Ke hobane’ng ha “’Nyeo” a ile a re lefa la hae le ne le tla senyeha ha a ne a ka nyala Ruthe? (Ruthe 4:1, 6)

Mehleng ea ha ho ne ho ngoloa Bibele, ha monna ea nyetseng a ne a ka hlokahala a se na bana, batho ba ne ba batla ho tseba hore na ho tla etsahala’ng ka lintho tseo a neng a e-na le tsona le ka lebitso la lelapa la hae. Molao oa Moshe o ne o e-na le likarabo tsa lipotso tseo.

Ho ne ho etsahala’ng ka sebaka kapa masimo a monna ha a hlokahala kapa a futsaneha ’me a tlameha ho a rekisa? Mor’abo motho eo kapa mong ka eena ea haufi o ne a ka a lopolla kapa a a reka. Sena se ne se tla etsa hore masimo ao a se ke a ea ho batho bao e seng karolo ea lelapa.—Lev. 25:23-28; Num. 27:8-11.

Ke’ng e neng e tla thusa hore lebitso la monna ea hlokahetseng le se ke la fela? Le ne le ke ke la fela haeba mor’abo kapa mong ka eena ea haufi a ne a ka nyala mosali oa hae, e leng ntho e ileng ea etsahala boemong ba Ruthe. Motho eo o ne a tla nyala mosali oa mor’abo e le hore a mo etsetse mojalefa ea tla sireletsa lebitso la monna eo ea hlokahetseng le lefa la hae. Molao ona o ne o boetse o sireletsa mohlolohali.—Deut. 25:5-7; Mat. 22:23-28.

Nahana ka Naomi. O ne a nyetsoe ke monna ea bitsoang Elimeleke. Ha Elimeleke le bara ba hae ba babeli ba hlokahala, Naomi o ile a sala a se na motho ea mo hlokomelang. (Ruthe 1:1-5) Ha Naomi a se a khutletse Juda, o ile a re ngoetsi ea hae Ruthe e ee ho Boase e e’o kopa hore a reke masimo a bona. Boase o ne a amana le Elimeleke. (Ruthe 2:1, 19, 20; 3:1-4) Empa Boase o ne a tseba hore “’Nyeo” o ne a amana haufi le Elimeleke ho mo feta. Kahoo, ’Nyeo o ne a e-na le monyetla o moholo oa ho ba molopolli.—Ruthe 3:9, 12, 13.

Qalong, “’Nyeo” o ne a batla ho thusa. (Ruthe 4:1-4) Le hoja a ne a tseba hore o lokela ho reka masimo, o ne a boetse a tseba hore Naomi o se a le moholo bakeng sa hore a ka ba le ngoana eo e tla ba mojalefa oa Elimeleke. Sena se bolela hore masimo ao ’Nyeo a a rekileng e ne e tla ba karolo ea lefa la hae. Kahoo, ho ne ho ka bonahala a sebelisitse chelete ea hae hantle.

’Nyeo o ile a fetola maikutlo tabeng ea ho ba molopolli ha a hlokomela hore o lokela ho nyala Ruthe. O ile a re: “Ha ke khone ho itopollela eona hobane nka tloha ka senya lefa la ka.” (Ruthe 4:5, 6) Ke hobane’ng ha a ile a fetola maikutlo?

Haeba ’Nyeo kapa motho e mong a ne a ka nyala Ruthe ’me a ba le mora, mora eo e ne e tla ba mojalefa oa Elimeleke. Joale “lefa” la ’Nyeo le ne le tla ‘senyeha’ joang? Bibele ha e cho empa e ka ’na eaba ho na le mabaka ’me a mang a ’ona ke ana.

• La pele, ho ne ho ka bonahala eka o sentse chelete ka ho reka masimo a Elimeleke hobane qetellong masimo ao e ne e tla ba a mora oa Ruthe.

• La bobeli, e ne e tla ba boikarabelo ba hae ho hlokomela Ruthe le Naomi.

• La boraro, haeba Ruthe le ’Nyeo ba ne ba ka ba le bana, ba ne ba tla arolelana lefa le bana bohle ba ’Nyeo.

• Lebaka la bone, haeba ’Nyeo a ne a se na bana, mora oa Ruthe o ne a tla ja lefa la Elimeleke le la ’Nyeo. Sena se bolela hore ha a ne a ka shoa, lefa la hae e ne e tla ba la ngoana oa lelapa la Elimeleke eseng la hae. ’Nyeo o ne a sa ikemisetsa hore a lahleheloe ke lefa la hae ka hore a thuse Naomi. O ile a bona ho le molemo hore Boase e be eena molopolli. Boase o ile a lumela ho etsa joalo hobane o ne a batla “ho khutlisetsa lefa la monna ea shoeleng lebitsong la hae.”—Ruthe 4:10.

’Nyeo o ne a amehile haholo ka ho sireletsa lebitso la hae le lefa la hae. E ne e le moithati. Le hoja ’Nyeo a ile a sebetsa ka thata ho sireletsa lebitso la hae, ha aa ka a atleha hobane le kajeno ha re le tsebe. O ile a boela a lahleheloa ke tlotla ea bohlokoa eo Boase a ileng a ba le eona. Boase e ile ea e-ba moholo-holo oa Mesia, Jesu Kreste. ’Nyeo o ile a fetoa ke monyetla ona ka lebaka la boithati le ho hana ho thusa motho e mong.—Mat. 1:5; Luka 3:23, 32.