelisa melao-motheo ea Bibele. Re leboha Jehova haholo hore ebe boholo ba lelapa la rona lea mo sebeletsa kajeno.

Kaha ke ne ke ntse ke batla ho ba ngaka, ke ne ke batla ho thusa bahlanka ba Molimo le hoja ho ithuta Bibele ho ile ha fetola lintho tse tlang pele bophelong ba ka. Kahoo ke ile ka ithaopela ho sebetsa Bethele e Paris ke le ngaka eaba hamorao ke ea Bethele e Louviers. Ke na le lilemo tse ka bang 50 ke sebetsa Bethele ke ntse ke tloha hae. Ho fihlela hona joale, ke se ke entse metsoalle e mengata haholo lelapeng la Bethele ’me e meng ea eona e se e le lilemong tsa bo-90. Ke ile ka boela ka thaba haholo ha ke kopana le motho e mong ea sebetsang Bethele eo ke neng ke sa mo nahana. Ke ile ka fumana hore ke ile ka pepisa ’mè oa hae ha a ne a e-ba le eena lilemo tse 20 tse fetileng.

Ho theosa le lilemo, ke ile ka rata Jehova le ho feta ha ke hlokomela kamoo a tataisang le ho hlokomela batho ba hae ka mokhatlong oa hae. Mathoasong a bo-1980, Sehlopha se Busang se ile sa etsa tokisetso ea hore ho be le puisano lipakeng tsa Lipaki Tsa Jehova le lingaka Amerika mabapi le ho tšela mali.

Ka 1988, Sehlopha se Busang se ile sa theha lefapha le lecha la bongaka Bethele le bitsoang Lefapha la Boitsebiso ba Litšebeletso Tsa Lipetlele. Qalong, lefapha lena le ne le okametse Likomiti Tsa Bohokahanyi le Lipetlele tse ileng tsa thehoa Amerika ho thusa bakuli ba Lipaki hore ba fumane kalafo e loketseng. Kahoo ha ho etsoa tokisetso ea hore Likomiti Tsa Bohokahanyi le Lipetlele li be teng lefatšeng lohle, li ile tsa e-ba teng le Fora. Ke lula ke hlolloa ha ke bona kamoo mokhatlo oa Jehova o thusang bara le barali ba bo rona nakong eo ba hlokang thuso.

Haesale ke rata ho ba ngaka. Empa ha ke ntse ke nahana ka lintho tseo ke li ratang, ke ile ka hlokomela hore ntho ea bohlokoa ka ho fetisisa ke ho thusa batho hore ebe metsoalle ea Molimo le ho ba thusa hore ba be haufi le Mohloli oa bophelo, Jehova. Ka mor’a hore ke tlohele mosebetsi, ’na le mohats’aka re qeta lihora tse ngata ka khoeli re bolella batho molaetsa oa ’Muso re le bo-pula-maliboho ba kamehla. Re ntse re sebetsa ka thata kahohle kamoo re ka khonang mosebetsing ona o pholosang bophelo.

Ka nakoana ke ntse ke tsoela pele ho thusa batho ba kulang empa kea hlokomela hore esita le ngaka e tsebang litaba tsa eona hantle, e ntse e ke ke ea khona ho folisa mafu ’ohle le ho thibela lefu. Kahoo ke lebeletse ka tabatabelo e kholo nako eo ka eona bohloko, mahlomola le lefu li tla beng li le sieo. Lefatšeng le lecha le tlang ka potlako, ke tla ba le monyetla oa ho ithuta ka popo ea Molimo bophelo bohle ba ka ho akarelletsa le tsela e hlollang eo a entseng ’mele oa motho ka eona. Kannete ntho eo esale ke e labalabela ho tloha ke sa le ngoana e tla phethahala ka botlalo haufinyane. Ke kholisehile hore likholo li sa tla!