1. Jehova o ikutloa joang ka bahlanka ba hae?

 JEHOVA o bona ntho e ’ngoe le e ’ngoe e etsahallang bahlanka ba hae ba lefatšeng. Oa bona ha ba thabile le ha ba utloile bohloko. (Pes. 37:18) Ha a bona hore re mo sebeletsa ka pel’o eohle ho sa tsotellehe mathata ao re thulanang le ’ona o thaba haholo! Ebile o ikemiselitse ho re tšehetsa le ho re tšelisa mathateng a rona.

2. Jehova o thusa bahlanka ba hae joang ha ba utloile bohloko, hona ba lokela ho etsa’ng e le hore ba fole?

² Pesaleme ea 147:3 e re Jehova “o tlamisa maqeba a ba utloileng bohloko.” Temana ena e re fa maikutlo a hore Jehova o re thoba maikutlo ha re utloile bohloko. Re ka etsa’ng e le hore re utloe ha Jehova a re thoba maikutlo? Nahana ka papiso ena: Ngaka e ka thusa motho ea kulang empa motho eo o lokela ho mamela litaelo tsa ngaka e le hore a tle a fole. Sehloohong sena re tl’o bona hore na Jehova o re’ng ka Lentsoeng la hae ha a bua le batho ba utloileng bohloko le hore na ba ka sebelisa keletso eo joang e le hore ba fole.

JEHOVA O BATLA HORE RE TSEBE HORE RE BA BOHLOKOA

3. Ke hobane’ng ha batho ba bang ba ikutloa ba se na thuso?

³ Batho ba bangata ha ba na lerato ebile ba etsa hore ba bang ba ikutloe ba se na thuso. Morali oa bo rona e mong ea bitsoang Helen a o re: “Ke holisitsoe ke batsoali ba se nang lerato. Ntate oa ka o ne a re bolella letsatsi le leng le le leng hore ha re na thuso.” Mohlomong le uena joaloka morali oa  bo rona Helen batho ba u tšoara hampe, ba lula ba u tšoaea liphoso ebile ba etsa u ikutloe eka ha u ratehe. Haeba ho joalo, u ka ’na oa thatafalloa ke ho lumela hore ho na le motho ea u ratang e le kannete.

4. Ho ea ka Pesaleme ea 34:18 Jehova o re tšepisa’ng?

⁴ Kholiseha hore Jehova oa u rata ebile o u nka u le bohlokoa le haeba batho ba bang ba kile ba u tšoara hampe. “O haufi le bao lipelo tsa bona li utloileng bohloko.” (Bala Pesaleme ea 34:18.) Haeba u utloa u ‘khathetse matla,’ u hopole hore Jehova o ile a bona hore pelo ea hao e ntle eaba o u hulela ho eena. (Johanne 6:44) O u rata haholo! kahoo, o ikemiselitse ho u thusa ka linako tsohle.

5. Tsela eo Jesu a neng a tšoara batho ka eona e re ruta’ng ka Jehova?

⁵ Re ka tseba hore na Jehova o ikutloa joang ka hore re ithute mohlaleng oa Jesu. Ha Jesu a ne a le lefatšeng o ne a tsotella batho ba neng ba khelloa fatše a bile a ba tšoara ka mosa. (Mat. 9:​9-12) Ka lekhetlo le leng mosali e mong ea kulang haholo o ile a tla ho Jesu, a tšoara seaparo sa hae a tšepa hore o tla fola eaba Jesu oa mo tšelisa a ba a mo babatsa ka lebaka la tumelo ea hae. (Mar. 5:​25-34) Ha re bona Jesu ho tšoana le ha re bona Jehova hantle. (Joh. 14:9) Kahoo, u ka kholiseha hore Jehova o u nka u le oa bohlokoa ebile o bona lintho tse ntle tseo u li etsang, oa bona hore u lumela ho eena ebile oa mo rata.

6. U ka etsa’ng haeba u ikutloa u se na thuso?

⁶ U ka etsa’ng haeba u ntse u ikutloa u se na thuso le hoja u lekile ho qoba boikutlo boo? U ka bala litemana tsa Bibele tse u kholisang hore u bohlokoa ho Jehova ebe u nahanisisa ka tsona. b (Pes. 94:19) Haeba u hlolehile ho finyella lipakane tseo u neng u ipehetse tsona,  u se ke oa nyahama hape u se ke oa ipapisa le batho ba bang. Jehova ha aa lebella hore re etse lintho tse ka holimo ho matla a rona. (Pes. 103:​13, 14) Haeba u kile oa hlekefetsoa, u se ke oa ikutloa u le molato. U hopole hore Jehova o tla ahlola batho ba tšoarang ba bang hampe le hore o thusa ba ileng ba tšoaroa hampe. (1 Pet. 3:12) Morali oa bo rona Sandra ea ileng a hlekefetsoa ha a le monyenyane o re: “Ke lula ke kopa Jehova hore a nthuse ke ipone ka tsela eo a mponang ka eona, ke bone makhabane a ka.”

7. Lintho tse bohloko tse re hlahelang bophelong li re koetlisa joang ha re sebeletsa Jehova?

⁷ Jehova ke eena ea u khethileng hore u be mosebetsi-’moho le eena, kahoo, u se ke oa ikhalala hore u ka khona ho thusa batho ba bang. (1 Bakor. 3:9) Mathata a u hlahetseng bophelong a ka u thusa hore u utloisise tsela eo batho ba ka ’nang ba ikutloa ka eona ha ba utloile bohloko le hore u ba qenehele. U kholisehe hore u ka khona ho thusa batho ba bang! Morali oa bo rona Helen eo re buileng ka eena pejana o ile a fumana thuso ’me hona joale o khona ho thusa batho ba bang. O re: “Ke ne ke ikutloa ke se na thuso empa Jehova o nthusitse hore ke ikutloe ke ratoa ebile ke khona le ho thusa batho ba bang.” Hona joale morali oa bo rona Helen ke pula-maliboho ea sebetsang a thabile!

JEHOVA O BATLA RE LUMELE HORE O RE TŠOARELA KA HO FELETSENG

8. Ho latela Esaia 1:18 Jehova o re tiisetsa eng?

⁸ Bahlanka ba bang ba Jehova ba lula ba tšoenyehile ka liphoso tseo ba ileng ba li etsa nakong e fetileng, ebang ke pele kapa ka mor’a hore ba kolobetsoe. Empa re lokela ho hopola hore Jehova o re file Mora oa hae hore a re shoele hobane a re rata haholo. Ka lebaka leo, re lokela hore re lule re kholisehile hore o batla hore re amohele mpho ena ea hae. Ebile o batla hore re lumele hore ka mor’a hore re “lokise litaba le eena,” c o re leballa liphoso tsa rona. (Bala Esaia 1:18.) Re leboha Jehova hore ebe o re rata haholo hoo a lebalang liphoso tsa rona. Taba e ’ngoe e thabisang ke hore o lula a hopola lintho tse ntle tseo re li etsang.—Pes. 103:​9, 12; Baheb. 6:10.

9. Ke hobane’ng ha re sa lokela ho lula re nahana ka liphoso tseo re li entseng nakong e fetileng?

⁹ Haeba u lula u tšoenyehile ka liphoso tseo u li entseng nakong e fetileng, leka ka matla ho nahana ka lintho tse ntle tseo u li etsang hona joale le tseo u tla li etsa nakong e tlang. Hopola mohlala oa moapostola Pauluse. O ne a ikoahlaela hore o kile a hlorisa Bakreste ka sehloho empa o ne a kholisehile hore Jehova o mo tšoaretse. (1 Tim. 1:​12-15) Na o ile a lula a ikoahlaela liphoso tseo a li entseng nakong e fetileng? Ho hang ha aa ka a lula a nahana ka liphoso tsa hae kapa ka lintho tseo a neng a li finyeletse pele e e-ba Mokreste, tse kang hore e ne e le Mofarisi ea hlomphehang. (Bafil. 3:​4-8, 13-15) Ho e-na le hoo, Pauluse o ne a nahana ka bokamoso a bile a sebeletsa Molimo ka mafolofolo ’ohle. Joaloka Pauluse, u ke ke oa fetola lintho tseo u li entseng nakong e fetileng. Empa u ka khona ho thabisa Jehova le ho mo sebeletsa hona joale u be u lule u lebeletse hore litšepiso tsa hae li phethahale.

10. Re ka etsa’ng haeba re ile ra utloisa batho ba bang bohloko nakong e fetileng?

¹⁰ Ho ka etsahala hore ebe u tšoenyehile ka lintho tseo u li entseng nakong e fetileng tse ileng tsa utloisa batho ba bang bohloko. U ka thusoa ke eng? U kope tšoarelo ’me u sebetse  ka thata hore le lokise bothata bo teng. (2 Bakor. 7:11) Kopa Jehova hore a thuse batho bao u ba utloisitseng bohloko. A ka le thusa hore le be le khotso hape le be le tsoele pele le mo sebeletsa.

11. Re ithuta’ng mohlaleng oa moprofeta Jonase? (Sheba setšoantšo )

¹¹ Ithute liphosong tsa hao ’me u itumelle hore Jehova a u sebelise. U hopole mohlala oa Jonase, eitse ha Molimo a mo roma Ninive a baleha. Jehova o ile a mo khalemela eaba Jonase o ithuta phosong eo ea hae. (Jon. 1:​1-4, 15-17; 2:​7-10) Ka mor’a moo, Jehova o ile a nka Jonase e ntse e le moprofeta oa hae, a mo fa monyetla o mong hape oa ho ea Ninive eaba lekhetlong lena Jonase oa mamela. Le hoja Jonase a ne a ikoahlaela phoso eo a e entseng, ha aa ka a itumella hore boikutlo boo bo mo sitise ho amohela mosebetsi oo Jehova a mo fang ona.—Jon. 3:​1-3.

JEHOVA O RE TŠELISA KA MOEA O HALALELANG

12. Jehova o re tšelisa joang ha re hlahetsoe ke lintho tse bohloko? (Bafilipi 4:​6, 7)

¹² Ha re hlaheloa ke lintho tse bohloko Jehova o re tšelisa ka moea oa hae o halalelang. Nahana ka mohlala oa Ron le Carol. Ka bomalimabe mora oa bona o ile a ipolaea, ha ba bua ka bothata bona ba re: “Re kile ra hlaheloa ke mathata empa ha re e-s’o kopane le bo tšoanang le bona. Matsatsing ao re neng re sa khone ho robala, re ne re rapela Jehova ’me re ne re fumana khotso eo ho buuoang ka eona ho Bafilipi 4:​6, 7.” (E bale.) Haeba pelo ea hao e utloisitsoe bohloko ke mathata ao u nang le ’ona, phetlela Jehova sefuba u bue le eena neng le neng ha u batla. (Pes. 86:3; 88:1) U mo kope hore a u fe moea o halalelang khafetsa. Le ka mohla a ke ke a iphapanyetsa uena!—Luka 11:​9-13.

13. Moea o halalelang o ka re thusa joang hore re tsoele pele re sebeletsa Jehova ka botšepehi? (Baefese 3:16)

¹³ Na u ikutloa u se na matla ka lebaka la bothata bo boima boo u ileng oa sebetsana le bona nakong e fetileng? Moea o halalelang o ka u matlafatsa hore u ’ne u tsoele pele ho sebeletsa Jehova ka botšepehi. (Bala Baefese 3:16.) Nahana ka se ileng sa etsahalla morali oa bo rona Flora. Eena le molekane oa hae e ne e le baromuoa. Molekane oa hae ha aa ka a mo tšepahalla ’me ba ile ba hlalana. O re: “Ke ne ke utloile bohloko hoo ke neng ke lula ke nahana ka ho se tšepahale ha molekane oa ka bosiu le motšehare. Ke ile ka kopa Jehova hore a mphe matla a ho mamella. Jehova o ile a nthusa hore ke amohele ’me ke ile ka fola, e leng ntho eo ke neng ke sa nahane hore e ka etsahala.” Ka lebaka lena Flora o kholisehile le ho feta hore Jehova o tla mo thusa mathateng a hae. O re: “Ke ile ka bona ha mantsoe a ho Pesaleme ea 119:32 a phethahala ho ’na, a reng: ‘Ke tla latela litaelo tsa hao ka pelo ea ka eohle hobane u nthusa hore ke li utloisise.’”

14. Ke eng seo u ka se etsang ho lumella moea o halalelang hore o u thuse?

¹⁴ Ka mor’a hore u kope Jehova hore a u fe moea oa hae o halalelang, ke’ng seo u lokelang ho se etsa? Etsa lintho tse tla etsa hore moea o halalelang o u thuse. Lintho tseo li akareletsa ho ba teng libokeng le ho bua le batho ba bang ka Bibele. Bala Lentsoe la Molimo kamehla e le hore u lule u nahana ka lintho tse hloekileng. (Bafil. 4:​8, 9) Ha u ntse u bala Bibele, ela hloko mehlala ea batho ba ileng ba kopana le mathata ’me u nahanisise ka tsela eo Jehova a ileng a ba thusa hore ba mamelle. Sandra eo ho builoeng ka eena qalong, o ile a thulana le mathata a mangata. O re: “Pale ea bophelo ba Josefa e  a ’matlafatsa, ha aa ka a lumella hore mathata a ileng a mo hlahela a ame setsoalle sa hae le Jehova.”—Gen. 39:​21-23.

JEHOVA O SEBELISA BAKRESTE-’MOHO LE RONA HO RE TŠELISA

15. Re ka fumana matšeliso ho bo-mang, hona ba ka re thusa joang? (Sheba setšoantšo.)

¹⁵ Ha re e-na le mathata, Bakreste-’moho le rona ‘ba ka re tšelisa haholo.’ (Bakol. 4:11) Jehova oa re bontša hore oa re rata ka ho re fa bara le barali ba bo rona. Ba ka re tšelisa ka ho re mamela le ho ba le rona ha re hlaheloa ke mathata. Ba ka re balla temana ea Bibele e khothatsang kapa ba rapela le rona. d (Bar. 15:4) Ka linako tse ling mora kapa morali oa bo rona a ka re hopotsa hore na Jehova o ikutloa joang ka mathata a re hlahelang ’me sena se ka re thusa hore re khone ho mamella. Bakreste-’moho le rona ba ka boela ba re thusa ka litsela tse ling joaloka ho re tlisetsa lijo nakong eo re nang le mathata.

16. U lokela ho etsa’ng e le hore batho ba bang ba u thuse?

¹⁶ Ka linako tse ling e le hore re fumane matšeliso, ho ka hlokahala hore re kope thuso. Le hoja bara le barali ba bo rona ba re rata ebile ba batla ho re thusa, ka linako tse ling ba ka se tsebe hore na re ikutloa joang le hore na re hloka eng. (Liprov. 17:17; 14:10) Ha u utloile bohloko bua le metsoalle ea hao e haufi u ba hlalosetse hore na ba ka u thusa joang. U  ka ’na oa khetha ho bua le moholo a le mong kapa ba babeli bao u tla phutholoha ha u na le bona. Ka linako tse ling barali ba bo rona ba ee ba ikutloe ba sireletsehile ha ba buile le barali ba bo rona ba bang.

17. Ke’ng e ka etsang hore u se ke oa batla ho ba le bara le barali ba bo rona, hona ke’ng e ka u thusang ho hlola bothata boo?

¹⁷ Itloaetse ho qeta nako u na le bara le barali ba bo rona. Ho ka etsahala hore maemong a mang ha u utloile bohloko, u batle ho ba moo u leng mong. Ho ka boela ha etsahala hore bara le barali ba bo rona ba se ke ba u utloisisa kapa ba bue ntho e u utloisang bohloko. (Jak. 3:2) Leha ho le joalo, kaha Jehova a ka ba sebelisa ho u khothatsa, leka ho ba haufi le bona. Mor’abo rona e mong oa moholo ea bitsoang Gavin ea nang le khatello ea maikutlo o re: “Ka linako tse ling ha ke batle ho bua le batho.” Empa maemong a mangata mor’abo rona enoa o lula a na le batho ebile ke eona ntho e mo thusang. Morali oa bo rona Amy eena o re: “Ka lebaka la lintho tse nketsahaletseng bophelong, ha ho bonolo hore ke tšepe batho empa ke ntse ke ithuta ho etsisa Jehova ka hore ke rate batho le hore ke ba tšepe. Kea thaba ha ke etsa joalo ebile kea tseba Jehova le eena oa thaba.”

HO TŠEPA JEHOVA HO KA RE TŠELISA

18. Ke’ng seo re se lebeletseng ka moso ’me re ka etsa’ng hona joale?

¹⁸ Kaha rea tseba hore Jehova o tl’o re folisa ’meleng le maikutlong, re ka lula re na le tšepo ea hore ho tla loka. (Tšen. 21:​3, 4) Ka nako eo re ‘ke ke ra hlola re hopola’ lintho tse re utloisitseng bohloko. (Esa. 65:17) Re se re ithutile hore le hona joale “Jehova o tlamisa maqeba” a rona. Kahoo, u fe Jehova monyetla oa hore a u folise a be a u tšelise. U lule u kholisehile hore “oa u tsotella!”—1 Pet. 5:7.