1. Ho hlokomela hore u hloka Molimo ho bolela’ng, hona ho amana joang le ho thaba?

 HO THABA ha se boikutlo feela bo tlang bo feta. Motho a ka khona ho thaba bophelo bohle ba hae. Ke eng e ka re thusang hore re thabe? Thutong ea Thabeng, Jesu o ile a re: “Ho thaba ba hlokomelang hore ba hloka Molimo.” (Mat. 5:3) Jesu o ne a tseba hore batho ba bopiloe ka tsela e tla etsa hore ba batle ho tseba le ho sebeletsa ’Mopi oa bona Jehova Molimo. Ha ba etsa joalo ke hona ha ba ‘hlokomela hore ba hloka Molimo.’ Kaha Jehova ke “Molimo ea thabileng” le batho ba mo sebeletsang le bona ba ka thaba.​—1 Tim. 1:11.

2, 3. (a) Jesu o ile a re ke batho bafe hape ba ka khonang ho thaba? (b) Re tl’o bua ka’ng sehloohong see, hona ke hobane’ng ha e le habohlokoa?

² Na re ka thaba feela ha re se na mathata? Che. Thutong ea Thabeng, Jesu o ile a bua ntho e ’ngoe e makatsang. O ile a re batho ba utloileng bohloko hobane ba ikutloa ba le molato ka lebaka la libe tseo ba li entseng kapa ba nang le mathata le bona ba ka thaba. O ile a boela a re batho “ba hlorisitsoeng ka lebaka la ho loka” kapa ba ileng ba utloisoa bohloko ke ho rohakoa hobane e le balateli ba hae le bona ba ka thaba. (Mat. 5:​4, 10, 11) Ke joang re ka thabang ha re le maemong aa?

³ Jesu o ne a re ruta hore ho thaba ha hoa itšetleha ka maemo a rona empa re ka thaba ha re sebeletsa Molimo leha re e-na le kamano e ntle le eena. (Jak. 4:8) Re ka etsa seo joang?  Sehlooho sena se tl’o bua ka lintho tse tharo tseo re lokelang ho li etsa e le hore re thabe.

4. Mohato oa pele oo re lokelang ho o nka ke ofe e le hore re thabe? (Pesaleme ea 1:​1-3)

⁴ MOHATO OA PELE: Re tlameha ho bala Bibele hore re thabe. Liphoofolo le batho ba hloka lijo e le hore ba phele. Empa ke batho feela ba ka khonang ho ithuta Lentsoe la Molimo ’me ke habohlokoa hore ba etse joalo. Ke kahoo Jesu a ileng a re: “Motho a ke ke a phela ka bohobe feela empa o tla phela le ka lentsoe le leng le le leng le tsoang molomong oa Jehova.” (Mat. 4:4) Kahoo, letsatsi ha lea lokela ho feta re sa bala Lentsoe la Molimo, e leng Bibele. Mongoli e mong oa Pesaleme o ile a re: ‘Ho thaba motho ea thabelang molao oa Jehova, o bala molao oa Hae bosiu le motšehare.’​—Bala Pesaleme ea 1:​1-3.

5, 6. (a) Re ithuta’ng ka Bibeleng? (b) Ho bala Bibele ho re thusa joang?

⁵ Jehova oa re rata kahoo o re bontšitse ka Bibeleng hore na re ka etsa’ng e le hore re thabe. Bibele e re ruta hore na ke hobaneng ha a re bopile. Re boetse rea ithuta hore na ke joang re ka bang le kamano e ntle le eena le hore na ke’ng eo re ka e etsang e le hore a re tšoarele libe tsa rona. Hape re ithuta ka tšepo e babatsehang eo a re tšepisitseng eona ka bokamoso. (Jer. 29:​11) Lintho tsena tseo re ithutang tsona Bibeleng li re thabisa haholo.

⁶ Bibele e boetse e na le likeletso tseo re ka li sebelisang bophelong ’me re tla thaba haeba re li mamela. Ha u ikutloa u nyahamisitsoe ke mathata ao u nang le ’ona, qeta nako e ngata u bala Lentsoe la Jehova le ho nahanisisa ka lona. Jesu o ile a re: “Ho thaba ba mamelang lentsoe la Molimo ’me ba le boloka.”​—Luka 11:28.

7. Ke eng e ka u thusang hore seo u se balang Lentsoeng la Molimo se u tsoele molemo?

 ⁷ Thabela seo u se balang Lentsoeng la Molimo. Ka mohlala, na u kile oa etsahalloa ke ntho ee? Motho e mong o pheha lijo tseo u li ratang. Ka lebaka la hore u potlakile kapa ho na le ntho eo u ntseng u nahana ka eona, u ja lijo tseo u tatile u sa khone le ho utloa monate oa tsona. Ka mor’a hore u qete ho ja oa hlokomela hore u jele kapele ’me u lakatsa eka u ka be u ile oa li thabela. Ka tsela e tšoanang, ka linako tse ling re ka bala Bibele re tatile ebe ha re khone ho utloisisa le ho thabela seo re se balang. Iphe nako ea ho thabela ho bala Lentsoe la Molimo, ipone u le moo, nahana ka melumo le mantsoe a batho bao u ntseng u bala ka bona ’me u nahanisise ka seo u se balang. Ha u etsa joalo u tla thaba le ho feta.

8. “Mohlanka ea tšepahalang le ea bohlale” o etsa mosebetsi oa hae joang? (Sheba le mongolo o botlaseng ba leqephe.)

⁸ Jesu o ile a khetha “mohlanka ea tšepahalang le ea bohlale” ho re fa lintho tse tla re thusa hore re be le kamano e ntle le Jehova ka nako e nepahetseng ’me o fela a etsa joalo. b (Mat. 24:​45) Mohlanka ea tšepahalang le ea bohlale o sebelisa Bibele ho etsa lintho tse re thusang hore re ithute ka Jehova haholoanyane. (1 Bathes. 2:​13) Lintho tseo li boetse li re thusa ho tseba hore na Jehova o nahana’ng, e leng seo a re bolelletseng sona ka Bibeleng. Ke kahoo re balang makasine ea Molula-qhooa le Tsoha! hammoho le lihlooho tse hlahang ho jw.org. Re itokisetsa liboka tsa har’a beke le tsa mafelo-beke. Hape khoeli le khoeli re shebella lenaneo la JW Broadcasting^® ha le fumaneha. Ha re etsa bonnete ba hore re bala Bibele, re tla khona ho nka mohato oa bobeli o tla re thusa hore re lule re thabile.

9. Ke mohato ofe oa bobeli o ka re thusang hore re thabe?

⁹ MOHATO OA BOBELI: Re lokela ho mamela melao ea Jehova e le hore re thabe. Mongoli e mong oa Pesaleme o ile a re: “Ho thaba bohle ba tšabang Jehova, ba phelang ka tsela e mo khahlisang.” (Pes. 128:1) Ho tšaba Jehova ho bolela ho mo hlompha haholo hoo re qobang ho etsa lintho tse mo utloisang bohloko. (Liprov. 16:6) Kahoo, re lula re etsa sohle seo re ka se khonang ho mamela melao ea Jehova ea se nepahetseng le se fosahetseng, eo a re hlaloselitseng eona ka Bibeleng. (2 Bakor. 7:1) Re tla thaba haeba re etsa lintho tseo Jehova a li ratang ’me re tlohela ho etsa tseo a sa li rateng.​—Pes. 37:​27; 97:​10; Bar. 12:9.

10. Ho ea ka Baroma 12:​2, boikarabelo ba rona ke bofe?

¹⁰ Bala Baroma 12:2. Motho a ka ’na a tseba hore Jehova ke eena ea nang le matla a ho etsa qeto ea hore na se nepahetseng le se fosahetseng ke sefe. Leha ho le joalo, motho eo ke eena ea tla ikhethela hore na o tla mamela melao ea Molimo kapa che. Ka mohlala, motho a ka ’na a tseba hore ’muso ke ’ona o fanang ka molao oa hore na koloi e lokela ho tsamaea ka lebelo le lekae. Mohlomong ha a batle ho mamela molao tabeng ena. Ka lebaka leo, o khanna ka lebelo leo a sa lokelang ho tsamaea ka lona. Re bontša ka liketso hore re fela re kholisehile hore ho phela ka melao ea Jehova ke eona tsela ea bohlokoa. (Liprov. 12:​28) Davida o ne a ikutloa ka tsela eo, o ile a re ka Jehova: “U ntsebisa tsela ea bophelo. Motho ea pel’a hao o thaba haholo, ea ka letsohong la hao le letona o lula a thabile.”​—Pes. 16:11.

11, 12. (a) Ha re ikutloa re nyahame kapa re tšoenyehile re lokela ho hlokomela eng? (b) Bafilipi 4:8 e re thusa joang ha re khetha boithabiso?

 ¹¹ Ha re ikutloa re nyahame kapa re tšoenyehile, re ka ’na ra batla ho etsa ntho e itseng e tla re thusa hore re khaotse ho tšoenyeha ka mathata a rona. Sena sea utloahala empa re lokela ho hlokomela hore re se ke ra etsa lintho tseo Jehova a li hloileng.​—Baef. 5:​10-12, 15-17.

¹² Lengolong leo moapostola Pauluse a ileng a le ngolla Bakreste ba Filipi, o ile a ba khothaletsa ho tsoela pele ba nahana ka lintho ‘tse lokileng, tse hloekileng, tse ratehang, . . .le tse molemo.’ (Bala Bafilipi 4:8.) Le hoja Pauluse a ne a sa bue ka ho toba ka boithabiso, seo a se ngotseng se lokela ho susumetsa tsela eo re khethang boithabiso ka eona. U ka leka sena: Moo u bonang lentsoe “lintho” le hlaha temaneng ena u ka kenya lentsoe “lipina,” “li-movie,” “lipale” kapa “lipapali tsa livideo.” Ho etsa sena ho tla u thusa hore u bone hore na ke’ng e amohelehang ho Molimo. Re batla ho mamela melao ea Jehova e phahameng. (Pes. 119:​1-3) Kahoo, re tla ba le letsoalo le letle ’me re ka khona ho nka mohato o latelang o tla etsa hore re thabe.​—Lik. 23:1.

13. Ke mohato ofe oa boraro o ka re thusang hore re thabe? (Johanne 4:​23, 24)

¹³ MOHATO OA BORARO: Etsa hore ho sebeletsa Jehova e be eona ntho e tlang pele bophelong ba hao. Re lokela ho sebeletsa Jehova kaha o re bopile. (Tšen. 4:​11; 14:​6, 7) Ntho ea bohlokoa e lokelang ho tla pele bophelong ke ho sebeletsa Jehova ka tsela eo a batlang re mo sebeletse ka eona, e leng ka “moea le nete.” (Bala Johanne 4:​23, 24.) Re batla hore moea oa Molimo o halalelang o re thuse ho mo sebeletsa ka tsela e lumellanang le seo re ithutang sona Lentsoeng la hae. Ho sebeletsa Jehova e lokela e be eona ntho e tlang pele le haeba re lula sebakeng seo mosebetsi oa rona o thibetsoeng. Hona joale bara le barali babo rona ba fetang lekholo ba koalletsoe ka lebaka la hore ke Lipaki Tsa Jehova. c Ho ntse ho le joalo, ba thabela ho etsa sohle seo ba ka se khonang ho rapela, ho ithuta le ho bolella batho ba bang ka Molimo oa rona le ka ’Muso oa hae. Ha batho ba re tlotlolla kapa ba re hlorisa, re ka thabisoa ke ho tseba hore Jehova o na le rona hape o tla re putsa.​—Jak. 1:​12; 1 Pet. 4:14.

14. Ho ile ha etsahala’ng ka mor’abo rona e mocha oa Tajikistan, hona hobane’ng?

¹⁴ Bara le barali babo rona ba bang ba ile ba hlaheloa ke mathata. Ho ntse ho le joalo, ba ne ba thabile haholo ka lebaka la hore ba ile ba nka mehato e meraro eo re buileng ka eona. Nahana ka se ileng sa etsahalla Mor’abo rona Jovidon Bobojonov ea lilemo li 19 ea lulang Tajikistan ka lebaka la ho hana ho kenela sesole. Ka la 4 October 2019 o ile a tlosoa lapeng, a koalloa teronkong ka likhoeli tse ’maloa ’me o ne a tšoeroe joaloka setloli sa molao. Ho hloka toka hoo ho ile ha tlalehoa mecheng ea phatlalatso linaheng tse ngata. Tlaleho e ’ngoe e ne e bua ka hore o ile a shapuoa e le ha ba mo qobella a ikane hore o tla tšepahalla sesole le ho apara liaparo tsa sona. Ka mor’a hore lekhotla le re o molato, o ile a isoa kampong ea mahloriso ho fihlela mopresidente oa naha eo a mo tšoarela ’me a re a lokolloe. Nakong ena kaofela, Mor’abo rona Jovidon o ile a lula a tšepahala hape a thabile.  O ile a thusoa ke’ng? Ke hore a lule a bala Bibele.

15. Ke joang Mor’abo rona Jovidon a ileng a tsoela pele a ithuta ka Jehova ha a ntse a le teronkong?

¹⁵ Ha Mor’abo rona Jovidon a ntse a le teronkong, o ile a tsoela pele a ithuta ka Jehova le hoja a ne a se na Bibele kapa lingoloa. Seo se etsahetse joang? Bara le barali babo rona ba lulang moo ba ne ba mo isetsa lijo ’me ba mo ngolla temana ea letsatsi mekotleng eo ba neng ba mo isetsa lijo ka eona. Kahoo, letsatsi le letsatsi o ne a khona ho bala Bibele le ho nahanisisa ka lintho tseo a li balileng. Ka mor’a hore a lokolloe teronkong o ile a fana ka keletso ho batho ba e-s’o ka ba hlaheloa ke mathata ao. O ile a re: “Ke habohlokoa hore u sebelise bolokolohi boo u nang le bona hona joale ho bala Lentsoe la Jehova le lingoloa hore u mo tsebe haholoanyane.”

16. Mor’abo rona Jovidon o ne a lula a nahana ka’ng?

¹⁶ Mor’abo rona Jovidon o ne a phela ka melao ea Jehova. Ho e-na le ho nahana ka lintho tse mpe kapa ho li etsa, o ne a lula a nahanne ka lintho tseo Jehova a nkang e le tsa bohlokoa. O ne a tsota botle ba popo ea Molimo. Hoseng ho hong le ho hong o ne a tsosoa ke linonyana tse binang. Bosiu o ne a sheba khoeli le linaleli. O re: “Limpho tsena tse tsoang ho  Jehova li ne li nthabisa ’me li nkhothatsa.” Ha re ananela lintho tseo Jehova a re fang tsona le tataiso eo re e fumanang ka Bibeleng, seo se etsa hore re thabe ebile thabo eo e re thusa hore re mamelle.

17. Motho eo e ka ’nang eaba o boemong bo tšoanang le ba Mor’abo rona Jovidon a ka thusoa joang ke 1 Petrose 1:​6, 7?

¹⁷ Mor’abo rona Jovidon o ne a boetse a etsa hore ho sebeletsa Jehova ho tle pele bophelong ba hae. O ne a tseba hore ke habohlokoa hore a lule a tšepahalla Molimo oa ’nete. Jesu o ile a re: “Ke Jehova Molimo oa hao eo u lokelang ho mo rapela ebile ke eena feela eo u lokelang ho mo sebeletsa.” (Luka 4:8) Molaoli oa masole le masole a mang a ne a batla hore Mor’abo rona Jovidon a khaotse ho ba Paki ea Jehova. Ho ntse ho le joalo, o ne a lula a rapela bosiu le motšehare a kopa Jehova hore a mo thuse hore a se ke a tela le hore a lule a tšepahala. Le hoja Mor’abo rona Jovidon a ne a tšoaroa hampe o ile a lula a tšepahalla Jehova. Hona joale o se a thabile ebile tumelo ea hae e se e le matla kaha e ile ea lekoa ka hore a tlosoe lapeng, a shapuoe a be a isoe teronkong.​—Bala 1 Petrose 1:​6, 7.

18. Re ka etsa’ng e le hore re lule re thabile?

¹⁸ Jehova oa tseba hore na ke’ng eo re e hlokang hore re thabe. Ntho e ka re thusang hore re thabe le haeba re e-na le mathata, ke haeba re latela mehato e meraro eo re buileng ka eona. Kahoo le uena u tla khona ho bua mantsoe a reng: “Ho thaba batho bao Molimo oa bona e leng Jehova.”​—Pes. 144:15.