1. Haufinyane Jesu o tla etsa’ng?

 RE PHELA nakong eo ho tla etsahala lintho tse kholo. Haufinyane Jesu o tla ahlola motho e mong le e mong. Jesu o ile a re bolella ka ho hlaka hore na ho tla etsahala’ng lefatšeng pele a tlisa kahlolo. O ile a bolella balateli ba hae hore na ba tla “bona ka’ng” hore o teng le hore ‘lefatše lena lea fela.’ (Mat. 24:3) Boprofeta bona bo hlaha ho Matheu khaolo ea 24 le ea 25, Mareka khaolo ea 13 le Luka khaolo ea 21.

2. Re tl’o bua ka’ng sehloohong see, hona ho etsa joalo ho tla re thusa joang?

² Jesu o ile a sebelisa lipapiso tse tharo ho re lemosa. Ke papiso ea linku le lipoli, baroetsana ba bohlale le ba maoatla le ea litalenta. Lipapiso tsena li re bontša hore Jesu o tla ahlola batho ho ea ka liketso tsa bona. Sehloohong, sena re tl’o bua ka lipapiso tsena re be re bone hore na re ka ithuta eng ho tsona. Re tla qala ka ho bua ka papiso ea linku le lipoli.

LINKU LE LIPOLI

3. Jesu o tla ahlola batho neng?

³ Papisong ea linku le lipoli Jesu o ile a re o tla ahlola batho ho latela hore na ba ile ba etsa’ng ha ba utloa litaba tse monate le hore na ba ile ba tšehetsa bana babo. (Mat. 25:​31-46) O tla fana ka kahlolo nakong ea “mahlomola a maholo,” pele ho Armagedone. (Mat. 24:21) Joalokaha molisa a arola linku ho lipoli, Jesu le eena o tla arola batho ba ileng ba tšehetsa balateli ba hae ba tlotsitsoeng ho ba sa kang ba ba tšehetsa.

4. Esaia 11:​3, 4 e re kholisa joang hore Jesu o tla ahlola batho ka toka? (Sheba setšoantšo se ka ntle.)

 ⁴ Bibele e re ha Jesu a ahlola bakeng sa Jehova, o tla ahlola ka toka. (Bala Esaia 11:​3, 4.) O hlahloba lintho tseo batho ba li etsang, ba li nahanang le tseo ba li buang ho akareletsa le tsela eo ba tšoarang batlotsuoa ka eona. (Mat. 12:​36, 37; 25:40) Jesu o tla tseba hore na ke bo-mang ba ileng ba tšehetsa bana babo ba tlotsitsoeng le mosebetsi oa bona. a Tsela ea bohlokoa eo re ka tšehetsang bana babo Kreste ka eona ke ka ho ba thusa mosebetsing oa boboleli. Batho ba tšehetsang bana babo Kreste ba tla nkoa ‘ba lokile’ ’me ba tla ba le monyetla oa ho “phela ka ho sa feleng” lefatšeng. (Mat. 25:46; Tšen. 7:​16, 17) Ona ke moputso o babatsehang bakeng sa ba tla lula ba tšepahala. Haeba ba ka lula ba tšepahala nakong ea mahlomola a maholo le ka mor’a moo, mabitso a bona a tla lula a ngotsoe “bukeng ea bophelo.”—Tšen. 20:15.

5. Re ithuta’ng papisong ea linku le lipoli, hona ke bo-mang ba ruang molemo ho eona?

⁵ Bontša hore oa tšepahala. Papiso ea Jesu ea linku le lipoli e ama ka ho khetheha batho ba nang le tšepo ea ho phela lefatšeng ka ho sa feleng. Ba bontša hore ba na le tumelo ka ho thusa bana ba bo Kreste ka mosebetsi oa boboleli le ho latela ka botšepehi tataiso e fanoang ke mohlanka ea bohlale le ea tšepahalang ea khethiloeng ke Jesu. (Mat. 24:45) Leha ho le joalo, batho ba nang le tšepo ea ho phela leholimong le bona ba ntse ba lokela ho mamela temoso e hlahang papisong ena. Hobane’ng? Hobane le bona Jesu o ntse a sheba lintho tseo ba li etsang, tseo ba li nahanang le tseo ba li buang. Le bona ba lokela ho tšepahala. Ebile Jesu o ile a etsa lipapiso tse peli tse lemosang bona ka ho khetheha. Lipapiso tseo li boetse li hlaha ho Matheu khaolo ea 25. Hona joale ha re bueng ka papiso ea baroetsana ba bohlale le ba maoatla.

BAROETSANA BA BOHLALE LE BA MAOATLA

6. Baroetsana ba bahlano ba ile ba bontša joang hore ba bohlale? (Matheu 25:​6-10)

⁶ Jesu o ile a etsa papiso ka baroetsana ba leshome ba neng ba e’o khahlanyetsa monyali. (Mat. 25:​1-4) Kaofela ba ne ba batla ho felehetsa monyali ho ea moketeng oa lenyalo. Jesu o ile a re ba bahlano e ne e le “ba bohlale,” ba bahlano e le “maoatla.” Baroetsana ba bohlale ba ne ba itokisitse ebile ba falimehile. Ba ne ba itjoetsitse hore ba tla emela monyali hore a fihle esita le ha a ne a ka fihla bosiu. Kahoo, ba ile ba nka mabone e le hore ba khantše ha ho e-ba lefifi. Ba ile ba boela ba nka oli e eketsehileng e le hore mabone a bona a se ke a tima haeba monyali a ne a ka lieha. (Bala Matheu 25:​6-10.) Ha monyali a fihla, baroetsana ba bohlale ba ile ba kena le eena moketeng oa lenyalo. Ka tsela e tšoanang, Bakreste ba tlotsitsoeng ba tla lula ba tšepahala ba bile ba falimehile ho fihlela Kreste a tla, ba tla fumana moputso oa bona ’me ba kene le monyali e leng Jesu ’Musong oa hae o leholimong. b (Tšen. 7:​1-3) Ho ile ha etsahala’ng ka baroetsana ba maoatla?

7. Ho ile ha etsahala’ng ka baroetsana ba bahlano ba maoatla, hona hobane’ng?

⁷ Baroetsana ba bahlano ba maoatla bona ba ne ba sa itokisa ha monyali a fihla. Mabone a bona a ne a le haufi le ho tima empa ba ne ba sa nka oli e eketsehileng. Eitse ha ba utloa hore monyali o se a ntse a tl’o fihla, eaba  ke hona ba e’o reka oli. Ha monyali a fihla, ba ne ba e-s’o khutle. “Baroetsana ba neng ba itokisitse ba kena le eena moketeng oa lenyalo ’me monyako oa koaloa.” (Mat. 25:10) Ha baroetsana ba maoatla ba khutla ’me ba batla ho kena, monyali o ile a re ho bona: “Ha ke le tsebe.” (Mat. 25:​11, 12) Baroetsana bao ba ne ba sa itokisetsa ho ema haeba monyali a ne a ka lieha ho fihla. Bakreste ba tlotsitsoeng ba ka ithuta’ng papisong ee?

8, 9. Batlotsuoa ba ka ithuta’ng papisong ea baroetsana ba leshome? (Sheba setšoantšo.)

⁸ Lula u itokisitse u bile u falimehile. Jesu o ne a sa bolele hore ho tla ba le lihlopha tse peli tsa batlotsuoa, e leng ba neng ba itokiselitse ho ema ho fihlela bofelong le ba neng ba sa itokisetsa ho ema. O ne a mpa a bolela hore na ho tla etsahala’ng ka batlotsuoa haeba ba ne ba sa itokisetsa ho lula ba tšepahala ho fihlela qetellong. Ba ne ba ke ke ba fumana moputso haeba feela ba sa itokisa. (Joh. 14:​3, 4) Taba ena e tebile. Kaofela ha rona re lokela ho mamela temoso ena e papisong ea baroetsana ba leshome ho sa tsotellehe hore na re na le tšepo ea ho phela lefatšeng kapa leholimong. E mong le e mong oa rona o lokela ho lula a falimehile a bile a itokiselitse ho mamella ho fihlela qetellong.—Mat. 24:13.

⁹ Ka mor’a ho etsa papiso ea baroetsana ba leshome ho bontša bohlokoa ba ho lula re falimehile re bile re itokisitse, Jesu o ile a etsa papiso ea litalenta. Papiso ena e bontša bohlokoa ba ho sebetsa ka thata.

LITALENTA

10. Makhoba a mabeli a ile a etsa’ng ho bontša hore aa tšepahala? (Matheu 25:​19-23)

¹⁰ Papisong ea litalenta, Jesu o bua ka makhoba a mabeli a ileng a tšepahalla mong’a ’ona le le leng le sa kang la mo tšepahalla. (Mat. 25:​14-18) Makhoba a mabeli a tšepahalang a ile a sebetsa ka thata hore a tsoalise chelete ea mong’a ’ona. Pele mong’a makhoba a etela hole o ile a a siea le litalenta. Eo e ne e le chelete e ngata ’me makhoba a mabeli a tšepahalang a ile a sebetsa ka thata ho sebelisa chelete eo hantle. Ha mong’a ’ona a fihla, chelete  eo a neng a a file eona e ne e imenne habeli. Mong’a ’ona o ile a a babatsa eaba a thaba le eena. (Bala Matheu 25:​19-23.) Lekhoba la boraro lona le ile la etsa’ng ka chelete eo mong’a lona a neng a le file eona?

11. Ho ile ha etsahala’ng ka lekhoba le “botsoa,” hona hobane’ng?

¹¹ Lekhoba la boraro le ile la fuoa talenta e le ’ngoe empa lona le ne le le “botsoa.” Mong’a lona o ne a lebeletse hore le sebelise talenta eo hamolemo. Empa le ile la tsetela chelete eo fatše. Ha mong’a lona a khutla le ile la mo fa talenta eo e le joalo, le sa e tsoalisa. Lekhoba leo ha lea ka la soabela ntho eo le e entseng. Ho e-na le hore le kope tšoarelo ka hore ebe ha lea etsetsa mong’a lona phaello, le ile la re mong’a lona ke “motho ea thata.” Mong’a lona o ne a sa thaba, kahoo o ile a le amoha talenta eo a ba a le leleka.—Mat. 25:​24, 26-30.

12. Makhoba a mabeli a tšepahalang a emela bo-mang?

¹² Makhoba a mabeli a ileng a tšepahala a emela Bakreste ba tlotsitsoeng ba tšepahalang. Mong’a makhoba ke Jesu ’me o mema makhoba a ileng a tšepahala hore a thabe le eena. Ba fumana moputso oa bona e leng tsoho ea pele. (Mat. 25:​21, 23; Tšen. 20:5b) Leha ho le joalo, mohlala o mobe oa lekhoba le botsoa ke temoso ho Bakreste ba tlotsitsoeng. Joang?

13, 14. Batlotsuoa ba ka ithuta’ng papisong ea litalenta? (Sheba setšoantšo.)

¹³ Lula u sebetsa ka thata. Joaloka papisong ea baroetsana ba leshome, papisong ea litalenta Jesu o ne a sa re batlotsuoa ba tla ba botsoa. Le hona mona o ne a mpa a hlalosa hore na ho tla etsahala’ng ka bona haeba ba ka felloa ke cheseho. Haeba ba ne ba ka etsa joalo, ba ne ba ke ke ba tšoaneleha ho kena ’Musong o leholimong.—2 Pet. 1:10.

¹⁴ Papiso ea Jesu ea baroetsana ba leshome le ea litalenta li hlakisa hantle hore Bakreste bohle ba tlotsitsoeng ba lokela ho lula ba itokisitse ba bile ba falimehile hape ba sebetsa ka thata. Na ho na le ntho e ’ngoe hape eo Jesu a ileng a e bua ho lemosa Bakreste ba tlotsitsoeng? Ho joalo. Re ka fumana temoso eo ho Matheu 24:​40, 41.

 KE BO-MANG BA “TLA NKOA”?

15, 16. Matheu 24:​40, 41 e thusa Bakreste ba tlotsitsoeng joang hore ba hlokomele hore ba lokela ho lula ba falimehile?

¹⁵ Pele Jesu a etsa lipapiso tsena tse tharo o ile a hlakisetsa batlotsuoa hore nakong ea kahlolo, ho tla hlaka hore na ke bo-mang ba amohetsoeng. O ile a bua ka banna ba babeli ba sebetsang masimong le basali ba babeli ba silang. Ka bobeli ba bonahala eka ba ntse ba etsa ntho e tšoanang empa Jesu o ile a re “e mong o tla nkoa, e mong a siuoe.” (Bala Matheu 24:​40, 41.) Ka mor’a moo, o ile a eletsa balateli ba hae a re: “Le lule le falimehile hobane ha le tsebe hore na Morena oa lona o tla ka letsatsi lefe.” (Mat. 24:42) Jesu o ile a bua ntho e tšoanang ka mor’a hore a etse papiso ea baroetsana ba leshome. (Mat. 25:13) Na litaba tsee lia amana? Ho bonahala joalo. Ke Bakreste ba tlotsitsoeng ba tšepahalang feela ba tla “nkoa.” Jesu o tla ba kenya ’Musong o leholimong.—Joh. 14:3.

¹⁶ Lula u falimehile. Bakreste ba tlotsitsoeng ba sa falimehang ba ke ke ba bokelloa le “bakhethoa.” (Mat. 24:31) Ha e le hantle bahlanka bohle ba Molimo ba lokela ho lula ba falimehile ba bile ba tšepahala ho sa tsotellehe hore na ba na le tšepo ea ho phela lefatšeng kapa leholimong.

17. Ke hobane’ng ha re sa lokela ho tšoenyeha ha re bona Jehova a ntse a khetha batlotsuoa le mehleng ee?

¹⁷ Kaha re tseba Jehova hantle, re tšepa hore ntho e ’ngoe le e ’ngoe eo a e etsang e nepahetse. Kahoo, ha re tšoenyehe ha Jehova a khetha ho tlotsa Bakreste ba bang ba tšepahalang lilemong tsa morao tjena. c Rea hopola hore na Jesu o ile a re’ng ka basebetsi ba ileng ba hiroa motsotsong oa ho qetela papisong ea tšimo ea morara. (Mat. 20:​1-16) Ba ileng ba hiroa ho tloha hoseng ba ile ba fumana moputso o lekanang le oa ba ileng ba hiroa motsotsong oa ho qetela. Kahoo, ho sa tsotellehe hore na batlotsuoa ba khethoa neng, ba tla fumana moputso oa bona haeba feela ba lula ba tšepahala.

MAMELA LITEMOSO

18, 19. Re ithutile’ng lipapisong tsee?

¹⁸ Re ithutile’ng? Papiso ea linku le lipoli ea bontša hore na ke hobane’ng ha ho le bohlokoa hore Bakreste ba nang le tšepo ea ho phela ka ho sa feleng lefatšeng ba lule ba tšepahalla Jehova hona joale le nakong ea mahlomola a maholo. Nakong e tlang Jesu o tla nka bohle ba tšepahetseng ba tšoaneloa ke ho phela “ka ho sa feleng.”—Mat. 25:46.

¹⁹ Re boetse re buile ka lipapiso tse peli tse lemosang Bakreste ba tlotsitsoeng. Papisong ea Jesu ea baroetsana, ba bahlano ba bona ba ile ba bontša hore ba bohlale. Ba ne ba ikemiselitse ho emela monyali ho sa tsotellehe hore na o fihla neng, ba itokisitse ba bile ba falimehile. Empa baroetsana ba maoatla ba ne ba sa itokisa. Joale monyali o ile a ba hanela ho kena moketeng oa lenyalo la hae. Le rona re lokela ho ikemisetsa ho leta ho fihlela Jesu a felisa lefatše lena ho sa tsotellehe hore na e tla ba neng. Papisong ea litalenta re ile ra ithuta hore makhoba a mabeli a ile a sebetsa ka thata. A ile a sebeletsa mong’a ’ona ka thata, kahoo o ile a thaba. Empa lekhoba le botsoa lona le ile la lelekoa. Re ithuta’ng? Re lokela ho lula re phathahane ka ho sebeletsa Jehova ho fihlela bofelo bo tla. Qetellong re ile ra bona hore batlotsuoa ba lokela ho lula ba falimehile e le hore ba fumane moputso oa bona oa ho ea leholimong. Ba labalabela “ho bokelloa” hore ba ee ho Jesu leholimong. Ka mor’a ntoa ea Armagedone, kaofela ha  bona e tla ba monyaluoa lenyalong la konyana.—2 Bathes. 2:1; Tšen. 19:9.

20. Jehova o tla etsetsa batho ba mamelang litemoso tsa hae eng?

²⁰ Le hoja nako ea hore Jesu a ahlole e atametse, ha rea lokela ho tšoha. Haeba re tšepahala, Ntate oa rona ea lerato ea leholimong o tla re fa “matla a sa tloaelehang” e le hore re ka “atleha . . . ho ema ka pel’a Mor’a motho.” (2 Bakor. 4:7; Luka 21:36) Ho sa tsotellehe hore na re na le tšepo ea ho phela leholimong kapa lefatšeng, re tla thabisa ntate oa rona haeba re mamela litemoso tse lipapisong tsa Jesu. Kaha Jehova o mosa, mabitso a rona a tla ‘fumanoa a ngotsoe bukeng’ ea bophelo.—Dan. 12:1; Tšen. 3:5.