1. Re lokela ho etsa’ng e le hore re pholohe letsatsi la Jehova?

 HA BIBELE e bua ka “letsatsi la Jehova,” e bua ka nako eo Jehova a tla felisa lira tsa hae le ho pholosa batho ba hae. Nakong e fetileng Jehova o ile a fana ka likahlolo. (Esa. 13:1, 6; Ezek. 13:5; Sof. 1:8) Mehleng ena “letsatsi la Jehova” le tla qala ha baeta-pele ba lipolotiki ba hlasela Babilona e moholo ’me le fele ka ntoa ea Armagedone. Re lokela ho itokisa hona joale e le hore re pholohe “letsatsi” leo. Jesu o ile a re ha rea lokela ho itokisetsa “mahlomola a maholo” feela empa re boetse re lokela ho ‘lula re itokisitse.’—Mat. 24:21; Luka 12:40.

2. Lengolo la 1 Bathesalonika le ka re thusa joang?

² Lengolong la pele leo moapostola Pauluse a ileng a le ngolla Bathesalonika, o ile a etsa lipapiso tse ngata ho thusa Bakreste hore ba itokisetse letsatsi le leholo la Jehova la kahlolo. Pauluse o ne a tseba hore letsatsi la Jehova le ne le ke ke la fihla ka eona nako eo. (2 Bathes. 2:1-3) Leha ho le joalo, o ile a ba khothaletsa hore ba itokisetse letsatsi leo joalokaha eka le ne le tla fihla letsatsing le hlahlamang ’me le rona re ka sebelisa keletso ea hae. A re boneng hore na o ile a hlalosa lintlha tse latelang joang: (1) Letsatsi la Jehova le tla fihla joang? (2) Ke bo-mang ba ke keng ba pholoha letsatsi leo? (3) Re ka itokisetsa ho pholoha letsatsi leo joang?

3. Letsatsi la Jehova le tšoana le lesholu le tlang bosiu ka tsela efe? (Sheba setšoantšo.)

³ “Joaloka lesholu bosiu.” (1 Bathes. 5:2) Papiso ena ke ea pele ho tse tharo tseo Pauluse a li entseng ho hlalosa hore na letsatsi la Jehova le ne le tla fihla joang. Hangata ha masholu a utsoa,  a etsa lintho kapele nakong eo batho ba ntseng ba robetse bosiu. Ka ho tšoanang, letsatsi la Jehova le tla fihla ka tšohanyetso batho ba bangata ba sa lebella. Bakreste ba ’nete le bona ba ka ’na ba makatsoa ke tsela eo lintho li tla etsahala kapele ka eona. Empa ntho e thabisang ke hore re tla pholoha ha batho ba khopo ba felisoa.

4. Letsatsi la Jehova le tšoana le mahlaba a pelehi ka tsela efe?

⁴ “Joalokaha mosali oa moimana a tleloa ke mahlaba a pelehi ka tšohanyetso.” (1 Bathes. 5:3) Mosali oa moimana ha a tsebe nako eo a tla beleha ka eona empa oa tseba hore joang kapa joang o tla beleha. Nako eo e ka fihla ka tšohanyetso ’me a ba le mahlaba a bohloko ao a ke keng a a qoba. Ka ho tšoanang, le rona ha re tsebe nako eo letsatsi la Jehova le tla fihla ka eona. Empa re kholisehile hore letsatsi leo lea tla le hore Molimo o tla felisa batho ba khopo ka tšohanyetso.

5. Mahlomola a maholo a tšoana le nako ea meso ka tsela efe?

⁵ Joaloka nakong ea meso. Pauluse o boetse o bua ka masholu a utsoang bosiu papisong ea hae ea boraro. Empa lekhetlong lena Pauluse o bapisa letsatsi la Jehova le nakong ea meso. (1 Bathes. 5:4) Masholu a utsoang bosiu a ka phathahana ka ho utsoa lintho tse ngata hoo a ka se hlokomeleng hore a felloa ke nako. Letsatsi le ka chaba a sa hlokomele eaba aa pepeseha. Ka ho tšoanang, mahlomola a maholo a tla pepesa batho ba tšoanang le masholu ao, ba tsoelang pele ho etsa lintho tse sa thabiseng Molimo. Ho fapana le bona, re ka itokisetsa letsatsi la Jehova ka hore re qobe ho etsa lintho tse sa mo thabiseng ’me re etse “mefuta eohle ea lintho tse molemo, tse lokileng le tsa ’nete.” (Baef. 5:8-12) Hamorao Pauluse o ile a etsa lipapiso tse peli tse hlalosang hore na ke bo-mang ba ke keng ba pholoha.

6. Batho ba bangata ba robetse ka tsela efe? (1 Bathesalonika 5:6, 7)

⁶ “Ba robalang.” (Bala 1 Bathesalonika 5:6, 7.) Pauluse o ile a bapisa batho ba ke keng ba pholoha letsatsi la Jehova le batho ba robetseng kaha ha ba tsebe lintho tse etsahalang ebile ha ba hlokomele hore nako e ntse e tsamaea. Kahoo, ha ba bone ha ho etsahala lintho tsa bohlokoa ebile ha ho na letho leo ba le etsang ha li etsahala. Batho ba bangata mehleng ena le bona ba robetse ka tsela ea tšoantšetso. (Bar. 11:8) Ha ba lumele bopaki bo bontšang hore re phela “mehleng ea bofelo” le hore haufinyane mahlomola a maholo a tla qala. Ha ho etsahala liphetoho tse kholo lefatšeng, batho ba bang ba batla ho mamela molaetsa oa ’Muso. Leha ho le joalo, bongata ba bona ba khutlela borokong ho e-na le hore ba lule ba falimehile. Le hoja batho ba bang ba lumela hore ho tla ba le letsatsi la kahlolo, ba nahana hore le sa le hole. (2 Pet. 3:3, 4) Leha ho le joalo, ke habohlokoa hore re lule re falimehile letsatsi le letsatsi.

7. Batho bao Molimo a tla ba felisa ba tšoana joang le ba tahiloeng?

⁷ “Ba tahoang.” Moapostola Pauluse o ile a bapisa batho bao Molimo a tla ba felisa le matahoa. Batho ba tahiloeng ba lieha ho hlokomela lintho tse etsahalang ebile ba etsa liqeto tse fosahetseng. Ka ho tšoanang, batho ba khopo ha ba mamele ha Molimo a ba lemosa, ho e-na le hoo ba khetha ho phela ka tsela e tla etsa hore ba felisoe. Empa Bakreste ba eletsoa hore ba hlaphoheloe kelellong. (1 Bathes. 5:6) Ho ea ka setsebi se seng sa Bibele, ho hlaphoheloa kelellong hoo ke ho ba “le kelello e sa ferekanang le e tsitsitseng, e seka-sekang le e hakanyang lintho hantle, eo ka hona e re thusang ho etsa liqeto tse nepahetseng.” Ke hobane’ng ha re lokela ho hlaphoheloa kelellong? Seo se tla re thusa hore re se ke ra kenella lipolotiking le ho batla ho rarolla mathata a sechaba. Ha letsatsi la Jehova le ntse le atamela, ho tla ba thata le ho feta hore re se ke ra kenella linthong tsena. Kahoo, ha rea lokela ho tšoenyeha ka hore na re tla etsa’ng ha re e-ba boemong boo. Moea oa Molimo o tla re thusa hore re be le likelello tse hlaphohetsoeng le hore re etse liqeto tse nepahetseng.—Luka 12:11, 12.

8. Ho ea ka 1 Bathesalonika 5:8 ke makhabane afe a tla re thusa hore re lule re falimehile le ho hlaphoheloa likelellong? (Sheba setšoantšo.)

⁸ “Re apare tšireletso ea sefuba . . . le . . . helmete.” Pauluse o re bapisa le masole a apereng liaparo tsa ntoa. (Bala 1 Bathesalonika 5:8.) Lesole le lokela ho lula le itokiselitse ho loana ka linako tsohle. Ho joalo le ka rona. Re lula re itokiselitse letsatsi la Jehova ka ho apara tšireletso ea sefuba ea tumelo le lerato le helmete ea tšepo. Ho ba le makhabane ana ho ka re thusa haholo.

9. Ho ba le tumelo ho re sireletsa joang?

⁹ Tšireletso ea sefuba e ne e sireletsa pelo ea lesole. Ka ho tšoanang, ho ba le tumelo le lerato ho sireletsa lipelo tsa rona tsa tšoantšetso. Makhabane ana a tla re thusa hore re tsoele pele ho sebeletsa Molimo le ho latela Jesu. Ho ba le tumelo ho re fa kholiseho ea hore Jehova o tla re putsa haeba re mo batla e le kannete. (Baheb. 11:6) Ho tla re thusa hore re lule re tšepahalla Moeta-pele oa rona Jesu leha re e-na le mathata. Re ka matlafatsa tumelo ea rona e le hore re mamelle mathata ka hore re ithute mehlaleng ea bara le barali ba bo rona ba mehleng ena, ba ileng ba tšepahala leha ba hlorisoa kapa ba e-na le mathata a lichelete. Re ka boela ra qoba kotsi ea ho rata chelete le ho ba le lintho tse ngata ka hore re etsise batho ba  ileng ba fokotsa lintho tseo ba neng ba e-na le tsona e le hore ba behe ’Muso pele. b

10. Ho rata Molimo le batho ba bang ho re thusa joang hore re mamelle?

¹⁰ Ke habohlokoa hore re be le lerato e le hore re lule re falimehile le ho hlaphoheloa kelellong. (Mat. 22:37-39) Ho rata Molimo ho re thusa hore re mamelle ha re ntse re etsa mosebetsi oa boboleli le hoja re ka hlaheloa ke mathata. (2 Tim. 1:7, 8) Kaha re rata le batho ba sa sebeletseng Jehova, re lula re ba bolella litaba tse monate ebile rea ba founela le ho ba ngolla mangolo ho ba bolella molaetsa oo. Re lula re e-na le tšepo ea hore ka le leng batho bao ba tla fetoha, ba etse lintho tse nepahetseng.—Ezek. 18:27, 28.

11. Ho rata Bakreste-’moho le rona ho re thusa hore re etse’ng? (1 Bathesalonika 5:11)

¹¹ Re rata Bakreste-’moho le rona. Re bontša hore rea ratana ka “ho khothatsana le ho matlafatsana.” (Bala 1 Bathesalonika 5:11.) Rea khothatsana joaloka masole a loanang ntoeng. Ha masole a le ntoeng, ho ka etsahala hore le leng le lematse lesole-’moho le lona empa e se ka boomo. Ka ho tšoanang, re ke ke ra utloisa bara le barali ba bo rona bohloko ka boomo kapa ra iphetetsa ha ba re utloisitse bohloko. (1 Bathes. 5:13, 15) Hape re bontša hore re rata bara ba bo rona ba etellang pele phutheho ka ho ba hlompha. (1 Bathes. 5:12) Ha Pauluse a ngola lengolo lena, phutheho ea Thesalonika e ne e e-na le selemo e thehiloe. E ka ’na eaba baholo ba phutheho eo ba ne ba se na boiphihlelo, kahoo ka linako tse ling ba ne ba etsa liphoso. Leha ho le joalo, phutheho e ne e lokela ho ba hlompha. Ha mahlomola a maholo a ntse a atamela, re tl’o hloka ho mamela litaelo tse tsoang ho baholo le ho feta. Ho ka etsahala hore re se ke ra fumana tataiso e tsoang ho bara ba bo rona ba ntlo-kholo le ba ofising ea lekala, ke kahoo ho leng bohlokoa hore re rate baholo hona joale le ho ba hlompha. Ho sa tsotellehe hore na ho tla etsahala’ng, a re luleng re hlaphohetsoe likelellong ka hore re se ke ra sheba liphoso tsa bara ba bo rona bana ba tšepahalang empa re lule re hopola hore Jehova oa ba tataisa a sebelisa Kreste.

12. Tšepo eo re nang le eona e sireletsa tsela eo re nahanang ka eona joang?

 ¹² Feela joalokaha helmete e sireletsa hlooho ea lesole, tšepo eo re nang le eona e sireletsa tsela eo re nahanang ka eona. E re thusa ho hlokomela hore lintho tseo lefatše lena le fanang ka tsona ha li na thuso. (Bafil. 3:8) Tšepo eo e re thusa hore re lule re khobile matšoafo. Mor’abo rona Wallace le Morali oa bo rona Laurinda ba sebeletsang Afrika ba ile ba bona hore taba eo ke ’nete. Libekeng tse tharo feela, Mor’abo rona Wallace o ile a hlokahalloa ke ntate oa hae ’me Morali oa bo rona Laurinda a hlokahalloa ke ’mè oa hae. Ha baa ka ba khona ho ea hae ho ba le ba malapa a bona ka lebaka la seoa sa COVID-19. Mor’abo rona Wallace o re: “Tšepo ea tsoho e nthusa hore ke se ke ka nahana ka hore na ba ne ba le joang pele ba hlokahala empa ke nahane ka tsela eo ba tla ba ka eona ha ba se ba tsositsoe lefatšeng le lecha. Tšepo ena e nthusa hore ke khobe matšoafo ha ke utloile bohloko ka lebaka la ho lahleheloa ke bona.”

13. Re ka etsa’ng e le hore re fumane moea o halalelang?

¹³ “Le se ke la sitisa moea oa Molimo hore o sebetse ho lona.” (1 Bathes. 5:19) Pauluse o ile a re moea o halalelang o sebetsa ho rona. Haeba re sa sitise moea oa Molimo hore o sebetse ho rona, re tla ba le matla a ho etsa lintho tse nepahetseng le ho sebeletsa Jehova ka mafolofolo. (Bar. 12:11) Re ka etsa’ng e le hore re fumane moea o halalelang? Re ka kopa hore Jehova a re fe oona, ra ithuta Lentsoe la hae le ho sebelisana le mokhatlo oa hae o tataisoang ke moea o halalelang. Ho etsa joalo ho tla re thusa hore re be le “litholoana tse behoang ke moea o halalelang.”—Bagal. 5:22, 23.

14. Ke’ng eo re lokelang ho e qoba e le hore re lule re fumana moea oa Molimo o halalelang? (Sheba setšoantšo.)

¹⁴ Ha rea lokela ho ‘sitisa moea oa Molimo hore o sebetse ho rona’ ha Molimo a se a re file oona. Ke batho ba nahanang lintho tse nepahetseng le ba itšoereng hantle feela bao Molimo a ba fang moea oa hae o halalelang. A ka khaotsa ho re fa moea oa hae o halalelang haeba re nahana ka lintho tse fosahetseng ebile re  li etsa. (1 Bathes. 4:7, 8) E le hore re ’ne re fumane moea o halalelang, ha rea lokela ho “bua hampe ka boprofeta.” (1 Bathes. 5:20) Temaneng ena lentsoe “boprofeta” le bolela melaetsa eo Jehova a re fang eona a sebelisa moea oa hae o halalelang. Melaetsa eo e akareletsa e buang ka letsatsi la Jehova le kamoo le potlakileng kateng mehleng ena. Ha rea lokela ho nahana hore letsatsi la Jehova kapa Armagedone e ke ke ea tla mehleng ena eo re phelang ho eona. Ho e-na le hoo, re bontša hore re lebeletse hore le tla tla haufinyane ebile re lula re nahana ka lona ka hore re tsoele pele ho “sebeletsa Molimo ka botšepehi” letsatsi le letsatsi le ka ho lula re itšoere hantle.—2 Pet. 3:11, 12.

15. Re ka etsa’ng e le hore re se ke ra khelosoa ke litaba tseo e seng tsa ’nete le tse susumetsoang ke bademona? (1 Bathesalonika 5:21)

¹⁵ Haufinyane bahanyetsi ba Molimo ba tla etsa phatlalatso e reng: “Khotso le tšireletseho!” (1 Bathes. 5:3) Lipolelo tse susumetsoang ke bademona li tla tlala lefatšeng lohle e le hore li khelose batho ba bangata. (Tšen. 16:13, 14) Ho tla etsahala’ng ka rona? Re ke ke ra khelosoa haeba re ‘etsa bonnete ba hore lintho tsohle li nepahetse.’ (Bala 1 Bathesalonika 5:21.) Lentsoe la Segerike le fetoletsoeng e le “etsang bonnete” le ne le sebelisoa ha ho hlahlojoa hore na lintho tsa bohlokoa tse kang khauta le silevera ke tsa ’nete. Kahoo, re lokela ho lula re hlahloba hore na lintho tseo re li utloang kapa tseo re li balang ke ’nete. Ho ne ho le bohlokoa hore Bathesalonika ba etse joalo ’me ke habohlokoa le ho feta hore le rona re etse joalo kaha mahlomola a maholo a ntse a atamela. Ho e-na le hore re lumele ntho e ’ngoe le e ’ngoe eo batho ba bang ba e buang, re bapisa lintho tseo re li balang le tseo re li utloang le seo Bibele le mokhatlo oa Jehova o se buang. Ha re etsa joalo, re ke ke ra khelosoa ke lipolelo tse susumetsoang ke bademona.—Liprov. 14:15; 1 Tim. 4:1.

16. Ke’ng eo re tla e fumana haeba re lula re tšepahala, hona re ikemiselitse ho etsa’ng?

¹⁶ Rea tseba hore bahlanka ba Molimo ba tla pholoha nakong ea mahlomola a maholo. Leha ho le joalo, ha re tsebe hore na ho tla etsahala’ng ka e mong le e mong oa rona nakong e tlang. (Jak. 4:14) Haeba re lula re tšepahala, re tla fumana bophelo bo sa feleng, ebang re tla phela ho fihlela mahlomola a maholo a fihla kapa re tla shoa pele ho ’ona. Batlotsuoa ba tla ba le Kreste leholimong. Linku tse ling li tla ba paradeiseng mona lefatšeng. E se eka kaofela ha rona re ka lula re nahana ka tšepo eo re nang le eona le ho itokisetsa letsatsi la Jehova.