1. Thato ea Jehova ke efe mehleng ee?

 KE THATO ea Molimo hore litaba tse molemo tsa ’Muso oa hae li boleloe lefatšeng lohle mehleng ena. (Mar. 13:​10; 1 Tim. 2:​3, 4) Mosebetsi ona ke oa Jehova ’me ke oa bohlokoa haholo hoo a khethileng Mora oa hae eo a mo ratang hore a o tataise. Kaha Jesu oa re tataisa, re ka kholiseha hore mosebetsi oa boboleli o tla etsoa lefatšeng lohle pele bofelo bo fihla joalokaha Jehova a batla.​—Mat. 24:14.

2. Re tla ithuta’ng sehloohong see?

² Sehloohong sena re tl’o ithuta kamoo Jesu a sebelisang “lekhoba le tšepahalang le le masene” kateng ho re koetlisa le sebelisa Lentsoe la Molimo le kamoo Jesu a tataisang balateli ba hae kateng ho etsa mosebetsi o moholo oa boboleli. (Mat. 24:​45) Re tla boela re bone seo e mong le e mong oa rona a ka se etsang ho tšehetsa Jesu le lekhoba le tšepahalang.

3. Jesu o fuoe matla a ho etsa’ng?

³ Jesu o etella pele mosebetsi oa boboleli. Re kholisoa ke’ng? Nakoana pele a nyolohela leholimong o ile a kopana le balateli ba hae thabeng ea Galilea. O ile a re ho bona: “Ke filoe matla ’ohle leholimong le lefatšeng.” Hlokomela hore na o ile a re’ng ka mor’a moo. O ile a re: “Ka hona e-eang ’me le etse batho ba lichaba tsohle barutuoa.” (Mat. 28:​18, 19) Kahoo, e ’ngoe ea lintho tseo Jesu a filoeng matla holim’a eona, ke ho tataisa mosebetsi oa boboleli.

4. Ke hobane’ng ha re kholisehile hore Jesu o ntse a tataisa mosebetsi oa boboleli?

 ⁴ Jesu o ile a re mosebetsi oa ho bolela le ho etsa barutuoa o tla etsoa ‘lichabeng tsohle’ ’me o tla ba le balateli ba hae “ka matsatsi ’ohle ho fihlela qetellong ea tsamaiso ea lintho.” (Mat. 28:​20) Mantsoe ao a bontša hantle hore Jesu o ne a tla tataisa mosebetsi oa boboleli ho fihlela mehleng ea rona.

5. Re thusa joang ho phethahatsa Pesaleme ea 110:3?

⁵ Jesu o ne a sa tšoenyeha ka hore na ho tla ba le basebetsi ba lekaneng matsatsing a ho qetela kapa che. O ne a tseba hore boprofeta ba mopesaleme bo tla phethahala bo reng: “Batho ba hao ba tla itlhahisa ka ho rata letsatsing la lebotho la hao la sesole.” (Pes. 110:3) Haeba le uena u bolela litaba tse molemo, u tšehetsa Jesu le lekhoba le tšepahalang ho phethahatsa boprofeta boo. Mosebetsi o tsoela pele le hoja ho e-na le litšitiso.

6. Ke bothata bofe boo baboleli ba ’Muso oa Molimo ba kopanang le bona mehleng ee?

⁶ Bothata boo baboleli ba litaba tse molemo ba kopanang le bona ke ho hanyetsoa. Bakoenehi, baeta-pele ba bolumeli le bo-ralipolotiki ba boleletse batho ba bangata mashano ka mosebetsi oa rona. Haeba beng ka rona, batho bao re ba tsebang le batho bao re sebetsang le bona ba thetsitsoe ke mashano ana, ba ka re susumeletsa ho khaotsa ho sebeletsa Jehova le ho khaotsa ho bolela. Linaheng tse ling, lira tsa rona li tšosa bara le barali babo rona, lia ba hlasela, lia ba tšoara ebile li ba isa chankaneng. Ha re makale ha re tšoaroa ka tsela ena. Jesu o ile a re: “Le tla hlouoa ke lichaba tsohle ka lebaka la lebitso la ka.” (Mat. 24:9) Ho hlouoa ka tsela ena ke bopaki ba hore Jehova oa re amohela. (Mat. 5:​11, 12) Diabolose ke eena ea etsang hore re hanyetsoe. Empa Jesu o matla haholo ho feta Satane. Kaha Jesu oa re tšehetsa, litaba tse molemo li boleloa ho batho ba lichaba tsohle. Nahana ka bopaki ba sena.

7. Re na le bopaki bofe ba hore Tšenolo 14:​6, 7 ea phethahala?

⁷ Bothata bo bong boo re kopanang le bona ha re bolela ke hore batho ba bua lipuo tse ngata tse fapaneng. Jesu o ile a senolela moapostola Johanne hore mehleng ea rona bothata bona bo ne bo tla hloloa ’me litaba tse molemo li boleloe. (Bala Tšenolo 14:​6, 7.) Seo se ne se tla etsahala joang? Re fa batho ba bangata kahohle kamoo ho ka khonehang monyetla oa hore ba utloe molaetsa oa ’Muso. Kajeno batho lefatšeng lohle ba ka bala lingoloa tse thehiloeng Bibeleng tse fumanehang websaeteng ea rona ea jw.org kaha e fetoletsoe ka lipuo tse fetang sekete. Sehlopha se Busang se fane ka tumello ea hore ho fetoleloe buka ea U ka Thaba ka ho sa Feleng! ka lipuo tse fetang 700. Buka ena ke eona e ka sehloohong eo re e sebelisang ho etsa batho barutuoa. Ho boetse ho na le livideo tse thehiloeng Bibeleng bakeng sa batho ba sa utloeng le lingoloa tsa braille bakeng sa ba sa boneng. Re bona ka mahlo ha boprofeta ba Bibele bo phethahala. Batho “ba tsoang lipuong tsohle tsa lichaba” ba ithuta ho bua ‘puo e hloekileng’ ea Bibele. (Zak. 8:​23; Sof. 3:9) Sena sohle se finyelloa tlas’a boeta-pele bo tsoileng matsoho ba Jesu Kreste.

8. Mosebetsi oa rona oa ho bolela o finyelletse eng?

⁸ Mehleng ena batho ba ka holimo ho limilione tse robeli linaheng tse 240 ke karolo ea mokhatlo oa Jehova ’me selemo le selemo ho kolobetsoa batho ba likete tse mashome. Empa ntho ea bohlokoa ke “botho bo bocha” kapa makhabane a Bokreste ao barutuoa bana ba bacha ba sebeletsang ho ba le ’ona. (Bakol. 3:​8-10) Ba bangata ba ile ba khaotsa  ho phela ka boitšoaro bo bobe, ho rata ntoa, ho ba leeme le ho rata naha ka ho feteletseng. Boprofeta bo hlahang ho Esaia 2:4 boa phethahala hobane ‘ha ba sa ithuta ntoa.’ Kaha re sebetsa ka thata ho apara botho bo bocha, re etsa hore batho ba batle ho kena ka mokhatlong oa Molimo ’me re bontša hore re latela moeta-pele oa rona Kreste Jesu. (Joh. 13:​35; 1 Pet. 2:​12) Lintho tsena ha li iketsahalle feela tjee. Jesu o re fa thuso eo re e hlokang.

9. Ho ea ka Matheu 24:​45-47, Jesu o ile a re ho tla etsahala’ng mehleng ea bofelo?

⁹ Bala Matheu 24:​45-47. Jesu o ile a bolela esale pele hore matsatsing a ho qetela, o tla khetha “lekhoba le tšepahalang le le masene” ho fa balateli ba hae koetliso e tsoang Lentsoeng la Molimo. Kahoo, re ne re ka lebella hore lekhoba leo le sebetse ka thata mehleng ena. Sena ke sona se hlileng se etsahalang. Moeta-pele oa rona Jesu o sebelisa sehlopha sena se senyenyane sa bara babo rona ba tlotsitsoeng ho fa batho ba Molimo le ba bang ba thahasellang ‘lijo ka nako e tšoanetseng.’ Bara bana babo rona ha ba nke hore ba lokela ho laola tumelo ea batho ba bang. (2 Bakor. 1:​24) Ho e-na le hoo, ba nka Jesu Kreste e le eena “moeta-pele le molaoli” oa batho ba hae.​—Esa. 55:4.

10. Libukeng tsee tse hlahileng litšoantšong ke efe e ileng ea u thusa hore u qale ho sebeletsa Jehova?

¹⁰ Ho tloha ka 1919, haesale lekhoba le tšepahalang le hatisa lingoliloeng tse fapa-fapaneng ho fa batho ba qalang ho ithuta monyetla oa ho tseba ’nete e ka Lentsoeng la Molimo. Ka 1921, lekhoba le tšepahalang le ile la lokolla buka ea The Harp of God ho thusa batho ba thahasellang e le hore ba ithute lithuto tsa motheo tsa Bibele. Ha mehla e ntse e fetoha, ho ile ha lokolloa lingoloa tse ling. Uena ke sengoliloeng sefe se u thusitseng ho tseba  le ho rata Ntate oa rona ea leholimong? Mohlomong ke “’Nete e be ea Molimo,” ’Nete e Isang Bophelong bo sa Feleng, U ka Phela ka ho sa Feleng Paradeiseng Lefatšeng, Tsebo e Isang Bophelong bo sa Feleng, Ha e le Hantle ke Eng Seo Bibele e se Rutang?, Re ka Ithuta Eng Bibeleng? kapa buka ea rona e ncha ea U ka Thaba ka ho sa Feleng! Lingoloa tsena kaofela li ne li reretsoe ho re thusa ho etsa barutuoa ’me li ile tsa fela tsa phetha morero oo ha li ne li lokolloa.

11. Ke hobane’ng ha e le habohlokoa hore kaofela ha rona re ithute Bibele re be re ithute ka Jehova?

¹¹ Ha se batho ba qalang ho ithuta feela ba hlokang ho ba le tsebo e tebileng ka Jehova le ka Bibele. Kaofela ha rona rea e hloka. Moapostola Pauluse o ile a ngola a re: “Lijo tse tiileng ke tsa batho ba holileng ka ho feletseng.” O ile a boela a re ho sebelisa seo re ithutileng sona Bibeleng ho tla re thusa “ho khetholla se nepahetseng le se fosahetseng.” (Baheb. 5:​14) Mehleng ena, ha ho bonolo ho mamela melao ea Jehova hobane boitšoaro ba batho ba bangata bo bobe haholo. Empa Jesu o etsa bonnete ba hore re ithuta lintho tse tla re thusa ho lula re e-na le tumelo e matla. Thuto ena e tsoa ka Lentsoeng la Molimo le bululetsoeng e leng Bibele. Jesu o tataisa lekhoba le tšepahalang hore le re fe thuto ena.

12. Joaloka Jesu, re bontšitse joang hore re hlompha lebitso la Molimo?

¹² Joaloka Jesu, le rona re fa lebitso la Molimo tlotla e le tšoanetseng. (Joh. 17:​6, 26) Ka mohlala, ka 1931 re ile ra qala ho ipitsa ka lebitso le thehiloeng Bibeleng e leng Lipaki Tsa Jehova. Ka ho etsa joalo, re ile ra bontša hore lebitso la Ntate oa rona ea leholimong le bohlokoa haholo ho rona le hore re batla ho tsejoa ka lona. (Esa. 43:​10-12) Haesale ho tloha ka October selemong sona seo, lebitso lena le hlaha sekoahelong sa khatiso e ’ngoe le e ’ngoe ea Molula-Qhooa.  Ho feta moo, Phetolelo ea Lefatše le Lecha ea Mangolo a Halalelang e khutliselitse lebitso la Molimo sebakeng sa lona se nepahetseng. Likereke tse sa ruteng ’nete ka Molimo tsona li entse ntho e fapaneng ka ho feletseng hobane li tlositse lebitso la Jehova liphetolelong tsa tsona tse ngata tsa Bibele.

13. U kholisoa ke eng hore Jesu o sebelisa “lekhoba le tšepahalang le le masene” mehleng ee? (Joh. 6:68)

¹³ Jesu o sebelisitse “lekhoba le tšepahalang le le masene” ho haha mokhatlo o ikhethang lefatšeng o etelletsang pele borapeli bo hloekileng. U ikutloa joang ka mokhatlo oo? Mohlomong u ikutloa joaloka moapostola Petrose ea ileng a re ho Jesu: “Re tla tloha re ee ho mang? Ke uena ea nang le lipolelo tsa bophelo bo sa feleng.” (Joh. 6:​68) Re ka be re le hokae hoja ha rea ka ra tseba ka mokhatlo oa Jehova? Ke ka hona Kreste a etsang bonnete ba hore re na le ntho e ’ngoe le e ’ngoe eo re e hlokang hore re lule re tšepahalla Molimo. Hape o re koetlisetsa ho etsa mosebetsi oa ho bolela ka tsela e atlehang. Ho feta moo, o re thusa hore re apare “botho bo bocha” e le hore re khahlise Jehova.​—Baef. 4:24.

14. U ruile molemo joang ka ho ba karolo ea mokhatlo oa Jehova nakong ea seoa sa COVID-19?

¹⁴ Jesu o fana ka tataiso e bohlale ha ho e-na le mathata. Re bone melemo ea tataiso eo ha seoa sa COVID-19 se qala. Ha batho ba bangata lefatšeng ba ne ba sa tsebe hore na ba etse’ng, Jesu o ile a etsa bonnete ba hore re fumana tataiso e hlakileng e le hore re lule re sireletsehile. Re ile ra khothalletsoa ho roala limonkoana ha re le har’a batho le hore re se ke ra atamela pel’a batho ba bang. Baholo ba ile ba hopotsoa hore ba lule ba buisana le bahoeletsi bohle ka phuthehong le ho fumana hore na ba hloka eng hore ba lule ba sireletsehile,  ba phetse hantle ebile ba e-na le tumelo e matla. (Esa. 32:​1, 2) Litlaleho tsa Sehlopha se Busang li ile tsa re khothatsa tsa ba tsa re fa tataiso e eketsehileng.

15. Nakong ee ea seoa, re ile ra fuoa tataiso efe bakeng sa ho tšoara liboka le ho etsa mosebetsi oa boboleli, hona liphello e bile life?

¹⁵ Nakong ea seoa sena, re ile ra boela ra fuoa tataiso e hlakileng ea hore na re ka tšoara liboka joang le ho etsa mosebetsi oa boboleli. Kapele feela re ile ra qala ho tšoara liboka le likopano tse kholo le tse nyenyane ka marang-rang. Re ile ra boela ra qala ho sebelisa mangolo le lifono haholo ho bolela litaba tse molemo. Jehova o ile a hlohonolofatsa boiteko ba rona. Makala a mangata a tlalehile hore palo ea bahoeletsi e eketsehile haholo. Batho ba bangata ba na le lipale tse khothatsang tseo ba ka li phetang tsa lintho tse ba etsahaletseng nakong ena.​—Sheba lebokose le reng “ Jehova o Hlohonolofatsa Mosebetsi oa Rona oa ho Ruta Batho Bibele.”

16. Re ka kholiseha ka eng?

¹⁶ E ka ’na eaba batho ba bang ba ne ba utloa eka mokhatlo o feteletsa lintho ka hore re be hlokolosi haholo nakong ena ea seoa. Empa nako le nako re lula re bona hore tataiso eo re ileng ra e fuoa e ne e le bohlale. (Mat. 11:​19) Ha re ntse re nahanisisa ka tsela e lerato eo Jesu a etellang batho ba hae pele ka eona, re kholisehile hore ho sa tsotellehe hore na ka moso ho tla etsahala’ng, Jehova le Mora oa hae ea ratoang ba tla lula ba e-na le rona.​—Bala Baheberu 13:​5, 6.

17. U ikutloa joang ka hore ebe Jesu ke moeta-pele oa hao?

¹⁷ Re thabile haholo hore ebe Jesu ke moeta-pele oa rona. Re ka har’a mokhatlo o sa aroloeng ke setso, bochaba kapa lipuo. Re fumana thuto e ngata e tsoang Lentsoeng la Molimo ’me re koetlisoa kahohle hore re etse mosebetsi oa ho bolela. Re le batho ka bomong, re rutoa ho apara botho bo bocha le ho ratana. Re na le mabaka a ho ba motlotlo hore ebe Jesu ke moeta-pele oa rona.