1, 2. Taba ea hore Jehova o re bopile re e-na le bokhoni ba ho thabisoa haholo ke ho fana ho feta ho fuoa e re tsoela molemo joang?

 HA JEHOVA a ne a bopa batho, o ba entse ba e-na le bokhoni ba hore ba thabisoe haholo ke ho fana ho feta ho fuoa. (Lik. 20:35) Na see se bolela hore ha re thabe ha re fuoa ntho e itseng? Ha ho joalo, hobane kaofela ha rona rea tseba hore rea thaba ha re fuoa mpho. Empa re thaba le ho feta ha e le rona ba fanang. Taba ea hore Jehova o re bopile ka tsela ena e re tsoela molemo. Hobane’ng?

² Tsela ena eo Jehova a re bopileng ka eona, e fa rona monyetla oa hore re eketse thabo ea rona. Re ka eketsa thabo ea rona ka hore re batle menyetla ea ho fana. Hoa thabisa hore ebe Jehova o re bopile ka tsela ena.—Pes. 139:14.

3. Ke hobane’ng ha Bibele e re Jehova ke “Molimo ea thabileng”?

³ Bibele e re bolella hore ho fana hoa thabisa. Ke kahoo re nolofalloang ke ho utloisisa hore na ke hobane’ng ha e re Jehova ke “Molimo ea thabileng.” (1 Tim. 1:11) Molimo ke eena oa pele oa ho fana ebile ha ho na motho ea ka fanang ho mo feta. Moapostola Pauluse o ile a re: “Ke ka eena re phelang, re sisinyehang ’me re leng teng.” (Lik. 17:28) Kannete “mpho e ’ngoe le e ’ngoe e molemo le ntho e ’ngoe le e ’ngoe e phethahetseng” e tsoa ho Jehova.—Jak. 1:17.

4. Ke eng e tla re thusa hore re thabe haholoanyane?

⁴ Boholo ba rona re ka thabela ho utloa hore na ho joang ho thaba haholoanyane ka lebaka la ho fana. Re ka etsa joalo ka hore re etsise tsela eo Jehova a fanang ka eona. (Baef. 5:1) Ha re ntse re ithuta sehlooho sena, hlokomela hore na re ka etsa’ng haeba re utloa eka batho bao re ba thusang ha ba ananele seo re ba etsetsang sona. Likhopotso tsena li tla re thusa hore re lule re thabile re be re eketse thabo eo re e fumanang ha re fana.

 ETSISA JEHOVA KA HORE U BE MOTHO EA FANANG

5. Ke lintho life tseo Jehova a re fang tsona?

⁵ Jehova o bontša ka litsela life hore oa fana? A re hlahlobeng mehlala e ’maloa. Jehova o re fa lintho tseo re li hlokang. Ha se kamehla Jehova a re fang lintho tseo re li batlang, empa o etsa bonnete ba hore re lula re e-na le lintho tseo re li hlokang. Ka mohlala, o re thusa hore re be le lijo, liaparo le bolulo. (Pes. 4:8; Mat. 6:​31-33; 1 Tim. 6:​6-8) Na Jehova o re fa lintho tseo re li hlokang hobane a tlamehile? Ha ho joalo! Empa joale ke hobane’ng ha Jehova a re fa tsona?

6. Re ithuta’ng ho Matheu 6:​25, 26?

⁶ Ka mantsoe a bonolo feela, Jehova o re fa lintho tseo re li hlokang hobane a re rata. A re hlahlobeng mantsoe a Jesu a hlahang ho Matheu 6:​25, 26. (E bale.) Litemaneng tsena, Jesu o etsa mehlala ka popo. Ha Jesu a bua ka linonyana, o ile a re: “Ha li jale peo leha e le ho kotula kapa ho boloka lijo ka setorong.” Leha ho le joalo, mantsoeng a hae a latelang o ile a re: “Ntate oa lona ea leholimong oa li fepa.” Ka mor’a moo Jesu oa botsa o re: “Na ha le bohlokoa ho li feta?” Re ithuta’ng? Jehova o nka bahlanka ba hae ba tšepahalang e le ba bohlokoa ho feta liphoofolo. Haeba Jehova a khona ho hlokomela liphoofolo, re ka kholiseha hore le rona o tla re hlokomela. Feela joalokaha ntate ea lerato a hlokomela lelapa la hae, Jehova o hlokomela lelapa la hae hobane a le rata.—Pes. 145:16; Mat. 6:32.

7. Re ka etsisa tsela eo Jehova a fanang ka eona joang? (Sheba setšoantšo.)

⁷ Joaloka Jehova, re ka bontša batho ba bang hore rea ba rata ka ho ba thusa ka lintho tseo ba li hlokang. Ka mohlala, na u tseba Mokreste-’moho le uena ea hlokang lijo kapa liaparo? Jehova a ka u sebelisa ho mo thusa ka lintho tseo a li hlokang. Bahlanka ba Jehova ba tsebahala ka ho thusa ha ho hlahile likoluoa. Ka mohlala, nakong ea seoa sa COVID-19, bara le barali ba bo rona ba ile ba arolelana lijo, liaparo le lintho tse ling le batho ba neng ba li hloka. Ba bangata ba ile ba boela ba thusa ka hore ba fane ka menehelo mosebetsing oa lefatše lohle. Menehelo ena e ile ea thusa bara le barali ba bo rona lefatšeng lohle ba neng ba hloka thuso ka lebaka la koluoa eo. Ba ile ba sebelisa keletso e hlahang ho Baheberu 13:16 e reng: “Le se ke la lebala ho etsa lintho tse molemo le ho arolela ba bang lintho tseo le nang le tsona hobane Molimo o thabisoa ke mahlabelo a joalo.”

8. Matla a Jehova a re tsoela molemo joang? (Bafilipi 2:13)

 ⁸ Jehova o fana ka matla. Jehova o na le matla a sa feleng ’me o thabela ho a arolela bahlanka ba hae ba tšepahalang. (Bala Bafilipi 2:13.) Na u kile oa rapela Jehova hore a u fe matla a ho hlola teko e itseng kapa a u thuse ho mamella boemo bo boima? Mohlomong u kile oa rapella hore a u fe matla ao u a hlokang bakeng sa ho phetha mosebetsi oa letsatsi. Ha u hlokomela hore Jehova o arabetse thapelo ea hao, e ka ’na eaba u ile oa lumellana le mantsoe a moapostola Pauluse, a reng: “Ke na le matla a ho etsa lintho tsohle ka lebaka la ea mphang matla.”—Bafil. 4:13.

9. Re ka etsisa tsela eo Jehova a sebelisang matla ka eona joang? (Sheba setšoantšo.)

⁹ Le hoja re sa phethahala, re ka etsisa tsela eo Jehova a sebelisang matla ka eona. Kaha rona ha re khone ho fa ba bang matla ao re nang le ’ona, re ka a sebelisa ho ba thusa. Ka mohlala, re ka khona ho thusa Bakreste-’moho le rona ba kulang kapa ba holileng ka ho hloekisa malapeng a bona kapa re ba ele mabenkeleng. Haeba maemo a rona a lumela, re ka ithaopela ho hloekisa le ho hlokomela Holo ea ’Muso. Haeba re sebelisa matla a rona ka tsela ena, re tla be re thusa bara le barali ba bo rona.

10. Re ka khothatsa batho ba bang joang ka seo re se buang?

¹⁰ Ntho e ’ngoe eo re sa lokelang ho e lebala ke hore re ka khona ho khothatsa ba bang ka seo re se buang. Na ho na le motho eo u mo tsebang eo u ka mo khothatsang ka hore u mo babatse? Na ho na le motho eo u mo tsebang ea hlokang ho tšelisoa? Haeba ho joalo, u se ke oa lieha ho ea ho motho eo. U ka ea ho motho eo ka ho toba, kapa oa mo founela kapa oa mo romela molaetsa o khothatsang ka karete, e-mail kapa ka fono. U se ke oa tšoenyeha haholo ka hore na u tla re’ng. Mantsoe a seng makae feela a tsoang pelong, e ka ba sona seo Mokreste-’moho le uena a se hlokang e le hore a tsoele pele ho tšepahalla Jehova kapa hore a mamelle boemo boo a leng ho bona.—Liprov. 12:25; Baef. 4:29.

11. Jehova o sebelisa bohlale ba hae joang?

¹¹ Jehova o fana ka bohlale. Jakobo o ile a re: “Haeba mang kapa mang ho lona a haelloa ke bohlale, a ’ne a bo kope ho Molimo ’me o tla bo fuoa hobane Molimo o fana ka seatla se bulehileng ho bohle a bile a sa nyefole.” (Jak. 1:5; nal.) Joalokaha mantsoe ana a bontša, Jehova ha a timane ka bohlale ba hae. O bo fa le batho ba bang. Hlokomela hore Jakobo o itse ha Jehova a fana ka bohlale, o fana ka bona “a sa ahlole,” kapa “a sa nyefole.” Le ka mohla, ha a  etse hore re ikutloe re le basesaane ha re kopa tataiso ea hae. Ho e-na le hoo, o re khothaletsa hore re e batle.—Liprov. 2:​1-6.

12. Re na le menyetla efe ea ho arolelana le ba bang bohlale boo re nang le bona?

¹² Na le rona re ka khona ho etsisa Jehova ka hore re arolele ba bang bohlale boo re nang le bona? (Pes. 32:8) Bahlanka ba Jehova ba na le menyetla e mengata ea hore ba arolele ba bang seo ba ithutileng sona. Ka mohlala, hangata re koetlisa ba bacha hore ba atlehe mosebetsing oa boboleli. Baholo ha ba fele pelo ha ba thusa bahlanka ba sebeletsang le bara ba bo rona ba kolobelitsoeng hore ba ithute ho etsa mesebetsi e itseng ka phuthehong. Bara le barali ba bo rona ba nang le boiphihlelo mosebetsing oa kaho le oa ho hlokomela libaka tsa rona tsa borapeli, ba koetlisa ba se nang boiphihlelo hore le bona ba atlehe ho etsa mosebetsi ona.

13. Ha re koetlisa ba bang, re ka etsisa tsela eo Jehova a arolelang ba bang bohlale ka eona joang?

¹³ Batho ba koetlisang ba bang, ba tla be ba etsa hantle haeba ba etsisa tsela eo Jehova a fang ba bang bohlale ka eona. Hopola hore Jehova o thabela ho arolela ba bang bohlale ba hae. Ka tsela e tšoanang, re lokela ho arolela batho ba ntseng ba ithuta tsebo le boiphihlelo boo re nang le bona. Ha re timane ka tsebo eo re nang le eona hobane feela re tšaba hore motho eo re mo rutang o tla re nkela mosebetsi kapa boikarabelo bo itseng. Hape ha rea lokela ho ba le maikutlo a ho re: ‘Ha ho na motho ea nkoetlisitseng! Kahoo, e mong le e mong o lokela ho hela a itlamela.’ Maikutlo a joalo ha a lokela ho ba teng har’a batho ba Jehova. Ho e-na le hoo, ha re thabele feela ho fetisa tsebo eo re nang le eona, empa re ikemiselitse “ho tela bophelo ba rona” bakeng sa batho bao re ba koetlisang. (1 Bathes. 2:8) Ha re ruta ba bang lintho tseo re li tsebang, re batla hore ‘le bona ba tšoanelehe ho li ruta ba bang.’ (2 Tim. 2:​1, 2) Haeba re thabela ho koetlisa ba bang, kaofela ha rona re tla ba bohlale ’me re thabe.

RE KA ETSA’NG HAEBA BA BANG BA SA ANANELE THUSO EA RONA?

14. Batho ba bangata ba etsa’ng ha re ba thusa?

¹⁴ Hangata haeba re thusa kapa re etsetsa bara le barali ba bo rona ntho e itseng, baa re leboha. Ba ka re romela molaetsa kapa ba bontša ka litsela tse itseng hore baa leboha. (Bakol. 3:15) Ha ba bontša kananelo ka tsela e joalo, re thaba le ho feta.

15. Re lokela ho etsa eng haeba batho ba bang ba sa bontše kananelo?

¹⁵ Ha se kamehla batho ba bang ba bontšang kananelo ha ba thusitsoe. Ka linako tse ling, re ka tela nako, matla le lintho tseo re nang le tsona ho thusa motho e mong empa ka mor’a moo ha bonahala eka ha a bontše kananelo. Ha seo se etsahala, re ka etsa’ng hore re lule re thabile ebile re sa nyahame? Hopola mantsoe a hlahang ho Liketso 20:​35, e leng lengolo la rona la sehlooho. Thabo ea rona ha ea itšetleha ka hore na batho baa leboha kapa che. Re ntse re ka khona ho thabela ho ba batho ba fanang, le hoja ho bonahala eka ba bang ha ba ananele seo re ba etsetsang sona. Re ka thusoa ke eng? A re hlahlobeng lintlha tsena tse ’maloa.

16. Re lokela ho ameha ka eng ha re fana?

¹⁶ Re amehe ka ho etsisa Jehova. O fa batho bohle lintho tse molemo, ho sa tsotellehe hore na baa li ananela kapa che. (Mat. 5:​43-48) Jehova o tšepisa hore haeba re fana ‘re sa lebella hore re pataloe, moputso oa rona o tla ba moholo.’ (Luka 6:35) Kahoo, u se ke oa ikutloa u nyahame haeba ka linako tse ling batho ba sa bontše hore ba ananela seo u ba etselitseng sona. Hopola hore Jehova o tla u hlohonolofatsa ka lebaka la ho etsetsa ba bang lintho tse molemo, hobane Jehova “o rata motho ea fanang a thabile.”—Liprov. 19:17; 2 Bakor. 9:7.

17. Ke lebaka lefe le ka sehloohong le lokelang ho re susumelletsa ho fana? (Luka 14:​12-14)

 ¹⁷ Ntho e ’ngoe e ka re thusang ho etsisa Jehova ha re fana, ke ho sebelisa mantsoe ao Jesu a a buileng ho Luka 14:​12-14. (E bale.) Ha se phoso ho bontša ba bang mosa le ho ba memela lijong ebe hamorao le bona ba etsa se tšoanang. Empa ho thoe’ng haeba re hlokomela hore re fana hobane le rona re lebeletse se seng? Haeba ho joalo, leka ho etsa seo Jesu a se buileng. Re ka mema motho eo re tsebang hore a ke ke a ba le bokhoni ba ho re mema. Seo se tla re thabisa hobane re tla be re etsisa Jehova. Hape haeba re fana re sa lebella letho ho batho ba bang, re tla lula re thabile le haeba ba sa bontše kananelo.

18. Ke eng seo re sa lokelang ho se etsa, hona hobane’ng?

¹⁸ U se ke oa nahana hore batho ba bang ha ba na kananelo. (1 Bakor. 13:7) Ha ba bang ba sa bontše kananelo, re lokela ho ipotsa: ‘Na ehlile ha ba ananele, kapa ke feela hore ba mpa ba lebetse ho bontša kananelo?’ Mohlomong ho na le mabaka a entseng hore ba se ke ba re leboha ka tsela eo re neng re e lebeletse. Le hoja ba bang ba ananela, ho ka ba thata ho bontša kananelo eo. E ka ’na eaba ba bang ba hlajoa ke lihlong hobane nakong e fetileng, ba ne ba khona ho fana ’me hona joale ha ba sa khona. Empa haeba re rata bara le barali ba bo rona e le kannete, re ke ke ra nahana lintho tse mpe ka bona ’me re tla tsoela pele re fana re thabile.—Baef. 4:2.

19, 20. Ke hobane’ng ha mamello e le ea bohlokoa ha re fana? (Sheba setšoantšo.)

¹⁹ E-ba le mamello. Morena Solomone ea bohlale, o ile a re ha a bua ka ho fana: “Lahlela bohobe ba hao ka metsing kaha ka mor’a matsatsi a mangata u tla boela u bo fumane.” (Moek. 11:1) Sena se re ruta hore batho ba bang ba ka bontša kananelo ka mor’a nako e telele. Sena ke se ileng sa etsahalla morali oa bo rona e mong.

²⁰ Lilemo tse ngata tse fetileng, mosali oa mopotolohi o ile a ngolla morali oa bo rona e mong ea neng a sa tsoa kolobetsoa lengolo, a  mo khothaletsa hore a lule a tšepahala. Hoo e ka bang ka mor’a lilemo tse robeli, morali oa bo rona eo le eena o ile a ngolla mosali oa mopotolohi lengolo, a re: “Le hoja u sa tsebe sena, u nthusitse haholo lilemong tse fetileng.” Ha a tsoela pele o ile a re: “[U ile oa ngolla] mantsoe a mosa, ’me ha ke lebale temana eo u ileng oa bua ka eona.” a Ka mor’a hore a hlalose mathata ao a kopaneng le ’ona lilemong tse fetileng, o ile a re: “Ka linako tse ling ke ne ke batla ho khaotsa ho sebeletsa Jehova, empa ke ne ke lula ke hopola temana eo u ileng oa ngolla eona, ’me seo se ile sa etsa hore ke be le matla a . . . ho lula ke tšepahala.” O ile a tsoela pele ho re: “Lilemong tseo tse robeli, ke ile ka khothatsoa haholo ke lengolo le temana eo u ileng oa ’ngolla eona.” Ak’u nahane feela hore na mosali oa mopotolohi o ile a ikutloa a thabile hakaakang ha a fumana lengolo lena ka mor’a lilemo tseo tse ngata! Ka ho tšoanang, le rona batho ba ka ’na ba bontša hore ba ananela lintho tseo re ileng ra ba etsetsa tsona, nako e telele ka mor’a hore re ba etsetse tsona.

21. Ke hobane’ng ha re ikemiselitse ho lula re etsisa Jehova ka hore re be batho ba fanang?

²¹ Joalokaha ho boletsoe, Jehova o re bopile re e-na le bokhoni bo ikhethang. O re bopile ka tsela e tla etsa hore re thabe ha re fana ho feta ha re fuoa. Rea thaba ha re khona ho thusa Bakreste-’moho le rona. Re boetse rea thaba ha ba bontša kananelo. Ebang motho eo re mo etsetsang ntho e itseng o bontša kananelo kapa che, re thabisoa ke hore re entse se nepahetseng. Ho sa tsotellehe hore na ke eng eo u fanang ka eona, Jehova a ka u fa se sengata ho feta seo. (2 Likron. 25:9) Jehova o tla lula a fana ka lintho tse ngata ho feta tseo re fanang ka tsona! Ha ho na ntho e thabisang ho feta ho putsoa ke Jehova. Kahoo, a re ikemisetseng ho etsisa Ntate oa rona ea fanang ka seatla se bulehileng.