Lipotso Tse Tsoang ho Babali

Ke hobane’ng ha Phetolelo ea Lefatše le Lecha ho 2 Petrose 3:13 e bua ka “maholimo [ka bongateng] a macha le lefatše le lecha,” empa Tšenolo 21:1 e bolela esale pele ka “leholimo [ka bonngoeng] le lecha le lefatše le lecha”?

Ha e le hantle hona ke makolopetso a ho ngoloa ha lipuo tsa pele. Ha ho bonahale ho e-na le moelelo leha e le ofe o khethehileng o fetolang se boleloang.

Nahana pele ka Mangolo a Seheberu. Tabeng e ngotsoeng ea puo ea pele, kamehla lentsoe la Seheberu sha·maʹyim, le fetoletsoeng e le “(ma)leholimo,” le ka bongateng. Ho ba ha lona ka bongateng ho bonahala ho sa bontše bongata ba bokhabane, empa ho bontša khopolo ea bongata “bo atolohelang sebakeng se itseng,” kapa khopolo ea “ntho e feletseng e entsoeng ka likarolo kapa lintlha tse se nang palo tse arohaneng.” Sena sea utloahala hobane maholimo a sebele a atolohela hōle le lefatše ka nģa tsohle ’me a akarelletsa linaleli tse limilione tse likete. Ha sha·maʹyim e etelloa pele ke lereho-lekhethi, hoo e batlang e le ka ho sa fetoheng Phetolelo ea Lefatše le Lecha e e fetolela e le “maholimo,” joaloka ho Esaia 66:22. Ha sha·maʹyim e hlaha e se na lereho-lekhethi, e ka fetoleloa ka bonngoeng (“leholimo,” joaloka ho Genese 1:8; 14:19, 22; Pesaleme ea 69:34) kapa ka bongateng (“maholimo,” joaloka ho Genese 49:25; Baahloli 5:4; Jobo 9:8; Esaia 65:17).

Ho Esaia 65:17 le 66:22, lentsoe la Seheberu bakeng sa maholimo le ka bongateng, ’me phetolelo e sa fetoheng e khethiloeng ke “maholimo a macha le [kapa] lefatše le lecha.”

Lentsoe la Segerike ou·ra·nosʹ le bolela “leholimo,” ’me ka bongateng ou·ra·noiʹ e bolela “maholimo.” Hoa thahasellisa hore ebe bafetoleli ba Septuagint ea Segerike ba ile ba sebelisa mofuta o ka bonngoeng ho Esaia 65:17 le 66:22.

Joale ho thoe’ng ka makhetlo a mabeli ao polelo “leholimo le lecha [kapa maholimo] le lefatše le lecha” e sebelisitsoeng ka ’ona Mangolong a Segerike a Bakreste?

Ho 2 Petrose 3:13, moapostola o sebelisitse mofuta o ka bongateng oa Segerike. Pele ho moo (temaneng ea 7, 10, 12), o ile a bua ka “maholimo” a teng hona joale a khopo, a sebelisa mofuta o ka bongateng. Kahoo ha aa ka a fetoha ha a sebelisa mofuta o ka bongateng temaneng ea 13. Ho feta moo, ho bonahala a ne a qotsa ho Esaia 65:17 ea pele, moo Seheberu se leng ka bongateng, joalokaha ho 2 Petrose 2:22, a ile a qotsa tabeng e ngotsoeng ea Seheberu ea Liproverbia 26:11. Kahoo Petrose o ile a bua ka “maholimo [ka bongateng] a macha le lefatše le lecha tseo re li letetseng ho ea ka tšepiso ea hae.”

Ho fapana hanyenyane le sena, ho Tšenolo 21:1, moapostola Johanne ka ho hlakileng o ile a sebelisa phetolelo ea Esaia 65:17 ea Septuagint, eo joalokaha ho boletsoe, e nang le lentsoe la Segerike bakeng sa “maholimo” le le ka bonngoeng. Kahoo seo Johanne a se ngotseng se ne se re: “Ka bona leholimo [ka bonngoeng] le lecha le lefatše le lecha; etsoe leholimo la pele le lefatše la pele li ne li fetile.”

Ana ke makolopetso a ho ngoloa ha puo a amanang le phetolelo. Ho hlokahala hore re boele re bolele hore ha ho bonahale ho e-na le phapang moelelong ha motho a bala kapa a bua ka “maholimo a macha” kapa “leholimo le lecha.” Tšebeliso ea mantsoe ana ka bobeli e na le moelelo o tšoanang.

[Tlhaloso ea Moo Setšoantšo se Nkiloeng Teng e leqepheng la 31]

Stars: Frank Zullo