1, 2. Bahlanka ba Jehova ba ka hlaheloa ke mathata afe?

 MATHATA a ka fetola bophelo ba rona ka ho panya ha leihlo. Ka mohlala, mor’abo rona e mong ea bitsoang Luis a o ile a tšoaroa ke mofuta o sa tloaelehang oa kankere. Ngaka e ile ea mo bolella hore ka mor’a likhoeli tse seng kae feela o tl’o shoa. Morali oa bo rona Monika le mohatsa oa hae ba ne ba phathahane ka ho sebeletsa Jehova. Eaba ka le leng Morali oa bo rona Monika o fumana hore e se e le lilemo monna oa hae eo e leng moholo a etsa libe tse tebileng ka lekunutu. Morali oa bo rona Olivia oa lesoha o ile a tlameha ho baleha ha hae ka lebaka la sefefo se matla kapa leholiotsoana le kotsi le neng le tla. Ha a khutla o ile a fumana hore leholiotsoana leo le sentse ntlo ea hae. Bophelo ba batho bana bo ile ba fetoha haholo ka nako le motsotso. Na le uena u kile oa hlaheloa ke bothata bo ileng ba fetola bophelo ba hao u sa lebella?

² Le hoja re le bahlanka ba Jehova, re hlaheloa ke mathata ebile rea kula joaloka motho e mong le e mong. Hape re ka hanyetsoa kapa ra hlorisoa ke batho ba hloileng bahlanka ba Molimo. Le hoja Jehova a sa etse hore mathata ana a re pote ka thoko, o tšepisa hore o tla re thusa. (Esa. 41:10) A ka re thusa hore re lule re thabile, re etse liqeto tse nepahetseng le hore re lule re mo tšepahalla leha re hlaheloa ke mathata a boima ka ho fetisisa. Sehloohong sena re tl’o hlahloba litsela tse ’nè tseo ka tsona Jehova a re thusang ha re imetsoe. Re tla boela re ithute hore na re lokela ho etsa’ng e le hore re fumane thuso ea hae.

JEHOVA O TLA U LEBELA

3. Ha re hlahetsoe ke ntho e bohloko, ke eng eo re ka utloang ho le thata ho e etsa?

³ Bothata. Ha re hlahetsoe ke ntho e bohloko, re ka utloa ho  le thata ho nahana hantle le ho etsa liqeto. Hobane’ng? Hobane e ka ’na eaba lipelo tsa rona li utloile bohloko haholo. Hape re ka utloa re imetsoe haholo kelellong ka lebaka la ho tšoenyeha. Re ka utloa re sa tsebe hore na re nka eng re e kopanya le eng. Hlokomela hore na barali ba bo rona ba babeli bao ho buuoeng ka bona serapeng sa pele ba ile ba ikutloa joang ha ba ne ba e-na le mathata. Morali oa bo rona Olivia o re: “Ka mor’a hore leholiotsoana le senye ntlo ea ka, ke ile ka utloa ke ferekane ebile ke imetsoe haholo.” Ha Morali oa bo rona Monika a bua ka bolotsana ba monna oa hae o re: “Ke ile ka utloa ke nyahame ho feta lentsoe ho nyahama. Ke ile ka utloa bohloko bo hlabang pelong. Ke ne ke utloa ke sitoa ho etsa letho. Ke ne ke sa nahana ho hang hore ntho e joalo e ka nketsahalla.” Jehova o tšepisa hore o tla re thusa joang ha re utloa re imetsoe?

4. Ho Bafilipi 4:​6, 7 Jehova o re tšepisa eng?

⁴ Jehova o re thusa joang? O tšepisa hore o tla re fa “khotso.” (Bala Bafilipi 4:​6, 7.) Ha re e-na le khotso eo, re khona ho khoba matšoafo ka lebaka la kamano e ntle eo re nang le eona le eena. Khotso ena ke “eo batho ba ke keng ba e utloisisa.” Ke e hlollang ho feta kamoo re ka nahanang kateng. Na u kile oa rapela Jehova ka matla eaba ka mor’a moo u utloa u tleloa ke khotso eo u sa tsebeng hore na e tsoa kae? Ke eona khotso eo Molimo a re fang eona.

5. Khotso eo Molimo a re fang eona e lebela lipelo le menahano ea rona joang?

⁵ Bafilipi 4:7 e boetse e re khotso eo Molimo a re fang eona e tla “lebela,” kapa e sireletse ‘lipelo tsa rona le menahano ea rona.’ Ka Segerike, lentsoe “lebela” e ne e le lentsoe le sebelisoang litabeng tsa sesole ha ho ne ho buuoa ka masole a neng a lebela motse e le hore o se ke oa hlaseloa. Baahi ba motse o neng o e-na le masole a katileng motse ba ne ba robala ka khotso joaloka masea hobane ba tseba hore masole a ba sirelelitse. Ka tsela e tšoanang, ha khotso eo Molimo a re fang eona e lebela lipelo le menahano ea rona, re khoba matšoafo hobane re tseba hore re sireletsehile. (Pes. 4:8) Joaloka Anna, re ka ikutloa re e-na le khotso le haeba maemo a rona a sa fetohe hang-hang. (1 Sam. 1:​16-18) Ha re khobile matšoafo, hangata ho ba bonolo hore re nahane hantle le ho etsa liqeto tse nepahetseng.

6. Re lokela ho etsa’ng e le hore Molimo a re fe khotso? (Sheba setšoantšo.)

⁶ Re lokela ho etsa’ng? Ha u e-na le mathata, balehela ho molebeli oa rona. Joang? Ka hore u rapele ho fihlela u utloa Molimo a u fa khotso. (Luka 11:9; 1 Bathes. 5:17) Mor’abo rona Luis eo ho builoeng ka eena serapeng sa pele, oa hlalosa hore na ke’ng e thusitseng eena le  mosali oa hae, Ana, hore ba mamelle ka mor’a hore ba tsebe hore o tl’o shoa ka mor’a likhoeli tse seng kae feela. O re: “Boemong bo tjena ho thata haholo ho etsa liqeto tse amanang le litaba tsa phekolo le lintho tse ling. Empa ho rapela ho ile ha re thusa ho ba le khotso nakong eo e boima.” Mor’abo rona Luis le mosali oa hae ba re ba ile ba rapela Jehova ka matla le ka makhetlo ba mo kopa hore a ba fe khotso, a ba thuse ho khoba matšoafo le ho ba fa bohlale ba ho etsa liqeto tse nepahetseng. Ba ile ba utloa hore Jehova oa ba thusa. Ha u e-na le bothata, u se ke oa khaotsa ho rapela ’me u tla utloa ha Jehova a u fa khotso e tla lebela pelo le kelello ea hao.—Bar. 12:12.

JEHOVA O TLA ETSA HORE U TSITSE

7. Re ka ikutloa joang ha re e-na le bothata bo boima?

⁷ Bothata. Ha re e-na le bothata bo boima, re ka ikutloa kapa ra nahana le ho itšoara ka tsela e sa tloaelehang. Feela joalokaha sekepe se ka tsukutloa kapa sa sisinngoa ke maqhubu a leoatle nakong ea sefefo, le rona re ka tsukutloa ke maikutlo a matla a fapaneng. Morali oa bo rona Ana eo re sa tsoa bua ka eena, o ile a re o ne a tleloa ke maikutlo a mangata a fapaneng ka mor’a hore Luis a hlokahale. O ile a re: “Ka linako tse ling ke ne ke nyahama ebe ke ipona ke le sono. Hape ke ne ke halefisoa ke hore ebe Luis o ntšiile.” Ho feta moo, Morali oa bo rona Ana o ne a bona eka ha ho sa tla ba le motho ea mo thusang hape o ne a ikutloa a ferekane hobane a tlameha ho etsa liqeto tse neng li etsoa ke Luis. Ka linako tse ling o ne a utloa eka o ka har’a sekepe se leoatleng le befileng le nang le sefefo se matla. Jehova o re thusa joang ha re imetsoe ke maikutlo a tjee?

8. Esaia 33:6 e re Jehova o re tšepisa eng?

⁸ Jehova o re thusa joang? O tšepisa hore o tla re thusa hore re lule re tsitsitse leha re e-na le mathata. (Bala Esaia 33:6.) Ha leoatle le befile ka lebaka la sefefo se matla, sekepe se ka tsukutleha eaba se beha bophelo ba batho kotsing. Likepe tse ngata li na le lintho ka mahlakoreng karolong e ka tlase ea sekepe tse li thusang hore li tsitse boemong bo joalo. Lintho tsena tse tsitsisang sekepe li se thusa hore se se ke sa tsukutleha haholo. Ha se sa tsukutlehe haholo, batho ba se palameng ba ka khona ho mamella boemo bona ebile ba tla bolokeha. Leha ho le joalo, lintho tsena tse thusang sekepe hore se tsitse li sebetsa hantle haholo ha sekepe se ntse se tsamaea. Ka tsela e tšoanang, Jehova o tla re thusa hore re lule re tsitsitse haeba re tsoela pele ho mo sebeletsa ka botšepehi le linakong tse thata.

9. Re ka sebelisa lintho tse re thusang ho etsa lipatlisiso joang hore re lule re tsitsitse leha re e-na le mathata? (Sheba setšoantšo.)

⁹ Re lokela ho etsa’ng? Ha u ferekane maikutlong,  etsa bonnete ba hore u tsoela pele u rapela, u ea libokeng le tšimong. Ke ’nete hore u ka ’na oa se ke oa khona ho etsa lintho joaloka pele empa hopola hore Jehova oa utloisisa. (Bapisa le Luka 21:​1-4.) Hape u lokela ho ipha nako ea ho ithuta u le mong le ho nahanisisa ka seo u ithutileng sona. Hobane’ng? Jehova o sebelisa mokhatlo oa hae ho re fa lingoloa le livideo tse ka re thusang hore re laole maikutlo a rona linakong tse thata. U ka sebelisa lintho tsa ho etsa lipatlisiso tse teng ka puo ea hao tse kang JW Library^® app, Watch Tower Publications Index le Tataiso ea ho Etsa Lipatlisiso ea Lipaki Tsa Jehova. Monika eo re buileng ka eena pejana, o re o ne a sebelisa lintho tsena ho batla likeletso ha a ne a utloa eka o tla ferekana maikutlong. Ka mohlala, ha a ne a etsa lipatlisiso o ne a batla lentsoe “bohale.” Ka linako tse ling, o ne a batla poleloana “ho eka” kapa lentsoe “botšepehi.” Ka mor’a moo, o ne a bala ho fihlela a ikutloa a le hantle. O re: “Ha ke ne ke etsa lipatlisiso, ke ne ke qala ke imetsoe haholo maikutlong. Empa ha ke ntse ke tsoela pele ke bala, ke ne ke utloa eka Jehova oa nhaka. Ha ke ntse ke bala, ke ile ka hlokomela hore Jehova o ne a utloisisa maikutlo a fapaneng ao ke neng ke e-ba le ’ona ’me o ne a nthusa.” Ha Jehova a u thusa ka tsela eo, u tla khona ho laola maikutlo a hao ho fihlela u e-ba le khotso.—Pes. 119:​143, 144.

JEHOVA O TLA U THUSA

10. Re ka ’na ra ikutloa joang ka mor’a ho hlaheloa ke ntho e bohloko haholo?

¹⁰ Bothata. Ka mor’a hore re hlaheloe ke ntho e bohloko haholo, ho na le linako tseo re ka ikutloang re se na matla re bile re imetsoe maikutlong. Re ka ’na ra ikutloa joaloka semathi se lemetseng se neng se tloaetse ho matha ka lebelo empa joale se se se tsamaea se hlotsa. Re ka ’na ra sokola ho etsa lintho tseo pele re neng re li etsa habonolo feela, kapa ra utloa re se re sa thahaselle ho etsa lintho tseo re neng re rata ho li etsa pele. Re ka utloa re thatafalloa ke ho tsoha, re batla ho robala feela joaloka Elia. (1 Mar. 19:​5-7) Jehova o tšepisa ho re thusa joang ha re ikutloa re fokola?

11. Tsela e ’ngoe eo Jehova a re thusang ka eona ke efe? (Pesaleme ea 94:18)

¹¹ Jehova o re thusa joang? O tšepisa ho re tšehetsa. (Bala Pesaleme ea 94:18.) Feela joalokaha semathi se lemetseng se hloka ho tšehetsoa e le hore se ’ne se tsamaee, le rona re hloka thuso e le hore re lule re sebeletsa Jehova. Linakong tse joalo, Jehova o re: “’Na, Jehova Molimo oa hao, ke u tšoara ka letsoho  la hao le letona, ke ’na ea reng ho uena, ‘U se ke oa tšoha. Ke tla u thusa.’” (Esa. 41:13) Jehova o ile a thusa Morena Davida. Ha a ne a tobane le lira tsa hae le liteko, o ile a re ho Jehova: “Letsoho la hao le letona lea ntšehetsa.” (Pes. 18:35) Empa Jehova o re tšehetsa joang?

12. Jehova a ka sebelisa bo-mang ho re thusa ha re nyahame?

¹² Hangata Jehova o re tšehetsa ka ho susumeletsa batho ba bang hore ba re thuse. Ka mohlala, ka lekhetlo le leng ha Davida a ne a nyahame, motsoalle oa hae Jonathane o ile a ea ho eena ’me a mo tšehetsa a ba a mo khothatsa. (1 Sam. 23:​16, 17) Ka tsela e tšoanang, Jehova o ile a khetha Elisha hore a thuse Elia. (1 Mar. 19:​16, 21; 2 Mar. 2:2) Mehleng ena, Jehova a ka sebelisa ba malapa a rona, metsoalle kapa baholo ho re tšehetsa. Leha ho le joalo, ha re utloile bohloko re ka ’na ra batla ho ikarola ho batho ba bang, ra batla ho lula re le bang. Ha ho makatse ho ikutloa joalo. Re ka etsa’ng e le hore re amohele tšehetso eo Jehova a re fang eona?

13. Re lokela ho etsa’ng e le hore re amohele tšehetso ea Jehova? (Sheba setšoantšo.)

¹³ Re lokela ho etsa’ng? Leka ka thata hore u se ke oa ikarola ho batho ba bang. Ha re ikarola ho batho ba bang, re ka ’na ra nahana ka rona feela le ka mathata ao re leng ka har’a ’ona. Ho nahana ka tsela ena ho ka etsa hore re se ke ra etsa liqeto tse nepahetseng. (Liprov. 18:1) Ke ’nete hore kaofela ha rona re hloka ho ba bang ka linako tse ling, haholo-holo ha re hlahetsoe ke lintho tse bohloko. Empa haeba re ikarola ho batho ba bang nako e telele, re tla be re hana tsela eo Jehova a e sebelisang ho re tšehetsa. Kahoo, ho sa tsotellehe hore na u imetsoe hakae, amohela thuso ea ba lelapa, metsoalle le baholo. Ba nke e le tsela eo Jehova a u tšehetsang ka eona.—Liprov. 17:17; Esa. 32:​1, 2.

JEHOVA O TLA U TŠELISA

14. Ke maemo afe a ka etsang hore re tšohe?

¹⁴ Bothata. Ho na le linako tseo re ka ikutloang re tšohile. Ka Bibeleng ho na le bahlanka ba Molimo bao ka linako tse ling ba neng ba tšoha le ho thothometsoa ke lira tsa bona kapa mathata a mang. (Pes. 18:4; 55:​1, 5) Le rona re ka ’na ra hanyetsoa sekolong, mosebetsing, lapeng kapa ra hanyetsoa ke ’muso. Re ka ba ra tšoha hore re tla shoa hobane re kula. Linakong tse joalo, re ka utloa re sa tsebe hore na re lokela ho etsa’ng. Maemong aa Jehova o re thusa joang?

15. Pesaleme ea 94:19 e re kholisa ka eng?

 ¹⁵ Jehova o re thusa joang? Oa re tšelisa hape o kokobetsa bohloko ba rona. (Bala Pesaleme ea 94:19.) Pesaleme ena e ka ’na ea etsa hore re nahane ka ngoanana e monyenyane ea tšohileng a bile a sa khone ho robala ka lebaka la sefefo se matla se nang le lehalima. Re ka inahanela re bona ntate oa hae a kena a bile a mo kuka ho fihlela a robala. Le hoja sefefo se ntse se le teng, o ikutloa a bolokehile a bile a se a sa tšoha ha ntate oa hae a mo kukile. Ha re tobane le liteko tse re tšosang, re ka hloka hore Ntate oa rona ea leholimong a re tšelise ho fihlela bohloko ba rona bo kokobela. Re ka etsa’ng hore re fumane matšeliso a tsoang ho Jehova?

16. Re ka etsa’ng e le hore matšeliso a Jehova a re tsoele molemo? (Sheba setšoantšo.)

¹⁶ Re lokela ho etsa’ng? Itloaetse ho qeta nako le Jehova ka hore u mo rapele le ho bala Lentsoe la hae. (Pes. 77:​1, 12-14) Haeba u etsa joalo, etlare ha u e-na le mathata, motho oa pele eo u tla kopa thuso ho eena ke Ntate oa hao ea leholimong. Bolella Jehova lintho tse u tšosang le tseo u tšoenyehileng ka tsona. Mo mamele ka hore u bale Lentsoe la hae ’me u tla bona hore na o u tšelisa joang. (Pes. 119:28) U tla hlokomela hore likarolo tse itseng tsa Bibele li ka u tšelisa haholo ha u tšohile. Ka mohlala, u ka tšeliseha haholo ha u bala buka ea Jobo, Lipesaleme, Liproverbia le mantsoe a Jesu a hlahang ho Matheu khaolo ea botšelela. Ha u rapela Jehova u bile u bala Lentsoe la hae, u tla utloa hore oa u tšelisa.

17. Re ka kholiseha ka eng?

¹⁷ Re ka kholiseha hore Jehova o tla ba le rona nakong eo bophelo ba rona bo leng boima. A ke ke a re lahla. (Pes. 23:4; 94:14) Jehova o tšepisa hore o tla re lebela, a re thuse hore re lule re tsitsitse, a re tšehetse le ho re tšelisa ha re e-na le mathata. Esaia 26:3 e re ka Jehova: “U tla sireletsa batho ba itšetlehang ka uena ka botlalo. U tla ba fa khotso e sa feleng hobane ba tšepile uena.” Kahoo, tšepa Jehova ’me u sebelise lintho tsohle tseo a u fileng tsona ho u thusa. Ha u etsa joalo, u tla ba le matla leha maemo a le boima.