1. Petrose o ile a ikutloa joang ka mor’a hore Jesu a mo thuse ka mohlolo hore a tšoase litlhapi tse ngata?

 PETROSE o ne a qetile bosiu bohle a ntse a tšoasa litlhapi empa o ne a sa fumane letho. Jesu o ile a tla ho eena a re: “Se hulele moo ho tebileng ebe le theolela matlooa tlase hore le tšoase litlhapi.” (Luka 5:4) Petrose o ne a sa batle ho theolela letlooa la hae ka metsing, a nahana hore o ntse a sa tl’o fumana letho. Empa o ile a le lahlela eaba le tla le litlhapi tse ngata tse ileng tsa tabola letlooa la hae. Ha Petrose le bao a neng a sebetsa le bona ba hlokomela mohlolo oo o qetang ho etsahala, ba ile ba ‘makala haholo’ eaba Petrose o re ho Jesu: “Morena, tloha ho ’na hobane ke moetsalibe.” (Luka 5:​6-9) Ho bonahala eka Petrose o ne a ikutloa a sa tšoanelehe hore a ka ba le Jesu.

2. Ho ithuta pale ea Petrose ho ka re thusa joang?

² Petrose o ne a nepile. E ne e le “moetsalibe.” Le Mangolo aa bontša hore ka linako tse ling o ne a bua ebile a etsa lintho tseo a neng a ikoahlaela tsona. Mohlomong le uena u ee u ikutloe joaloka Petrose. Na ho na le phoso eo u e etsang hangata kapa bofokoli boo u ntseng u loantšana le bona? Haeba ho joalo, mohlala oa Petrose o ka u thusa. Ka tsela efe? Jehova a ka be a entse hore liphoso tsa Petrose li se ke tsa ngoloa ka Bibeleng. Empa o entse hore li ngoloe e le hore re ka ithuta mohlaleng oa hae. (2 Tim. 3:​16, 17) Ho ithuta ka monna enoa ea neng a etsa liphoso joaloka rona ho tla re thusa ho bona hore Jehova ha aa lebella hore re se ke ra etsa liphoso. O batla hore re tsoele pele re mo sebeletsa ho sa tsotellehe hore na re mo fosetsa hakae.

3. Ke hobane’ng ha re lokela ho lula re leka ho etsa lintho tse nepahetseng?

³ Ke hobane’ng ha re lokela ho lula re leka ho etsa lintho tse nepahetseng? Lebaka ke hobane re khona ho etsa ntho hantle  haeba re e etsa ka makhetlo a mangata. Ka mohlala, motho a ka nka lilemo tse ngata a ithuta ho letsa seletsa se itseng sa ’mino. Qalong a ka ’na a etsa liphoso tse ngata empa ha a ntse a tsoela pele a ithuta, o qetella a se a tseba ho se letsa hantle. O tla ’ne a etse liphoso ka linako tse ling le hoja a tseba ho letsa seletsa seo hantle. Leha ho le joalo, liphoso tseo ha li mo nyahamise empa o tsoela pele a se letsa e le hore a ka ntlafatsa bokhoni ba hae. Ka tsela e tšoanang, re ka hlola bothata bo itseng boo re nang le bona empa re ka iphumana re entse phoso e tšoanang hape. Leha ho le joalo, ha re nyahame empa re leka kahohle ho hlola bothata boo. Ka linako tse ling re bua le ho etsa lintho tseo hamorao re ikoahlaelang tsona empa Jehova o tla re thusa hore re ntlafatse haeba re sa nyahame empa re lula re leka ho etsa lintho tse nepahetseng. (1 Pet. 5:10) A re ke re hlahlobeng mohlala oa Petrose oa ho se nyahamisoe ke liphoso tsa hae. Ho nahana kamoo Jesu a ileng a utloela Petrose bohloko kateng le hoja a ne a etsa liphoso, ho ka re thusa hore re se ke ra nyahamisoa ke liphoso tsa rona ha re ntse re sebeletsa Jehova.

4. Petrose o itlhalosa e le motho ea joang ho Luka 5:​5-10 empa Jesu o ile a re’ng ha a mo khothatsa?

⁴ Bibele ha e bolele hore na ke hobane’ng ha Petrose a ne a re ke “moetsalibe” le hore na o ne a nahanne ka libe life. (Bala Luka 5:​5-10.) Ho ka etsahala hore ho ne ho e-na le liphoso tse kholo tseo a ileng a li etsa. Jesu o ile a hlokomela hore Petrose o tšohile e leng boikutlo boo e ka ’nang eaba bo ne bo bakoa ke ho ikhalala. Jesu o ne a boetse a tseba hore Petrose a ka khona ho lula a tšepahala. Ke kahoo Jesu a ileng a re ho eena: “U se ke oa tšoha.” Petrose o ile a khothatsoa ke ho hlokomela hore Jesu oa mo tšepa. Petrose le ngoan’abo Andrease ba ile ba qetella ba tlohetse khoebo ea bona ea ho tšoasa litlhapi ’me ea e-ba balateli ba Mesia e leng qeto e ileng ea etsa hore Jehova a ba hlohonolofatse haholo.—Mar. 1:​16-18.

5. Petrose o ile a hlohonolofatsoa joang ka hore ebe o ile a khaotsa ho tšoha ’me ea e-ba molateli oa Jesu?

⁵ Petrose o ile a ba le monyetla oa ho bona lintho tse ngata tseo Jesu a ileng a li etsa kaha e ne e se e le molateli oa hae. O ile a bona ha a folisa batho, a leleka bademona le ha a ne a tsosa bafu. b (Mat. 8:​14-17; Mar. 5:​37, 41, 42) Petrose o ile a boela a bona pono ea se neng se tla etsahala nakong e tlang ha Jesu e se e le Morena oa ’Muso oa Molimo. (Mar. 9:​1-8; 2 Pet. 1:​16-18) Petrose o ile a bona lintho tseo ho hang a neng a sa nahana hore o tla ke a li bone.  E tlameha ebe Petrose o ile a thaba haholo hore ebe ha aa ka a lumella hore maikutlo ao a neng a e-na le ’ona ka liphoso tsa hae a etse hore a fetoe ke litlhohonolofatso tsena.

6. Na Petrose o ile a khaotsa ho etsa liphoso? Hlalosa.

⁶ Petrose o ile a ’na a etsa liphoso ho sa tsotellehe lintho tsohle tseo a ileng a utloa Jesu a li bua le ho bona a li etsa. Nahana ka liketsahalo tse latelang. Ha Jesu a ne a hlalosa hore o tl’o hlorisoa a be a shoe ho phethahatsa boprofeta bo ka Bibeleng, Petrose o ile a mo khalemela. (Mar. 8:​31-33) Petrose le baapostola ba bang ba ne ba lula ba ngangisana ka hore na ke mang e moholo har’a bona. (Mar. 9:​33, 34) Bosiung ba ho qetela pele Jesu a bolaoa, Petrose o ile a hlasela monna e mong a ba a mo khaola tsebe. (Joh. 18:10) Bosiung bona boo, o ile a tšoha ’me a latola hore o tseba motsoalle oa hae Jesu ka makhetlo a mararo. (Mar. 14:​66-72) Ntho eo e ile ea etsa hore Petrose a lle habohloko.—Mat. 26:75.

7. Ka mor’a hore Jesu a tsosoe bafung, o ile a fa Petrose monyetla ofe?

⁷ Jesu ha aa ka a lahla moapostola enoa oa hae ea neng a nyahame. Ka mor’a hore Jesu a tsosoe bafung, o ile a fa Petrose monyetla oa hore a bontše hore o ntse a mo rata. Jesu o ile a mo fa mosebetsi oa hore a hlokomele linku tsa hae. (Joh. 21:​15-17) Petrose o ile a amohela mosebetsi oo. Petrose o ile a ba har’a batho ba pele ba ileng ba tlotsoa ka moea o halalelang ha a ne a le Jerusalema ka letsatsi la Pentekonta.

8. Ke phoso efe e kholo eo Petrose a ileng a e etsa ha a le Antioke?

⁸ Petrose o ne a ntse a etsa liphoso le ka mor’a hore a tlotsoe ka moea o halalelang. Ka selemo sa 36 o ne a le teng ha Korneliase oa Molichaba ea neng a sa bolla a tlotsoa ka moea o halalelang. Ketsahalo eo e ne e bontša hore “Molimo ha a leeme” le hore Balichaba ba ne ba ka khona ho ba litho tsa phutheho ea Bokreste. (Lik. 10:​34, 44, 45) Ka mor’a ketsahalo eo, Petrose o ile a ikutloa a lokolohile hore a ka ja le Balichaba e leng ntho eo a neng a ke ke a e etsa pele ho moo. (Bagal. 2:12) Leha ho le joalo, Bakreste ba bang ba Bajuda ba ne ba re Bajuda le Balichaba ha baa lokela ho ja hammoho. Ha Bajuda ba bang ba Bakreste ba fihla Antioke, Petrose o ile a khaotsa ho ja le bana babo ba Balichaba, mohlomong hobane a ne a tšaba ho khopisa Bakreste bao ba Bajuda. Ha moapostola Pauluse a bona ketso ena e bontšang boikaketsi, o ile a mo khalemela ka pel’a batho ba bang. (Bagal. 2:​13, 14) Petrose ha aa ka a nyahamisoa ke phoso eo. Ke eng e mo thusitseng?

9. Lengolo la Johanne 6:​68, 69, le bontša joang hore Petrose o ne a tšepahala?

⁹ Petrose o ne a tšepahalla Jesu. Ha aa ka a lumella letho ho mo sitisa hore a lule a latela Jesu. O ile a bontša hore o tšepahalla Jesu nakong eo a neng a bua ntho eo barutuoa ba bang ba neng ba sa e utloisise. (Bala Johanne 6:​68, 69.) Barutuoa ba bangata ba ile ba khaotsa ho latela Jesu ba sa mo botsa le ho mo botsa hore na o ne a bolela’ng. Petrose eena ha aa ka a khaotsa ho mo latela. O ile a hlokomela hore ke Jesu feela ea nang le ‘mantsoe a fanang ka bophelo bo sa feleng.’

10. Jesu o ile a bontša joang hore o tšepa Petrose? (Sheba setšoantšo.)

¹⁰ Jesu ha aa ka a lahla Petrose. Jesu o ne a tseba hore Petrose le baapostola ba bang ba hae ba ne ba tl’o mo lahla bosiung ba ho qetela pele a bolaoa. Leha ho le joalo, o ile a bolella Petrose hore ka mor’a hore a mo lahle, o ne a tla khutla ’me a tsoele pele a tšepahala. (Luka 22:​31, 32) Jesu o ne a utloisisa hore “pelo e na le tabatabelo empa nama ea fokola.” (Mar. 14:38) Kahoo, le ka mor’a hore Petrose a latole hore o tseba Jesu, Jesu ha aa ka a mo lahla. Ka mor’a hore a tsosoe bafung, o ile a hlaha ho Petrose  moo a neng a le mong. (Mar. 16:7; Luka 24:34; 1 Bakor. 15:5) E tlameha ebe ntho eo e ile ea khothatsa Petrose haholo nakong eo a neng a nyahame.

11. Jesu o ile a kholisa Petrose joang hore Jehova o tla mo hlokomela?

¹¹ Jesu o ile a kholisa Petrose hore Jehova o tla mo hlokomela. Ka mor’a hore Jesu a tsosoe bafung, o ile a etsetsa Petrose le baapostola ba hae mohlolo o mong hape oa ho tšoasa litlhapi. (Joh. 21:​4-6) Mohlolo oo o ile oa kholisa Petrose hore Jehova a ka khona ho mo hlokomela. Mohlomong moapostola eo o ile a hopola mantsoe a Jesu ha a ne a re Jehova o tla hlokomela ba etsang hore “’Muso oa Molimo” e be ntho e tlang pele bophelong ba bona. (Mat. 6:33) Ka lebaka leo, Petrose o ile a etsa hore mosebetsi oa boboleli e be oona o tlang pele, eseng khoebo ea hae ea ho tšoasa litlhapi. O ile a bolela litaba tse monate ka sebete ka letsatsi la Pentekonta ka selemo sa 33 ’me a thusa batho ba bangata hore e be barutuoa. (Lik. 2:​14, 37-41) Ka mor’a moo, o ile a thusa le Basamaria le Balichaba hore e be balateli ba Kreste. (Lik. 8:​14-17; 10:​44-48) Kannete Jehova o ile a sebelisa Petrose haholo ho thusa batho ba mefuta eohle hore ba tle ka phuthehong.

12. Re nahanne ka mohlala oa Petrose, re lokela ho hopola eng haeba re lula re etsa liphoso tse tšoanang?

¹² Jehova a ka re thusa hore re tsoele pele re mo sebeletsa. Ho ka ba thata hore re tsoele pele re sebeletsa Jehova, haholo haeba re lula re etsa phoso e tšoanang. Ka linako tse ling bothata boo re nang le bona bo ka bonahala bo le boima ho feta boo Petrose a neng a e-na le bona. Empa Jehova a ka re thusa hore re se ke ra lula re nyahame. (Pes. 94:​17-19) Ka mohlala, mor’abo rona e mong o ne a ratana le banna ba bang ka lilemo tse ngata pele e e-ba Paki ea Jehova. Ka mor’a hore a hlokomele hore tsela eo a phelang ka eona e fosahetse, o ile a etsa qeto ea ho fetoha. Leha ho le joalo, o ntse a loantšana le litakatso tseo tse fosahetseng. Ke’ng e ileng ea mo thusa hore a se ke a nyahama? O re: “Jehova ke eena ea re thusang. O sebelisa moea oa hae o halalelang ho nthusa hore ke phele ka tsela eo a e batlang. Jehova o ntse a mpha monyetla oa hore ke sebelisoe ka phuthehong ebile o mpha matla a hore ke tsoele pele ke mo sebeletsa ho sa tsotellehe bothata bona boo ke ntseng ke loantšana le bona.”

13. Ho latela se tlalehiloeng ho Liketso 4:​13, 29, 31, re ka etsisa mohlala oa Petrose joang? (Sheba setšoantšo.)

¹³ Re se re bone hore Petrose o ile a pheta phoso e tšoanang ka makhetlo hobane a ne a  tšaba batho. Empa o ile a rapella ho ba sebete ’me Jehova a mo thusa. (Bala Liketso 4:​13, 29, 31.) Le rona Jehova a ka re thusa hore re be sebete. Nahana ka mohlala oa Mor’abo rona Horst ea neng a lula Jeremane nakong ea puso ea Manazi. Ha e ntse e le mocha, ka makhetlo o ne a lumelisa batho a re “Hitler o tla re pholosa!” le hoja a ne a tseba hore ho fosahetse ho cho joalo hobane a ne a tšaba matichere le bana bao a neng a kena sekolo le bona. Ho e-na le hore batsoali ba hae ba mo halefele, ba ile ba rapela le eena ba kopa Jehova hore a mo fe sebete. Ka mor’a nako Mor’abo rona Horst o ile a ba sebete hobane batsoali ba hae ba ile ba mo thusa ebile a tšepile Jehova. O re: “Jehova o ile a lula a nthusa.” c

14. Baholo ba ka khothatsa batho ba nyahameng joang?

¹⁴ Jehova le Jesu ba ke ke ba re qhalla matsoho empa ba tla lula ba re thusa. Petrose o ne a lokela ho etsa qeto ea bohlokoa ka ho fetisisa bophelong ba hae ka mor’a hore a latole hore o tseba Kreste. Na o ne a tla tsoela pele e le morutuoa oa Kreste kapa o ne a tla tlohela? Jesu o ne a ile a rapella Petrose hore Jehova a mo thuse hore a lule a e-na le tumelo. Jesu o ile a bolella Petrose hore o mo rapeletse ’me a mo kholisa hore oa mo tšepa le hore hamorao o ne a tla khona ho matlafatsa le ho khothatsa Bakreste-’moho le eena. (Luka 22:​31, 32) E tlameha ebe Petrose o ile a khothala haholo ha a hopola mantsoe ao a Jesu. Le rona ha re tlameha ho etsa liqeto tsa bohlokoa bophelong ba rona, Jehova a ka sebelisa baholo hore ba re khothatse le ho re thusa ho bona hore re ka khona ho lula re tšepahala. (Baef. 4:​8, 11) Mor’abo rona Paul ea seng a qetile lilemo tse ngata e le moholo, o leka kahohle ho thusa Bakreste-’moho le eena ka tsela ena. Ha a kopana le Bakreste-’moho ba nyahameng, oa ba hopotsa hore Jehova o ba tlisitse ka phuthehong  hobane a ba rata le hore a ke ke a ba lahla. O re o bone ha Jehova a thusa batho ba bangata ba neng ba nyahame hore ba boele ba mo sebeletse.

15. Mohlala oa Petrose le oa Mor’abo rona Horst o re thusa joang ho bona hore mantsoe a hlahang ho Matheu 6:33 ke ’nete?

¹⁵ Jehova o ile a fa Petrose le baapostola ba bang lintho tseo ba neng ba li hloka. Re ka kholiseha hore le rona haeba re etsa hore ho sebeletsa Jehova e be eona ntho e tlang pele bophelong ba rona, o tla re fa lintho tseo re li hlokang. (Mat. 6:33) Mor’abo rona Horst eo re buileng ka eena pejana o ne a batla ho ba pula-maliboho ka mor’a Ntoa ea Bobeli ea Lefatše empa o ne a futsanehile. O ne a se na tšepo ea hore o tla fumana mosebetsi o tla mo lumella hore e ’ne e be pula-maliboho. O ile a etsa’ng? Mor’abo rona Horst o ne a batla ho bona hore na Jehova o tla mo hlokomela. Kahoo, o ile a etsa qeto ea ho ea tšimong beke kaofela nakong eo molebeli oa potoloho a neng a etetse phutheho ea bona. Ha beke eo e fela, o ile a makala ha molebeli oa potoloho a mo fa enfelopo eo a neng a sa tsebe hore na e tsoa ho mang. Enfelopo eo e ne e e-na le chelete e neng e tla mo thusa haholo hoo a neng a ke ke a hloka hore a sebetse ka likhoeli tse ngata. Mpho eo e ile ea etsa hore Mor’abo rona Horst a bone hore Jehova o tla mo hlokomela. Kahoo, o ile a qeta bophelo bohle ba hae a nka ho sebeletsa Jehova e le eona ntho e tlang pele bophelong ba hae.—Mal. 3:10.

16. Mohlala oa Petrose le lintho tseo a li ngotseng li ka re thusa joang?

¹⁶ E tlameha ebe Petrose o ile a thaba haholo hore ebe Jesu ha aa ka a tloha ho eena joalokaha Petrose a ne a kopile. Kreste o ile a tsoela pele ho koetlisa Petrose hore e be moapostola ea tšepahalang eo hape e leng mohlala le ho Bakreste ba bang. Koetliso eo ea Petrose e tlalehiloeng ka Bibeleng e re tsoela molemo kaofela. Mangolong a hae a mabeli ao a ileng a a romela liphutheho tsa mehleng ea baapostola, Petrose o bua ka lintho tseo a ithutileng tsona ho Jesu. Sehloohong se latelang re tla bua ka tse ling tsa lintho tse hlahang mangolong ana a Petrose tse ka re thusang mehleng ena.