NA U kile oa hlokomela hore batho ba bangata mehleng ee, ba batla maemo a phahameng le ho tšoaroa ka tsela e khethehileng e etsang eka ba betere ho feta batho ba bang? Leha ba ka tšoaroa ka tsela e khethehileng ba ntse ba nahana hore ba lokela ho tšoaroa ka tsela khethehileng le ho feta. Tsela eo ba nahanang ka eona e bontša hore ba icheba bo bona ebile ha ba ananele lintho tseo ba nang le tsona. Ke eona tsela eo Bibele e ileng ea re batho ba tla itšoara ka eona mehleng ena ea bofelo.—2 Tim. 3:2.

Ha se ntho e ncha hore batho ba ichebe bobona. Ka mohlala, Adama le Eva ba ne ba batla ho ikhethela hore na ke eng e nepahetseng le e fosahetseng ’me kaofela re hlaheloa ke mathata ka lebaka la qeto ea bona. Mohlala o mong ke oa Morena Uzia oa Juda, o ne a nahana hore o na le tokelo ea ho chesa libano ka tempeleng empa ho hang o ne a sa lokela ho etsa joalo. (2 Likron. 26:​18, 19) Ka tsela e tšoanang, Bafarisi le Basaduse ba ne ba nahana hore Molimo o lokela ho ba tšoara ka tsela e betere ho feta batho ba bang hobane feela ba hlaha lelokong la Abrahama.—Mat. 3:9.

Re phela har’a batho ba ichebileng bobona le ba ikhohomosang ’me moea oo o ka re hahlamela. (Bagal. 5:26) Re ka ’na ra nahana hore re lokela ho fuoa litokelo tse itseng kapa ho tšoaroa ka tsela e itseng e khethehileng. Re ka thusoa ke eng ho qoba ho nahana ka tsela ee? Re lokela ho qala pele ka ho utloisisa hore na Jehova o ikutloa joang ka ho nahana joalo. Re tl’o thusoa ke melao-motheo e latelang ea Bibele e ’meli.

 Jehova ke eena ea etsang qeto ea hore na re tšoaneloa ke eng. Nahana ka mehlala e latelang.

• Jehova o batla hore monna a ikutloe a hlomphuoa ke mosali oa hae. Hape o batla hore mosali a ikutloe a ratoa ke monna oa hae. (Baef. 5:33) Banyalani ba lokela ho bontša lerato le mofuthu ho balekane ba bona feela. (1 Bakor. 7:3) Hape, batsoali ba lebelletse hore bana ba bona ba ba mamele. Bana le bona ba lebelletse hore batsoali ba ba rate le ho ba hlokomela.—2 Bakor. 12:14; Baef. 6:2.

• Jehova o batla hore re hlomphe baholo ka lebaka la mosebetsi o boima oo ba o etsang ho hlokomela phutheho. (1 Bathes. 5:12) Leha ho le joalo, ha ba na tokelo ea ho hatella balumeli-’moho le bona.—1 Pet. 5:​2, 3.

• Molimo o file balaoli tokela ea hore ba batle lekhetho ba be ba hlomphuoe ke batho ba ka tlas’a bolaoli ba bona.—Bar. 13:​1, 6, 7.

Jehova o re fa lintho tse sa re tšoanelang ka lerato. Ka hobane re futsitse sebe ho Adama, ntho feela e re tšoanelang ke lefu. (Bar. 6:23) Ho ntse ho le joalo, Jehova o re hlohonolofatsa ka litsela tse ngata hobane a re rata. (Pes. 103:​10, 11) Le hoja litlhohonolofatso kapa litokelo tsena li sa re tšoanele, o re fa tsona hobane a re rata ebile a le mosa haholo.—Bar. 12:​6-8; Baef. 2:8.

E-ba hlokolosi hore u se ke oa nahana joaloka batho ba lefatše lena la Satane. Re ka ’na ra nahana hore re tšoaneloa ke lintho tse betere ho feta batho ba bang re sa hlokomele. Jesu o ile a etsa papiso ea basebetsi ba pataloang ka denari ho bontša hore ho ka ba bonolo hore re ikutloe eka re betere ho feta batho ba bang. Basebetsi ba bang ba ile ba fihla hoseng, ba sebetsa letšehare kaofela ho chesa, ha ba bang bona ba qalile ho sebetsa hora feela pele mosebetsi o fela. Basebetsi ba fihlileng pele ba ile ba nahana hore ba lokela ho pataloa ho feta ba bang ka lebaka la mosebetsi oo ba o entseng. (Mat. 20:​1-16) Ka ho sebelisa papiso ena, Jesu o ne a bontša hore balateli ba hae ba lokela ho khotsofalla seo Molimo a ba fang sona ka lerato.

E-ba motho ea lebohang eseng ea lulang a lebelletse ho fuoa. (1 Bathes. 5:18) Etsisa Moapostola Pauluse ea sa kang a kopa lintho tseo a neng a li hloka ho balumeli-’moho le eena ba Korinthe le hoja a ne a e-na le tokelo ea ho etsa joalo. (1 Bakor. 9:​11-14) Re lokela ho ananela lintho tseo batho ba re fang tsona empa re se ke ra lebella hore ba tlameha ho re fa tsona.

 Ikokobetse. Ha motho a inahana ho tlola, hangata o utloa a tšoaneloa ke lintho tse ngata ho feta tseo a nang le tsona. Boikokobetso bo tla re thusa hore re se ke ra nahana ka tsela eo e kotsi.

Moprofeta Daniele o re behetse mohlala o motle oa ho bontša boikokobetso. Kaha o ne a tsoa lelapeng le hlahelletseng, a le motle, a hlalefile a bile a e-na le bokhoni ba ho etsa mesebetsi e mengata, o ne a ka ’na a nahana hore ho tšoaroa ka tsela e khethehileng le litokelo tseo a neng a li fumana li ne li mo tšoanela. (Dan. 1:​3, 4, 19, 20) Leha ho le joalo, Daniele o ile a lula a ikokobelitse ’me boikokobetso ba hae ke bona bo entseng hore Jehova a mo rate haholo.—Dan. 2:30; 10:​11, 12.

A re qobeng ho ba joaloka batho ba lefatše lena, ba inkang ba le bohlokoa ho feta batho ba bang ba bile ba icheba bobona feela. Ho e-na le hoo, a re tsoeleng pele ho thabela litlhohonolofatso tseo Jehova a lulang a re fa tsona ka lebaka la mosa oa hae.