HA MORALI oabo rona Lisa a a bua ka ntho e ileng ea etsa hore a batle ho ithuta Bibele, o re: “Ke ile ka angoa ke mosa oo bara le barali babo rona ba ileng ba mpontša oona.” Morali oabo rona Anne le eena o ne a ikutloa ka tsela e tšoanang, o re: “Ke ile ka ithuta Bibele hobane Lipaki Tsa Jehova li ne li le mosa, eseng hakaalo ka lebaka la seo li neng li se ruta.” Hona joale barali bana babo rona ba babeli ba thabela ho bala Bibele le ho nahanisisa ka eona empa ntho e ileng ea ba ama haholo ke ho bontšoa mosa.

Re ka bontša mosa joang ka tsela e tla etsa hore le batho ba bang ba o bontše? Re tla bua ka litsela tse peli tseo re ka bontšang mosa ka tsona, e leng tsela eo re buang ka eona le eo re etsang lintho ka eona. Ka mor’a moo, re tla bua ka hore na ke batho bafe bao re lokelang ho ba bontša mosa.

Mosali ea nang le bokhoni eo ho buuoang ka eena ho Liproverbia khaolo ea 31 o na le “molao oa mosa” lelemeng la hae. (Liprov. 31:26) O lumella “molao” ona hore o laole lintho tseo a li buang le tsela eo a buang ka eona. Bo-ntate le bona ba lokela hore ba sebelise “molao” ona ha ba bua. Batsoali ba bangata baa tseba hore ha ba bua le bana ba bona hampe ba ka ba utloisa bohloko ebile ba ka ’na ba se ke ba ba mamela. Kahoo, ha batsoali ba bua le bana ka tsela e mosa ho tla ba bonolo hore ba ba mamele.

Ho sa tsotellehe hore na u motsoali kapa che, ke joang u ka ithutang ho bua ka tsela e mosa? Karolo e qalang ea Liproverbia 31:26 e re thusa ho fumana karabo ea potso ena, e re: “O ahlamisitse molomo oa hae ka bohlale.” Sena se akarelletsa ho khetha mantsoe ha re bua le ho laola tsela eo re buang ka eona. Ntho e ka re thusang ke hore re ipotse potso ena: ‘Na seo ke tl’o se bua se tla koatisa batho ba bang kapa se etse hore ho be le khotso?’ (Liprov. 15:1) Ke hantle hore re nahane pele re bua.

Maele a mang a re: “Ho na le ea buang a sa nahane joalokaha eka ke ka ho hlaba ha sabole.” (Liprov. 12:18) Ha re nahana hore na lintho tseo re li buang le tsela eo re buang ka eona e ka ama batho ba bang joang, re tla laola tsela eo re buang ka eona. Ha re sebelisa “molao oa mosa,” re ke ke ra bua lintho tse tla utloisa ba bang bohloko kapa ra bua ka tsela e seng mosa. (Baef. 4:31, 32) Re ke ke ra nahana ka lintho tse mpe empa re tla bua ka mosa le batho ba bang. Jehova o re behetse mohlala tabeng ena ha a ne a khothatsa mohlanka oa hae Elia nakong eo a neng a tšohile. Lengeloi le neng le rometsoe ke Jehova le ile la bua ka “lentsoe le bonolo, le tlaase.” (1 Mar. 19:12) Ho ba mosa ho akarelletsa tsela eo re buang le ho etsa lintho ka eona. Re ka bontša mosa ka liketso joang?

Re etsisa Jehova ka hore re be mosa ho ba bang. (Baef. 4:32; 5:1, 2) Morali oabo rona Lisa eo re buileng ka eena o re bolella ka mosa oo Lipaki Tsa Jehova li ileng tsa o bontša. O re: “Ha lelapa leso le ne le lokela ho thota hang-hang, banyalani ba bang phuthehong ba  ile ba ikopa mosebetsing e le hore ba tl’o re thusa ka ho paka thoto. Ka nako eo ke ne ke e-s’o ka ke ithuta Bibele.” Liketso tseo tse mosa li ile tsa etsa hore Morali oabo rona Lisa a ithute Bibele.

Morali oabo rona Anne eo re buileng ka eena qalong, le eena o ne a ananela mosa oo Lipaki Tsa Jehova li ileng tsa o bontša. O ile a re: “Tsela eo batho ba neng ba ntšoara ka eona e ne e etsa hore ho be thata hore ke tšepe motho leha e le ofe.” O tsoela pele ho re: “Ha ke ne ke kopana le Lipaki ho ne ho le thata hore ke li tšepe. Ke ne ke ipotsa hore na ke hobane’ng ha ba ntsotella hakana. Motho ea neng a nthuta Bibele o ile a mpontša mosa ’me seo se ile sa etsa hore ke mo tšepe.” Ho ile ha etsahala’ng ka mor’a moo? O re: “Hamorao ke ile ka qala ho nahana haholoanyane ka seo ke ntseng ke ithuta sona.”

Morali oabo rona Lisa le Morali oabo rona Anne ba ile a angoa ke mosa oo phutheho e ileng ea ba bontša oona ’me seo se ile sa etsa hore ba batle ho ithuta Bibele. Hape mosa oo o ile oa ba thusa hore ba tšepe Jehova le batho ba bang.

Batho ba bang ba tloaetse ho bua ka tsela e mosa le ho bososela hobane ba holisitsoe joalo. Ke ntho e ntle hore ebe tsela eo batho ba bang ba holisitsoeng ka eona le botho ba bona bo etsa hore e be batho ba mosa empa e ka ’na eaba ha ba bontše mosa joaloka Molimo.​—Bapisa le Liketso 28:2.

Mosa ke e ’ngoe ea litholoana tsa moea oa Molimo o halalelang. (Bagal. 5:22, 23) Kahoo, re lokela ho lumella moea oa Molimo hore o re thuse hore re be batho ba mosa. Ha re bontša mosa re tla be re etsisa Jehova le Jesu. Kaha re Bakreste, re tsotella batho ba bang. Kahoo, re susumelletseha hore re rate Jehova Molimo le batho ba bang. Sena se tla etsa hore re ba bontše mosa e leng se thabisang Molimo.

Ho ka ba bonolo hore re be mosa ho batho bao re ba tsebang kapa ba kileng ba re bontša mosa. (2 Sam. 2:6) Re ka ba ra ba leboha. (Bakol. 3:15) Empa re ka thusoa ke’ng haeba re utloa eka ho na le motho eo re sa hlokeng ho mo bontša mosa?

Nahana ka sena: Jehova o re behetse mohlala ka hore a re bontše mosa o sa tšoanelang. Lentsoe la hae Bibele le re ruta ntho ea bohlokoa ka ho bontša mosa. Polelo e reng “mosa o sa tšoanelang,” e hlaha ka makhetlo a mangata Mangolong a Segerike a Bakreste. Molimo o re bontša mosa joang?

Nahana ka batho ba bangata bao Jehova a ba bontšang mosa ka hore a ba fe lintho tseo ba li hlokang e le hore ba tsoele pele ba phela. (Mat. 5:45) Ha e le hantle, Jehova o ile a re bontša mosa le pele re mo tseba. (Baef. 2:4, 5, 8) Ka mohlala, o fane ka Mora oa hae a le mong feela molemong oa batho bohle. Moapostola Pauluse o ile a re Jehova o fane ka thekollo “ho ea ka maruo a mosa oa hae o sa tšoanelang.” (Baef. 1:7) Le hoja re etsa libe ebile re utloisa Jehova bohloko, o tsoela pele ho re ruta le ho re fa likeletso. Mantsoe a hae le litaelo tsa hae li joaloka “pula e nang hasesaane.” (Deut. 32:2) Re ke ke ra khona ho mo patala ka lebaka la mosa oo a re bontšang oona. Rea tseba hore haeba Jehova a ne a sa re bontše mosa, re ne re ke ke ra ba le tšepo ea bokamoso.​—Bapisa le 1 Petrose 1:13.

Ha ho pelaelo hore re rata tsela eo Jehova a re bontšang mosa ka eona ebile sena sea re khothatsa. Ho e-na le hore re khethe hore na ke batho bafe bao re tla ba bontša mosa, re lokela ho loanela ho etsisa Jehova ka hore re bontše motho e mong le e mong mosa letsatsi le letsatsi. (1 Bathes. 5:15) Ha re lula re bontša batho ba bang mosa, re tla tšoana le mollo o futhumatsang ha ho bata. Re tla khothatsa ba malapa, Bakreste-’moho, batho bao re sebetsang le bona, bao re kenang sekolo le bona le baahisane ba rona.

Nahana ka ba lelapa leno le batho ba ka phuthehong bao mantsoe le liketso tsa hao tse mosa li ka ba tsoelang molemo. E ka ’na eaba ho na le motho phuthehong ea heno ea hlokang thuso ka ho hloekisetsoa ntlo le jarete ea hae kapa ho mo thusa ka lintho tse ling tse kang ho ea mabenkeleng. Hape haeba u kopana le motho tšebeletsong ea tšimo ’me a hloka thuso, na u tla mo thusa?

E se eka re ka etsisa Jehova ka hore lintho tseo re li buang le tseo re li etsang li lule li susumetsoa ke “molao oa mosa.”