1. Ke thuto efe e khothatsang eo Jehova a ileng a e ruta Abrahama?

 ABRAHAMA o ne a ke ke a lebala puisano ena le ka mohla. Molimo o ile a sebelisa lengeloi ho joetsa Abrahama hore o ne a tl’o felisa motse oa Sodoma le Gomora. Monna eo ea tšepahalang o ne a khathatsehile. O ile a botsa: “Na kannete u tla felisa ea lokileng le ea khopo? . . . U Moahloli oa lefatše lohle ea ahlolang ka toka.” Ka mamello Jehova o ile a ruta motsoalle eo oa hae eo a mo ratang thuto ea bohlokoa: Molimo a ke ke a felisa batho ba lokileng. Le rona thuto eo e re tsoela molemo ’me ea re tšelisa.—Gen. 18:​23-33.

2. Ke hobane’ng ha re ka kholiseha hore Jehova o ahlola ka mohau le ka toka?

² Ke hobane’ng ha re ka kholiseha hore Jehova o ahlola ka mohau le ka toka? Ke hobane rea tseba hore “Jehova o bona se ka pelong.” (1 Sam. 16:7) Ha e le hantle, o tseba “pelo ea motho e mong le e mong.” (1 Mar. 8:39; 1 Likron. 28:9) Eo ke taba e hlollang. Jehova o bohlale haholo ho re feta, ke kahoo eseng kamehla re ka utloisisang liqeto tseo a li etsang. Ke ka hona moapostola Pauluse a ileng a re ka Jehova Molimo: “Likahlolo tsa hae li ke ke tsa utloisisoa ka ho feletseng.”—Bar. 11:33.

3, 4. Re ka ipotsa lipotso life ka linako tse ling, hona re tl’o bua ka eng sehloohong see? (Johanne 5:​28, 29)

³ Le hoja re tseba hore kamehla Jehova o ahlola ka toka, re ka ’na ra botsa lipotso tse tšoanang le tseo Abrahama a ileng a li botsa. Re ka ’na ra ipotsa: ‘Na batho bao Jehova a ileng a ba timetsa joaloka ba Sodoma le Gomora ba ka phela hape? Na ho ka etsahala hore ebe ba bang ba bona ba ka tsosoa ha Molimo a “tsosa batho ba . . . sa lokang bafung”?’—Lik. 24:15.

⁴ A re ikhopotseng hore na hana re tseba eng ka tsoho. Haufinyane re sa tsoa fumana kutloisiso e ntlafalitsoeng ea hore  na ho boleloa’ng ha ho thoe ba bang ba tla “tsohela bophelo” ebe ba bang ba ‘tsohela kahlolo.’ a (Bala Johanne 5:​28, 29.) Kutloisiso ena e entse hore ho be le liphetoho tse eketsehileng tseleng eo re utloisisang taba ena ka eona. Sehlooho sena le se latelang li tla bua ka liphetoho tseo. Re tla bua pele ka hore na ha re tsebe eng ka likahlolo tsa Jehova tse lokileng ebe re bua ka hore na re tseba eng ka tsona.

HA RE TSEBE ENG?

5. Nakong e fetileng, lingoloa tsa rona li ile tsa re’ng ka batho ba ileng ba timetsoa Sodoma le Gomora?

⁵ Nakong e fetileng lingoloeng tsa rona re ile ra bua ka hore na ho etsahala’ng ka batho bao Jehova a ba ahlotseng e le ba sa lokang. Re ile ra re batho ba timelitsoeng ke Jehova joaloka ba Sodoma le Gomora ba ke ke ba tsoha. Empa ka mor’a ho ithuta ka hloko le ho rapela haholoanyane ka taba eo, ho hlakile hore ha re na bonnete ba hore ho joalo. Ke hobane’ng ha re cho joalo?

6. Ke mehlala efe ea moo Jehova a ileng a ahlola batho ba sa lokang, hona ke eng seo re sa se tsebeng?

⁶ Nahana ka litlaleho tse ’maloa tse hlahang ka Bibeleng tseo ho tsona Jehova a ileng ahlola batho ba sa lokang. Ka mohlala, Jehova o ile a timetsa batho bohle ntle le Noe le lelapa la hae nakong ea Moroallo. Hape o ile a sebelisa Baiseraele ho timetsa lichaba tse supileng tse neng li lula Naheng e Tšepisitsoeng. O ile a sebelisa lengeloi le le leng ho bolaea masole a 185 000 a Baasiria ka bosiu bo le bong. (Gen. 7:23; Deut. 7:​1-3; Esa. 37:​36, 37) Mehlaleng ee, na Bibele e bolela ka ho hlakileng hore Jehova o ile a etsa qeto ea hore e mong le e mong oa batho baa a felisoe ka ho sa feleng ho se na tšepo ea hore a tsohe? Che, ha ho joalo. Ke hobane’ng ha re ka cho joalo?

7. Ke eng eo re sa e tsebeng ka batho ba ileng ba timetsoa ka nako ea moroallo kapa ha ho haptjoa Kanana? (Sheba setšoantšo .)

⁷ Mehlaleng e ka holimo, ha re tsebe hore na Jehova o ile a ahlola e mong le e mong joang ebile ha re tsebe hore na batho ba ileng ba bolaoa ba ile ba e-ba le monyetla oa ho ithuta ka Jehova le hore ba bake. Ha Bibele e bua ka nako ea Moroallo e re Noe o ne “a phatlalatsa litaba tse lokileng.” (2 Pet. 2:5) Empa ha e re ha a ne a ntse a haha areka eo e kholo, o ne a boetse a ntse a leka ho bolella motho e mong le e mong ea phelang lefatšeng molaetsa. Ka tsela e tšoanang, ha re tsebe hore na batho ba neng ba lula Kanana ba ile ba e-ba le monyetla oa ho ithuta ka Jehova le ho fetola mekhoa ea bona.

8. Ke eng eo re sa e tsebeng ka batho ba Sodoma le Gomora?

⁸ Ho thoe’ng ka batho ba Sodoma le Gomora? Monna ea lokileng ea bitsoang Lota o ne a lula har’a bona. Empa na rea tseba hore ehlile Lota o ile a ba bolella ka Jehova kaofela ha bona? Che. Kaofela ha bona ba ne ba le khopo empa na e mong le e mong oa bona o ne a tseba ntho e nepahetseng le e fosahetseng? Ha ho bonahale ho le joalo. Hopola hore na Bibele e re’ng ka letšoele la banna ba neng ba batla ho beta baeti ba Lota. Bibele e re letšoele leo e ne e le banna bohle “ho tloha ho moshanyana ho ea ho monna-moholo.” (Gen. 19:4; 2 Pet. 2:7) Na ehlile re tseba hantle hore Molimo ea mohau Jehova o entse qeto ea hore ha ho le ea mong oa bona ea tla tsoha? Che, re ke ke ra cho joalo. Jehova o ile a tiisetsa Abrahama hore ha ho na leha e se e le batho ba leshome ba lokileng motseng oo. (Gen. 18:32) Kahoo, ba ne ba sa loka ’me Jehova o ne a nepile ka ho ba timetsa. Na re ka bua re kholisehile hore ha ho le ea mong oa bona ea tla tsoha ha Molimo a “tsosa batho . . . ba sa  lokang bafung”? Che, re ke ke ra tiisa hore ho joalo.

9. Ke eng eo re sa e tsebeng ka Solomone?

⁹ Ka lehlakoreng le leng, Bibele e bua ka litlaleho tsa batho ba neng ba lokile empa ba qetella ba se ba sa loka. Morena Solomone ke mohlala oa batho ba joalo. O ne a tseba Jehova hantle ebile a tseba hore na o lokela ho mo rapela joang ’me Jehova o ile a mo hlohonolofatsa haholo. Empa hamorao Solomone o ile a rapela melimo ea bohata. Taba ena e ile ea halefisa Jehova haholo hoo sechaba sa Baiseraele se ileng sa khola litholoana tse bosula ka lilemo tse makholo ka lebaka la libe tsa Solomone. Ke ’nete hore Mangolo a re Solomone o ile “a patoa joaloka baholo-holo ba hae,” ho akareletsa le banna ba tšepahalang joaloka Morena Davida. (1 Mar. 11:​5-9, 43, nal; 2 Mar. 23:13) Empa na taba ea hore o ile a patoa joaloka baholo-holo ba hae ke tiiso ea hore Jehova o tla mo tsosa? Bibele ha e re bolelle. Batho ba bang ba ka ’na ba nahana hore Solomone o tla tsosoa hobane Bibele e re “motho ea shoeleng o tšoaretsoe sebe sa hae.” (Bar. 6:7) Leha ho le joalo, ha ho bolele hore batho bohle ba shoeleng ba tla tsosoa, etsoe taba ea hore motho o shoele ha e bolele hore o na le tokelo ea ho phela hape. Tsoho ke mpho e tsoang ho Molimo oa rona ea lerato. O e fa batho bao a batlang hore ba be le monyetla oa ho mo sebeletsa ka ho sa feleng. (Jobo 14:​13, 14; Joh. 6:44) Na Solomone o tla fumana mpho eo? Jehova ke eena ea tsebang, rona ha re tsebe. Ntho eo re e tsebang ke hore Jehova o tla etsa ntho e nepahetseng.

RE TSEBA ENG?

10. Jehova o ikutloa joang ka ho timetsa batho? (Ezekiele 33:11) (Sheba setšoantšo.)

¹⁰ Bala Ezekiele 33:11. Jehova oa re bolella hore na o ikutloa joang ka taba ea ho ahlola batho. Moapostola Petrose o ile a ngola mantsoe a tšoanang le a moprofeta Ezekiele ha a re “Jehova . . . ha a lakatse hore mang kapa mang a timetsoe.” (2 Pet. 3:9) Mantsoe ana a khothatsang a re thusa ho tseba hore Jehova ha a potlakele ho timetsa batho ka ho sa feleng ntle leha a e-na le lebaka le utloahalang la ho etsa joalo. O mohau haholo ’me o o bontša ka linako tsohle ha ho khoneha.

11. Ke bo-mang ba sa tl’o tsosoa, hona re tseba joang?

¹¹ Ke eng eo re e tsebang ka batho ba sa tl’o tsosoa? Bibele e bua ka mehlala e seng mekae feela. b Jesu o ile a bontša hore Judase Iskariota a ke ke a tsosoa. (Mar. 14:21; sheba le Johanne 17:12.) Judase o ne a tseba hore ntho eo a e entseng e ne e le khahlanong le Jehova le Mora oa hae empa o ile a e etsa ho ntse ho le joalo. (Sheba Mareka 3:29 le w07/15 leq. 18.) Ka tsela e tšoanang, Jesu o ile a re ba bang ba baeta-pele ba bolumeli ba neng ba mo hanyetsa ba ne ba tla shoa ba se na tšepo ea tsoho. (Mat. 23:33) Le moapostola Pauluse o ile a re bakoenehi ba sa bakeng ba ke ke ba tsosoa.—Baheb. 6:​4-8; 10:29.

12. Re tseba eng ka mohau oa Jehova? Etsa mehlala.

¹² Leha ho le joalo, re tseba eng ka mohau oa Jehova? O bontšitse joang hore “ha a lakatse hore mang kapa mang a timetsoe”? Nahana ka mohau oo a ileng a o bontša ba bang ba ileng ba etsa libe tse tebileng. Morena Davida o ile a etsa libe tse tebileng joaloka bofebe le ho bolaea. Leha ho le joalo, Davida o ile a baka ’me Jehova a mo bontša mohau ka ho mo tšoarela. (2 Sam. 12:​1-13) Morena Manase o ne a le khopo haholo hoo e ka bang bophelo bohle ba hae. Le boemong bo bobe hakaalo  Jehova o ile a mo bontša mohau ’me a mo tšoarela hobane o ile a baka. (2 Likron. 33:​9-16) Mehlala ena e re hopotsa hore Jehova o bontša mohau hafeela ho e-na le lebaka le utloahalang la hore a etse joalo. O tla tsosa batho ba joalo hobane ba ile ba hlokomela hore ba entse libe tse tebileng ba ba ba li bakela.

13. (a) Ke hobane’ng ha Jehova a ile a hauhela Baninive? (b) Lilemo hamorao Jesu o ile a re’ng ka Baninive?

¹³ Re boetse re tseba mohau oo Jehova a ileng a o bontša Baninive. Molimo o ile a re ho Jonase: “Ke hlokometse bokhopo ba bona.” Empa eitse ha ba bakela libe tsa bona Jehova o ile a ba tšoarela. O ne a le mohau haholo ho feta Jonase. Molimo o ile a hopotsa moprofeta eo oa hae ea neng a halefile haholo hore Baninive ba ne ‘ba sa tsebe phapang pakeng tsa se nepahetseng le se fosahetseng.’ (Jon. 1:​1, 2; 3:10; 4:​9-11) Lilemo hamorao Jesu o ile a sebelisa mohlala oo ho ruta hore Jehova o mohau ebile o na le toka. Jesu o ile a re Baninive bao ba bakileng, “ka letsatsi la kahlolo . . . ba tla tsoha bafung.”—Mat. 12:41.

14. Ho ‘tsohela kahlolo’ ho tla bolela’ng ho Baninive?

¹⁴ Empa ho boleloa’ng ha ho thoe “ka letsatsi la kahlolo, batho ba Ninive ba tla tsoha bafung”? Jesu o ile a re ho na le batho ba tla ‘tsohela kahlolo.’ (Joh. 5:29) O ne a bua ka Puso ea Lilemo Tse Sekete eo ho eona “batho ba lokileng le ba sa lokang” ba tla tsosoa. (Lik. 24:15) Batho ba sa lokang ba tla ‘tsohela kahlolo.’ Sena se bolela hore ka mor’a hore ba tsosoe, Jehova le Jesu ba tla be ba ba shebile hore na ba tla mamela le ho etsa lintho tseo ba ithutang tsona. Haeba Moninive ea tsositsoeng a hana ho rapela Jehova, Jehova a ke ke a mo lumella hore a ’ne a tsoele pele a phela. (Esa. 65:20) Empa bohle ba khethang ho sebeletsa Jehova ka botšepehi ba tla ba le monyetla oa ho phela ka ho sa feleng.—Dan. 12:2.

15. (a) Ke hobane’ng ha re sa lokela ho re ha ho na motho le ea mong ho batho ba ileng ba lula Sodoma le Gomora ea tla tsosoa? (b) Re lokela ho utloisisa mantsoe a ho Juda 7 joang? (Sheba lebokose le reng “ Juda o ne a Bolela’ng?”)

¹⁵ Ha Jesu a bua ka batho ba Sodoma le Gomora, o ile a re “ka Letsatsi la Kahlolo” kotlo ea bona e tla ba bobebe ho feta ea batho ba ileng ba mo hana le ho hana lithuto tsa hae. (Mat. 10:​14, 15; 11:​23, 24; Luka 10:12) O ne a  bolela’ng? Na Jesu o ne a mpa a sebelisa mokhabo puo oa pheteletso ho bontša hore batho ba mehleng ea hae ba ne ba le babe ho feta ba mehleng ea Sodoma le Gomora? Hopola hore ha Jesu a ne a re “ka letsatsi la kahlolo, batho ba Ninive ba tla tsoha bafung” o ne a bolela seo ka tsela ea sebele. c Ho bonahala hore le ha Jesu a ne a bua ka batho ba Sodoma le Gomora, o ne a bolela seo ka tsela ea sebele. “Letsatsi la Kahlolo” leo a neng a bua ka lona maemong ana a mabeli e ne e le letsatsi le tšoanang. Batho ba Sodoma le Gomora ba ne ba etsa lintho tse mpe joaloka batho ba Ninive. Empa Baninive ba ile ba fumana monyetla oa ho baka. Ntle ho moo, hopola seo Jesu a ileng a se bua ka ho ‘tsohela kahlolo.’ Ho tla tsosoa le batho “ba neng ba tloaetse ho etsa lintho tse fosahetseng.” (Joh. 5:29) Kahoo, ho bonahala eka e ka ’na eaba ho na le tšepo bakeng sa batho ba Sodoma le Gomora. Ho ka ’na ha etsahala hore ebe ba bang ba batho bao ba tla tsosoa ’me re ka ’na ra ba le monyetla oa ho ba ruta ka Jehova le ka Jesu Kreste.

16. Ho ea ka seo re se tsebang, Jehova o tla etsa qeto joang ea hore na o tla tsosa bo-mang? (Jeremia 17:10)

¹⁶ Bala Jeremia 17:10. Temana eo e re thusa ho akaretsa seo re se tsebang: Kamehla Jehova ke eena ea ‘hlahlobang pelo, ea phenyang menahano e tebileng.’ Nakong e tlang ha a tsosa bafu o tla ‘fa e mong le e mong ho ea ka litsela tsa hae’ joalokaha a tloaetse. Jehova o tla ema a tiile ha ho hlokahala empa o tla bontša mohau ha ho khoneha. Ha rea lokela ho etsa qeto ea hore motho a ke ke a tsosoa ntle le haeba ehlile re tseba hore ho joalo.

“MOAHLOLI OA LEFATŠE LOHLE” O TLA ‘AHLOLA KA TOKA’

17. Ho tl’o etsahala’ng ka batho ba seng ba shoele?

¹⁷ Ho tloha ha Adama le Eva ba kopanela le Satane borabeleng ba hae khahlanong le Jehova Molimo, ho se ho shoele batho ba libilione. “Sera . . . e leng lefu” se se se nkile batho ba bangata. (1 Bakor. 15:26) Ho tl’o etsahala’ng ka batho bao kaofela? Ke palo e fokolang ea balateli ba Kreste ba tšepahalang ba 144  000 ba tla tsosetsoa ho ea phela leholimong ba se ba sa shoe. (Tšen. 14:1) Banna le basali ba bangata ba neng ba rata Jehova ba tla phela hape ha ho ‘tsosoa batho ba lokileng’ ’me ba tla phela ka ho sa feleng lefatšeng haeba ba lula ba tšepahala nakong ea Puso ea Kreste ea Lilemo Tse Sekete le nakong ea teko ea ho qetela. (Dan. 12:13; Baheb. 12:1) Hape ka nako ea Lilemo Tse Sekete, batho “ba sa lokang” ba akareletsang batho ba sa kang ba sebeletsa Jehova kapa “ba neng ba tloaetse ho etsa lintho tse fosahetseng,” ba tla fuoa monyetla oa ho fetola litsela tsa bona hore e be bahlanka ba tšepahalang ba Jehova Molimo. (Luka 23:​42, 43) Leha ho le joalo, batho ba bang ba ne ba le khopo haholo, ba ikemiselitse ho se mamele Jehova le merero ea hae hoo a entseng qeto ea hore a ke ke a ba tsosa ho hang.—Luka 12:​4, 5.

18, 19. (a) Ke hobane’ng ha re ka kholiseha hore Jehova o tla ahlola batho ba shoeleng ka toka? (Esaia 55:​8, 9) (b) Re tl’o bua ka’ng sehloohong se latelang?

¹⁸ Na re ka kholiseha ka ho feletseng hore likahlolo tsohle tsa Jehova li nepahetse? Hantle haholo. Abrahama le eena o ne a tseba hore Jehova o phethahetse, o bohlale ebile ke “Moahloli oa lefatše lohle” ea mohau. O koetlisitse Mora oa hae a ba a mo fa mosebetsi oa ho ahlola motho e mong le e mong. (Joh. 5:22) Ka bobeli Ntate le Mora oa hae ba khona ho bona se ka pelong ea motho e mong le e mong. (Mat. 9:4) Maemong ’ohle ba tla lula ba ‘ahlola ka toka.’

¹⁹ A re ikemisetseng ho tšepa Jehova liqetong tsohle tseo a li etsang. Rea hlokomela hore rona re ke ke ra khona ho ahlola ka toka empa eena a ka khona. (Bala Esaia 55:​8, 9.) Ke ka lebaka leo re tšepang Jehova le Mora oa hae hore ba fane ka likahlolo tsohle. Hape rea tseba hore Morena oa rona Jesu o tla etsisa ka ho phethahetseng toka le mohau oa Ntate oa hae. (Esa. 11:​3, 4) Empa re ka re’ng ka likahlolo tsa Jehova le Jesu nakong ea mahlomola a maholo? Ha re tsebe eng? Re tseba eng? Sehlooho se latelang se tla araba lipotso tsena.