1. Jehova o batla hore re etse’ng?

 E ’NGOE ea linako tse monate ka ho fetisisa bakeng sa banyalani ke ha ngoana oa bona a hlaha. Le hoja batsoali ba rata ngoana oa bona e monyenyane, ha ba batle hore e lule e le lesea. Ha e le hantle, ba ne ba ka tšoenyeha haholo haeba a sa hole. Ka tsela e tšoanang, le hoja Jehova a thaba ha re qala ho ithuta ka eena, ha a batle hore re felle moo. (1 Bakor. 3:1) Ho e-na le hoo, o batla hore re tšoane le “batho ba baholo” tabeng ea ho ba Bakreste.—1 Bakor. 14:20.

2. Re tl’o bua ka eng sehloohong see?

² Ho bolela’ng ho ba Mokreste ea holileng? Re lokela ho etsa’ng e le hore re be Bakreste ba holileng? Ho ithuta lithuto tse tebileng tsa Bibele ho ka re thusa joang hore re be Bakreste ba holileng? Ke hobane’ng ha re lokela ho qoba ho itšepa ho tlola? Sehlooho sena se tl’o araba lipotso tsena.

HO BA MOKRESTE EA HOLILENG HO BOLELA’NG?

3. Ho ba Mokreste ea holileng ho bolela’ng?

³ Ka Bibeleng, lentsoe la Segerike le fetoletsoeng e le “ba baholo” le ka boela la bolela “ba holileng,” “ho phethahala,” le “ho fella.” (Baef. 4:13) Joalokaha ngoana a tsoela pele ho hola ho fihlela e e-ba motho e moholo, le rona re lokela ho tsoela pele re holisa kamano ea rona le Jehova. Ka tsela eo, re tla ba Bakreste ba holileng. Le ka mor’a hore kamano ea rona le Jehova e hole, re ntse re lokela ho tsoela pele ho e ntlafatsa. (1 Tim. 4:15) Kaofela ha rona, ho akareletsa le ba banyenyane lilemong, re ka ba Bakreste ba holileng. Leha ho le joalo, re ka tseba joang hore re Bakreste ba holileng?

4. U ka hlalosa Mokreste ea holileng joang?

⁴ Mokreste ea holileng o etsa ntho e ’ngoe le e ’ngoe eo Jehova  a reng a e etse. Ha a ikhethele hore na o batla ho etsa’ng. Ke ’nete hore o etsa liphoso hobane ha aa phethahala. Empa tsela eo a phelang ka eona letsatsi le letsatsi ea bontša hore o nahana le ho etsa lintho ka tsela eo Molimo a e batlang. O apere botho bo bocha ’me ka linako tsohle o leka ho nahana joaloka Molimo. (Baef. 4:​22-24) O ithutile ho etsa liqeto tse bohlale ka hore a nahane ka melao le melao-motheo ea Jehova. Kahoo, ha a hloke letoto le letelele la melao e mo joetsang hore na a etse’ng. Ha a entse qeto, o sebetsa ka thata hore a e phethe.—1 Bakor. 9:​26, 27.

5. Ho ka etsahala’ng ka Mokreste ea sa holang? (Baefese 4:​14, 15)

⁵ Ka lehlakoreng le leng, Mokreste ea sa holang a ka khelosoa “ke batho ba bolotsana” le “batho ba qhekellang ba bang ka maqiti a bona.” A ka ’na a kholoa batho ba jalang litaba tse khelosang, mabare-bare le litaba tseo eseng ’nete tse tsoang mecheng ea puisano. A ka ’na a khelosoa ke bakoenehi. a (Bala Baefese 4:​14, 15.) Hape a ka ’na a monela ba bang, a ba le likhohlano le bona kapa a khopeha habonolo. A ka boela a etsa ntho e fosahetseng ha a lekoa.—1 Bakor. 3:3.

6. Ke hobane’ng ha re bapisa ho hola ha Mokreste le ho hola ha ngoana? (Sheba setšoantšo.)

⁶ Joalokaha ho boletsoe pejana, Mangolo a bapisa ho hola ha Mokreste le ho hola ha ngoana ho fihlela e e-ba motho e moholo. Ngoana ha a tsebe lintho tse ngata, kahoo o hloka hore motho e moholo a mo tataise le ho mo sireletsa. Ka mohlala, ’mè a ka ’na a tšoara morali oa hae e monyenyane ka letsoho ha ba tšela tsela. Ha ngoanana eo a ntse a hola, ’mè oa hae a ka ’na a mo lumella hore a tšele tsela a le mong, empa o tla mo hopotsa hore a shebe likoloi ka lehlakoreng le letona le le letšehali pele a tšela. Ha ngoana e se e le motho e moholo, o se a tseba ho qoba likotsi tse kang tseo. Feela joalokaha bana ba hloka thuso ea batho ba baholo ho qoba likotsi, le Bakreste ba sa holang ba hloka thuso ea Bakreste ba holileng hore ba qobe likotsi tse ka senyang kamano ea bona le Jehova le hore ba etse liqeto tse nepahetseng. Ka lehlakoreng le leng, ha Bakreste ba holileng ba  hloka ho etsa qeto, ba nahana ka melao-motheo ea Bibele e le hore ba tsebe hore na Jehova o nahana joang ka taba eo, ebe joale ba etsa qeto e nepahetseng.

7. Na Bakreste ba holileng ba hloka thuso ea ba bang?

⁷ Na taba ee e bolela hore Mokreste ea holileng ha ho mohla a hlokang thuso ea motho e mong? Ha ho joalo. O ntse a hloka ho kopa thuso ka linako tse ling. Empa Mokreste ea sa holang a ka ’na a batla hore ba bang ba mo joetse hore na a etse’ng kapa ba mo etsetse qeto eo a lokelang ho e etsa. Phapang ke hore ha Mokreste ea holileng a kopa thuso ho batho ba bohlale le ba nang le boiphihlelo, oa tseba hore o na le boikarabelo ba ho iketsetsa liqeto le hore “o tla ikarabella ka lintho tseo a li etsang.”—Bagal. 6:5.

8. Bakreste ba holileng ba fapane joang?

⁸ Joalokaha batho ba baholo ba fapane ka litšobotsi, le Bakreste ba holileng ba na le makhabane a sa tšoaneng a kang bohlale, sebete, ho fana le kutloelo-bohloko. Hape Bakreste ba babeli ba holileng ba ka ’na ba tobana le boemo bo tšoanang empa ba etsa liqeto tse peli tse fapaneng tse ntseng li sa hanane le Mangolo. Taba ena e etsahala hangata haeba qeto e lokelang ho etsoa e itšetlehile ka letsoalo la motho. Kahoo, Bakreste ha ba ahlolane ka lebaka la liqeto tse fapaneng tseo ba li entseng. Ho e-na le hoo, ba lula ba momahane.—Bar. 14:10; 1 Bakor. 1:10.

RE LOKELA HO ETSA’NG E LE HORE RE BE BAKRESTE BA HOLILENG?

9. Na re ka ba Bakreste ba holileng re sa etse letho? Hlalosa.

⁹ Ngoana oa hola ha nako e ntse e-ea empa ha ho motho eo kamano ea hae le Jehova e ka holang ho se letho leo a le etsang. Ka mohlala, Bakreste ba Korinthe ba ile ba amohela litaba tse monate, ba kolobetsoa, ba amohela moea o halalelang ba ba ba ithuta linthong tseo moapostola Pauluse a neng a ba ruta tsona. (Lik. 18:​8-11) Ho ntse ho le joalo, bongata ba bona e ne e ntse e le Bakreste ba sa holang ka mor’a lilemo tse ngata ba kolobelitsoe. (1 Bakor. 3:2) Re ka etsa joang hore ntho e tšoanang e se ke ea re etsahalla?

10. Re lokela ho etsa’ng e le hore re be Bakreste ba holileng? (Juda 20)

¹⁰ E le hore re be Bakreste ba holileng, re tlameha ho batla ho hola. Batho ba ‘ratang ho hloka tsebo’ e leng batho ba ratang ho lula e le Bakreste ba sa holang, ba tla lula ba le joalo. (Liprov. 1:22) Ha re batle ho tšoana le motho e moholo ea sa batleng ho nka boikarabelo ebile a batla hore batsoali ba hae ba mo etsetse liqeto. Ho e-na le hoo, re batla ho nka boikarabelo le ho etsa bonnete ba hore re ba Bakreste ba holileng. (Bala Juda 20.) Haeba u ntse u sebeletsa ho ba Mokreste ea holileng, rapela Jehova hore a u fe ‘tabatabelo le matla a hore u etse lintho tse mo khahlisang.’—Bafil. 2:13.

11. Jehova o re thusa joang hore re be Bakreste ba holileng? (Baefese 4:​11-13)

¹¹ Jehova ha aa lebella hore re be Bakreste ba holileng ka matla a rona feela. O re file balisa le mesuoe ka phuthehong, ba re thusang hore re be Bakreste ba holileng ’me “re tla ba batho ba holileng ka litsela tsohle joaloka Kreste.” (Bala Baefese 4:​11-13.) Jehova o boetse o re fa moea oa hae o halalelang ho re thusa hore re tsebe ho “nahana joaloka Kreste.” (1 Bakor. 2:​14-16) Ho feta moo, Molimo o re file Likosepele tse ’nè tse re bontšang hore na Jesu o ne a nahana joang, a bua joang a bile a etsa lintho joang ha a ne a le lefatšeng. Haeba u nahana u bile u etsa lintho joaloka Jesu, u tla khona ho ba Mokreste ea holileng.

 HO ITHUTA LITHUTO TSE TEBILENG TSA BIBELE HO KA RE THUSA JOANG HORE RE BE BAKRESTE BA HOLILENG?

12. “Lithuto tsa motheo tse mabapi le Kreste” ke eng?

¹² E le hore re be Bakreste ba holileng, re lokela ho ithuta ho fetang feela “lithuto tsa motheo tse mabapi le Kreste.” Mehlala ea lithuto tseo e akareletsa ho baka, ho ba le tumelo, ho kolobetsoa le tsoho ea bafu. (Baheb. 6:​1, 2) Lithuto tsena ke mokokotlo oa thuto ea Bokreste. Ke ka lebaka leo moapostola Petrose a ileng a ruta ka tsona ha a ne a bua le letšoele ka Pentekonta. (Lik. 2:​32-35, 38) Re tlameha ho lumela lithuto tsena tsa motheo e le hore re be barutuoa ba Kreste. Ka mohlala, Pauluse o ile a re re ke ke ra re re barutuoa ba Kreste haeba re sa lumele tsohong ea bafu. (1 Bakor. 15:​12-14) Leha ho le joalo, ha rea lokela ho khotsofalla lithuto tsa motheo feela.

13. Re lokela ho etsa eng e le hore re fumane molemo lijong tse tiileng tseo ho buuoang ka tsona ho Baheberu 5:14? (Sheba setšoantšo.)

¹³ Lijo tse tiileng li fapane le lithuto tsa motheo hobane tsona li akareletsa melao ea Jehova le melao-motheo ea hae e re thusang ho utloisisa hore na o nahana joang. E le hore re fumane molemo lijong tseo, re lokela ho ithuta, ho nahanisisa le ho sebelisa lintho tseo re ithutileng tsona Lentsoeng la Molimo. Ha re etsa joalo, re ikoetlisetsa ho etsa liqeto tse tla thabisa Jehova. b—Bala Baheberu 5:14.

14. Pauluse o ile a thusa Bakorinthe joang hore e be Bakreste ba holileng?

¹⁴ Bakreste ba sa holang ba ba le bothata ha ba tobane le boemo boo ho bona ba lokelang ho etsa qeto tabeng eo Bibele e sa faneng ka molao o tobileng. Ba bang ba nahana hore ha molao o joalo o le sieo, ba ka etsa ntho e ’ngoe le e ’ngoe eo ba e batlang. Ba bang bona ba ka batla hore ho be le molao leha ho sa hlokahale. Ka mohlala, Bakreste ba Korinthe ba ile ba kopa Pauluse hore a ba fe molao tabeng ea hore na ba je lijo tse hlabetsoeng litšoantšo kapa che. Ho e-na le hore a ba bolelle hore na ba lokela ho etsa’ng, Pauluse o ile a ba bolella hore ba lokela ho khetha seo ba tla se etsa ba ipapisitse  le seo matsoalo a bona a ba lumellang ho se etsa. O ile a ba fa melao-motheo e tsoang ka Bibeleng e neng e tla ba thusa hore ba etse qeto e lumellanang le matsoalo a bona empa e sa khopise batho ba bang. (1 Bakor. 8:​4, 7-9) Ka ho etsa joalo, Pauluse o ne a ruta Bakorinthe hore e be Bakreste ba holileng e le hore ba sebelise likelello tsa bona ho e-na le ho itšetleha ka batho ba bang kapa ho batlana le melao.

15. Pauluse o ile a thusa Bakreste ba Baheberu joang hore ba hole?

¹⁵ Re ithuta thuto e ’ngoe ea bohlokoa ho seo Pauluse a ileng a se ngolla Bakreste ba Baheberu. Ba bang ba Bakreste ba ne ba se ba sa hole. Ho e-na le hoo, ba ne ba ‘boetse e le batho ba hlokang lebese eseng lijo tse tiileng.’ (Baheb. 5:12) Ba ne ba sa ithute lintho tse ncha tseo Jehova a neng a ba ruta tsona a sebelisa phutheho ebile ba sa li lumele. (Liprov. 4:18) Ka mohlala, Bakreste ba bangata ba Bajuda ba ne ba ntse ba buella hore ho bolokoe Molao oa Moshe le hoja ho ne ho se ho fetile lilemo tse 30 sehlabelo sa Jesu se felisitse Molao oo. (Bar. 10:4; Tite 1:10) Lilemo tseo tse 30 li ne li file Bakreste bao nako e ngata ea hore ba utloisise hore ha ho sa hlokahala hore ba boloke Molao. Joale, Pauluse o ne a leka ho ba thusa hore ba amohele lijo tse tiileng tseo a neng a ba ruta tsona. Lengolo la Baheberu le ile la ba thusa ho bona hore tsela ena e ncha ea Bokreste eo ba neng ba rapela Jehova ka eona, e ne e le molemo ho feta tsela ea Sejuda. Le ile la boela la ba fa sebete sa ho tsoela pele ba bolela ho sa tsotellehe khanyetso e tsoang ho Bajuda.—Baheb. 10:​19-23.

QOBA HO ITŠEPA HO TLOLA

16. Ke eng seo re lokelang ho se etsa ka mor’a hore re be Bakreste ba holileng?

¹⁶ Re lokela ho sebetsa ka thata, eseng feela hore re be Bakreste ba holileng empa le hore re lule re le bona. Taba ena e bolela hore re tlameha ho qoba ho itšepa ho tlola. (1 Bakor. 10:12) Re lokela hore ‘re ’ne re itlhahlobe’ e le ho etsa bonnete ba hore re tsoela pele re ntse re hola.—2 Bakor. 13:5.

17. Lengolo la Pauluse le eang ho Bakolose le bontša bohlokoa ba hore re lule re le Bakreste ba holileng joang?

¹⁷ Pauluse o ile a boela a totobatsa bohlokoa  ba ho ba Bakreste ba holileng lengolong la hae le eang ho Bakolose. Le hoja Bakolose e ne e se e le Bakreste ba holileng, Pauluse o ile a ba lemosa hore ba itlhokomele hore ba se ke ba nahana joaloka batho ba lefatše. (Bakol. 2:​6-10) Epafrase eo ho bonahalang hore o ne a tseba Bakreste ba Kolose hantle, o ile a ba rapella hangata hore ba ‘eme ba tiile’ kapa re ka re ba lule ba holile. (Bakol. 4:12) Re ithuta’ng? Pauluse le Epafrase ba ne ba utloisisa hore ho lula re le Bakreste ba holileng ho hloka boiteko ba rona le thuso ea Molimo. Ba ne ba batla hore Bakolose ba lule e le Bakreste ba holileng ho sa tsotellehe mathata ao ba neng ba tobane le ’ona.

18. Ho ka etsahala eng ka Mokreste ea holileng? (Sheba setšoantšo.)

¹⁸ Pauluse o ile a lemosa Baheberu hore Mokreste ea holileng a ka lahleheloa ke kamohelo ea Molimo ka ho sa feleng haeba a se hlokolosi. Haeba Mokreste a sa mamele Jehova, a ka suthela hole le eena hoo Molimo a ke keng a mo tšoarela hobane a sa bake. Ntho e thabisang ke hore Baheberu ba ne ba e-s’o be babe hakaalo. (Baheb. 6:​4-9) Ho thoe’ng ka batho ba seng ba sa kopanele kapa ba khaotsoeng empa hamorao ba baka? Haeba ba ikokobetsa ’me ba baka, baa bontša hore ha ba tšoane le bao Pauluse a ileng a bua ka bona, ba tla lahleheloa ke kamohelo ea Molimo ka ho sa feleng. Leha ho le joalo, ha ba khutlela ho Jehova ba tla hloka hore a ba thuse. (Ezek. 34:​15, 16) Baholo ba ka ’na ba etsa tokisetso ea hore Mokreste e mong ea holileng a ba thuse hore ba matlafatse kamano ea bona le Jehova hape.

19. Re lokela ho ikemisetsa ho etsa’ng?

¹⁹ Haeba u sebetsa ka thata hore u tsoele pele ho hola, u tla atleha. Tsoela pele u ithuta lithuto tse tebileng tsa Bibele le ho nahana joaloka Jehova. Haeba u se u le Mokreste ea holileng, etsa sohle seo u ka se khonang hore u lule u le joalo hona joale le ka ho sa feleng.