Ke Hobane’ng ha Batho ba se ba sa Hlomphe ba Bang?
KE HOBANE’NG HA HO HLOMPHA BATHO BA BANG HO LE BOHLOKOA?
Ho hlompha batho ba bang ho etsa hore lintho li se ke tsa tsoa taolong ha ho e-ba le liqabang.
-
Maele a Bibele a re: “Karabo e bonolo e leleka khalefo empa lentsoe le hlabang le fehla bohale.” (Liproverbia 15:1) Ho se hlomphe batho ba bang ka seo re se buang le seo re se etsang, ho tšoana le ha eka re tšela parafine mollong ’me seo se ba le liphello tse bohloko.
-
Jesu o ile a re: “Motho o bua ntho e tletseng ka pelong ea hae.” (Matheu 12:34) Ho hlompholla batho ba bang ka seo re se buang, ho ka bontša hore na ehlile re ikutloa joang ka batho ba morabe, setso, bochaba kapa ba phelang ka tsela e sa tšoaneng le eo rona re phelang ka eona.
Phuputsong e ’ngoe e sa tsoa etsoa morao tjena ho batho ba fetang 32 000 linaheng tse 28, ba etsang liphesente tse 65 ba boletse hore batho ha ba sa na mekhoa ebile ha ba sa hlomphana mehleng ena.
U KA BONTŠA JOANG HORE U HLOMPHA BATHO BA BANG?
Ha u le sekolong kapa mosebetsing, hlompha batho bohle le haeba u sa lumellane le bona ka lintho tse itseng. Sheba lintho tseo u lumellanang le bona ka tsona. Ho etsa joalo, ho tla u thusa hore u se ke oa ba nyenyefatsa kapa oa ba ahlola.
Tšoara batho ba bang ka tsela eo le uena u batlang ho tšoaroa ka eona. Haeba u le mosa ’me u nahanela batho ba bang, le bona ba ka ’na ba u tšoara ka tsela e tšoanang.
E-ba motho ea tšoarelang. Iphapanyetse liphoso tsa batho ba bang ’me u se ke oa nahana hore ba ne ba batla ho u utloisa bohloko.
LIPAKI TSA JEHOVA LI BONTŠA JOANG HORE LI HLOMPHA BATHO BA BANG?
Lipaki Tsa Jehova li hlompha batho ba bang moo li lulang teng le moo li sebetsang teng.
Re ithaopela ho ruta batho Bibele mahala empa ha re ba hatelle ho lumela seo re se lumelang kapa ho bona lintho ka tsela eo re li bonang ka eona. Ho e-na le hoo, re leka ho sebelisa keletso ea Bibele e reng ‘re arabe batho ka bonolo le ka tlhompho’ ha re ba bolella molaetsa oa rona.—1 Petrose 3:15; 2 Timothea 2:24.
Ha re khetholle batho ba bang empa re amohela motho e mong le e mong ea batlang ho ithuta Bibele hore a tle libakeng tsa rona tsa borapeli, ho sa tsotellehe hore na o tsoa hokae. Re loanela ho amohela ‘le ho hlompha batho ba mefuta eohle.’—1 Petrose 2:17.
Re hlompha balaoli ba phahameng libakeng tseo re lulang ho tsona. (Baroma 13:1) Re mamela melao ebile re patala makhetho. Le hoja re sa kenelle litabeng tsa lipolotiki, re hlompha liqeto tsa batho litabeng tsa lipolotiki.
