1, 2. Bahlanka ba Jehova ba lokela ho hanela eng?

HO TLOHA ka motho oa pele ea tšepahalang, e leng Abele, bahlanka ba Molimo ba ’nile ba loanela ho etsa se nepahetseng. Moapostola Pauluse o ile a re Bakreste ba Baheberu ba ile ba “mamella ntoa e khōlō tlas’a litlhokofatso,” e le hore Jehova a ba amohele a be a ba hlohonolofatse. (Baheb. 10:32-34) Pauluse o ile a bapisa boikitlaetso boo Bakreste ba bo etsang le bo etsoang ke ba neng ba kenela litlhōlisano tsa Bagerike, joaloka limathi le bo-ralitebele. (Baheb. 12:1, 4) Kajeno re peisong ea bophelo, ’me re tobana le bahanyetsi ba batlang ho re ferekanya, ho re liha, ho re hlōla le ho re sitisa ho thaba esita le ho amohela moputso oo re o letetseng.

² Taba ea pele, re loana le Satane le lefatše la hae le khopo. (Baef. 6:12) Re lokela ho hanela tšusumetso e mpe ea lefatše ea “lintho tse metseng ka matla.” Li akarelletsa lithuto tsa bohata le lifilosofi, mekhoa e litšila e joaloka boitšoaro bo bobe ba ho kopanela liphate, ho tsuba, botahoa le ho sebelisa lithethefatsi. ’Me re lokela ho lula re loantša mefokolo ea rōna le ho nyahama.—2 Bakor. 10:3-6; Bakol. 3:5-9.

3. Molimo o re thusa joang hore re loantše lira tsa rōna?

 ³ Na re ka atleha ho hlōla lira tse matla joalo? E, re ka li hlōla, empa re lokela ho loana. Pauluse o ile a etsa mohlala ka ralitebele oa mehleng ea boholo-holo, ’me a re: “Tsela eo ke tobisang ho otla ha ka ka eona ke ka tsela ea hore ke se ke ka otla moea.” (1 Bakor. 9:26) Feela joalokaha ralitebele a loantša sera sa hae, le rōna re lokela ho loantša lira tsa rōna. Jehova o oa re koetlisa ebile o re thusa hore re li loantše. Ka Lentsoeng la hae o fane ka litaelo tse ka re sireletsang. O boetse o re tataisa ka lingoliloeng tse thehiloeng Bibeleng, liboka le likopano. Na u sebelisa seo u ithutang sona? Haeba u sa se sebelise, ho tšoana le ha u “otla moea,” ho e-na le sera sa hao.

4. Re lokela ho etsa’ng e le hore re se ke ra hlōloa ke bobe?

⁴ Lira tsa rōna li ka ’na tsa re tsometsa kapa tsa re hlasela ha re nyahame, kahoo re lokela ho lula re falimehile. Bibele e re: “U se ke ua itlohela hore u hlōloe ke bobe, empa u ’ne u hlōle bobe ka botle.” (Bar. 12:21) Keletso e reng ‘re se ke ra itlohella hore re hlōloe ke bobe’ e bontša hore re ka bo hlōla. Re ka bo hlōla haeba re bo loantša. Ka lehlakoreng le leng, haeba re khaotsa ho loantša lira tsa rōna, e leng Satane le lefatše la hae le khopo hammoho le ho se phethahale ha rōna, li ka re hlōla. U se ke ua lumella Satane hore a u nyahamise!—1 Pet. 5:9.

5. (a) Ke’ng e ka re thusang ho tsoela pele re loana e le hore re fumane litlhohonolofatso tsa Molimo? (b) Re tlil’o tšohla mehlala efe?

⁵ E le hore re atlehe, ha rea lokela ho lebala sepheo sa rōna sa ho loana. Ba batlang hore Molimo a ba amohele le ho ba hlohonolofatsa, ba lokela ho lula ba hopola mantsoe ana a ho Baheberu 11:6, a reng: “Ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” Leetsi la Segerike le fetoletsoeng e le ‘ho batla ka tieo’ le fana ka maikutlo a ho ikitlaetsa kapa ho leka ka matla. (Lik. 15:17) Ka Mangolong ho na le mehlala e metle ea banna le basali ba ileng ba ikitlaelletsa ho fumana litlhohonolofatso tsa Jehova. Jakobo, Ragele, Josefa le Pauluse ba ile ba tobana le maemo a thata a ileng a ba sithabetsa, empa kaha ba ile ba mamella ba ile ba hlohonolofatsoa ka ho enneng. Re ka etsisa mohlala oa bona joang?

6. Ke hobane’ng ha Jakobo a ile a khona ho mamella, hona o ile a putsoa joang? (Sheba setšoantšo se qalong.)

⁶ Mopatriareka Jakobo o ile a loana a ba a mamella hobane a rata Jehova, a ananela lintho tsa moea a bile a kholisehile hore Jehova o tla mo hlohonolofatsa eena le litloholo tsa hae. (Gen. 28:3, 4) Sena se re thusa ho utloisisa hore na ke hobane’ng ha Jakobo le hoja a ne a habile lilemo tse 100 a ile a etsa sohle se matleng a hae hore Molimo a mo hlohonolofatse; esita le ho betana le lengeloi. (Bala Genese 32:24-28.) Na Jakobo o ne a e-na le matla le mokoka oa ho loantša lengeloi le matla? Che! Empa o ile a ikitlaetsa, ’me a bontša hore ha aa ikemisetsa ho tela! Mamello ea hae e ile ea feela ea putsoa. O ile a rehoa lebitso le loketseng la Iseraele, (le bolelang “Ea Loantšanang le [Ea Phehellang] Molimo,” kapa “Molimo o oa Loana”). Jehova o ile a amohela Jakobo a ba a mo hlohonolofatsa, e leng seo le rōna re se labalabelang.

7. (a) Ragele o ile a tobana le boemo bofe bo nyahamisang? (b) Ke’ng e ileng ea thusa Ragele hore a se ke a nyahama, hona o ile a hlohonolofatsoa joang?

 ⁷ Mosali oa Jakobo ea bitsoang Ragele le eena o ne a labalabela ho bona hore na Jehova o tla phethahatsa tšepiso eo a e etselitseng monna oa hae joang. Empa o ne a e-na bothata boo a sa khoneng ho bo rarolla. O ne a se na bana. Mehleng ea hae, ho se be le bana e ne e le sekhobo. Ke’ng e ileng ea thusa Ragele hore a se ke a nyahama le hoja a ne a le boemong boo a sa khoneng ho bo fetola? Ha aa ka a tela. Ho e-na le hoo, o ile a tsoela pele ho rapela ka tieo. Jehova o ile a utloa lithapelo tsa Ragele, ’me a mo hlohonolofatsa ka bana. Ke kahoo ka nako e ’ngoe Ragele a ileng a hooa, a re: “Ke loanne . . . ntoa e boima. Hape ke . . . hlōtse!”—Gen. 30:8, 20-24.

8. Josefa o ile a tobana le boemo bofe bo thata, hona o re behetse mohlala ofe?

⁸ Mohlala o motle oa Jakobo le Ragele o ile oa susumetsa mora oa bona ea bitsoang Josefa, oa mo thusa ho mamella liteko tsa tumelo tseo a ileng a tobana le tsona. Ha Josefa a le lilemo li 17, o ile a etsahalloa ke ntho e bohloko haholo. Kaha baholoane ba hae ba ne ba mo shoela mōna, ba ile ba mo rekisa bokhobeng. Lilemo hamorao, o ile a koalloa teronkong Egepeta le hoja a ne a se na molato. (Gen. 37:23-28; 39:7-9, 20-21) Josefa ha aa ka a itumella ho nyahama; kapa hona ho tlala bohale hoo a ileng a batla ho iphetetsa. Ho e-na le hoo, o ile a loanela hore a be le kamano e ntle le Jehova. (Lev. 19:18; Bar. 12:17-21) Josefa o re behetse mohlala o motle. Ka mohlala, esita le haeba re hōtse ka thata kapa re tobana le maemo a re nyahamisang, re lokela ho tsoela pele ho loana ’me re mamelle. Re ka kholiseha hore ha re etsa joalo, Jehova o tla re hlohonolofatsa.—Bala Genese 39:21-23.

9. E le hore le rōna Jehova a re hlohonolofatse joaloka Jakobo, Ragele le Josefa, re lokela ho etsa’ng?

⁹ Ak’u nahane ka bothata boo u tobaneng le bona hona joale. Mohlomong u tšoeroe ka leeme, u ua khetholloa kapa u ua songoa. Kapa mohlomong motho e mong o u qosa ka bohata hobane feela a u shoela mōna. Ho e-na le ho nyahama, hopola hore na ke’ng e ileng ea thusa Jakobo, Ragele le Josefa hore ba tsoele pele ho sebeletsa Jehova ba thabile. Molimo o ile a ba matlafatsa le ho ba hlohonolofatsa kaha ba ile ba bontša hore ba ananela lintho tsa moea. Ba ile ba tsoela pele ho loana le ho etsa lintho tse lumellanang le lithapelo tsa bona. Re phela qetellong ea tsamaiso ena e khopo ea lintho; kahoo re na le lebaka le utloahalang la ho itšoarella ka tieo ho seo Jehova a re tšepisitseng sona! Na u ikemiselitse ho amoheloa ke Jehova, ka mantsoe a mang, na u loanela hore a u amohele?

10, 11. (a) Re ka ’na ra lokela ho etsa’ng e le hore Molimo a re hlohonolofatse? (b) Ke’ng e tla re nolofalletsa ho khetha ho etsa se nepahetseng?

¹⁰ Ke maemong afe ao ho ka ’nang ha hlokahala hore re loanele hore Molimo a re hlohonolofatse? Ba bang ba rōna ke tabeng ea ho loantša bofokoli bo itseng. Ba bang bona ba lokela ho loanela ho ba le boikutlo bo nepahetseng ka tšebeletso. Mohlomong uena u ua kula kapa u jeoa ke bolutu. Ba bang bona ba thatafalloa ho tšoarela batho ba ba foselitseng. Ho sa tsotellehe hore na ke khale hakae re sebeletsa Jehova, kaofela ha rōna re lokela ho loantša ntho leha e le efe e ka re sitisang  ho sebeletsa Molimo, ea putsang ba tšepahalang.

¹¹ Ke ’nete hore ha ho bonolo ho khetha ho etsa se nepahetseng le ho phela joaloka Mokreste. Ho ba thata le ho feta ha lipelo tsa rōna tse bolotsana li re susumelletsa ho etsa se fosahetseng. (Jer. 17:9) Haeba u hlokomela hore ho na le moo u lokelang ho ntlafatsa teng, kōpa Molimo hore a u thuse ka moea o halalelang. Thapelo le moea o halalelang li tla u thusa ho etsa se nepahetseng ’me Jehova o tla u hlohonolofatsa. Etsa lintho tse lumellanang le lithapelo tsa hao. Leka ho bala Bibele letsatsi le leng le le leng, ’me u iphe nako ea ho ba le thuto ea botho le ea ho tšoara Borapeli ba Lelapa.—Bala Pesaleme ea 119:32.

12, 13. Ke’ng e ileng ea thusa mocha e mong le morali oabo rōna hore ba loantše litakatso tse fosahetseng?

¹² Ho na le mehlala ea Bakreste ba bangata e bontšang kamoo Lentsoe la Molimo, moea o halalelang le lingoliloeng tsa rōna li ba thusitseng kateng ho loantša litakatso tse fosahetseng. Mocha e mong o ile a bala sehlooho se reng “U ka Hanela Litakatso Tse Fosahetseng Joang?” se hlahang Tsoheng! ea December 8, 2003. O ile a ikutloa joang ha a qeta ho e bala? O ile a re: “Ke ntse ke leka ho loantša menahano e litšila. Ha ke utloa sehloohong seo ho thoe ‘ba bangata ba thatafalloa ka ho khetheha ho loantša litakatso tse fosahetseng,’ seo se ile sa etsa hore ke lemohe hore ha ke mokhelo ka  phuthehong. Ke ile ka hlokomela hore ha ke mong.” Mocha enoa o ile a ruisoa molemo le ke sehlooho se reng, “Bophelo ba Boikhethelo—Na Molimo oa bo Amohela?” se hlahang Tsoheng! ea October 8, 2003. O ile a hlokomela hore se bapisa mathata ao ba bang ba loantšanang le ’ona le “moutloa nameng.” (2 Bakor. 12:7) Ha ba ntse ba loanela ho etsa se nepahetseng, ba tšepa hore lintho li tla loka nakong e tlang. Qetellong o re: “Seo se nthusitse ho lemoha hore nka lula ke tšepahala. Ke leboha Jehova haholo ka ho sebelisa mokhatlo oa hae ho re qobisa likotsi letsatsi ka leng tsamaisong ena e khopo.”

¹³ Nka hape mohlala oa morali’abo rōna e mong oa United States. O ile a ngola, a re: “Ke rata ho le leboha ka ho re fa seo re se hlokang le hona ka nako e loketseng. Hangata ke utloa eka lihlooho tsena li ngoletsoe ’na ka ho khetheha. E se e le lilemo joale, ke loantšana le takatso e matla ea ntho eo Jehova a e hloileng. Ka linako tse ling, ke batla ho inehela. Kea tseba hore Jehova o mosa ebile o oa tšoarela, empa kaha ke na le takatso ena e matla ke nka hore ha ho letho le ka nthusang. Bothata bona bo ama ntho e ’ngoe le e ’ngoe eo ke e etsang. . . . Ha ke qeta ho bala sehlooho se reng, ‘Na U na le “Pelo ea ho Tseba” Jehova?’ Molula-Qhooeng oa March 15, 2013, ke ile ka hlokomela hore ka sebele Jehova o batla ho nthusa.”

14. (a) Pauluse o ne a ikutloa joang ka mathata ao a tobanang le ’ona? (b) Re ka etsa’ng e le hore re hlōle bofokoli ba ho se phethahale?

¹⁴ Bala Baroma 7:21-25. Pauluse o ne a tseba kamoo ho leng thata kateng ho loantšana le litakatso tse fosahetseng le bofokoli ba ho se phethahale. Empa o ne a kholisehile hore o tla atleha ntoeng ena, haeba a itšetleha ka Jehova a bile a bontša tumelo sehlabelong sa Jesu sa thekollo. Na le rōna re ka atleha? E, re ka atleha, ha re ntse re loantša bofokoli ba rōna ba ho se phethahale. Ka ho etsa’ng? Ka ho etsisa Pauluse le ho itšetleha ka Jehova ka ho feletseng, ho e-na le ho itšetleha ka matla a rōna le ka ho bontša tumelo sehlabelong sa thekollo.

15. Thapelo e ka re thusa joang hore re tšepahale le ho mamella liteko?

¹⁵ Ka linako tse ling, Molimo a ka re fa monyetla oa ho bontša hore na re amehile hakae ka bothata boo re nang le bona. Ka mohlala, re tla etsa’ng haeba re kula (kapa ho kula e mong ka lapeng) kapa haeba re tšoeroe ka leeme? Re lokela ho bontša hore re tšepile Jehova ka ho feletseng ka hore re mo kōpe hore a re fe matla e le hore re tšepahale, ’me re se ke ra felloa ke thabo. (Bafil. 4:13) Lintho tse ileng tsa etsahalla Bakreste ba bangata mehleng ea Pauluse le kajeno, li bontša hore thapelo e ka re fa matla ’me ea etsa hore re be sebete e le hore re tsoele pele ka mamello.

16, 17. U ikemiselitse ho etsa’ng?

¹⁶ Diabolose o batla ho u nyahamisa e le hore u inehele. Ikemisetse ‘ho tšoarella ka tieo ho se setle.’ (1 Bathes. 5:21) Kholiseha hore u ka atleha ho loantša Satane, lefatše la hae le khopo le bofokoli ba ho se phethahale. U ka atleha haeba u tšepile Molimo ka ho feletseng hore a u matlafatse.—2 Bakor. 4:7-9; Bagal. 6:9.

¹⁷ U se ke ua inehela. Tsoela pele ho loana. U se ke ua nyahama. Mamella. Kholiseha hore Jehova o tla ‘u tšollela tlhohonolofatso ho fihlela ho se ho se letho leo u le hlokang.’—Mal. 3:10.