Utloela “Batho ba Mefuta Eohle” Bohloko
HA JESU a ne a ruta barutuoa ba hae hore ba bolele litaba tse molemo, o ne a tseba hore ha se kamehla batho ba tla rata molaetsa oo. (Luka 10:3, 5, 6) Ka linako tse ling ha re le tšimong, re ka kopana le batho ba re halefelang kapa ba mabifi. Kahoo, ho ka ba thata hore kamehla re utloele batho bao re buang le bona ka Bibele bohloko.
Motho ea utloelang ba bang bohloko, oa ba qenehela ebile o batla ho ba thusa. Leha ho le joalo, haeba re sa utloele batho bao re kopanang le bona tšimong bohloko, re ke ke ra chesehela ho ba ruta ’me re ke ke ra atleha ho ba thusa hore e be metsoalle ea Jehova. Empa haeba re ba utloela bohloko, ho tšoana leha re rotelletsa mollo kaha re tla chesehela ho etsa mosebetsi ona.—1 Bathes. 5:19.
Re ka etsa’ng hore re utloele batho bohloko esita leha ho le thata ho etsa joalo? A re ithuteng ka batho ba bararo bao re ka ba etsisang e leng Jehova, Jesu le moapostola Pauluse.
ETSISA JEHOVA KA HORE U UTLOELE BATHO BOHLOKO
Jehova o ’nile a mamella ka lilemo tse likete ha batho ba ntse ba mo senya lebitso. Leha ho le joalo, o lula a le “mosa ho ba se nang teboho le ba khopo.” (Luka 6:35) O ntse a mameletse hobane o mosa. O batla hore “batho ba mefuta eohle ba pholohe.” (1 Tim. 2:3, 4) Le hoja Jehova a hloile bokhopo, o nka batho ba le bohlokoa ’me ha a batle ha mang kapa mang a ka shoa.—2 Pet. 3:9.
Jehova oa tseba hore Satane o foufalitse likelello tsa batho ba sa lumelang. (2 Bakor. 4:3, 4) Ba bangata ba rutiloe lithuto tsa bohata ’me ba boleletsoe lintho tse fosahetseng ho tloha e sa le bana. Kahoo, ho ba thata hore e be Lipaki Tsa Jehova. Jehova o labalabela ho thusa batho ba joalo. Re tseba joang?
Nahana hore na Jehova o ne a ikutloa joang ka Baninive. Le hoja ba ne ba le mabifi, Jehova o ile a re ho Jonase: “Na ha kea tšoanela ho utloela Ninive motse o moholo bohloko, oo ho oona ho nang le batho ba fetang likete tse lekholo le mashome a mabeli [120 000] bao ho hang ba sa tsebeng phapang pakeng tsa letsoho la bona le letona le letsoho la bona le letšehali?” (Jon. 4:11) Kaha Jehova o ne a hlokomela hore Baninive ba lokela ho lokisa kamano ea bona le eena, o ile a roma Jonase ho ea ba lemosa.
Le rona re etsisa Jehova kaha re nka batho ba le bohlokoa. Re lokela ho etsisa Jehova ka hore re labalabele ho thusa batho ba ka ’nang ba mamela esita le haeba ho ka bonahala eka ba ke ke ba rata ho ithuta Bibele.
ETSISA JESU KA HORE U UTLOELE BATHO BOHLOKO
Jesu o ne a tšoana le Ntate oa hae kaha o ne a utloela batho ba sa tsebeng Molimo bohloko. Bibele e re: “Ha a bona bongata a bo hauhela, hobane bo ne bo sohlokehile ’me bo qhalakane joaloka linku tse se nang molisa.” (Mat. 9:36) Jesu o ne a sa kale batho ka mahlo feela. O ne a tseba hore batho ba tlileng ho mo mamela ba rutiloe lithuto tse fosahetseng le hore baeta-pele ba bolumeli ba ne ba ba tšoara hampe. Le hoja a ne a tseba hore ho na le lintho tse ngata tse ka ba sitisang ho mamela, o ile a ’na a ba “ruta lintho tse ngata.”—Mar. 4:1-9.
U se ke oa nyahama ha motho eo u buang le eena a sa mamele ka lekhetlo la pele
Kaha maemo a batho aa fetoha, le tsela eo ba ikutloang ka eona ka Bibele e ka fetoha
Ha batho ba sa mamele molaetsa oa rona, le rona ha rea lokela ho ba kala ka mahlo feela. Re lokela ho ipotsa hore na ke hobane’ng ha ba sa mamele. Ba bang ba ka ’na ba e-ba le maikutlo a fosahetseng ka Bibele kapa ka Bokreste hobane ba bona batho ba ipolelang hore ke Bakreste ba ikaketsa. Ba bang bona ba boleletsoe mashano ka bolumeli ba rona. Batho ba bang ba hlorisoa ke ba malapa a bona kapa ke batho ba bang haeba ba re mamela.
Batho ba bang ba ka ’na ba se re mamele hobane ba ile ba hlaheloa ke mathata a sisimosang, kahoo ba lula ba utloile bohloko. Morali’abo rona e mong oa moromuoa eo lebitso la hae e leng Kim o re: “Sebakeng se seng tšimong ea rona, batho ba bangata ke mahlatsipa a lintoa ’me ba lahlehetsoe ke thepa eohle ea bona. Kahoo ha ba sa na tšepo. Ba lula ba e-na le khatello ea maikutlo ebile ha ba tšepe mang kapa mang. Hangata re kopana le batho ba sa rateng ho re mamela. Ka letsatsi le leng, mong’a ntlo o kile a batla a ntšelakha ka sekele.”
Morali’abo rona Kim o thusoa ke’ng hore a lule a utloela batho bohloko? O re: “Ha ke tšoaroa hampe, ke hopola Lengolo la Liproverbia 19:11 le reng: ‘Temohisiso ea motho e liehisa bohale ba hae.’ Ha ke hopola hore na batho bao ba tsoa hokae, ke ba utloela bohloko. Ha se batho bohle bao re kopanang le bona ba lulang ba le mabifi. Sebakeng sona seo, ho ntse ho e-na le batho bao re ba fumanang ba ratang ho ithuta Bibele.”
Re lokela ho ipotsa: ‘Haeba ke ne ke le boemong ba bona, na ke ne ke tla mamela ha batho ba bua le ’na ka Bibele?’ Mohlomong haeba u ne u boleletsoe mashano ka Lipaki tsa Jehova, le uena u ne u ke ke oa batla ho mamela. Ha re hopola hore Jesu o itse re tšoare batho ka tsela eo re ka ratang hore ba re tšoare ka eona, re susumelletseha ho utloela batho ba bang bohloko esita leha ho ka ba thata ho etsa joalo.—Mat. 7:12.
ETSISA PAULUSE KA HORE U UTLOELE BATHO BOHLOKO
Moapostola Pauluse o ne a qenehela esita le batho ba mo hanyetsang ka mabifi. Hobane’ng? O ne a hopola hore le eena o kile a hlorisa batho ba Molimo. O ile a re: “Pele ke ne ke le monyefoli le mohlorisi le monna oa monyelisi. Leha ho le joalo, ke ile ka bontšoa mohau, hobane ke ne ke hloka tsebo ’me ke etsa ka ho hloka tumelo.” (1 Tim. 1:13) O ile a hlokomela hore Jehova le Jesu ba ile ba mo hauhela. E ka ’na eaba ba bang ba bona ba ne ba mo hopotsa eena pele e e-ba Mokreste.
Ka linako tse ling, Pauluse o ne a kopana le batho ba ratang lithuto tsa bohata ho tlola. O ne a itšoara joang? Lengolo la Liketso 17:16 le re ha a le Athene, “moea oa hae ka hare ho eena oa halefa ha a bona hore motse oo o ne o tletse litšoantšo tse rapeloang.” Leha ho le joalo, o ile a ba ruta ka Molimo a sebelisa tsona litšoantšo tseo. (Lik. 17:22, 23) Pauluse o ne a fetola tsela eo a rutang ka eona e le hore e lumellane le batho ba fapaneng bao a neng a bua le bona ’me a etsa sohle seo a ka se khonang ho “pholosa ba bang.”—1 Bakor. 9:20-23.
Re lokela ho etsisa Pauluse ka hore re tsebe hore na ke lintho life tse fosahetseng tseo batho ba li lumelang ebe re batla litsela tsa ho ba tsebisa “litaba tse molemo tsa ho hong ho molemo.” (Esa. 52:7) Morali’abo rona Dorothy o re: “Batho ba bangata tšimong ea rona ba rutiloe hore Molimo o ahlola batho ebile o khopo. Kea ba babatsa hore ebe ba lumela ho Molimo ebe ke ba thusa ho hlokomela hore Jehova oa ba rata le hore o re tšepisa lintho tse molemo nakong e tlang.”
“U ’NE U HLŌLE BOBE KA BOTLE”
Ha bofelo bo ntse bo atamela, re tla lebella hore mekhoa e mebe ea batho bao re buang le bona ka Bibele e tlohe “bobeng ho ea bobeng bo fetisisang.” (2 Tim. 3:1, 13) Leha ho le joalo, ha rea lokela ho lumella mekhoa eo hore e re sitise ho ba utloela bohloko kapa hore e re amohe thabo. Jehova o tla re fa matla a hore ‘re ’ne re hlōle bobe ka botle.’ (Bar. 12:21) Morali’abo rona e mong oa pula-maliboho eo lebitso la hae e leng Jessica o re: “Hangata ke kopana le batho ba ikhohomosang kapa ba khellang molaetsa oa rona fatše. Ke ee ke utloe ke tenehile. Empa pele ke qala moqoqo, ke ee ke rapelle ka pelong ke kopa Jehova hore a nthuse hore ke bone batho ka tsela eo Eena a ba bonang ka eona. Ha ke etsa joalo, ke tlosa kelello ea ka linthong tse nyahamisang ebe ke nahana kamoo nka thusang batho kateng.”
Re lula re batla batho ba thabelang molaetsa oo re ba bolellang oona e le hore ba tle ba phele ka ho sa feleng
Qetellong batho ba bang ba ka re mamela haeba re sa fele pelo
Re boetse re lokela ho nahana ka ho khothatsa Bakreste-’moho le rona. Morali’abo rona Jessica o re: “Haeba e mong oa rona a kopane le mong’a ntlo ea sa mameleng molaetsa oa rona, ke leka ho bua ka lintho tse khothatsang. Ke ee ke bue ka kamoo mosebetsi oa rona o thusang batho ba bangata kateng.”
Jehova oa hlokomela hore re kopana le mathata ha re le tšimong. Oa thaba ha a bona re mo etsisa ka hore re hauhele batho. (Luka 6:36) Ke ’nete hore Jehova a ke ke a hauhela batho ka ho sa feleng. Re kholisehile hore o tseba nako e nepahetseng ea hore a felise batho ba khopo. Ho fihlela nako eo e fihla, re lokela ho ruta batho ka eena. (2 Tim. 4:2) E se eka re ka tsoela pele ho chesehela ho phetha mosebetsi oa rona ’me re utloele “batho ba mefuta eohle” bohloko.
