Ke ile ka tšeha hobane ke ne ke sa bone eka ke motho ea ka thahasellang lintho tsa bolumeli. Ke ile ka re: “U tseba eng ka Bibele?” O ile a lieha ho nkaraba. Empa qetellong o ile a mpolella hore ’mè oa hae ke Paki ea Jehova ’me o ile a ithuta lintho tse ngata ho eena. Ke ne ke batla hore a mpolelle lintho tse ling tseo a ithutileng tsona ho ’mè oa hae. Kahoo, ke ile ka mo phehella hore a mpolelle.

Bosiung boo, re ile ra qeta nako e telele re ntse re bua. Motsoalle oa ka o ile a mpolella hore Bibele e re Satane ke eena ea busang lefatše. (Joh. 14:30) E ka ’na eaba u tsebile taba ena bophelo bohle ba hao empa ’na ke ne ke qala ho e utloa ’me ke ne ke batla ho tseba haholoanyane ka eona. Ke ne ke lula ke utloa ho thoe lefatše le busoa ke Molimo hape ho thoe Molimo o mosa ebile o lokile. Empa taba eo e ne e sa utloahale ho latela hore na ke ne ke bona ho etsahala eng bophelong. Ke ne ke le lilemo li 26 feela empa ho ne ho se ho etsahetse lintho tse ngata tse ntšoenyang.

Ha ke ne ke le ngoana, ntate oa ka o ne a khanna lifofane tsa sesole sa Amerika. Kahoo, haesale ke tseba hore ntoa ea libomo tsa nuclear e ka qhoma neng kapa neng. Masole a ne a lula a le malala-a-laotsoe hore a betse bomo. Ho bile le ntoa Vietnam nakong eo ke ntseng ke le k’holejeng California. Ke ile ka kenela litoitoi tsa bana ba sekolo. Mapolesa a ile a re lelekisa ka melangoana le ho re fahla ka khase e llisang mahlo (tear gas). Ha re ntse re baleha, re ne re sa bone hantle ebile re qhoeloa ka lebaka la khase eo. Batho ba bangata e ne e le marabele ’me ho ne ho le morusu. Batho ba ne ba etsa litoitoi ’me baeta-pele ba lipolotiki ba bolaoa. Motho e mong le e mong o ne a e-na le maikutlo a hae ka hore na ho lokela hore ho etsoe eng. Ho ne ho hlile ho le moferefere.

Ka 1970, ke ile ka sebetsa karolong e ka leboea ea Alaska ’me ka etsa chelete e ngata. Ka mor’a moo, ke ile ka ea London, ka reka sethuthuthu eaba ke ea ke lebile boroa ke ipoleletse hore ke tla thuloa ke thaba feela. Likhoeli hamorao, ke ile ka fihla Afrika. Ha ke le tseleng, ke ile ka kopana le batho  bao le bona ba neng ba lakatsa eka ba ka baleha mathata a bona.

Lintho tseo ke ileng ka li bona le ho li utloa li ile tsa etsa hore ke lumellane le thuto ea Bibele ea hore lefatše le laoloa ke Satane. Empa ke ne ke batla ho tseba hore na Molimo eena o ntse a etsa eng haeba ha se eena ea laolang lefatše.

Likhoeling tse ileng tsa latela ke ile ka fumana karabo. Ha nako e ntse e e-ea, ke ile ka tseba ka ba ka rata batho ba ileng ba bontša ka liketso tsa bona hore ba tšepahalla Molimo oa ’nete ho sa tsotellehe maemo.

Ha ke se ke khutletse London, ke ile ka kopana le ’mè oa motsoalle oa ka eaba o mpha Bibele. Hamorao ke ile ka ea Amsterdam, Netherlands. Ka letsatsi le leng ke ne ke lutse tlas’a lebone la tseleng ke ntse ke bala Bibele eo. Paki e ’ngoe e ile ea mpona ’me ea nthusa hore ke utloisise Bibele. Ka mor’a moo ke ile ka ea Dublin, Ireland eaba ke fumana ofisi ea lekala ea Lipaki Tsa Jehova. Ha ke fihla, ke ile ka kokota monyako ’me ke moo ke ileng ka kopana le Mor’abo rona Arthur Matthews ea bohlale le ea nang le boiphihlelo. Ke ile ka kopa hore a ithute Bibele le ’na ’me o ile a lumela.

Ke ile ka chesehela ho ithuta ’me ke ne ke rata ho bala libuka le li makasine tseo Lipaki Tsa Jehova li li hatisitseng. Ke ne ke boetse ke bala Bibele. Ke ne ke thabile haholo. Ha ke le libokeng, ke ne ke bona le bana ba banyenyane ba tseba likarabo tsa lipotso tseo batho ba rutehileng ba ’nileng ba ipotsa tsona ka lilemo tse makholo tse kang, ‘Ke hobane’ng ha ho e-na le bokhopo? Molimo ke mang? Ho etsahala eng ha motho a e-shoa?’ Metsoalle ea ka kaofela e ne e le Lipaki Tsa Jehova. Ho ne ho le bonolo hore metsoalle ea ka e be Lipaki feela hobane ho ne ho se na batho bao ke ba tsebang naheng eo. E ile ea nthusa ho rata Jehova le ho etsa thato ea hae.

Ke ile ka kolobetsoa ka 1972. Selemo hamorao, ke ile ka ba pula-maliboho eaba ke kopanela le phutheho e nyenyane e neng e le Newry, Ireland Leboea. Ke ile ka hira ntlo e nyenyane lehlakoreng la thaba thoko le motse. Ho ne ho e-na le likhomo haufi le moo. Ke ne ke ema ka pel’a tsona ha ke itokisetsa ho fana ka lipuo ’me li ne li bonahala eka li mametse ka hloko ha li ntse li thuisa. Li ne li ke ke tsa bua hore na ke lokela ho ntlafatsa hokae empa li ne li nthusa ho sheba bamameli ha ke fana ka lipuo. Ka 1974 ke ile ka ba pula-maliboho e khethehileng ’me ke ile ka sebetsa le Nigel Pitt, eo e bileng motsoalle oa ka ho tloha ka nako eo.

 Ka nako eo, ho ne ho lula ho e-ba le lintoa Ireland Leboea. Batho ba bang ba ne ba re Ireland Leboea ke “naha ea libomo le likulo.” E ne e le ntho e tloaelehileng ho bona batho ba loana, likoloi li phahloloa ka libomo le batho ba thunngoa. Mathata a mangata a ne a le teng ka lebaka la lipolotiki le bolumeli. Leha ho le joalo, Maprostanta le Mak’hatholike a ne a hlokomela hore Lipaki Tsa Jehova ha li kenelle lipolotiking. Kahoo, re ne re khona ho paka ka bolokolohi ebile re sireletsehile. Batho bao re ba pakelang, hangata ba ne ba tseba hore na ho tla ba le lintoa neng le hore na li tla ba hokae. Kahoo, ba ne ba re bolella e le hore re ka qoba libaka tse joalo.

Ho ne ho ntse ho e-na le maemo a kotsi. Ka letsatsi le leng, re ne re ruta batho Bibele le Denis Carrigan toropong e haufi moo ho neng ho se na Lipaki. Denis e ne e le pula-maliboho. Re ne re kile ra ea moo hanngoe feela. Ha re le moo, ’mè e mong o ile a re re masole a Brithani a mautloela, mohlomong hobane ka bobeli ba rona re ne re sa bue joaloka batho ba Ireland. Ntho eo e ile ea re tšosa. U ne u ka bolaoa kapa oa thunngoa lengoleng hobane feela u buisitse lesole hantle. Ha re ntse re emetse bese re le bang ebile re hatsetse, re ile ra bona koloi e fihla e ema ka pel’a shopo. E ne e le moo re ileng ra kopana le ’mè ea ileng a re re masole a Brithani a mautloela. ’Mè eo o ile a tsoa, a bua le bo-ntate ba neng ba le ka koloing a ntse a re supa. Koloi eo e ile ea atamela ho rona eaba bo-ntate bao ba re botsa lipotso tse seng kae ka hore na bese e fihla le ho tsamaea neng. Ha bese e fihla, ba ile ba buisana le mokhanni oa eona. Re ne re sa utloe hore na ba ntse ba re’ng. Kaha e ne e le rona feela ba palamang, re ne re nahana hore ba ntse ba rera ho re ntša kotsi ha re le ka ntle ho toropo empa seo ha sea ka sa etsahala. Ha re theoha bese, ke ile ka botsa mokhanni hore na ho na le ntho eo bo-ntate bao ba e botsitseng ka rona. O ile a re: “Kea tseba hore le Lipaki Tsa Jehova kahoo, ke ile ka ba bolella. Le se ke la tšoenyeha, le sireletsehile.”

Ka 1976 ha re le kopanong ea setereke, ke ile ka kopana le Pauline Lomax eo e neng e le pula-maliboho e khethehileng e tsoang Engelane. E ne e le morali oa bo rona ea ratang Jehova haholo, ea ikokobelitseng le ea ratehang. Eena le khaitseli ea hae Ray, ba ithutile ka Jehova ba sa le banyenyane. Selemo hamorao re ile ra nyalana eaba re tsoela pele re ntse re le bo-pula-maliboho ba khethehileng Ballymena, Ireland Leboea.

Ka nakoana, re ile ra ba mosebetsing oa potoloho Belfast, Londonderry le libakeng tse ling tse kotsi. Re ile ra khothatsoa ke ho bona tumelo eo bara le barali ba bo rona ba neng ba e-na le eona. Ba ne ba ile ba tlohela litloaelo tsa bolumeli, khethollo le lehloeo e le hore ba sebeletse Jehova. O ile a ba sireletsa a ba a ba hlohonolofatsa haholo.

Ke ile ka lula Ireland ka lilemo tse leshome eaba ka 1981 re memeloa ho ea tlelaseng ea bo72 ea Gileade. Ka mor’a ho fumana mangolo a Gileade, re ile ra isoa Sierra Leone, Afrika Bophirimela.

Re ne re lula lehaeng la baromuoa le batho ba bang ba 11. Re ne re sebelisa kichine e le ’ngoe, matloana a mararo, libaka tse peli tsa ho hlapela, fono e le ’ngoe, mochine o le mong o hlatsoang liphahlo le mochine o le mong o li omisang. Motlakase o ne o lula o khaoha ebile e le ka linako tseo re sa li lebellang. Litoeba li ne li entse ha tsona karolong e ka marulelong ha linoha tsa masumu tsona li ne li kena karolong e ka tlase-tlase ea mohaho.

Maemo a bophelo a ne a se matle empa re ne re  thabela tšebeletso ea tšimo haholo. Batho ba ne ba hlompha Bibele ’me ba mamela ka hloko. Batho ba bangata ba ne ba ithuta Bibele ’me ba kolobetsoa. Batho ba moo ba ne ba re ke “Ntate Robert” ha Pauline eena ba ne ba re ke “’Mè Robert.” Ha ke se ke sa khone ho ea tšebeletsong ea tšimo kamehla ka lebaka la mosebetsi oo ke neng ke o etsa ofising ea lekala, batho ba ile ba qala ho bitsa Pauline “’Mè Pauline” eaba ’na ba mpitsa “Ntate Pauline.” Pauline o ne a thabela seo.

Bara le barali ba bo rona ba bangata ba ne ba futsanehile empa Jehova o ne a ba fa lintho tseo ba li hlokang, ka linako tse ling ebile e le ka litsela tse hlollang. (Mat. 6:33) Ke hopola ha morali oa bo rona e mong a ne a e-na le chelete ea ho reka lijo tsa letsatsi leo feela bakeng sa hae le bana ba hae. Empa o ile a e fa mor’abo rona e mong ea neng a se na chelete ea ho reka meriana ea malaria. Hamorao ’mè e mong o ile a fihla ha hae. O ile a kopa morali oa bo rona hore a mo lokise moriri a ba a mo patala. Ho ile ha e-ba le liketsahalo tse ngata tse tšoanang le eo.

Re lutse Sierra Leone ka lilemo tse robong eaba re isoa Bethele e Nigeria. E ne e le kholo ho feta ofisi ea lekala eo re neng re le ho eona pele. Ke ne ke etsa mosebetsi o tšoanang le oo ke neng ke o etsa ha ke le Sierra Leone empa mosebetsi oa Pauline oona o ile oa fetoha haholo ’me o ne o mo thatafalla. Pele o ne a etsa lihora tse 130 khoeli e ’ngoe le e ’ngoe tšebeletsong ea tšimo ’me o ne a e-na le lithuto tse tsoelang pele hantle. Empa hona joale o ne a se a roka ’me a qeta nako e ngata a roka liphahlo tse tabohileng. Ho ile ha mo nka nako hore a tloaele mosebetsi ona empa qetellong o ile a hlokomela hore batho ba bang ba ne ba ananela mosebetsi oo a o etsang. Kahoo, o ile a batla menyetla ea hore na ke joang a ka khothatsang batho ba bang ba sebetsang Bethele.

Ho ne ho e-na le lintho tse ngata tseo re lokelang ho ithuta tsona ka setso sa Nigeria. Ka le leng, mor’abo rona e mong o ile a tla ofising ea ka ho tla ntsebisa morali e mong oa bo rona ea sa tsoa amoheloa Bethele. Ha ke re ke isa letsoho kea mo lumelisa, o ile a khumama maotong a ka a shebisitse hlooho fatše. Ke ne ke maketse. Kapele feela ke ile ka nahana ka lengolo la Liketso 10:25, 26 le Tšenolo 19:10. Ho ne ho re ke mo joetse hore a se ke a etsa joalo, feela le teng ke ile ka hopola hore o qeta ho amoheloa Bethele e leng hore o ne a tseba seo Bibele e se rutang.

Ke ne ke se ke sa phutholoha ha moqoqo o ntse o tsoela pele. Ka mor’a moo, ke ile ka etsa  lipatlisiso ’me ka hlokomela hore morali oa bo rona o ne a etsa lintho ho latela litloaelo tsa setso tse neng li ntse li le teng libakeng tse ling tsa moo. Bo-ntate le bona ba ne ba ka lumelisa ka tsela ena hobane e ne e le tsela ea moo ea ho bontša tlhompho. E ne e se borapeli. Ho na le mehlala e tšoanang le eo ka Bibeleng. (1 Sam. 24:8) Ke ile ka thaba hore le hoja ke ne ke sa tsebe mokhoa ona oa ho bontša tlhompho, ha kea ka ka bua letho le neng le tla soabisa morali oa bo rona.

Re ile ra kopana le bara le barali ba bo rona ba bangata Nigeria ba ileng ba tšepahalla Jehova ka lilemo tse ngata. E mong oa bona ke Isaiah Adagbona. a O ithutile ka Jehova a sa le mocha empa o ile a tšoaroa ke lepera eaba o isoa lehaeng la balepera moo e neng e le eena feela Paki ea Jehova. Le hoja a ne a hanyetsoa, o ile a thusa balepera ba ka holimo ho 30 hore ba ithute ka Jehova a ba a thusa hore ho thehoe phutheho moo.

Ka 1996 re ile ra koptjoa ho ea sebetsa ofising ea lekala e Kenya. E ne e le lekhetlo la ka la pele ke khutlela Kenya. Re ne re lula Bethele ’me ho ne ho e-na le litšoene tse ngata tse neng li tloaetse ho nkela barali ba bo rona litholoana. Ka le leng, morali oa bo rona o ile a siea a butse fensetere. Ha a khutla, o ile a fumana litšoene li itšetla ka lijo tseo a neng a li siile ka moo a lulang. O ile a hoeletsa eaba oa baleha. Litšoene tseo li ile tsa tšoha eaba li tsoa ka fensetere.

Re ile ra ea phuthehong ea Seswahili. Ka mor’a nakoana re le moo, ke ile ka khetheloa ho khanna Thuto ea Buka (hona joale e bitsoa Thuto ea Bibele ea Phutheho). Leha ho le joalo, ke ne ke sa tsebe puo ea Seswahili hantle. Ke ne ke lokisetsa hantle esale pele kahoo, ke ne ke khona ho botsa lipotso. Empa ha bamameli ba ne ba araba ka mantsoe a bona, ke ne ke lahleha. Ho ne ho se bonolo. Ke ne ke utloela bara le barali ba bo rona bohloko. Leha ho le joalo, ba ne ba e-na le mamello hape ba ikokobelitse ’me ke ile ka rata taba eo.

Re lutse Kenya nako e ka tlase ho selemo eaba ka 1997 re memeloa ho ea sebetsa Bethele e Brooklyn, New York. Joale re ne re se re le naheng eo batho ba teng ba ruileng. Taba ena e ka ba bothata. (Liprov. 30:8, 9) Leha ho le joalo, bara le barali ba bo rona ba ne ba e-na le tumelo e matla. Ba sebelisa chelete ea bona le lintho tseo ba nang le tsona ho tšehetsa mosebetsi o etsoang ke mokhatlo oa Jehova ho e-na le ho batla ho rua.

Ka lilemo tse ngata, re ile ra bona ha bara le barali ba bo rona ba bontša hore ba na le tumelo tlas’a maemo a sa tšoaneng. Ha re le Ireland, re bone kamoo bara le barali ba bo rona ba nang le tumelo ho sa tsotellehe lintoa. Ha re le Afrika, re bone kamoo ba nang le tumelo ho sa tsotellehe bofutsana. Ha re le Amerika teng, re bone kamoo ba nang le tumelo le hoja ba ruile. E tlameha ebe Jehova o thaba haholo ha a bona batho ba mo rata ho sa tsotellehe maemo a bona.

Nako e tsamaile kapele “joaloka nalete ea motho ea rokang.” (Jobo 7:6) Hona joale re se re sebetsa ntlo-kholo e Warwick, New York ’me re thabela ho sebetsa ’moho le bara le barali ba bo rona ba lerato. Re thabile ebile re khotsofalletse ho etsa sohle seo re ka se khonang ho tšehetsa Morena oa rona Kreste Jesu, eo haufinyane a tlang ho putsa batho ba tšepahalang.—Mat. 25:34.