1. Ke hobane’ng ha lintho tsohle li ikarabella ho Jehova? (Sheba setšoantšo se qalong.)

JEHOVA o bopile lintho tsohle. Bibele e re: “Maholimo ke a Jehova Molimo oa hao, esita le maholimo a maholimo, lefatše le tsohle tse ho lona.” (Deut. 10:14; Tšen. 4:11) Ka lebaka leo, kaofela ha rona re ikarabella ho Jehova. (Pes. 100:3) Leha ho le joalo, ho tloha khale esale Jehova a khetha batho ba itseng e le ba bohlokoa ho eena.

2. Ke bo-mang bao Jehova a neng a ba khethile hore e be sechaba sa hae?

² Mohlala, ha Pesaleme ea 135 e bua ka bahlanka ba Jehova ba tšepahalang ba Iseraele ea boholo-holo e re ke “thepa ea hae [Jehova] e khethehileng.” (Pes. 135:4) Hape, buka ea Hosea e ile ea bolela esale pele hore batho ba bang bao e seng Baiseraele e ne e tla ba batho ba Jehova. (Hos. 2:23) Boprofeta bona bo ile ba phethahala ha Jehova a ne a khetha batho bao eseng Bajuda hore e tl’o ba marena le Jesu Kreste. (Lik. 10:45; Bar. 9:23-26) Sechaba sena se halalelang ke “letlotlo le khethehileng” ho Jehova hobane o se tlotsitse ka moea o halalelang e le hore se ka phela leholimong. (1 Pet. 2:9, 10) Empa ho thoe’ng ka Bakreste ba tšepahalang ba nang le tšepo ea ho phela lefatšeng? Jehova o  re ke “sechaba sa” hae le “bakhethoa ba” hae.—Esa. 65:22.

3. (a) Ke bo-mang bao Jehova a ba amohelang mehleng ee? (b) Re tla ithuta’ng sehloohong see?

³ Mehleng ena, “mohlatsoana” e leng batho ba nang le tšepo ea ho phela leholimong, le “linku tse ling” e leng batho ba nang le tšepo ea ho phela lefatšeng ba sebetsa hammoho e le “mohlape o le mong” oo Jehova a o amohelang. (Luka 12:32; Joh. 10:16) Re ananela monyetla oo Jehova a re fileng oona oa hore re be le kamano e ntle le eena. Sehlooho sena se tla bontša litsela tse fapaneng tseo ka tsona re ka bontšang hore re ananela monyetla oo o khethehileng.

4. (a) Tsela e ’ngoe eo ka eona re ka bontšang hore re batla ho ba le kamano e ntle le Jehova ke efe? (b) Jesu o ile a etsa ntho e tšoanang joang?

⁴ Tsela e ’ngoe eo ka eona re ka bontšang hore rea ananela ke ka ho inehela ho Jehova ka ho felletseng. Ha re kolobetsoa, re bontša phatlalatsa hore re file Jehova bophelo ba rona ’me re rata ho etsa thato ea hae le ho ikokobelletsa eena. (Baheb. 12:9) Jesu o ile a etsa ntho e tšoanang ha a ne a kolobetsoa kaha o ile a re ho Jehova: “Ke thabetse ho etsa thato ea hao, Molimo oa ka.” (Pes. 40:7, 8) Jesu o ile a inehela ho Jehova le hoja e ne e se e ntse e le karolo ea sechaba se inehetseng ho Molimo.

5, 6. (a) Jehova o ile a ikutloa joang ha Jesu a kolobetsoa? (b) Ke mohlala ofe o bontšang hore Jehova oa thaba ha re inehela ho eena le hoja a bopile lintho tsohle?

⁵ Jehova o ile a etsa’ng ka mor’a hore Jesu a kolobetsoe? Bibele e re: “Ka mor’a hore Jesu a kolobetsoe kapele-pele a nyoloha a tsoa ka metsing; ’me, bonang! maholimo a buleha, ’me a bona moea oa Molimo o theoha joaloka leeba o tla holim’a hae. Bonang! Hape, ha e-ba le lentsoe le tsoang maholimong le reng: ‘Enoa ke Mora oa ka, ea ratoang, eo ke mo amohetseng.’” (Mat. 3:16, 17) Le hoja Jesu e ne e le mora oa Molimo, Jehova o ile a thaba haholo ha a mo bona a etsa thato ea Hae ka ho feletseng. Ka ho tšoanang, Jehova o thaba haholo ha re inehela ho eena ’me o tla re hlohonolofatsa.—Pes. 149:4.

⁶ Mohlala, a re re ntate o lemme lipalesa tse ntle serapeng sa hae. Joale ka letsatsi le leng, moralinyana oa hae o kha e ’ngoe ea lipalesa tseo ’me o mo fa eona. Na lipalesa tseo ha se tsa ntate? Ke joang a ka fang ntate palesa eo e leng ea hae? Ntate ea lerato a ke ke a nahana ka lipotso tse joalo. Ho e-na le hoo, o tla thaba ha a fuoa palesa kaha ke pontšo ea hore moralinyana oa hae oa mo rata. Ntate o tla thabela palesa eo haholo ho feta tse ngata tse serapeng. Empa Jehova o thaba le ho feta ha re inehela ho eena ka ho feletseng.—Ex. 34:14.

7. Malakia o ile a re Jehova o ikutloa joang ka batho ba mo sebeletsang ka ho rata?

⁷ Bala Malakia 3:16. Haeba ha u e-s’o inehele ho Jehova le ho kolobetsoa, e ka ba bohlale hore u nahane ka ho etsa joalo. Ho tloha ha re hlaha, re ne re se re ntse re ikarabella ho Jehova. Nahana hore na Jehova o tla thaba hakaakang ha u inehela ho eena hore u etse thato ea hae hobane u batla ho tšehetsa bobusi ba hae. (Liprov. 23:15) Jehova o ela hloko batho ba ithaopelang ho mo sebeletsa, ebile o ngola mabitso a bona ‘bukeng ea hae ea khopotso.’

8, 9. Jehova o lebeletse’ng ho batho bao mabitso a bona a ngotsoeng ka bukeng ea hae ea khopotso?

⁸ Ho na le lintho tseo re lokelang ho li etsa e le hore mabitso a rona a lule a le ka bukeng ea Jehova ea khopotso. Malakia o ile a re re lokela ho tšaba Jehova le ho  nahanisisa ka lebitso la hae. Haeba re rapela mang kapa mang kapa ntho leha e le efe ntle le Jehova, mabitso a rona a tla hlakoloa ka har’a buka ea bophelo.—Ex. 32:33; Pes. 69:28.

⁹ Kahoo, ho inehela ho Jehova, ha ho akarelletse feela ho mo tšepisa hore re tla etsa thato ea hae ’me re kolobetsoe. Tsena ke lintho tseo re li etsang hanngoe, empa ho sebeletsa Jehova ke ntho eo re lokelang ho e etsa bophelo bohle ba rona. Ho ema ka lehlakoreng la Jehova ho akarelletsa ho mo mamela le ho etsa lintho tseo a li ratang ka linako tsohle.—1 Pet. 4:1, 2.

10. Ke phapang efe e lokelang ho ba teng pakeng tsa batho ba sebeletsang Jehova le ba sa mo sebeletseng?

¹⁰ Sehloohong se fetileng re ithutile ka Kaine, Solomone le Baiseraele. Kaofela ha bona ba ne ba ipolela feela hore ba rapela Jehova empa ha baa ka ba mo tšepahalla. Mehlala ea bona e bontša hore ha rea lokela ho ipolela feela hore re rapela Jehova empa re lokela ho hloea lintho tseo a li hloileng re rate lintho tseo a li ratang. (Bar. 12:9) Ka mor’a hore Malakia a bue ka “buka ea khopotso,” Jehova o ile a bua ka “phapang pakeng tsa ea lokileng le ea khopo, pakeng tsa ea sebeletsang Molimo le ea sa kang a mo sebeletsa.”—Mal. 3:18.

11. Ke hobane’ng ha u lokela ho etsa hore tsoelo-pelo ea hao e bonahale ho batho bohle?

¹¹ Re ananela hore ebe Jehova o re khethile hore re be batho ba hae. Tsoelo-pele ea rona e lokela ho “bonahala ho batho bohle.” (1 Tim. 4:15; Mat. 5:16) Ipotse: ‘Na batho baa hlokomela hore ke tšepahalla Jehova? Na ke sebelisa menyetla e hlahang e le hore ke bolelle batho ba bang hore ke Paki ea Jehova?’ Jehova o tla utloa bohloko haholo haeba re le lihlong ho bolella batho hore re ka lehlakoreng la hae.—Pes. 119:46; bala Mareka 8:38.

12, 13. Ke lintho life tse etsang hore ho be thata ho khetholla Bakreste ba bang ho batho bao e seng Lipaki?

¹² Ho utloisa bohloko hore ebe ha ho na phapang e kaalo pakeng tsa Lipaki tse ling le batho ba sa sebeletseng Jehova kaha li  amohetse “moea oa lefatše.” (1 Bakor. 2:12) Moea ona o etsa hore batho ba rate “litakatso tsa nama.” (Baef. 2:3) Mohlala, ho sa tsotellehe khalemelo eo re e fuoang, batho ba bang ba ntse ba tsoela pele ho apara ka tsela e sa hlompheheng. Ba apara liaparo tse ba penyang le tse bonaletsang esita le ha ba ea libokeng. Ba bang ba etsa litaele tsa moriri tse ba bitsetsang mahlo a batho hoo ho leng thata ho ba khetholla ho batho bao e seng Lipaki. (1 Tim. 2:9, 10) Kahoo, ho ka ba thata ho bona hore na ba ka lehlakoreng la Jehova kapa ke ‘metsoalle ea lefatše.’—Jak. 4:4.

¹³ Ka linako tse ling Bakreste ba ka bonahala ba sa fapana hakaalo le batho bao e seng Lipaki. Mohlala, ha ba le meketeng, lintho tseo ba li etsang le tsela eo ba jaefang ka eona, ha e tšoanele Bakreste. Lifoto tseo ba bang ba li behang Inthaneteng le lintho tseo ba li ngolang, li bontša hore ha ba nahane lintho ka tsela eo Jehova a nahanang ka eona. Le hoja ba e-s’o ka ba khalemelloa sebe se tebileng, ba ntse ba ka susumetsa Bakreste ba bang hampe ba ntseng ba sebetsa ka thata hore ba be le boitšoaro bo botle.—Bala 1 Petrose 2:11, 12.

14. Re lokela ho etsa’ng hore re lule re le metsoalle ea Jehova?

¹⁴ Batho bao e seng Bakreste ba re susumelletsa hore re be le “takatso ea nama le takatso ea mahlo le pontšo ea mponeng ea mokhoa oa motho oa boipheliso.” (1 Joh. 2:16) Kaha re ka lehlakoreng la Jehova, re ‘hana ho hloka bomolimo le litakatso tsa lefatše empa re phela ka ho hlaphoheloa kelellong le ho loka le boinehelo ba bomolimo har’a tsamaiso ena ea hona joale ea lintho.’ (Tite 2:12) Ha re e-ja, re e-noa, re apara, re itlhopha, re sebetsa kapa re bua, re lokela ho bontša batho bohle hore re bahlanka ba Jehova.—Bala 1 Bakorinthe 10:31, 32.

15. Ke hobane’ng ha re lokela ho rata Bakreste-’moho le rona le ho ba mosa ho bona?

¹⁵ Re bontša hore re nka setsoalle sa rona le Jehova e le sa bohlokoa haeba re sebelisana le Bakreste-’moho le rona hantle. Le bona ke bahlanka ba Jehova. Haeba re lula re hopola taba ena, re tla rata bara le barali babo rona ’me re be mosa ho bona. (1 Bathes. 5:15) Jesu o ile a re ho barutuoa ba hae: “Bohle ba tla tseba ka sena hore le barutuoa ba ka, haeba le e-na le lerato har’a lōna.”—Joh. 13:35.

16. Re ithuta’ng Molaong oa Moshe mabapi le tsela eo Jehova a ileng a bontša batho ba hae lerato ka eona?

¹⁶ Mohlala o latelang o re thusa ho bona hore na re lokela ho tšoara litho tsa phutheho joang. Ka tempeleng, ho ne ho e-na le lintho tse neng li sebelisetsoa borapeli ba Jehova feela. Molao oa Moshe o ne o hlalosa kamoo lisebelisoa tseo li lokelang ho hlokomeloa kateng. Batho ba neng ba tlola molao oo ba ne ba bolaoa. (Num. 1:50, 51) Haeba Jehova o ile a tsotella lintho tseo tse sa pheleng, na a ke ke a hlokomela bahlanka ba hae ba mo tšepahallang? Jehova o ile a re ho batho ba hae: “Ea le amang o ama leihlo la ka.”—Zak. 2:8.

17. Jehova o “ela hloko” eng?

¹⁷ Malakia o ile a re Jehova o “ela hloko” hore na batho ba hae ba sebelisana joang. (Mal. 3:16) Jehova “o tseba ba hae.” (2 Tim. 2:19) O bona ntho e ’ngoe le e ’ngoe eo re e etsang le eo re e buang. (Baheb. 4:13) Jehova oa bona ha re se mosa ho bara le barali babo rona. Empa ka lehlakoreng le leng oa hlokomela ha re ba tšoarela ha ba re foselitse, ha re fana le ha re le mosa ho bona.—Baheb. 13:16; 1 Pet. 4:8, 9.

18. Re ka bontša joang hore re ananela ho ba batho ba Jehova?

¹⁸ Re batla ho bontša Jehova hore rea ananela hore ebe re batho ba hae. Re ka etsa joalo ka hore re inehele ho eena. Le hoja re phela “har’a moloko o khopameng le o sothehileng,” re batla ho ba batho ba “sa tšoauoeng phoso le ba hlokang molato.” Re boetse re batla ho khanya joaloka “maseli lefatšeng.” (Bafil. 2:15) Kahoo, re qoba ho etsa ntho leha e le efe eo Jehova a e hloileng. (Jak. 4:7) Re rata bara le barali babo rona ebile rea ba hlompha kaha le bona ke bahlanka ba Jehova.—Bar. 12:10

19. Jehova o hlohonolofatsa batho ba hae joang?

¹⁹ Bibele e re: “Jehova a ke ke a furalla batho ba hae.” (Pes. 94:14) Jehova oa re tšepisa hore ho sa tsotellehe hore na re thulana le mathata afe, a ke ke a re lahla. Le haeba re ka shoa, Jehova a ke ke a re lebala. (Bar. 8:38, 39) Kahoo, “haeba re phela, re phela ho hlompha Jehova, ’me haeba re shoa, re shoa ho hlompha Jehova. Ka hona, haeba re phela le haeba re shoa, re ba Jehova.” (Bar. 14:8) Re lebeletse nako eo ka eona Jehova a tla tsosa bahlanka ba hae ba tšepahalang. (Mat. 22:32) Esita le hona joale, Jehova o ntse a re hlohonolofatsa haholo. Feela joalokaha Bibele e bolela, “ho thaba sechaba seo Molimo oa sona e leng Jehova, batho bao a ba khethileng e le lefa la hae.”—Pes. 33:12.