1. Moapostola Pauluse o ne a ikutloa joang ka bahlanka ba sebeletsang?

 BAHLANKA ba sebeletsang ba etsa mosebetsi oa bohlokoa liphuthehong. Moapostola Pauluse o ne a nka banna bana ba tšepahalang e le ba bohlokoa. Ka mohlala, ha a ne a ngolla Bakreste ba Filipi, ka ho khetheha o ile a lumelisa bahlanka ba sebeletsang hammoho le baholo.—Bafil. 1:1.

2. Mor’abo rona Luis o ikutloa joang ka ho ba mohlanka ea sebeletsang?

² Bara ba bo rona ba bangata ba kolobelitsoeng, ho sa tsotellehe hore na ba bacha kapa ba holile, ba thabela ho ba bahlanka ba sebeletsang. Ka mohlala, Mor’abo rona Devan o ne a le lilemo li 18 ha a ne a khethoa hore e be mohlanka ea sebeletsang. Mor’abo rona Luis eena o ne a le ka holimo ho lilemo tse 50 ha a ne a khethoa hore e be mohlanka ea sebeletsang. O ikutloa joang ka ho ba mohlanka ea sebeletsang? O re: “Ke ananela mosebetsi oo ke o etsang haholo joaloka mohlanka ea sebeletsang, haholo-holo ha ke nahana ka tsela eo phutheho e bontšitseng ka eona hore ea nthata.” Bahlanka ba sebeletsang ba bangata le bona ba ikutloa ka tsela ena.

3. Re tl’o araba lipotso life sehloohong see?

³ Haeba u mor’abo rona ea kolobelitsoeng ’me ha u e-s’o be mohlanka ea sebeletsang, ikemisetse ho ba eena. Ke eng e ka u thusang hore u ikemisetse ho ba mohlanka ea sebeletsang? Hape ke litšoaneleho life tse hlahang ka Bibeleng tseo u lokelang ho ba le tsona? Sehloohong sena, re tl’o araba lipotso tsena. Empa pele a re bueng ka hore na mosebetsi oa mohlanka ea sebeletsang ke ofe.

 MESEBETSI EA BAHLANKA BA SEBELETSANG KE EFE?

4. Mesebetsi ea bahlanka ba sebeletsang ke efe? (Sheba setšoantšo.)

⁴ Mohlanka ea sebeletsang ke mor’abo rona ea kolobelitsoeng ea khethiloeng ke moea o halalelang, e le hore a thuse baholo ho etsa mesebetsi e mengata ea bohlokoa ka phuthehong. Bahlanka ba sebeletsang ba bang ba etsa bonnete ba hore bahoeletsi ba na le tšimo e lekaneng eo ba e sebetsang le lingoloa tse lekaneng bakeng sa tšimo. Ba bang ba thusa ka ho hloekisa Holo ea ’Muso le ho e hlokomela. Bahlanka ba sebeletsang e boetse e-ba bahlokomeli ebile ba thusa ka ho bapala lipina le livideo nakong ea liboka. Mosebetsi o mongata oo ba o etsang ke oa bohlokoa. Leha ho le joalo, ntho ea bohlokoa ka ho fetisisa ke hore bahlanka ba sebeletsang ke banna ba ratang Jehova ebile ba phela ka tsela e mo thabisang. Ba boetse ba rata Bakreste-’moho le bona haholo. (Mat. 22:​37-39) Mor’abo rona ea kolobelitsoeng a ka etsa boiteko ba ho ba mohlanka ea sebeletsang joang?

5. Mor’abo rona a ka etsa’ng hore a tšoanelehe ho ba mohlanka ea sebeletsang?

⁵ Bibele e bua ka litšoaneleho tse hlokahalang pele mor’abo rona a ka khethoa hore e be mohlanka ea sebeletsang. (1 Tim. 3:​8-10, 12, 13) U ka etsa boiteko ba ho fumana tokelo ena ka hore u ithute ka litšoaneleho tseo u be u sebetse ka thata hore u be le tsona. Empa pele ho moo, u lokela ho ipotsa hore na ha e le hantle sepheo sa hao ke sefe sa ho etsa boiteko ba ho ba mohlanka ea sebeletsang.

KE ENG E U SUSUMELETSANG HORE U ETSE BOITEKO BA HO BA MOHLANKA EA SEBELETSANG?

6. Ke eng e lokelang ho u susumelletsa ho etsetsa Bakreste-’moho le uena mosebetsi leha e le ofe? (Matheu 20:28; sheba setšoantšo.)

⁶ Nahana ka mohlala oa rona o ka sehloohong, e leng Jesu Kreste. Ntho e ’ngoe le e ’ngoe eo a neng a e etsa, o ne a e etsa hobane a ne a rata Ntate oa hae le batho. Lerato leo le ile la mo susumeletsa hore a sebeletse ba bang ka thata a be a ba etsetse mesebetsi e neng e khelloa fatše. (Bala Matheu 20:28; Joh. 13:​5, 14, 15) Haeba le uena u etsa lintho hobane u susumetsoa ke lerato, Jehova o tla u hlohonolofatsa a be a u thuse hore u tšoanelehe ho ba mohlanka ea sebeletsang.—1 Bakor. 16:14; 1 Pet. 5:5.

7. Ke hobane’ng ha mor’abo rona a sa lokela ho batla ho ba mohlanka ea sebeletsang hobane a batla ho ikutloa a le bohlokoa?

 ⁷ Lefatšeng, batho ba inkelang holimo ke bona ba nkoang e le ba bohlokoa. Empa eseng ka mokhatlong oa Jehova. Mor’abo rona ea susumetsoang ke lerato joaloka Jesu, ha a batle ho laola batho ba bang, kapa ho etsa hore ba bang ba mo nke eka ke oa bohlokoa. Haeba mor’abo rona ea joalo a ne a ka khethoa, o ne a ka ’na a hana ho etsa mesebetsi e khelloang fatše empa e hlokahala bakeng sa ho hlokomela linku tsa Jehova tsa bohlokoa. A ka nka mesebetsi e joalo e le tlase ebile e sa mo tšoanele. (Joh. 10:12) Jehova a ke ke a hlohonolofatsa boiteko ba motho leha e le ofe ea susumetsoang ke ho ikhohomosa kapa ho ikutloa a le bohlokoa.—1 Bakor. 10:​24, 33; 13:​4, 5.

8. Jesu o ile a fa baapostola ba hae keletso efe?

⁸ Ka linako tse ling, le metsoalle ea Jesu e haufi e ile ea batla litokelo ka sepheo se sebe. Nahana ka seo moapostola Jakobo le Johanne ba ileng ba se etsa. Ba ile ba kopa Jesu hore a ba fe boemo bo phahameng ’Musong oa hae. Jesu ha aa ka a ba babatsa hobane ba ne ba batla ho inka e le ba bohlokoa ho feta ba bang. Ho e-na le hoo, o ile a re ho baapostola bohle ba 12: “Ea batlang ho ba moholo har’a lona e lokela ho ba mosebeletsi oa lona. Ea batlang ho ba oa pele har’a lona e lokela ho ba mohlanka oa bohle.” (Mar. 10:​35-37, 43, 44) Bara ba bo rona ba nang le sepheo se setle sa ho batla ho ba bahlanka ba sebeletsang, e leng ho sebeletsa ba bang e tla ba tlhohonolofatso e kholo liphuthehong tsa habo bona.—1 Bathes. 2:8.

KE ENG E KA U THUSANG HO ETSA BOITEKO BA HO BA MOHLANKA EA SEBELETSANG?

9. Ke eng e ka u thusang ho etsa boiteko ba ho ba mohlanka ea sebeletsang?

⁹ Ho hlakile hore u rata Jehova ebile u batla ho sebeletsa ba bang. Leha ho le joalo, ho ka etsahala hore ha u rate ho etsa mesebetsi eo bahlanka ba sebeletsang ba lokelang ho e etsa. Ke eng e ka u thusang hore u batle ho etsa mosebetsi oo? Nahana ka hore na ho sebeletsa Bakreste-’moho le uena ho tla u thabisa hakae. Jesu o ile a re: “Ho fana ho thabisa haholo ho feta ho fuoa.” (Lik. 20:35) Jesu o ile a phelela mantsoe a hae. O ile a thaba e le kannete ka lebaka la ho sebeletsa ba bang ’me le uena u ka thaba.

10. Jesu o ile a bontša joang hore o ne a thabela ho sebeletsa ba bang? (Mareka 6:​31-34)

¹⁰ Nahana ka mohlala o bontšang hore Jesu o ne a thabela ho sebeletsa ba bang. (Bala Mareka 6:​31-34.) Ka le leng, Jesu le baapostola ba hae ba ne ba khathetse. Ba ne ba le tseleng e eang sebakeng se ka thoko moo ba tla phomola. Empa batho ba bangata ba ile ba ba fihlela pele moo ba eang hobane ba ne ba batla ho rutoa ke Jesu. Jesu a ka be a ile a hana hobane eena le barutuoa ba hae “ba ne ba se na nako ea ho phomola esita le ea ho ja.” Mohlomong Jesu a ka be a ile a ba ruta ntho e le ’ngoe kapa tse peli, ebe ka mor’a moo o re ba tsamaee. Empa kaha o ne a susumetsoa ke lerato, o ile “a qala ho ba ruta lintho tse ngata.” O ile a tsoela pele ho ba ruta ho fihlela “e se e le mantsiboea.” (Mar. 6:35) Ha aa ka a etsa joalo hobane a ne a tlamehile empa hobane o ne “a ba hauhela.” O ne a batla ho ba ruta hobane a ba rata. Jesu o ne a thabisoa haholo ke ho sebeletsa ba bang.

11. Jesu o ile a thusa batho joang ka lintho tseo ba li hlokang? (Sheba setšoantšo.)

¹¹ Ha Jesu a ntse a thusa batho ba bangata ka hore a ba rute ka Molimo, o ile a boela a ba thusa ka lintho tseo ba li hlokang. Ka mohlolo o ile a etsa hore ho be le lijo eaba o re barutuoa ba hae ba li abele batho. (Mar. 6:41) Ka ho etsa joalo, o ile a ruta barutuoa ba hae ho sebeletsa ba bang. O ile a boela a ba bontša hore mesebetsi e kang ena eo hangata e etsoang ke bahlanka  ba sebeletsang, le eona e bohlokoa. Nahana feela hore na baapostola ba ile ba thaba hakae ha ba sebetsa le Jesu ho aba lijo tsena tseo Jesu a neng a li entse ka mohlolo ho fihlela “bohle ba ja ba khora.” (Mar. 6:42) Rea tseba hore lena e ne e se lekhetlo la pele Jesu a etsa hore litlhoko tsa batho ba bang li tle pele ho tsa hae. O ile a sebeletsa batho bophelo bohle ba hae ha a le lefatšeng. (Mat. 4:23; 8:16) Jesu o ne a thaba a bile a khotsofala ka lebaka la ho ruta batho le ho ba thusa ka lintho tseo ba li hlokang. Le uena u tla thaba haholo ka lebaka la ho itella ba bang ka hore u be mohlanka ea sebeletsang.

12. Ke hobane’ng ha ho se na motho ea lokelang ho ikutloa eka ha a na molemo ka phuthehong?

¹² Haeba u utloa eka ha u na bokhoni bo itseng bo ikhethang, u se ke oa nyahama. E tlameha ebe u na le makhabane a matle a ka tsoelang phutheho molemo. Nahana ka mantsoe a Pauluse a hlahang ho 1 Bakorinthe 12:​12-30 ebe u kopa Jehova hore a u thuse. Mantsoe a Pauluse a bontša ka ho hlaka hore le uena joaloka mohlanka e mong le e mong oa Jehova, phutheho ea u hloka ebile u motho oa bohlokoa. Haeba hona joale ha u e-s’o ka u tšoaneleha ho ba mohlanka ea sebeletsang, u se ke oa nyahama. Ho e-na le hoo, etsa sohle seo u ka se khonang ho sebeletsa Jehova le Bakreste-’moho le uena. Kholiseha hore baholo ba tla nahana ka bokhoni ba hao ’me ba u fe mosebetsi oo u tla khona ho o etsa.—Bar. 12:​4-8.

13. U lokela ho nahana ka eng?

¹³ Nahana ka sena: Boholo ba makhabane ao Bibele e buang ka ’ona hore aa hlokahala bakeng sa bahlanka ba sebeletsang, ke makhabane ao Bakreste bohle ba lokelang ho ba le ’ona. Bakreste bohle e lokela ho ba metsoalle ea Jehova, ba thabele ho fa ba bang le hore ba phele ka tsela e thabisang Molimo. Taba ena e bolela hore e ka ’na eaba u se u ntse u e-na le makhabane a mang a hlokahalang hore u be mohlanka ea sebeletsang. Empa ke eng ka ho khetheha eo mor’abo rona a lokelang ho e etsa e le hore a tšoanelehe ho ba mohlanka ea sebeletsang?

U KA ETSA BOITEKO BA HO BA MOHLANKA EA SEBELETSANG JOANG?

14. Ho bolela’ng ho ‘ba motho ea holileng kelellong’? (1 Timothea 3:​8-10, 12)

¹⁴ A re hlahlobeng tse ling tsa litšoaneleho tse hlahang ho 1 Timothea 3:​8-10, 12. (E bale.) Mohlanka ea sebeletsang e lokela ho ‘ba motho ea holileng kelellong.’ Poleloana ena e ka boela ea fetoleloa e le “ea sa tlaloang ke papali,” “ea nang le boikarabelo” kapa “ea itšoarang ka  tsela e etsang hore batho ba mo hlomphe.” Sena ha se bolele hore ha ho mohla u tla tšeha kapa u soasoe le ba bang. (Moek. 3:​1, 4) Empa se bolela hore u lokela ho nka boikarabelo bohle boo u bo filoeng ka botebo. Haeba u e-na le botumo ba ho phetha mosebetsi oo u o filoeng hantle, phutheho e tla u hlompha e be e u tšepe.

15. Ho bolela eng ho ‘se be moikaketsi’ le ho ‘se be meharo ea ho fumana leruo ka bolotsana’?

¹⁵ Ho ‘se be moikaketsi’ ho bolela hore u rata ’nete ebile oa tšepahala. U etsa lintho tseo u itseng u tla li etsa, ebile ha u thetse batho ba bang. (Liprov. 3:32) Ho ‘se be meharo ea ho fumana leruo ka bolotsana’ ho bolela hore oa tšepahala ha u sebelisana le batho litabeng tsa khoebo le tsela eo u sebelisang chelete ka eona. U ke ke oa nka monyetla ka Bakreste-’moho le uena ka hore u ba sebelise hore u be le chelete ngata.

16. (a) Ho bolela eng ho ‘se noe veine haholo’? (b) Ho bolela eng ho ba le “letsoalo le khutsitseng”?

¹⁶ Ho ‘se noe veine haholo’ ho bolela ho se noe joala haholo le ho se tsebahale u le motho ea noang joala haholo. Ho ba le “letsoalo le khutsitseng” ho bolela hore u phela tumellanong le melao ea Jehova. Le hoja u sa phethahala, u thabela ho ba motsoalle oa Molimo ’me seo se etsa hore u be le khotso.

17. Mor’abo rona a ka bontša joang hore a ka tšeptjoa ha a ntse a ‘hlahlojoa pele hore ho bonoe hore na oa tšoaneleha’? (1 Timothea 3:10; sheba setšoantšo.)

¹⁷ Ho ‘hlahlojoa pele hore ho bonoe hore na oa tšoaneleha’ ho bolela hore baholo ba bone hore u phetha boikarabelo ba hao hantle ’me ba ka u tšepa. Kahoo, ha baholo ba u fa mosebetsi, latela ka hloko litaelo tseo ba u fang tsona le tataiso eo ba u fang eona ho tsoa mokhatlong. Etsa bonnete ba hore oa utloisisa hore na u lokela ho etsa eng le hore na u lokela ho qeta mosebetsi oo neng. Ha u ntse u etsa mosebetsi oa hao hantle le ka mafolofolo, phutheho e tla hlokomela le ho ananela khatelo-pele ea hao. Baholo, etsang bonnete ba hore le koetlisa bara ba bo rona ba kolobelitsoeng. (Bala 1 Timothea 3:10.) Na ho na le bara ba bo rona ba kolobelitsoeng phuthehong ea habo lona ba lilemong tsa bocha kapa ka tlase ho moo? Na ba ithuta Bibele kamehla le ho lokisetsa liboka hantle? Na ba arabela kamehla libokeng le ho ea tšimong? Haeba ho joalo, ba feng mesebetsi e ba tšoanelang ho latela lilemo tsa bona le maemo a bona. Ha le etsa joalo, le tla be le ba ‘hlahloba pele hore ho bonoe hore na baa tšoaneleha.’ E tla re ha ba le haufi le ho ba lilemo tse 20, ba ka ’na ba tšoaneleha ho ba bahlanka ba sebeletsang.

18. Ho ‘se be le letho leo u qosoang ka lona’ ho bolela eng?

 ¹⁸ Ho ‘se be le letho leo u qosoang ka lona’ ho bolela hore ha ho na motho ea ka u qosang a bile a e-na le bopaki ba hore u entse phoso e tebileng. Ke ’nete hore ka linako tse ling, Bakreste ba ka ’na ba qosoa ka ntho eo ba sa e etsang. Jesu le eena o ile a ’na a qosoa ka lintho tseo a sa li etsang a ba a bolela hore balateli ba hae le bona ba tla etsahalloa ke se tšoanang. (Joh. 15:20) Leha ho le joalo, haeba u tsoela pele u itšoere hantle joaloka Jesu, o tla ba le botumo bo botle ka phuthehong.—Mat. 11:19.

19. Bibele e bolela eng ha e re monna ea nyetseng “a be le mosali a le mong”?

¹⁹ “A be le mosali a le mong.” Haeba u monna ea nyetseng, u lokela ho ba le mosali a le mong, e leng eona tokisetso eo Jehova a e entseng ho tloha tšimolohong. (Mat. 19:​3-9) Monna oa Mokreste, ha a lokela ho etsa boitšoaro bo bobe bo amanang le thobalano. (Baheb. 13:4) Ha ho felle moo, u lokela ho tšepahalla mosali oa hao ’me u se ke oa bontša maikutlo a lerato ho mosali leha e le ofe e mong.—Jobo 31:1.

20. Ke joang mor’abo rona a ka laolang lelapa la hae “hantle”?

²⁰ “A laole lelapa la hae hantle, haholo-holo bana ba hae.” Haeba u hlooho ea lelapa, u lokela ho nka boikarabelo ba hao ka ho teba. Tšoara borapeli ba lelapa kamehla. E ea tšimong le setho ka seng sa lelapa la hao hangata kamoo u ka khonang. Thusa bana ba hao hore e be metsoalle ea Jehova. (Baef. 6:4) Ha monna a khona ho hlokomela ba lelapa la hae, seo se bontša hore a ka khona ho hlokomela le phutheho.—Bapisa le 1 Timothea 3:5.

21. U ka etsa eng haeba ha u e-s’o be mohlanka ea sebeletsang?

²¹ Mor’abo rona, haeba ha u e-s’o be mohlanka ea sebeletsang, bala sehlooho sena ka hloko ’me u rapele Jehova ka taba ena. Ithute ka litšoaneleho tsa bahlanka ba sebeletsang ’me u sebetse ka thata hore u be le tsona. Nahana kamoo u ratang Jehova le Bakreste-’moho le uena kateng. Matlafatsa lerato leo u ba ratang ka lona ’me u nahane hore na ke hobane’ng ha u batla ho ba sebeletsa. (1 Pet. 4:​8, 10) U tla latsoa thabo e tlisoang ke ho sebeletsa Bakreste-’moho le uena. E se eka Jehova a ka hlohonolofatsa boiteko boo u bo etsang ba ho batla ho ba mohlanka ea sebeletsang.—Bafil. 2:13.