1. Nakoana pele moapostola Petrose a hlokahala, Jehova o ile a mo susumeletsa hore a etse’ng?

 MOAPOSTOLA Petrose o ne a tseba hore haufinyane o ne a tl’o hlokahala. O ile a sebeletsa Jehova ka botšepehi ka lilemo tse ngata a sebetsa le Jesu ’me a bolella batho bao e neng e se Bajuda litaba tse monate tsa ’Muso oa Molimo. Petrose o ile a boela a ba setho sa sehlopha se busang. Hoo e ka bang ka selemo sa 62 ho ea ho 64 mehleng ea baapostola, Molimo o ile a mo susumeletsa hore a ngole mangolo a mabeli a Bibele e leng Petrose oa pele le Petrose oa bobeli. O ne a e-na le tšepo ea hore mangolo ana a ne a tla thusa Bakreste ka mor’a hore a hlokahale.—2 Pet. 1:​12-15.

2. Ke hobane’ng ha Bakreste-’moho le Petrose ba ne ba hloka mangolo ao a a ngotseng?

² Petrose o ngotse mangolo a hae nakong eo Bakreste-’moho le eena ba neng ba “utloisoa bohloko ke liteko tse fapaneng.” (1 Pet. 1:6) Batho ba khopo ba ne ba leka ho tlisa lithuto tse fosahetseng le boitšoaro bo bobe ka phuthehong ea Bokreste. (2 Pet. 2:​1, 2, 14) Bakreste ba neng ba lula Jerusalema ba ne ba tla bona “qetello ea lintho tsohle” e leng nakong eo motse oa Jerusalema le tempele ea oona li neng li tla felisoa ke masole a Roma. (1 Pet. 4:7) Mangolo a Petrose a ile a thusa Bakreste hore ba lule ba tšepahala le hoja ba ne ba e-na le mathata le hore ba itokisetse mathata a neng a tla ba hlahela nakong e tlang. b

3. Ke hobane’ng ha re lokela ho bala mangolo ao Petrose a a ngotseng?

 ³ Le hoja Petrose a ne a ngoletse Bakreste ba mehleng ea pele, Jehova o ile a etsa hore mangolo ao e be karolo ea mangolo a Bibele e le hore re ka rua molemo ho ’ona. (Bar. 15:4) Kaha re phela lefatšeng le khothaletsang boitšoaro bo bobe, le rona re hlaheloa ke mathata a ka etsang hore ho be thata ho sebeletsa Jehova. Haufinyane re tla hlaheloa ke matšoenyeho a fetang a ileng a hlahela Bakreste ba mehleng ea pele ha Jerusalema le tempele ea eona e felisoa. Re fumana likhopotso tsa bohlokoa mangolong ao a mabeli a Petrose. Likhopotso tsena li re hopotsa hore re lule re lebeletse letsatsi la Jehova, re se ke ra tšaba batho le hore re tsoele pele re ratana haholo. Likhopotso tsena li ka boela tsa thusa baholo hore ba thuse bara le barali ba bo rona hore ba lule ba e-na le kamano e ntle le Jehova.

4. Lengolo la 2 Petrose 3:​3, 4, le bontša hore ke’ng e ka etsang hore tumelo ea rona e fokole?

⁴ Re phela le batho ba sa lumeleng hore boprofeta ba Bibele ke ’nete. Bahanyetsi ba ka ’na ba re soma hobane haesale re ntse re re bofelo bo haufi. Batho ba bang ba re ha ho mohla bofelo bo tla fihla. (Bala 2 Petrose 3:​3, 4.) Tumelo ea rona e ka ’na ea fokola haeba re utloa motho eo re mo bolellang molaetsa oa Bibele ebang ke mosebetsi-’moho kapa e mong oa lelapa a cho joalo. Petrose oa re hlalosetsa hore na re ka thusoa ke’ng.

5. Ke’ng e ka re thusang hore re letele hore lefatše lena le khopo le felisoe? (2 Petrose 3:​8, 9)

⁵ Batho ba bang ba ka bona eka Jehova o lieha ho felisa lefatše lena le khopo empa mantsoe a Petrose a ka re thusa hobane a re hopotsa hore Jehova ha a shebe nako joaloka rona batho. (Bala 2 Petrose 3:​8, 9.) Lilemo tse sekete li tšoana le letsatsi le le leng ho eena. Jehova o na le mamello ebile ha a batle hore motho leha e le ofe a felisoe. Ha letsatsi la hae le fihla, joang kapa joang lefatše lena le tla felisoa. Re na le monyetla o babatsehang oa hore re sebelise nako e setseng ho bolella batho bohle molaetsa oa Bibele.

6. Re ka etsa’ng e le hore re ‘lule re hopola’ letsatsi la Jehova? (2 Petrose 3:​11, 12)

⁶ Petrose o re khothaletsa hore re ‘lule re hopola’ letsatsi la Jehova. (Bala 2 Petrose 3:​11, 12.) Re ka etsa seo joang? Letsatsi le letsatsi re ka leka ho nahana ka hore na bophelo bo tla be bo le monate hakae lefatšeng le lecha. Ipone u hema moea o hloekileng, u ja lijo tse nang le phepo, u amohela ba lelapa le metsoalle ea hao e tla beng e tsositsoe ebile u ruta batho ba phetseng mehleng ea khale ka tsela eo boprofeta ba Bibele bo phethahetseng ka eona. Ho nahana ka lintho tsena ho tla u thusa hore u lule u lebeletse letsatsi la Jehova ebile ho tla etsa hore u kholisehe hore bofelo bo haufi. Re ke ke ra khelosoa ke lithuto tsa leshano kaha ‘re tsebile lintho tsena esale pele’ ka bokamoso ba rona.—2 Pet. 3:17.

7. Ho tšaba batho ho ka re ama joang?

⁷ Ho lula re nahana ka letsatsi la Jehova ho re susumeletsa hore re bolelle batho ba bang litaba tse monate tse tsoang ka Bibeleng. Ka linako tse ling re ka tšaba ho ba bolella litaba tsena. Hobane’ng? Lebaka ke hobane re ka ’na ra tšaba batho. Petrose le eena o ile a tšaba batho. Ha ho ne ho tšoeroe nyeoe ea Jesu bosiung bo bong, Petrose o ile a tšaba ho bua hore ke e mong oa barutuoa ba Jesu ’me o ile a hana ka makhetlo hore oa mo tseba.  (Mat. 26:​69-75) Leha ho le joalo, hamorao Petrose ha aa ka a hlola a tšaba batho, ke kahoo a ileng a re: “Le se ke la tšaba lintho tseo ba li tšabang kapa tsa le ferekanya.” (1 Pet. 3:14) Mantsoe a Petrose a etsa hore re kholisehe hore le rona re ka khaotsa ho tšaba batho.

8. Ke’ng e ka re thusang hore re se ke ra tšaba batho? (1 Petrose 3:15)

⁸ Re ka thusoa ke’ng hore re se ke ra tšaba batho? Petrose o ile a re: “Le lumele ka lipelong tsa lona hore Kreste ke Morena le hore oa halalela.” (Bala 1 Petrose 3:15.) Taba ena e akareletsa ho nahana ka matla ao Morena oa rona Kreste Jesu a nang le ’ona. Haeba u tšoha ha ho hlaha monyetla oa hore u bolelle batho litaba tse monate, hopola Morena oa rona. Ak’u nahane ka eena a busa leholimong ’me a pota-potiloe ke mangeloi a mangata. Hopola hore o “filoe matla holim’a ntho e ’ngoe le e ’ngoe e leholimong le lefatšeng” le hore o tla ba le uena “ka matsatsi ’ohle ho fihlela lefatše le fela.” (Mat. 28:​18-20) Petrose o re khothaletsa hore re lule re “itokiselitse” ho buella lintho tseo re li lumelang. Na u ka rata ho bolella motho litaba tse monate ha u le mosebetsing, ha u le sekolong kapa sebakeng se seng? Nahana ka hore na u tla khona ho etsa joalo neng ebe u lokisetsa esale pele hore na u tla re’ng. Kopa Jehova hore a u fe sebete ’me u tšepe hore o tla u thusa hore u se ke oa tšaba batho.—Lik. 4:29.

9. Petrose o ile a hloleha joang ho bontša lerato? (Sheba setšoantšo.)

⁹ Petrose o ile a ithuta ho bontša lerato. O ne a le teng ha Jesu a ne a re: “Ke le fa taelo e ncha ea hore le ratane. Le ratane feela joalokaha ke le ratile.” (Joh. 13:34) Leha ho le joalo, hamorao Petrose o ile a hana ho ja le Bakreste bao e neng e se Bajuda hobane o ne a tšaba Bakreste ba Bajuda. Moapostola Pauluse o ile a re ntho eo Petrose a e entseng ke boikaketsi. (Bagal. 2:​11-14) Petrose o ile a mamela khalemelo eo ea Pauluse a ba a ithuta ho eona. Mangolong a hae ka bobeli o re khothaletsa hore re se ke ra bua feela hore re rata Bakreste-’moho le rona empa re ba bontše lerato leo ka liketso.

10. Ke’ng e ka re thusang hore re ‘ratane e le kannete’? (1 Petrose 1:22)

¹⁰ Petrose o ile a re re lokela ho “ratana e le kannete.” (Bala 1 Petrose 1:22.) Re tla rata Bakreste-’moho le rona e le kannete ha re ‘mamela lentsoe la Molimo.’ Lentsoe la Molimo le bontša hore “Molimo ha a leeme.” (Lik. 10:​34, 35) Re ke ke ra khona ho mamela taelo ea Jesu ea hore re ratane haeba re rata batho ba itseng feela ka phuthehong. Ke ’nete hore joaloka Jesu re ka ’na ra tloaela batho ba itseng haholo ho feta ba bang. (Joh. 13:23; 20:2) Empa Petrose o re hopotsa hore re lokela ho ‘rata bana ba bo rona kaofela’ hobane re lelapa.—1 Pet. 2:17.

11. Ho ‘ratana ka pelo eohle’ ho bolela’ng?

¹¹ Petrose o ile a re khothaletsa hore re ‘ratane ka pelo eohle.’ Mantsoe ana a bolela hore re lokela ho rata batho ba bang le hoja ho ka ba thata ho etsa joalo. Ka mohlala, re ka etsa’ng haeba Mokreste-’moho le rona a bua kapa a etsa ntho e re utloisang bohloko? Le rona re ka ’na ra batla ho mo utloisa bohloko. Petrose o ile a ithuta ho Jesu hore ho etsa joalo ha ho thabise Molimo. (Joh. 18:​10, 11) Petrose o ile a re: “Le se ke la etsa ba bang hampe hobane ba le entse hampe kapa la ba rohaka hobane ba le rohakile. Ho e-na le ho etsa joalo, le ba etsetse lintho tse molemo.” (1 Pet. 3:9) Haeba u rata Bakreste-’moho le uena haholo, u tla ba bontša mosa u be u ba nahanele le haeba ba ka etsa kapa ba bua lintho tse u utloisang bohloko.

12. (a) Ho rata Bakreste-’moho haholo ho tla re thusa hore re etse’ng? (b) U ikemiselitse ho etsa’ng ka mor’a hore u shebelle video ea Boloka Mpho e Babatsehang ea Bonngoe?

¹² Lengolong la hae la pele, Petrose o ile a re ha re ‘ratana haholo’ re ke ke ra tšoarelana ka makhetlo a ’maloa feela empa re tla lula re “itokiselitse ho tšoarela.” (1 Pet. 4:8) Mohlomong Petrose o ile a hopola tsela eo Jesu a ileng a mo ruta hore a tšoarele batho ba bang ka eona lilemo tse ’maloa pele ho moo. Ka nako eo, ho ka etsahala hore Petrose o ne a nahana hore o mosa ha a ne a re o ne a ka tšoarela ngoan’abo ka “makhetlo a supileng.” Leha ho le joalo, Jesu o ile a mo ruta hore a tšoarele ka “makhetlo a 77” ’me le rona re lokela ho etsa joalo. (Mat. 18:​21, 22) Taba ena e bolela hore re lokela ho lula re tšoarela batho ba bang. U se ke oa nyahama haeba u utloa ho le thata hore u mamele taelo ena. Bahlanka ba Jehova ha baa phethahala ’me ka linako tse ling ba thatafalloa ke ho tšoarela batho ba bang. Ntho ea bohlokoa hona joale ke hore u tšoarele batho ba bang le hore u etse khotso le bona. c

13. Ke’ng e ka etsang hore ho be thata hore baholo ba fumane nako ea ho khothatsa Bakreste-’moho le bona?

¹³ Petrose ha aa ka a lebala mantsoe ao Jesu a ileng a mo bolella ’ona ka mor’a  hore a tsosoe a reng: “Lisa linku tsa ka tse nyenyane.” (Joh. 21:16) Ho ka ba thata hore moholo a phethe boikarabelo bona ba bohlokoa. Moholo o boetse o lokela ho etsa bonnete ba hore lelapa la hae le fumana lintho tsohle tseo le li hlokang, setho se seng le se seng sa lelapa se ikutloa se ratoa ebile o lokela ho thusa lelapa la hae hore le lule le e-na le kamano e ntle le Jehova. O boetse o lokela ho beha mohlala ha a le tšebeletsong ea tšimo, ha a fana ka lipuo libokeng tsa Bokreste le ha a le likopanong tse kholo le tse nyenyane. Baholo ba bang ba thusa Likomiting Tsa Bohokahanyi le Lipetlele ’me ba bang ba etsa mesebetsi e meng Lefapheng la Meralo le Kaho. Kannete baholo ba lula ba phathahane.

14. Ke’ng e susumetsang baholo hore ba hlokomele mohlape? (1 Petrose 5:​1-4)

¹⁴ Petrose o ile a re ho baholo: “Le lise mohlape oo Molimo a le fileng oona.” (Bala 1 Petrose 5:​1-4.) Haeba u moholo, rea tseba hore u rata Bakreste-’moho le uena ’me u batla ho ba hlokomela. Leha ho le joalo, ka linako tse ling u ka ’na oa utloa eka u phathahane haholo kapa u khathetse haholo ’me u ke ke oa khona ho phetha mosebetsi ona. U ka etsa’ng haeba u ikutloa joalo? Bolella Jehova hore na u ikutloa joang. Petrose o ile a re: “Haeba motho . . . a thusa batho ba bang, a itšetlehe ka matla a Molimo.” (1 Pet. 4:11) Bakreste-’moho le uena ba hlaheloa ke mathata a ke keng a fela hona joale empa hopola hore “molisa ea ka sehloohong” Jesu Kreste, a ka ba thusa ho feta mang kapa mang. A ka ba thusa hona joale ebile a ka ba thusa le lefatšeng le lecha. Molimo o batla hore baholo ba rate Bakreste-’moho le bona, ba ba hlokomele le hore ba behele “mohlape mohlala.”

15. Moholo e mong o etsa’ng hore a hlokomele mohlape? (Sheba setšoantšo.)

¹⁵ Mor’abo rona William eo ho seng ho fetile lilemo tse ngata e le moholo, o utloisisa bohlokoa ba ho hlokomela Bakreste-’moho. Ha seoa sa COVID-19 se qala, eena le baholo ba bang ba ile ba etsa bonnete ba hore ba letsetsa bara le barali ba bo rona ba lihlopheng tsa bona beke le beke. O re bara le barali ba bo rona ba bangata ba ne ba lula ba le bang ’me seo se ne se ka etsa hore ba nahane ka lintho tse nyahamisang. Ha Mokreste-’moho a e-na le bothata bo itseng, William o mo mamela ka  hloko e le hore a ka utloisisa hore o tšoenyehile ka eng le hore ke’ng seo a se hlokang ’me ha a fumana hore bothata ke bofe, o leka ho fumana lingoloa le livideo tse hlahang websaeteng ho thusa Mokreste eo. O re: “Hona joale Bakreste-’moho le rona ba hloka ho hlokomeloa le ho feta. Kaha re sebetsa ka thata ho thusa batho hore ba tsebe Jehova, re lokela ho sebetsa ka thata le ho feta ho thusa Bakreste-’moho hore ba lule ba e-na le kamano e ntle le Jehova.”

16. Ke ka litsela life re ka sebelisang seo re ithutileng sona mangolong a Petrose?

¹⁶ Re bone lintlha tse ’maloa feela tseo re ka ithutang tsona mangolong a mabeli a Petrose. Mohlomong u hlokometse hore ho na le moo u lokelang ho lokisa teng. Ka mohlala, na u ka rata ho nahanisisa haholoanyane ka litlhohonolofatso tseo re tla li fumana lefatšeng le lecha? Na u ikemiselitse ho bolella batho molaetsa oa Bibele ha u le mosebetsing, ha u le sekolong kapa ha u le libakeng tse ling? Na ho na le litsela tseo u ka bontšang Bakreste-’moho hore u ba rata haholo? Baholo, na le ikemiselitse ho sebetsa ka thata e le hore le hlokomele bahlanka ba Jehova? Ha u itlhahloba ka botšepehi, u ka ’na oa hlokomela hore ho na le moo u lokelang ho lokisa teng empa u se ke oa nyahama. “Morena o mosa” ’me o tla u thusa hore u ntlafatse. (1 Pet. 2:3) Petrose o ile a re: “Molimo . . . o tla qetela koetliso ea lona. O tla le tiisa, a le thuse hore le lule le tšepahala a be a le matlafatse.”—1 Pet. 5:10.

17. Re tla fumana’ng haeba re tšepahala ’me re lumella hore Jehova a re koetlise?

¹⁷ Ho na le nako eo ka eona Petrose a kileng a utloa a sa tšoanelehe hore e be molateli oa Jesu. (Luka 5:8) Empa Jehova le Jesu ba ile ba mo tšehetsa ’me o ile a latela Kreste ka botšepehi. Kahoo, Jehova o ile a fa Petrose monyetla oa hore “a kene ’Musong o sa feleng oa Morena le Mopholosi oa rona Jesu Kreste.” (2 Pet. 1:11) Kannete oo e ne e le moputso o moholo. Haeba u tšepahala joaloka Petrose ebile u lumella hore Jehova a u koetlise, le uena u tla fumana moputso oa bophelo bo sa feleng. U tla ‘pholosoa ka lebaka la tumelo ea hao.’—1 Pet. 1:9.