Motho ea nang le mamello ke ea tsoelang pele ka bophelo ka mor’a ho kopana le mathata. Ho ke ke ha etsahala hore ngoana ea ntseng a ithuta ho tsamaea a tsamaee hantle feela a sa oele, hoa tšoana le haeba motho a batla ho atleha bophelong o tla ’ne a kopane le mathata.

Bana ba bang baa nyahama haeba ba sa khone ho etsa lintho tseo ba li ratang, ha ba kopana le mathata kapa ho na le batho ba tšoaeang mosebetsi oa bona phoso. Ba bang bona ba khaotsa ho etsa boiteko ba hore ba atlehe. Empa ba tlameha hore ba utloisise lintlha tsena:

• Ha se lintho tsohle tseo re li etsang tseo re tla atleha ho tsona.​—Jakobo 3:2.

• Mathata a hlahela motho e mong le e mong.​—Moeklesia 9:11.

• Ka linako tse ling re hloka ho khalemeloa e le hore re etse lintho hantle.​—Liproverbia 9:9.

Haeba bana ba hao ba mamella hona joale, ba tla atleha ho hlola mathata ao ba tla tobana le ’ona ha ba se ba le baholo.

Haeba ho e-na le moo ngoana oa hao a hlolehang.

MOLAO-MOTHEO OA BIBELE: “Etsoe ea lokileng a ka ’na a oa esita le ka makhetlo a supileng, ’me ka sebele o tla ema.”​—Liproverbia 24:16.

Thusa ngoana oa hao hore a se ke a nyahamisoa le ke mathata a fokolang. Mohlala, o tla etsa’ng haeba a sa pasa tlhahlobo sekolong? Mohlomong a ka tela a nka hore ha ho letho leo a ka khonang ho le etsa hantle.

U ka ruta ngoana oa hao ho mamella ka ho mo koetlisa hore na a ka etsa’ng nakong e tlang e le hore a atlehe. Ha u etsa joalo, ngoana oa hao a ke ke a lumella mathata hore a mo hloe setha empa o tla leka ho a rarolla.

Ha oa lokela ho rarolla mathata a ngoana oa hao empa u lokela ho mo thusa ho itharollela ’ona. U ka ’na oa mo botsa hore na o bona eka a ka etsa’ng hore nakong e tlang a tle a pase tlhahlobo eo.

Ha a e-na le mathata.

MOLAO-MOTHEO OA BIBELE: “Ha le tsebe hore na bophelo ba lona bo tla ba joang hosasane.” ​—Jakobo 4:14.

Bophelo ke lebili, morui a ka tsoha e le mofutsana le motho ea phetseng hantle a ka tsoha a kula. Bibele e re: “Ba lebelo ha ba hlole peisong, leha e le hore ba  matla baa hlola ntoeng . . . hobane bohle ba hlaheloa ke nako le ketsahalo e sa lebelloang.”​—Moeklesia 9:11.

Ke boikarabello ba hao joaloka motsoali ho sireletsa ngoana oa hao. Leha ho le joalo, ’nete eo re ke keng ra e qoba ke hore u ke ke oa khona ho sireletsa ngoana oa hao nthong e ’ngoe le e ’ngoe.

Ke ’nete hore ho na le mathata ao ngoana oa hao a ke keng a khona ho a utloisisa hobane a sa le monyenyane, a kang ho felloa ke chelete kapa ke mosebetsi. Leha ho le joalo ho na le mathata ao u ka mo thusang ho a mamella, mohlala, haeba motsoalle oa hae a mo fetohetse kapa ho na le setho sa lelapa se hlokahetseng. *

Ha ngoana oa hao a khalemeloa.

MOLAO-MOTHEO OA BIBELE: “Mamela keletso . . . e le hore u ka hlalefa bokamosong ba hao.”​—Liproverbia 19:20.

Ha motho e mong a khalemela ngoana oa hao ha se hore oa mo hlorisa empa o mo hlokomelisa phoso eo a tlamehang ho e lokisa.

Ha u ruta ngoana oa hao hore a lumele ha a khalemeloa, u qobisa uena le eena mathata. Ntate e mong ea bitsoang John o re: “Haeba bana ba sa lokise liphoso, ha ho na mohla ba tla ithuta. Ba ke ke ba lokisa liphoso tsa bona empa u tla lula u ba pata bohlasoa bophelo bohle ba bona. Taba ena e etsa hore motsoali le ngoana ba sulafalloe ke bophelo.”

U ka thusa ngoana oa hao joang ho hlokomela hore ke taba ea bohlokoa ha batho ba bang ba mo khalemela? Ha ngoana a u phetela hore ho na le motho ea mo khalemetseng, e bang ke sekolong kapa hohle moo a neng a le teng, u se ke oa potlakela ho tšoaea motho eo liphoso. Empa u ka botsa ngoana oa re:

• “Ebe u nahana ke hobane’ng ha motho eo a ne a u khalemela?”

• “U bona eka u ka lokisa hokae?”

• “U bona eka u tla etsa’ng ha u ka hlaheloa ke ntho e tjee hape?”

U se ke oa lebala hore haeba ngoana oa hao a lumela ha a khalemeloa, taba eo e tla mo tsoalla namane e tšehali hona joale le ha a se a le moholo.