1. U nahana hore Jehova o joang?

 NA U kile oa ipotsa hore na Jehova o joang? Ha u mo rapela, ho tla eng ka kelellong ea hao? Le hoja Jehova a sa bonahale, Bibele e mo hlalosa ka litsela tse fapaneng. Jehova o bitsoa “letsatsi le thebe” le “mollo o felisang.” (Pes. 84:11; Baheb. 12:29) Ezekiele o ile a ba le pono eo ho eona Jehova a neng a tšoana le lejoe la safire, tšepe e khanyang le mookoli. (Ezek. 1:​26-28) Tse ling tsa litsela tsena tseo Jehova a hlalosoang ka tsona li ka etsa hore re utloe re hlolloa kapa tsa re tšosa.

2. Ke eng e ka re sitisang ho atamela haufi le Jehova?

² Re ka ’na ra fumana ho le thata ho lumela hore Jehova oa re rata hobane ha re mo bone. Batho ba bang ba nahana hore Jehova a ke ke a ba rata le ka mohla ka lebaka la lintho tse bohloko tse ba etsahaletseng nakong e fetileng. Mohlomong ba ne ba se na bo-ntate ba ba ratang. Jehova oa utloisisa ha re ikutloa ka tsela eo ebile oa utloisisa hore na ke hobane’ng ha ho ka ba thata ho atamela haufi le eena. O re thusa ka hore a re hlalosetse ka Lentsoeng la hae hore na ke Molimo ea joang.

3. Ke hobane’ng ha ho le bohlokoa ho ithuta ka lerato leo Jehova a nang le lona?

³ Lentsoe le hlalosang Jehova hantle ke lerato. Bibele e re “Molimo ke lerato.” (1 Joh. 4:8) Le susumetsa ntho e ’ngoe le e ’ngoe eo a e etsang. Lerato leo Molimo a nang le lona le mofuthu ebile le matla hoo a le bontšang le batho ba sa mo rateng. (Mat. 5:​44, 45) Sehloohong sena, re tl’o ithuta ka Jehova le lerato leo a nang le lona. Ha re ntse re tsoela pele ho ithuta ka Molimo oa rona, re tla mo rata le ho feta.

JEHOVA O RE RATA HAHOLO

4. Tsela eo Jehova a re ratang ka eona e etsa hore u ikutloe joang? (Sheba setšoantšo.)

⁴ “Jehova o lerato.” (Jak. 5:11) Ka Bibeleng, o itšoantša le ’mè  ea lerato. (Esa. 66:​12, 13) Ak’u nahane ka ’mè ea ratang ngoana oa hae e monyenyane a bile a mo hlokomela. Ka mofuthu o koietsa ngoana oa hae a mo behile mangoleng ebile o bua le eena ka lentsoe le bonolo le le thobang maikutlo. Ha ngoana oa hae a lla kapa a utloile bohloko, o etsa bonnete ba hore o mo fa seo a se hlokang. Ha re utloile bohloko, re ka kholiseha hore Jehova oa re rata. Mopesaleme o ile a re: “Ha ke tšoenyehile haholo, u ile oa ntšelisa oa ba oa etsa hore ke thabe.”—Pes. 94:19.

5. Botšepehi ba Jehova bo etsa hore u ikutloe joang?

⁵ Jehova oa tšepahala. (Pes. 103:​8, nal.) A ke ke a khaotsa ho re rata ha re etsa phoso. Baiseraele ba ile ba fosetsa Jehova ka makhetlo empa ha ba ne ba baka o ne a ba kholisa hore o ntse a ba rata. Ka mohlala, o ile a re: “U bile motho oa bohlokoa mahlong a ka, u ile oa hlomphuoa ’me ke u ratile.” (Esa. 43:​4, 5) Jehova o ntse a re rata ka tsela e tšoanang le mehleng ena. Re ka tšepa lerato leo a re ratang ka lona. Le haeba re entse liphoso tse tebileng, Jehova a ke ke a re lahla. Haeba re baka ’me re khutlela ho eena, re tla bona hore o ntse a re rata. O tšepisa hore ‘o tla re tšoarela ka pelo eohle.’ (Esa. 55:7) Bibele e re ha Jehova a re tšoarela re tla ba le “linako tse khathollang . . . ho tsoa ho Jehova.”—Lik. 3:​19, nal.

6. Zakaria 2:8 e re ruta eng ka Jehova?

⁶ Bala Zakaria 2:8. Kaha Jehova oa re rata, o utloisisa kapele hore na re ikutloa joang ’me o labalabela ho re sireletsa. O utloa bohloko ha re utloile bohloko. Kahoo, re ka kholiseha hore o tla re araba ha re mo rapela re re: “Ntšireletse joaloka thaka ea leihlo la hao.” (Pes. 17:8) Leihlo ke karolo ea ’mele e boi le ea bohlokoa haholo. Kahoo, ha Jehova a re bapisa le thaka ea leihlo la hae, ho tšoana le ha eka o re: ‘Mang kapa mang ea le lematsang, batho ba ka, o lematsa ntho ea bohlokoa ho ’na.’

7. Ke eng e ka etsang hore ho be thata hore u kholisehe hore Jehova oa u rata?

⁷ Jehova o batla hore u kholisehe hore oa u rata. Leha ho le joalo, oa tseba hore ka lebaka la lintho tse re etsahaletseng khale, re ka ’na ra belaella hore oa re rata. Kapa e ka ’na eaba u tobane le mathata hona joale a etsang hore u utloe u sa kholiseha hore Jehova oa u rata. Ke eng e ka matlafatsang kholiseho ea rona? Ke ho ithuta kamoo Jehova a  bontšitseng kateng hore o rata Jesu, batlotsuoa le rona kaofela.

JEHOVA O BONTŠA LERATO LA HAE JOANG?

8. Ke hobane’ng ha Jesu a ne a kholisehile hore Ntate oa hae oa mo rata?

⁸ Jehova le Mora oa hae ba qetile nako e ngata ka ho fetisisa ba le ’moho. Ka lilemo tse ngata tseo ba li qetileng ba le ’moho leholimong, ba ile ba utloana le ho ratana haholo. Ho Matheu 17:​5, Jehova o ile a bontša ka ho hlaka hore o rata Jesu. Jehova a ka be a ile a re feela, ‘Enoa ke Mora oa ka ea nkhahlisang.’ Empa o ne a batla hore re tsebe hore na o rata Jesu hakae, ke kahoo a ileng a mo bitsa “Mora oa ka eo ke mo ratang.” Jehova o ne a le motlotlo ka Jesu, haholo-holo hobane a ne a ikemiselitse ho tela bophelo ba hae. (Baef. 1:7) Jesu le eena o ne a sa belaelle hore Ntate oa hae oa mo rata. O ne a kholisehile ho tsoa botebong ba pelo ea hae hore Jehova oa mo rata. O ile a bua ka makhetlo hore Ntate oa hae oa mo rata.—Joh. 3:35; 10:17; 17:24.

9. Mantsoe a sebelisitsoeng qalong ha ho ne ho ngoloa Baroma 5:5 a hlalosa lerato leo Jehova a ratang batlotsuoa ka lona joang?

⁹ Jehova o boetse oa bontša hore o rata batlotsuoa. (Bala Baroma 5:5.) Ka puo eo lengolo lena le neng le ngotsoe ka eona qalong, temana ena e fana ka maikutlo a hore lerato leo Jehova a ratang batlotsuoa ka lona le matla hoo le ka tšoantšoang le metsi a phallang. Papiso ena e bontša ka ho hlaka hore Jehova o rata batlotsuoa haholo. Batlotsuoa baa tseba hore ‘ba ratoa ke Molimo.’ (Juda 1) Moapostola Johanne o ile a hlalosa hore na ba ikutloa joang ha a ne a re: “Bonang hore na Ntate o re rata hakaakang! O re bitsa bana ba hae.” (1 Joh. 3:1) Na Jehova o rata batlotsuoa feela? Che, Jehova o bontšitse hore o re rata kaofela.

10. Ke eng e ka sehloohong e bontšang hore Jehova oa u rata?

¹⁰ Ke eng e ka sehloohong e bontšang hore Jehova oa re rata? O ile a re lopolla. Ka ho etsa joalo, Jehova o bontšitse lerato le fetang leo motho ofe kapa ofe a kileng a le bontša. (Joh. 3:16; Bar. 5:8) Jehova o fane ka Mora oa hae eo a mo ratang hore a shoele batho bohle e le hore re ka tšoareloa libe re be re khone ho ba metsoalle ea hae. (1 Joh. 4:10) Ha re ntse re tsoela pele ho nahanisisa ka hore na Jehova le Jesu ba lahlehetsoe hakae, re tla utloisisa haholoanyane hore na ba re rata hakae. (Bagal. 2:20) Ha rea lopolloa hobane feela melao ea Jehova ea toka e hloka hore re lopolloe. Jehova o re lopolotse hobane a re rata. Jehova o bontšitse hore oa re rata ka hore a tele motho oa bohlokoa ka ho fetisisa ho eena e leng Jesu. O ile a lumella hore Mora oa hae a utloe bohloko a be a re shoele.

11. Re ithuta eng ho Jeremia 31:3?

¹¹ Joalokaha re se re bone, Jehova ha a pate tsela eo a ikutloang ka eona ka rona empa oa re bolella hore na o re rata hakae. (Bala Jeremia 31:3.) Jehova o re huletse ho eena hobane a re rata. (Bapisa le Deuteronoma 7:​7, 8.) Ha ho na ntho kapa motho ea ka re arohanyang le lerato la hae. (Bar. 8:​38, 39) Lerato lee le etsa hore u ikutloe joang? Bala Pesaleme ea 23 ’me u bone hore na Davida o ne a ikutloa joang ka lerato leo Jehova a neng a mo rata ka lona le hore na uena le ka etsa hore u ikutloe joang.

LERATO LEO JEHOVA A U RATANG KA LONA LE ETSA HORE U IKUTLOE JOANG?

12. Pesaleme ea 23 e bua ka eng?

¹² Bala Pesaleme ea 23:​1-6. Pesalemeng ea 23, Davida o bina pina e bontšang kamoo a kholisehileng kateng hore Jehova oa mo rata le hore o tla mo hlokomela. O bitsa Jehova Molisa oa hae ’me o hlalosa kamoo eena le Jehova  e leng metsoalle e haufi kateng. Davida o ne a ikutloa a sireletsehile ha Jehova a mo tataisa ’me o ne a itšetleha ka eena ka ho feletseng. O ne a tseba hore lerato la Jehova le tla mo sala morao ka matsatsi ’ohle a bophelo ba hae. Ke hobane’ng ha a ne a kholisehile hakaale?

13. Ke hobane’ng ha Davida a ne a kholisehile hore Jehova o tla mo hlokomela?

¹³ “Nke ke ka hloka letho.” Davida o ne a utloa a hlokomelehile hantle hobane Jehova o ne a lula a mo fa lintho tsohle tseo a li hlokang. Davida o ne a boetse a tseba hore Jehova ke motsoalle oa hae le hore o thabisa Jehova. Ke kahoo a neng a kholisehile hore ho sa tsotellehe hore na o tla hlaheloa ke eng nakong e tlang, Jehova o tla lula a mo hlokomela ka lintho tsohle tseo a li hlokang. Kaha Davida o ne a tseba hore Jehova oa mo rata le hore o tla mo hlokomela, o ne a sa tšoenyeha empa o ne a lula a thabile a bile a khotsofetse.—Pes. 16:11.

14. Jehova a ka re hlokomela joang?

¹⁴ Jehova oa re rata le ho re hlokomela, haholo-holo ha lintho tse bohloko li re etsahalla. Morali oa bo rona Claire a ea seng a e-na le lilemo tse fetang 20 a le Bethele o ile a utloa a sa tsebe hore na a ka thusa lelapa labo joang ha le ne le hlahetsoe ke mathata a boima a latellanang. Ntate oa hae o ile a otloa ke stroke, ngoan’abo oa ngoanana a khaoloa, lelapa labo la e-ba le mathata a lichelete la ba la nkeloa ntlo. Jehova o ile a ba hlokomela joang? Claire o re: “Jehova o ile a etsa bonnete ba hore lelapa leso le ba le lintho tseo le li hlokang letsatsi le letsatsi. Ka makhetlo a mangata, Jehova o ile a re fa lintho tse fetang tseo re neng re li hloka. Hangata ke lula ke nahana ka litsela tseo Jehova a re thusitseng ka tsona ’me le ka mohla nke ke ka lebala hore na o re rata hakae. Ho lula ke  nahana ka lintho tsena ho nthusitse hore ke lule ke sebeletsa Jehova ke thabile leha ke e-na le mathata.”

15. Ke hobane’ng ha Davida a ne a ikutloa a khatholohile? (Sheba setšoantšo.)

¹⁵ “Oa nkhatholla.” Ka linako tse ling Davida o ne a ikutloa a imetsoe ke mathata le liteko tseo a neng a kopana le tsona. (Pes. 18:​4-6) Empa lerato leo Jehova a mo ratang ka lona le tlhokomelo ea hae li ile tsa mo khatholla. Jehova o ile a isa motsoalle oa hae ea khathetseng “makhulong a tletseng joang” le “libakeng tse nang le metsi a mangata moo [a] tla phomola teng.” Ka lebaka leo, Davida o ile a boela a ba matla hape ’me a tsoela pele a sebeletsa Jehova a thabile.—Pes. 18:​28-32.

16. Lerato leo Jehova a u ratang ka lona le ile la u khatholla joang?

¹⁶ Ka tsela e tšoanang, mehleng ena “ha re e-s’o timele hobane Jehova o lerato” ha re kopana le liteko le mathata bophelong. (Lillo 3:22; Bakol. 1:11) Nahana ka mohlala oa Rachel. O ne a utloile bohloko haholo ha monna oa hae a mo siea a bile a tlohela Jehova nakong ea seoa sa COVID-19. Jehova o ile a mo thusa joang? O re: “Jehova o ile a etsa bonnete ba hore ke ikutloa ke ratoa. O ile a mpha metsoalle e ileng ea qeta nako le ’na, ea ntlisetsa lijo, ea nthomella melaetsa e monate le mangolo a Bibele a khothatsang, ea bososela le ’na ea ba ea lula e nkhopotsa hore Jehova o ne a ntlhokomela. Ke lula ke leboha Jehova kamehla ka lelapa le leholo le nang le lerato leo a mphileng lona.”

17. Ke hobane’ng ha Davida a ne a sa “tšabe letho le kotsi”?

¹⁷ “Ha ke tšabe letho le kotsi hobane u na le ’na.” Hangata bophelo ba Davida bo ne bo lula bo le kotsing a bile a e-na le lira tse ngata tse matla. Leha ho le joalo, lerato leo Jehova a mo ratang ka lona le ile la etsa hore a ikutloe a bolokehile a bile a sireletsehile. Davida o ne a utloa hore Jehova o na le eena maemong ’ohle ’me seo se ne se etsa hore a khaotse ho tšoenyeha. Ke kahoo a ileng a bina a re: “[Jehova] o ile a mpholosa linthong tsohle tseo ke li tšabang.” (Pes. 34:4) Le hoja ka linako tse ling Davida a ne a ikutloa a tšohile haholo, o ne a khona ho hlola tšabo eo hobane a tseba hore Jehova oa mo rata.

18. Ho tseba hore Jehova oa re rata ho re fa matla joang ha re tšohile?

¹⁸ Ho tseba hore Jehova oa re rata ho re fa matla joang ha re tobane le maemo a re tšosang?  Morali oa bo rona Susi oa pula-maliboho oa hlalosa hore na eena le monna oa hae ba ile ba ikutloa joang ka mor’a hore mora oa bona a ipolaee. O re: “Ha ntho e bohloko joaloka ena e u hlahela bophelong, e u ama haholo ’me e etsa hore u ikutloe u se na matla. Empa lerato leo Jehova a re ratang ka lona le entse hore re ikutloe re bolokehile re bile re sireletsehile.” Morali oa bo rona Rachel ea boletsoeng pejana o re: “Bosiu bo bong ha ke ne ke utloile bohloko haholo, ke tšoenyehile ke bile ke tšohile, ke ile ka rapela Jehova ke lla ka lentsoe le phahameng. Ka nako eo, ke ile ka utloa ha Jehova a nthoba pelo a bile a nthusa hore ke khone ho khoba matšoafo joalokaha ’mè a etsa ho lesea la hae, eaba ke khona ho robala. Nke ke ka lebala nako eo.” Moholo ea bitsoang Tasos o ile a koalloa lilemo tse ’nè teronkong hobane a hanne ho ba lesole. O ile a utloa joang hore Jehova oa mo rata le ho mo tsotella? O re: “Jehova o ile a mpha lintho tse fetang tseo ke neng ke li hloka. Sena se ile sa matlafatsa kholiseho ea ka ea hore nka mo tšepa ka ho feletseng. Hape Jehova o ile a sebelisa moea oa hae ho nthusa hore ke thabe le hoja ke ne ke le sebakeng se tepeletsang. Ke ile ka hlokomela hore ha ke lula ke tšepile Jehova, ke ne ke tla bona hore oa nthata. Kahoo, ke ile ka ba pula-maliboho ea kamehla ke ntse ke le teronkong.”

ATAMELA HO MOLIMO OA HAO EA U RATANG

19. (a) Ho tseba hore Jehova oa re rata ho tl’o etsa hore re mo rapele joang? (b) Ke mantsoe afe a hlalosang tsela eo Jehova a re ratang ka eona a u amang maikutlo? (Sheba lebokose le reng, “ Mantsoe a re Thusang ho Utloa Hore Jehova o re Rata ka Lerato le Mofuthu.”)

¹⁹ Lipale tsa bophelo tseo re buileng ka tsona lia paka hore Jehova, “Molimo ea lerato,” o na le rona. (2 Bakor. 13:11) O re tsotella re le batho ka bomong. Re kholisehile hore o re “sireletsa . . . ka lerato la hae.” (Pes. 32:10) Ha re tsoela pele re nahanisisa kamoo Jehova a re bontšang hore oa re rata, re bona haholoanyane hore oa re tsotella ’me seo se etsa hore re atamele haufi le eena. Re ka mo rapela ka bolokolohi ’me ra mo bolella kamoo re hlokang hore a re rate. Re ka mo bolella lintho tsohle tse re tšoenyang hobane re kholisehile hore oa utloisisa le hore o ikemiselitse ho re thusa.—Pes. 145:​18, 19.

20. Lerato leo Jehova a re ratang ka lona le re atametsa haufi le eena joang?

²⁰ Feela joalokaha re atamela haufi le mollo ha ho bata, re atamela haufi le Jehova hobane a re rata. Jehova o re rata haholo ebile o bonolo. Kahoo, thaba hobane Jehova oa u rata. E se eka re ka arabela leratong leo Jehova a re bontšang lona ka ho re: “Ke rata Jehova.”—Pes. 116:1.