’Mè oa ka le ntate oa ka e ne e le Mak’hatholike a popota. Empa ka mor’a hore ba ithute hore Bibele e re lebitso la Molimo ke Jehova, e ile ea e-ba Lipaki Tsa Jehova tse chesehang. Ntate oa ka o ile a khaotsa ho betla litšoantšo tsa Jesu, eaba o sebelisa tsebo ea hae ea ho betla mapolanka ho fetola mokato o ka tlase oa ntlo ea heso hore e be Holo ea ’Muso. Holo eo e ne e le San Juan del Monte, sebakeng se ka thoko ho motse-moholo oa Philippines e leng Manila.

Ho tloha ha ke hlaha ka selemo sa 1952, batsoali ba ka ba ile ba nthuta ka Jehova joalokaha ba ile ba etsa ka bo-abuti ba ka ba bane le bo-ausi ba ka ba bararo. Ha ke ntse ke hola, ntate oa ka o ile a nkhothalletsa hore ke bale khaolo e le ’ngoe ea Bibele letsatsi le leng le le leng ebile o ne a bala le ’na lingoloa tse ngata tsa mokhatlo. Ka linako tse ling, batsoali ba ka ba ne ba amohela balebeli ba tsamaeang le baemeli ba lekala lapeng. Ho ne ho re thabisa ebile ho re khothatsa ho utloa liphihlelo tsa bara bao ba bo rona, e leng se ileng sa re susumelletsa ho etsa hore ho sebeletsa Jehova e be ntho e tlang pele bophelong ba rona.

Lefa leo batsoali ba ka ba ntšietseng lona ke ho ba le tumelo ho Jehova. Ka mor’a hore ’mè oa ka eo ke neng ke mo rata a hlokahale ka lebaka la ho kula, ’na le ntate oa ka re ile ra qala ho ba bo-pula-maliboho ka selemo sa 1971. Leha ho le joalo, ntate oa ka o ile a hlokahala ka 1973 ha ke le lilemo li 20. Ho hlokahalloa ke batsoali ho ile ha etsa hore ke ikutloe ke sa tsebe hore na ke phelela’ng ebile eka ke mong. Empa tšepo eo re e fumanang ka Bibeleng ‘e re thusang hore re eme re tiile, re sa belaele,’ e ile ea nthusa hore ke lule ke le haufi le Jehova, ke tsitsitse ho e-na le ho nyahama ho tlola. (Baheb. 6:19) Ka mor’a nako e seng kae ntate oa ka a hlokahetse, ke ile ka amohela kabelo ea ho sebeletsa ke le pula-maliboho e khethehileng sehlekehlekeng sa Coron, profinseng ea Palawan.

Ke ne ke le lilemo li 21 ha ke fihla Coron. Kaha ke ne ke holetse toropong, ke ile ka makala ha ke fihla sehlekehlekeng seo ’me ke bona batho ba sokola  motlakase, metsi le lipalangoang. Le hoja ho ne ho e-na le bara ba bo rona ba seng bakae moo, ho ne ho se na pula-maliboho eo ke sebetsang le eona ’me ka linako tse ling ke ne ke lokela ho ea tšimong ke le mong. Khoeling ea pele, ke ne ke hopotse lelapa leso le metsoalle ea ka haholo. Bosiu ke ne ke sheba leholimo le tletseng linaleli ebe kea lla. Ke ne ke utloa eka nka tlohela kabelo ea ka ebe ke khutlela hae.

Ka linako tseo ke neng ke ikutloa eka ke mong, ke ne ke tšollela pelo ea ka ho Jehova. Ke ne ke hopola lintho tse khothatsang tseo ke ithutileng tsona Bibeleng le lingoloeng tsa rona. Hangata ke ne ke nahana ka Pesaleme ea 19:14. Ke ile ka hlokomela hore Jehova e tla ba “Lefika la ka le Molopolli oa ka” haeba ke thuisa ka lintho tse mo thabisang tse kang mesebetsi ea hae le makhabane a hae. Ke ile ka thusoa ke sehlooho sa Watchtower se reng “You Are Never Alone.” a Ke ile ka se bala ka makhetlo. Ka linako tseo, ho ne ho tšoana le ha eka ke mong feela le Jehova ’me seo se ile sa mpha menyetla e metle ea hore ke rapele, ke ithute ke be ke thuise.

Nakoana ka mor’a hore ke fihle Coron, ke ile ka khethoa hore ke be moholo. Kaha e ne e le ’na feela moholo, beke e ’ngoe le e ’ngoe ke ne ke khanna Sekolo sa Tšebeletso sa Puso ea Molimo, Seboka sa Tšebeletso, Thuto ea Buka ea Phutheho le Molula-Qhooa. Ke ne ke boetse ke fana ka puo ea phatlalatsa beke e ’ngoe le e ’ngoe. Ke ne ke phathahane haholo hoo ke neng ke se na nako ea ho ikutloa eka ke mong.

Ke ne ke thabela mosebetsi oa boboleli o neng o atleha Coron, ’me tse ling tsa liithuti tsa ka li ile tsa qetella li kolobelitsoe. Empa ho ne ho ntse ho e-na le mathata a mang. Ka linako tse ling ha ke ea tšimong, ke ne ke tlameha ho tloha hoseng ke tsamaee ka maoto ebe ke fihla motšehare, ke sa tsebe le hore na ke tla robala hokae ha ke fihla moo. Tšimo ea phutheho ea rona e ne e boetse e akarelletsa le lihlekehleke tse ngata tse nyenyane. Hangata ha ke ne ke ea lihlekehlekeng tseo, ke ne ke ea ka seketsoana se tsamaisoang ka enjene leoatleng le befileng le hoja ke ne ke sa tsebe ho tola. Har’a mathata ana kaofela, Jehova o ile a ntšireletsa le ho ntšehetsa. Hamorao ke ile ka hlokomela hore mathata ao ke neng ke kopana le ’ona, a ne a nkoetlisetsa mathata ao ke neng ke tla kopana le ’ona kabelong ea ka e latelang.

Ka 1978, ke ile ka fuoa kabelo ea ho sebeletsa Papua New Guinea, e ka leboea ho Australia. Papua New Guinea ke naha e nang le lithaba tse ngata ’me e batla e lekana le Spain. Ke ne ke hlolletsoe ha ke utloa hore batho ba lulang moo ba ka ba limilione tse tharo ’me ba bua lipuo tse fetang 800. Bonyane batho ba bangata ba ne ba khona ho bua puo ea Semelanesia e nolofalitsoeng, e tsebahalang e le Setok Pisin.

Ke ile ka isoa phuthehong ea Senyesemane ka nakoana e motse-moholo o bitsoang Port Moresby. Ka mor’a moo ke ile ka ea phuthehong ea Setok Pisin eaba ke ea tlelaseng e rutang puo eo. Ke ile ka sebelisa lintho tseo ke ithutileng tsona tlelaseng ha ke le tšimong. Sena se ile sa nthusa hore ke ithute puo eo kapele. Ka mor’a nako e seng kae, ke ne ke se ke khona ho fana ka puo ea phatlalatsa ka Setok Pisin. Ke ne ke maketse haholo ha le pele ho fela selemo ke fihlile Papua New Guinea, ke khethoa hore ke be molebeli oa potoloho oa liphutheho tsa Setok Pisin tse liprofinseng tse kholo tse ’maloa.

Kaha liphutheho li ne li arohane haholo, ke ne ke tlameha ho hlophisa likopano tsa potoloho tse ngata le ho nka maeto hangata. Qalong ke ne ke ikutloa eka ke mong hobane ke le naheng e ncha, moo batho  ba buang puo e ’ngoe hape ba etsa lintho ka tsela eo ke sa e tloaelang. Ke ne ke sa khone ho etela liphutheho ke tsamaea ka koloi ka lebaka la lithaba le tsela e mpe. Kahoo, ke ne ke lokela ho tsamaea ka sefofane hoo e ka bang beke e ’ngoe le e ’ngoe. Ka linako tse ling, e ne e-ba ’na feela mopalami ka har’a sefofane se senyenyane se seng maemong a matle. Maeto ao a ne a etsa hore ke ikutloe ke sa phutholoha, feela joalokaha ke ne ke sa phutholohe ha ke ne ke tsamaea ka seketsoana.

Ke batho ba ’maloa feela ba neng ba e-na le lifono. Kahoo, ke ne ke ngolla liphutheho mangolo. Hangata ke ne ke fihla pele mangolo a ka a fihla, ebe ke botsa batho ba motse hore na Lipaki ke bo-mang motseng oo. Nako le nako ha ke ne ke fumana bara ba bo rona, ba ne ba nkamohela ka mofuthu hoo ke neng ke hopola lebaka le etsang hore ke etse boiteko boo ba ho ba fumana. Ke ile ka bona kamoo Jehova a ntšehelitseng ka litsela tse ngata kateng ’me seo se ile sa nkatametsa haufi haholo le eena.

Ha ke ne ke le libokeng ka lekhetlo la pele sehlekehlekeng sa Bougainville, banyalani ba bang ba ile ba nkatamela ba bososetse ’me ba re, “Na u sa re hopola?” Ke ne ke hopola hore ke ile ka ba pakela ha ke qala ho fihla Port Moresby. Ke ne ke ile ka qala ho ithuta Bibele le bona eaba ke kopa mor’abo rona e mong hore a tsoele pele ho ithuta le bona. Ha ke kopana le bona libokeng ba ne ba se ba kolobelitsoe. Ena ke e ’ngoe ea litlhohonolofatso tse ngata tseo ke li fumaneng ka lilemo tse tharo tseo ke li qetileng ke le Papua New Guinea.

Pele ke tloha Coron ka 1978, ke ile ka kopana le morali oa bo rona e motle ea itetseng ea bitsoang Adel. E ne e le pula-maliboho ea kamehla ’me a holisa bana ba hae ba babeli, Samuel le Shirley. O ne a bile a hlokomela ’mè oa hae ea seng a holile. Ka May 1981, ke ile ka khutlela Philippines ke il’o nyala Adel. Ka mor’a hore re nyalane, re ile ra ba bo-pula-maliboho ba kamehla ra ba ra hlokomela lelapa ’moho.

Le hoja ke ne ke se ke e-na le lelapa, ka 1983, ke ile ka khethoa hore ke be pula-maliboho e khethehileng ’me ka abeloa ho sebeletsa Sehlekehlekeng sa Linapacan, se profinseng ea Palawan. Lelapa la ka kaofela le ile la fallela sehlekehlekeng seo ho sona ho neng ho se na Lipaki. Ka mor’a nako e ka etsang selemo re le moo, ’mè oa Adel o ile a hlokahala. Leha ho le joalo re ile ra phathahana tšebeletsong ’me seo se ile sa re thusa ho mamella bohloko ba ho hlokahalloa. Ha re ntse re le Linapacan, re ile ra qala lithuto tsa Bibele tse ngata tse hatelang pele hoo ka mor’a nako e seng kae re ileng ra hloka Holo ea ’Muso e nyenyane. Ke kahoo re ileng ra ikahela Holo ea ’Muso. Ka mor’a lilemo tse tharo feela, re ile ra thabela ho bona batho ba 110 ba tla Sehopotsong ’me ba bangata ba bona ba ile ba sala ba kolobetsoa re se re tsamaile.

Ka 1986, ke ile ka abeloa ho ea sebeletsa sehlekehlekeng sa Culion, seo ho sona ho neng ho e-na le batho ba tšoeroeng ke lepera. Ka mor’a moo, Adel le eena o ile a khethoa hore e be pula-maliboho e khethehileng. Qalong re ne re tšaba ho pakela batho ba tšoeroeng ke lepera. Le ha ho le joalo, bara le barali ba bo rona ba sebakeng seo ba ile ba re kholisa hore batho ba tšoeroeng ke lepera ba fumane kalafo ’me monyetla oa hore ba re tšoaetse o ne o fokola. Ba bang ba batho bao ba tšoeroeng ke lepera ba ne ba ea libokeng tse neng li tšoareloa ha morali oa bo rona e mong. Ho e-s’o ee kae, re ile ra tloaela maemo ’me re ne re thabisoa ke ho ruta batho bana ba neng  ba ikutloa ba lahliloe ke Molimo le batho ka tšepo eo Bibele e fanang ka eona. Ho ne ho thabisa ho bona batho ba neng ba kula haholo ba fumana thabo tšepisong ea hore ka letsatsi le leng ba tla phela ba sa kule ho hang.—Luka 5:​12, 13.

Bana ba rona ba ile ba etsa’ng hore ba tloaelane le maemo Culion? ’Na le Adel re ile ra mema barali ba bo rona ba babeli ba bacha ba tsoang Coron e le hore bana ba rona ba ka ba le metsoalle e hantle. Samuel, Shirley le barali ba bo rona bana ba babeli ba bacha ba ne ba thabela ho ithuta Bibele le bana ba bang ba bangata, ha ’na le Adel re ne re ithuta le batsoali ba bana bao. Ha e le hantle, ho na le nako eo ka eona re neng re ithuta le malapa a 11. Ka mor’a nakoana e seng kae, re ne re khanna lithuto tse ngata tsa Bibele tse hatelang pele hoo re ileng ra khona ho qala phutheho e ncha.

Qalong, e ne e le ’na feela moholo sebakeng seo. Kahoo, ofisi ea lekala e ile ea nkopa hore ke tšoare liboka tsa har’a beke le bahoeletsi ba robeli ba Culion. Hape e ile ea re ke li tšoare le bahoeletsi ba robong ba motseng o bitsoang Marily, ho ne ho nka lihora tse tharo ho fihla motseng oo ha u tsamaea ka seketsoana. Ka mor’a liboka re ne re tsamaea ka maoto lihora tse ngata re le lelapa sebakeng se lithaba hore re il’o khanna lithuto tsa Bibele motseng o bitsoang Halsey.

Qetellong, batho ba bangata ba Marily le Halsey ba ile ba amohela ’nete hoo ho ileng ha hahoa Liholo Tsa ’Muso libakeng tseo tse peli. Joaloka Linapacan, bara ba bo rona le batho ba nang le thahasello ba ile ba fana ka boholo ba thepa e sebelisoang le ho thusa ka mosebetsi. Holo ea Marily e ne e ka nka batho ba 200 hape e ne e ka atolosoa habonolo, e leng se ileng sa re thusa hore re tšoarele likopano tsa potoloho ho eona.

Ka 1993 ha bana ba se ba holile, ’na le Adel re ile ra qala mosebetsi oa potoloho Philippines. Ka selemo sa 2000, ke ile ka koetlisetsoa ho ba morupeli oa Sekolo sa ho Koetlisetsoa Bosebeletsi. Ke ne ke ikutloa ke sa tšoanelehe ho ba morupeli empa Adel o ne a lula a nkhothatsa. O ile a nkhopotsa hore Jehova o tla lula a mpha matla a hore ke phethe kabelo ena e ncha. (Bafil. 4:13) Adel o ne a tseba hore na o bua ka eng hobane o ne a khona ho phetha kabelo ea hae le hoja a ntse a kula.

 Ka 2006 ha ke ntse ke le morupeli, Adel o ile a fumanoa a e-na le lefu la Parkinson le amang boko le bakang bothata ba ho tsamaea, mathata a kelello le lintho tse ling. Re ne re ferekane. Ha ke ne ke etsa tlhahiso ea hore re tlohele kabelo ea rona e le hore ke mo hlokomele, Adel o ile a re, “Ke kopa u mpatlele ngaka e ka nthusang ka boloetse ba ka ’me kea tseba hore Jehova o tla re thusa hore re tsoele pele ka kabelo ea rona.” Lilemo tse tšeletseng ka mor’a moo, Adel o ile a tsoela pele ka tšebeletso ea hae ho Jehova ntle le ho tletleba. Ha a se a sa khone ho tsamaea, o ne a paka a lutse holim’a wheelchair. Ha a ne a se a thatafalloa ke ho bua, o ne a araba ka lentsoe le le leng kapa a mabeli libokeng. Bara le barali ba bo rona ba bangata, ba ne ba romella Adel melaetsa ho bontša kananelo ea hore o ba behela mohlala o motle oa ho mamella. Ba ile ba etsa joalo ho fihlela a hlokahala ka 2013. Ke qetile lilemo tse fetang tse 30 ke e-na le Adel, mosali oa ka ea tšepahalang le ea lerato, empa kamora hore a hlokahale, ke ne ke se ke ikutloa ke sareloa ebile eka ke mong hape.

Adel o ne a batla hore ke tsoele pele ka kabelo ea ka, ’me ke ile ka etsa joalo. Ke ile ka lula ke phathahane ’me seo se ile sa nthusa hore ke se ke ka ikutloa eka ke mong. Ho tloha ka 2014 ho ea ho 2017, ke ile ka abeloa ho etela liphutheho tsa Setagalog linaheng tseo mosebetsi oa rona o neng o thibetsoe. Ka mor’a moo, ke ile ka etela liphutheho tsa Setagalog tse Taiwan, United States le Canada. Ka 2019, ke ile ka tšoara Sekolo sa Baevangeli ba ’Muso ka Senyesemane naheng ea India le Thailand. Likabelo tseo kaofela li ile tsa nthabisa. Ke thaba haholo ha ke phathahane ka ho sebeletsa Jehova.

Kabelong e ’ngoe le e ’ngoe eo ke e fuoang, bara le barali ba bo rona e-ba metsoalle ea ka e haufi ’me ho ba thata ho arohana le bona. Nako le nako ha re ne re arohana, ke ne ke ithuta ho tšepa Jehova ka ho felletseng. Ke ile ka bona ha Jehova a ntšehetsa ka makhetlo a mangata ’me sena se ile sa nthusa hore ke amohele liphetoho life kapa life ka pelo eohle. Hona joale, ke pula-maliboho e khethehileng Philippines. Ke se ke tloaetse phutheho ea ka e ncha, eo e seng e le lelapa le ntšehetsang le ho ntlhokomela. Ke boetse ke ikotla sefuba ka Samuel le Shirley ba etsisang tumelo ea ’mè oa bona.—3 Joh. 4.

’Nete ke hore ke bile le mathata a mangata bophelong ba ka, ho akarelletsa ho bona ha mosali oa ka eo ke mo ratang a utloa bohloko a bile a hlokahala ka lebaka la bokuli bo sehloho. Ke ile ka boela ka tlameha ho tloaelana le maemo a mangata a macha. Leha ho le joalo, ke ile ka hlokomela hore Jehova “ha a hole le rona.” (Lik. 17:27) Letsoho la Jehova “ha le lekhutšoanyane” hore le ka re tšehetsa le ho re matlafatsa le ha re le libakeng tse ka thoko. (Esa. 59:1) Jehova, Lefika la ka, haesale a e-na le ’na bophelo bohle ba ka ’me ke mo leboha haholo. Ha ke e-s’o be mong le ka mohla.