Boikhohomoso bo ka etsa hore re be le khethollo. Motho ea ikhohomosang o inka e le motho oa bohlokoa ho feta kamoo ho leng kateng. O inka a phahametse batho ba bang ’me ha a sheba batho bao a sa tšoaneng le bona o nka a ba phahametse. Mang kapa mang a ka oela lerabeng lena. Encyclopædia Britannica e re: “Litsong tse ngata batho ba nka ba phahametse ba bang ho ea ka hore na ba ja eng, ba apara eng, ba tloaetse ho etsa eng, ba lumela eng kapa hore na ba nka eng e le ea bohlokoa, joalo joalo.” Re ka qoba mokhoa oo o bokooa oa ho nahana joang?

‘Ka ho ikokobetsa kelellong le nke hore ba bang ba le phahametse.’​—BAFILIPI 2:3.

Temana ee e bolela’ng? E le hore re qobe boikhohomoso re lokela ho sebetsa ka thata hore re be le boikokobetso. Boikokobetso bo re thusa ho hlokomela hore maemong a mang batho ba re phahametse. Ha ho na motho ea phahametseng ba bang ka ntho e ’ngoe le e ’ngoe.

Nahana ka mohlala oa Stefan. O holetse naheng ea bokomonisi, leha ho le joalo ha nako e ntse e ea o ile a khona ho hlola khethollo eo a neng a e-na le eona ho batho ba sa hlaheng linaheng tsa bokomonisi. O re: “Ke lumela hore ho bohlokoa ho nka ba bang  ba u phahametse haeba u batla ho loantša khethollo. Ha ke tsebe lintho tsohle. Nka ithuta ho hong ho motho e mong le e mong.”

Leka hore ha u icheba u se ke oa bona lintho tse ntle feela empa u bone le mefokolo ea hao. Amohela hore batho ba bang baa u hloa linthong tse itseng. U se ke oa nka hore batho ba sehlotšoana se itseng ba na le mefokolo e tšoanang kaofela.

Ho e-na le ho etsa liqeto tse fosahetseng ka sehlopha se itseng, ak’u ipotse pele:

• ‘Na lintho tseo ke sa li rateng ka motho eo ehlile li mpe kapa empa li fapane le tseo ke li tloaetseng?’

• ‘Na motho eo a ka khona ho bona moo ke haellang teng?’

• ‘Ke lintho life tseo motho eo a ntlholang ka tsona?’

Haeba u ka araba lipotso tsena ka botšepehi, seo se ka ’na sa u thusa ho hlola khethollo hape u ka ’na oa hlokomela lintho tseo u li ratang ka motho eo.