“A sebetse ka thata, a etse mosebetsi o molemo ka matsoho a hae, e le hore a ka ba le ho hong hoo a ho abelang ea hlokang.”​—BAEFESE 4:28.

’Mopi oa rona o batla hore re nke mosebetsi e le ntho e ntle. Hobane’ng? Ha motho a sebetsa ka thata oa thaba hobane o khona ho itlhokomela le ho hlokomela lelapa la hae ka lintho tseo le li hlokang. A ka ba a khona ho thusa le batho ba hlokang. Mohiri oa hae le eena o tla mo nka e le motho oa bohlokoa. Hangata motho ea sebetsang ka thata ha a lahleheloe ke mosebetsi oa hae. Mangolo a hlalosa moputso oa ho sebetsa ka thata e le “mpho ea Molimo.”​—Moeklesia 3:13.

“Re tšepa hore re na le matsoalo a tšepahalang, kaha re lakatsa ho itšoara ka botšepehi linthong tsohle.”​—BAHEBERU 13:18.

Haeba re tšepahala, rea itlhompha, re ba le khotso ebile re robala hamonate bosiu. Hape batho ba bang ba tla re tšepa ba be ba re hlomphe. Batho ba sa tšepahaleng ha ba khone ho fumana lintho tsena. Hape matsoalo a bona a ka ba tšoenya ebile ba ka lula ba tšohile hore ka letsatsi le leng ba tla tšoaroa ka lebaka la ho se tšepahale.

“Mokhoa oa lona oa bophelo e ke e be o se nang lerato la chelete, ha le ntse le khotsofaletse lintho tse teng.”​—BAHEBERU 13:5.

Re hloka chelete bakeng sa lijo le litlhoko tse ling. Leha ho le joalo, “lerato la chelete” le kotsi. Motho ea ratang chelete a ka qeta nako ea hae e ngata le matla a hae a loanela ho ba le chelete e eketsehileng. Ho etsa joalo ho ka etsa hore ho be le mathata lenyalong la hae, a se ke a ba le nako bakeng sa bana ba hae ha ba ha mo kulisa. (1 Timothea 6:​9, 10) Ho feta moo, motho ea ratang chelete a ka lekeha hore a se ke a tšepahala. Monna e mong ea bohlale o ile a re: “Motho oa liketso tse tšepahalang o tla fumana litlhohonolofatso tse ngata, empa ea potlakelang ho fumana maruo a ke ke a lula a hloka molato.”​—Liproverbia 28:20.

“Sireletsa bohlale bo sebetsang le matla a ho nahana.”​—LIPROVERBIA 3:21.

Thuto e ntle e re thusa hore re be batho ba nang le boikarabelo le batsoali ba molemo. Empa thuto ea sekolo ka boeona e ke ke ea etsa hore motho a lule a thabile ebile a e-na le ntho e ’ngoe le e ’ngoe eo a e hlokang. E le hore re atlehe nthong e ’ngoe le e ’ngoe eo re e etsang, re hloka thuto e tsoang ho Molimo. Ha Mangolo a bua ka motho ea mamelang Molimo a re: “Ntho e ’ngoe le e ’ngoe eo a e etsang e tla atleha.”​—Pesaleme ea 1:​1-3.