1, 2. (a) Ba bangata ba tobane le mathata afe kajeno, hona phello e ba efe? (b) Lentsoe la Molimo le re tiisetsa eng ho Esaia 41:10, 13?

MORALI’ABO RŌNA e mong eo e leng pula-maliboho oa kamehla ’me a nyetsoe ke moholo, o re: “Le hoja ke na le kemiso e ntle ea lintho tsa moea, ke qetile lilemo tse ngata ke loantšana le ho tšoenyeha maikutlong. Ho tšoenyeha ho etsa hore ke hlobaele, hoa nkulisa, ho ama le tsela eo ke tšoarang ba bang ka eona, ’me ka linako tse ling ke ee ke utloe eka nka re lefatše ngamoha ke kene.”

² Na u ee u ikutloe ka tsela e kang ee eo morali oabo rōna a ikutloang ka eona? Ka masoabi, lefatše le khopo la Satane le re bakela khatello e matla, ’me seo se etsa hore re tšoenyehe re be re tepelle. Sena se ka tšoantšoa le ankora e tšoereng sekepe, e se sitisang ho tsamaea. (Liprov. 12:25) Ke’ng e ka etsang hore u ikutloe ka tsela ee? Mohlomong u shoetsoe ke motho eo u mo ratang, u ua kula, maemo a moruo a u thatafalletsa ho hlokomela ba lelapa la hao, kapa u ua hanyetsoa. Ha nako e ntse e ea, khatello ea maikutlo e ka u qeta matla. E ka ba ea etsa hore u felloe ke thabo. Empa u ka kholiseha hore Molimo o ikemiselitse ho u thusa.—Bala Esaia 41:10, 13.

3, 4. (a) Ka Bibeleng lentsoe “matsoho” le sebelisoa joang? (b) Ke’ng e ka ’nang ea etsa hore matsoho a rōna a tepelle?

 ³ Bibele e atisa ho sebelisa likarolo tsa ’mele oa motho ho hlalosa lintho tse sa tšoaneng. Ka mohlala, e bua khafetsa ka letsoho. Ho matlafatsa letsoho la motho ho fana ka boikutlo ba ho mo khothatsa, ho mo tiisa le ho mo susumelletsa ketsong. (1 Sam. 23:16; Esdr. 1:6) Ho fana ka maikutlo a ho ba le tšepo ea hore lintho li tla loka.

⁴ Ka linako tse ling hore matsoho a motho a tepeletse ho bolela hore motho eo o nyahame, kapa o feletsoe ke tšepo. (2 Likron. 15:7; Baheb. 12:12) Hangata ha motho a le boemong boo, o oa inehela. U ka khothatsoa ke eng ha u tobane le maemo a u sithabetsang kapa a etsang hore u ikutloe u khathetse ’meleng, maikutlong, esita le moeeng? Ke’ng e ka u susumetsang le ho u matlafatsa hore u mamelle ’me u thabe?

5. (a) Re ka ’na ra ikutloa joang ha re tobana le mathata, empa re lokela ho hopola eng? (b) Re tlil’o tšohla eng?

⁵ Bala Sofonia 3:16, 17. Jehova, Ntate oa rōna ea lerato o re khothalletsa hore re se ke ra tšoha kapa hona ho nyahama, ho e-na le hoo re ‘lahlele matšoenyeho ’ohle a rōna ho eena.’ (1 Pet. 5:7) Re ka khothatsoa ke seo Molimo a ileng a se bolella Baiseraele, ha a re ‘letsoho la hae le matla ha lea khutsufala hoo le ke keng la pholosa’ bahlanka ba hae ba tšepahalang. (Esa. 59:1) Re tlil’o tšohla mehlala e meraro e ka Bibeleng e bontšang hore Jehova o ikemiselitse ho matlafatsa batho ba hae, ebile o na le matla a ho etsa seo esita le maemong a thata. Leka ho bona hore na mehlala ena e ka u matlafatsa joang.

6, 7. Re ithuta thuto efe ea bohlokoa tabeng ea ha Baiseraele ba hlōla Baamaleke?

⁶ Nakoana ka mor’a hore Baiseraele ba lokolloe ka mohlolo bokhobeng Egepeta, Baamaleke ba ile ba ba hlasela. Moshe o ile a laela Joshua ea sebete hore a etelle Baiseraele pele ntoeng. Ka nako e tšoanang, Moshe a nyolohela leralleng le haufi le moo, a e-na le Arone le Hure, e le hore ba bone se etsahalang moleng oa ntoa. Na banna bao ba bararo ba ne ba tšaba ho ea ntoeng? Che!

⁷ Moshe o ile a sebelisa leano le ileng la atleha. O ile a nka molamu oa Molimo oa ’nete ’me a o phahamisetsa holimo. Ha a o phahamisitse, Jehova o ne a matlafatsa Baiseraele, ’me ba hlōla Baamaleke. Empa ha letsoho la Moshe le khathala ’me le qala ho tepella, Baamaleke ba ne ba hlōla. Arone le Hure ba ile “ba nka lejoe ’me ba le beha ka tlas’a [Moshe], eaba o lula holim’a lona; Arone le Hure ba tšehetsa matsoho a hae, e mong ka lehlakoreng lena ’me e mong ka lehlakoreng lane, hoo matsoho a hae a ileng a ema nģa e le ’ngoe ho fihlela letsatsi le likela.” Ha e le hantle, letsoho le matla la Molimo le ile la thusa Baiseraele hore ba hlōle ntoeng eo.—Ex. 17:8-13.

8. (a) Asa o ile a etsa’ng ha Baethiopia ba leka ho hlasela Juda? (b) Re ka etsisa Asa joang?

⁸ Le mehleng ea Morena Asa, Jehova o ile a boela a bontša hore letsoho la hae ha lea khutsufala. Ka Bibeleng ho buuoa ka lintoa tse ngata. Empa lebotho le neng le le leholo ho ’ohle ke la Zera oa Moethiopia. O ne a e-na le masole a 1 000 000. Lebotho leo le ne le kopola la Asa habeli. U ka inahanela hore na ho ka be ho bile bonolo hakae hore Asa a tšoenyehe a be a nyahame. Empa ho e-na le hoo,  Asa o ile a kōpa Jehova hore a mo thuse. Ho ne ho ka ’na ha bonahala eka Asa a ke ke a hlōla lebotho la Baethiopia, empa “lintho tsohle lia khoneha ho Molimo.” (Mat. 19:26) Molimo o ile a bonahatsa matla a hae a maholo ’me a “hlōla Baethiopia ka pel’a Asa,” eo ‘pelo ea hae e neng e feletse ho Jehova ka matsatsi ’ohle a hae.’—2 Likron. 14:8-13; 1 Mar. 15:14.

9. (a) Ke’ng e ileng ea thusa Nehemia hore a tsoele pele ho tsosolosa marako a Jerusalema? (b) Molimo o ile a araba thapelo ea Nehemia joang?

⁹ U ka inahanela hore na Nehemia o ile a ikutloa joang ha a ea Jerusalema. Motse oo o ne o sa sireletseha, ’me Bajuda ba habo ba nyahame. Batho ba lichaba tse ling ba neng ba hanyetsa Bajuda ba ile ba etsa hore ba tepelle, ba khaotse ho tsosolosa marako a Jerusalema. Na Nehemia le eena o ile a lumella boemo boo hore bo mo nyahamise? Che! Ho tšoana le Moshe, Asa le bahlanka ba bang ba tšepahalang ba Jehova, Nehemia o ne a se a ntse a tloaetse ho itšetleha ka Jehova ka thapelo. O ile a etsa se tšoanang le lekhetlong lena. O ne a tobane le bothata boo Bajuda ba bang ba neng ba nahana hore ba ke ke ba bo hlōla, leha ho joalo Jehova o ile a araba thapelo ea Nehemia. Molimo o ile a sebelisa ‘matla a hae a maholo le letsoho la hae le matla’ ho matlafatsa Bajuda ba neng ba nyahame. (Bala Nehemia 1:10; 2:17-20; 6:9.) Na u ua lumela hore Jehova o sebelisa ‘matla a hae a maholo le letsoho la hae le matla’ ho matlafatsa bahlanka ba hae kajeno?

10, 11. (a) Satane o etsa’ng ho leka ho re nyahamisa? (b) Jehova o sebelisa’ng ho re matlafatsa? (c) U ruile molemo joang thutong ea bomolimo le koetlisong eo u e fumaneng?

¹⁰ Rea tseba hore Diabolose a ke ke a khoehlisa boitekong ba hae ba ho re tlohelisa tšebeletso ea rōna ea Bokreste. O sebelisa mebuso, baeta-pele ba bolumeli le bakoenehi ho re etselletsa le ho re sokela. Ka sepheo sefe? O batla ho re nyahamisa mosebetsing oa ho bolela litaba tse molemo tsa ’Muso. Empa Jehova a ka khona ho re matlafatsa ka moea oa hae o halalelang, ’me o ikemiselitse ho etsa seo. (1 Likron. 29:12) Re lokela ho latela tataiso ea moea o halalelang e le hore re loantšane le bothata leha e le bofe boo Satane le tsamaiso ea hae a re tlisetsang bona. (Pes. 18:39; 1 Bakor. 10:13) Hape, re lokela ho ananela Lentsoe la Molimo, le bululetsoeng ka moea o halalelang. Nahana ka lijo tsa moea tse thehiloeng Bibeleng tseo re li fumanang khoeli le khoeli. Mantsoe a ho Zakaria 8:9, 13 (e bale) a builoe ha tempele e Jerusalema e ntse e tsosolosoa, ’me aa sebetsa le ho rōna kajeno.

¹¹ Re boetse re matlafatsoa ke thuto ea bomolimo eo re e fumanang libokeng, likopanong le likolong tsa puso ea Molimo. Koetliso eo e ka re thusa hore re be le boikutlo bo loketseng, re ipehele lipakane tsa tšebeletso le ho phetha boikarabelo ba rōna ba Bokreste. (Pes. 119:32) Na u leka ho fumana koetliso eo, e le hore u imatlafatse?

12. Re lokela ho etsa’ng e le hore re lule re le matla moeeng?

¹² Jehova o ile a thusa Baiseraele hore ba hlōle Baamaleke le Baethiopia, ’me a fa Nehemia le bo-mphato ba hae matla e le hore ba qete mosebetsi oa ho tsosolosa marako. Le rōna Molimo o tla re fa matla e le hore re tsoele pele ka mosebetsi oa boboleli ho sa tsotellehe mathata ao re kopanang le ’ona, khanyetso le ho hloka thahasello ha batho bao re buang le bona. (1 Pet. 5:10) Ha rea lebella hore  Jehova a re thuse ka mohlolo. Ho e-na le hoo, re lokela ho phetha karolo ea rōna. Seo se akarelletsa ho bala Lentsoe la Molimo letsatsi le letsatsi, ho lokisetsa liboka, ho etsa thuto ea botho le ho tšoara borapeli ba lelapa, esita le ho itšetleha ka Jehova kamehla. Ha rea lokela ho lumella letho ho re thibela ho sebelisa litokisetso tseo Jehova a li entseng ho re matlafatsa le ho re khothatsa. Haeba u lemoha hore ho na le moo u lokelang ho ntlafatsa teng lintlheng tsena, kōpa Molimo hore a u thuse. Ka ho etsa joalo, moea oa hae o tla u matlafatsa. (Bafil. 2:13) Empa u ka etsa’ng ho matlafatsa ba bang?

13, 14. (a) Mor’abo rōna e mong o ile a matlafatsoa ke’ng ka mor’a ho shoeloa ke mosali? (b) Re ka etsa’ng ho matlafatsa ba bang?

¹³ Jehova o re file bara le barali babo rōna ba tsotellang ba ka re khothatsang. Moapostola Pauluse o ile a re: “Otlollang matsoho a lepeletseng le mangole a tšeremang, ’me le ’ne le otlolle litsela bakeng sa maoto a lōna.” (Baheb. 12:12, 13) Ba bangata lekholong la pele la lilemo ba ile ba fumana thuso ea mofuta oo. Ho joalo le kajeno. Mor’abo rōna e mong ea ileng a hlokahalloa ke mosali ’me a feta le maemong a mang a thata, o re: “Ke ithutile hore re ke ke ra khetha hore na re tleloa ke liteko life kapa hona hore na li re tlele neng. Ho rapela le ho ba le thuto ea botho ho nthusitse haholo. Bara le barali babo rōna le bona ba ile ba ntšehetsa ’me seo se nkhothalitse. Hona joale kea hlokomela hore ke habohlokoa hore motho a be le kamano e ntle le Jehova pele a hlaheloa ke mathata.”

¹⁴ Arone le Hure ba ile ba tšehetsa matsoho a Moshe nakong ea ntoa. Le rōna re ka batla litsela tsa ho tšehetsa le ho thusa ba bang ka phuthehong. Re ka thusa bo-mang? Re ka thusa ba seng ba hōlile, ba kulang, ba hanyetsoang ke ba malapa, ba jeoang ke bolutu, kapa ba shoetsoeng ke baratuoa ba bona. Re ka boetse ra matlafatsa bacha bao lefatše le ba susumelletsang hore ba etse lintho tse fosahetseng kapa ba hahamalle thuto e phahameng haesita le maruo. (1 Bathes. 3:1-3; 5:11, 14) Batla litsela tseo u ka bontšang ba bang hore u ba thahasella e le kannete ha le le Holong ea ’Muso, tšebeletsong ea tšimo, ha le le lijong kapa ha le ntse le buisana ka fono.

15. Ho bua ka tsela e khothatsang ho ka ama Bakreste-’moho le rōna joang?

¹⁵ Ka mor’a hore Asa a hlōle, moprofeta Azaria o ile a mo khothatsa hammoho le sechaba ka mantsoe a reng: “Lōna, le be sebete ’me le se ke la lumella matsoho a lōna ho tepella, hobane moputso o teng bakeng sa mosebetsi oa lōna.” (2 Likron. 15:7) Sena se ile sa susumelletsa Asa hore a etse liphetoho tse ngata ho tsosolosa borapeli bo hloekileng. Ka ho tšoanang, ha u bua ka tsela e khothatsang u tla susumetsa ba bang. U tla ba thusa hore ba sebeletse Jehova ka botlalo. (Liprov. 15:23) Ha u le libokeng, u ka boetse ua khothatsa ba bang ka ho phahamisa letsoho le ka ho fana ka likarabo tse hahang.

16. Baholo ba ka etsisa Nehemia joang tabeng ea ho matlafatsa ba bang ka phuthehong? Bolela kamoo balumeli-’moho le uena ba u thusitseng kateng.

¹⁶ Jehova o ile a matlafatsa Nehemia le bo-mphato ba hae hore ba phethe mosebetsi. Kahoo, ba ile ba nka matsatsi a 52 feela ho tsosolosa marako a Jerusalema! (Neh. 2:18; 6:15, 16) Nehemia o ne a sa tsamaise mosebetsi feela. O ile a kenya letsoho ka ho toba mosebetsing oa ho tsosolosa marako a Jerusalema.  (Neh. 5:16) Baholo ba bangata ba lerato ba etsisa Nehemia ka hore ba ithaopele ho thusa mosebetsing oa kaho kapa ho hloekiseng Holo ea ’Muso le ho e boloka e le boemong bo botle. Ba boetse ba matlafatsa ba lipelo li tšoenyehileng ka hore ba sebetse le bona tšimong le ho ba etsetsa maeto a bolisa.—Bala Esaia 35:3, 4.

17, 18. Re ka kholiseha ka eng ha re e-na le mathata kapa re tšoenyehile?

¹⁷ Rea momahana ha re sebetsa mahetla a bapile le bara le barali babo rōna. Ho boetse ho tiisa maqhama a rōna a setsoalle ’me ho re kholisa le ho feta hore re tla hlohonolofatsoa ka ho enneng ’Musong oa Molimo. Ha re ntse re matlafatsa ba bang, re ba thusa hore ba loantše maemo a ba nyahamisang ’me ba lebelle bokamoso bo khanyang. Ho feta moo, ha re khothatsa ba bang seo se re thusa hore re tsepamise kelello linthong tsa moea ’me re nahane ka seo Molimo a re tšepisitseng sona. Ha e le hantle, le rōna hoa re matlafatsa.

¹⁸ Ho bona kamoo Jehova a ’nileng a tšehetsa bahlanka ba hae ba tšepahalang le ho ba sireletsa kateng nakong e fetileng, ho lokela ho re matlafatsa tumelo le ho etsa hore re mo tšepe le ho feta. Kahoo, ha u tobana le mathata u se ke ua lumella ‘matsoho a hao ho tepella’! Ho e-na le hoo, kōpa Jehova hore a u thuse, ’me u lumelle letsoho la hae le matla hore le u tataisitse litlhohonolofatsong tsa ’Muso.—Pes. 73:23, 24.