Na U sa Hopola?

Na u ananetse ho bala litokollo tsa morao tjee tsa Molula-Qhooa? Kahoo, bona hore na u ka arabela lipotso tse latelang:

• Ke hobane’ng ha re ka kholiseha hore phethahatso ea boprofeta ba “maholimo a macha le lefatše le lecha” bo ho Esaia 65:17-19 e ne e sa ame feela ho khutla ha Bajuda kholehong?

Hobane moapostola Petrose le moapostola Johanne, ha ba ngola lekholong la pele la lilemo C.E., ba ile ba bolela phethahatso ea nakong e tlang, e amang litlhohonolofatso tseo e leng hona li tla tla. (2 Petrose 3:13; Tšenolo 21:1-4 )—4/15, leqepheng la 10-12.

• Ebe ke eng e ka ’nang ea e-ba motheo oa litšōmo tsa Bagerike ba boholo-holo tsa melingoana e mabifi?

E ka ’na eaba ke ho khabisoa le ho sothoa ha ’nete ea hore pele ho Moroallo mangeloi a mang a ile a iphetolela ’meleng ea batho ’me a phela bophelo bo mabifi le ba boitšoaro bo bobe lefatšeng. (Genese 6:1, 2)—4/15, leqepheng la 27.

• Likotsi tse ling tseo Bakreste ba hōlileng tsebong ba ka ikalosang ho tsona machatong ke life?

Ke habohlokoa ho qoba mokete o lerata, o ka ’nang oa bakoa ke ho noa joala ka bolokolohi bo boholo le motjeko o hlaha, oo ho oona ho tjekeloang ’mino o lerata. Ntle leha ho boletsoe hore moketeng ho mengoa bohle, ba sa mengoang ha baa lokela ho ba teng. Monyali o lokela ho tiisa hore Bakreste ba nang le boikarabelo ba tla ba teng ho fihlela mokete o qhalana ka nako e loketseng.—5/1, leqepheng la 19-22.

• Ho fetisoa maikutlo afe ho Pesaleme ea 128:3 (NW) ha ho thoe bara ke “mahlōmela a lifate tsa mohloaare” a pota-potileng tafole ea monna?

Hangata letlōbō le hlomela tlaase kutung ea sefate sa mohloaare. Ha kutu e khōlō ea sefate se tsofetseng e se e sa behe haholo, letlōbō le ka ’na la fetoha likutu tse tiileng tse e pota-potileng. Ka tsela e tšoanang, batsoali ba ka thabela ho ba le bana ba behang litholoana ba sebeletsang Jehova hammoho le bona.—5/15, leqepheng la 27.

• Melemo eo bana ba e fumanang ka tikoloho e hahang ea lelapa ke efe?

E rala motheo oa hore ba be le maikutlo a matle ka bolaoli, ba ananele litekanyetso tse loketseng le likamano tse thabisang le ba bang. Tikoloho e joalo e ka boela ea ba thusa ho hlaolela setsoalle le Molimo.—6/1, leqepheng la 18.

• Naheng e ’ngoe ea Bochabela bo Hōle, ho ile ha etsoa’ng ho khothalletsa maikutlo a hore Bakreste bohle ke bara ba motho?

Litho tsa liphutheho tsohle li ile tsa khothalletsoa hore li se ke tsa bitsa ba bang ba itseng ka mabitso a tlhompho. Ho e-na le hoo, bohle ba lokela ho bitsana bara ba motho.—6/15, leqepheng la 21, 22.

• Na Lipaki tsa Jehova li amohela meriana e entsoeng ka mali?

Re lumela hore taelo ea Bibele e reng ‘le ile mali’ e hanela tšelo ea mali a feletseng kapa likarolo tse khōlō tsa ’ona (plasma, lisele tse khubelu, lisele tse tšoeu le liplatelete). (Liketso 15:28, 29) Tabeng ea likaroloana tse fumanoang likarolong tse khōlō, Mokreste ka mong o iketsetsa qeto e le eena, a ntse a hopola se boleloang ke Bibele le kamano ea hae le Molimo.—6/15, leqepheng la 29-31.

• Na ho hlile ho bonolo ho ba le khotso ea kelello kajeno?

E. Ka Bibele, Jesu Kreste o tataisetsa batho tseleng ea borapeli bo hloekileng le khotsong e hlalositsoeng ho Esaia 32:18. Ho feta moo, ba fumanang khotso e joalo ba lebelletse ho thabela khotso ea kamehla lefatšeng phethahatsong ea Pesaleme ea 37:11, 29.—7/1, leqepheng la 7.

• George Young o bile le karolo efe historing ea kajeno ea puso ea Molimo?

Ho tloha ka 1917, o ile a jala leseli la litaba tse molemo tsa ’Muso linaheng tse ngata. Bosebeletsi ba hae bo ile ba mo isa hohle Canada, lihlekehlekeng tsa Caribbean, Brazil le linaheng tse ling Amerika Boroa, Amerika Bohareng, Spain, Portugal, Soviet Union ea mehleng le United States.—7/1, leqepheng la 22-7.

• Bakorinthe ba Pele 15:29 e bolela’ng ha e bua ka ba bang e le ‘ba kolobetsoang ka morero oa ho ba ba shoeleng’?

Taba ke hore ha Bakreste ba tlotsoa ka moea o halalelang, ba kenngoa tseleng ea bophelo e isang lefung la bona le tla lateloa ke ho tsohela bophelong ba leholimo.—7/15, leqepheng la 17.

• Moapostola Pauluse o ne a etsa’ng nakong e ’nileng ea hlalosoa e le lilemo tseo ho sa buuoeng letho ka eena?

E ka ’na eaba o ne a thusa ho theha kapa ho matlafatsa liphutheho Syria le Cilicia. Mathata a mangata a boletsoeng ho 2 Bakorinthe 11:23-27 a lokela a be a etsahetse nakong ena, ho bontšang hore o ne a tsoela pele ka bosebeletsi bo mafolofolo.—7/15, leqepheng la 26, 27.

• Ke eng se ka re thusang ho ba ba itekanetseng linthong tseo re li lebeletseng?

Hopola hore Jehova oa utloisisa. Thapelo e lebisoang ho eena e ka re thusa ho tsitsisa monahano oa rōna, ’me e bontša boinyenyefatso. Thuso e ’ngoe ke ho fumana maikutlo a macha ka ho bua le motsoalle ea hōlileng tsebong.—8/1, leqepheng la 29, 30.