METSE e mengata ea mehleng ea khale e ne e sirelelitsoe ka mabota a phahameng. Haeba sera se ne se ka thuha esita le karolo e nyenyane feela ea lebota, motse oohle o ne o e-ba kotsing. ’Mele oa hao o tšoana le motse o sirelelitsoeng ka mabota. Tsela eo u hlokomelang masole a hao a ’mele ka eona e ka etsa hore u kule kapa u se ke oa kula. Nahana ka lintho tse hlano tse ka u bakelang mafu le hore na u ka itšireletsa joang khahlanong le ’ona.

KOTSI: Metsi a litšila a na le likokoana-hloko, kahoo a ka u bakela mafu.

U KA ITŠIRELETSA JOANG?: U ka itšireletsa ka hore u noe metsi a tsoang mohloling o hloekileng. Haeba u tseba kapa u belaella hore metsi ao u a sebelisang ha aa hloeka, u ka a hloekisa lapeng e le hore a se ke a u kulisa. * Boloka metsi ka nkhong e koetsoeng ’me u a khe ka lebekere le mohele o motelele kapa u a khe pompong. U se ke ua kenya matsoho ka metsing a hloekileng. Haeba ho khoneha, lula sebakeng se nang le litšebeletso tsa likhoerekhoere le metsi a hloekileng.

KOTSI: Lijo tseo u li jang li ka ba le likokoana-hloko.

U KA ITŠIRELETSA JOANG?: Lijo tse sa hloekang li ka ’na tsa bonahala li le ntle li bile li loketse ho jeoa. Kahoo, itloaetse ho hlatsoisisa litholoana le meroho. Netefatsa hore likhaba, litafole le matsoho a hao a hloekile ha u lokisetsa ho pheha lijo le ha u li ngoatha. Lijo tse ling li lokela ho phehoa ka mocheso o itseng e le hore likokoana-hloko tse ho tsona li shoe. Lijo tse lahlileng ’mala le tse nkhang hampe kapa tse nang le tatso e sa tloaelehang ke pontšo ea hore li na le likokoana-hloko. Kenya lijo tseo le sa li jang ka forijing ka pele kamoo ho ka khonehang. U se ke ua etsetsa batho lijo ha u kula. *

KOTSI: Likokoanyana tse ling li na le likokoana-hloko ’me li ka u tšoaetsa ka tsona.

U KA ITŠIRELETSA JOANG?: Etsa sohle seo u ka se khonang hore u qobe likokoanyana tse jereng mafu ka hore u lule ka tlung ha li le kantle kapa u apare liaparo tse matsoho a matelele le marikhoe a matelele. Robala ka har’a nete e nang le moriana oa likokoanyana kapa u sebelise moriana o li lelekang. U se ke ua beha metsi a sa koaheloa kaha menoang e ka qhotsetsa ka ho ’ona. *

KOTSI: Likokoana-hloko tse phelang ka har’a liphoofolo li ka u kulisa. Haeba u lonngoe kapa u ngoapuoe ke phoofolo, kapa u thetsitse mantle a eona, u ka ba kotsing ea ho ba le mafu.

U KA ITŠIRELETSA JOANG?: Batho ba bang ba boloka liphoofolo kantle e le hore ba se ke ba li thetsa hangata. Hlapa matsoho ha u qeta ho tšoara phoofolo e ruuoeng lapeng ’me u se ke ua tšoara liphoofolo tse hlaha. Haeba u lonngoe kapa u ngoapuoe ke phoofolo, hlatsoa leqeba ebe u ea ngakeng kapa u batle thuso ea tsa bongaka. *

KOTSI: Likokoana-hloko tse ling li ka fetisetsanoa ha motho a hohlola kapa a thimola. Li ka boela tsa fetisetsanoa ha batho ba thetsana ka letlalo, ba hakana kapa ba lumelisana ka matsoho. Likokoana-hloko tse tsoang bathong li ka lula linthong tse kang liloko tsa mamati, moo ho itšoarelletsoang, lifounong, lirimoutung kapa lik’hompheutheng.

U KA ITŠIRELETSA JOANG?: U se ke ua arolelana le batho ba bang lintho tse kang mahare, borashe ba meno le lithaole. U se ke ua tšoara lintho tse kang, bolalu, mamina kapa mali a phoofolo kapa a motho. Ho lula u hlapa matsoho khafetsa ho ka u thusa hore u qobe mafu. Ha e le hantle, ke tsela e molemo ka ho fetisisa ea ho fokotsa ho ata ha mafu.

Haeba ho khoneha, lula hae haeba u kula. Mekhatlo ea thibelo ea mafu e khothalletsa hore ha motho a hohlola kapa a thimola, a sebelise pampiri kapa sephaka, eseng letsoho.

Bibele e re: “Ea masene ke ea boneng tlokotsi ’me a ipata.” (Liproverbia 22:3) Mantsoe ao a ka re thusa haholo-holo nakong ena eo mafu a leng mangata hakana. Kahoo, e-ea litsing tsa bophelo e le hore u rue tsebo e tla u thusa hore u itšireletse khahlanong le mafu. Matlafatsa masole a hao a ’mele e le hore u fokotse menyetla ea ho tšoaroa ke mafu!