Thuto e Fumanoang Sefateng sa Palema
Thuto e Fumanoang Sefateng sa Palema
“SERITI se khahlehang le se hlollang ka botle.” Ke kamoo encyclopedia e ’ngoe ea Bibele e hlalosang sefate sa palema se behang litholoana kateng. Mehleng ea Bibele le kajeno, lifate tsa palema tse behang litholoana li khabisa Phula ea Nile ea Egepeta, ’me li fana ka moriti o khathollang libakeng tse nonneng tse teetsoeng hare ke Lehoatata la Negeb.
Joaloka mefuta e mengata ea lifate tsa palema, sefate sa palema se behang litholoana se eme se otlolohile ka tsela e makatsang. Tse ling tsa tsona li ba bolelele ba limithara tse 30 ’me li tsoela pele ho beha litholoana ka lilemo tse 150. E, sefate sa palema se behang litholoana se setle haholo ebile se beha litholoana ka mokhoa o makatsang. Selemo se seng le se seng se beha masihla a mangata a litholoana. Lesihla le le leng feela le ka ba le litholoana tse fetang 1 000. Ha se bua ka litholoana tsena, setsebi se seng se ile sa ngola sa re: “Ba . . . ileng ba latsoa litholoana tse seng li omme feela, tse kentsoeng ka har’a liphutheloana lifensetereng tsa mabenkele, ho hang ha ba tsebe kamoo litholoana tsena li hlabosang kateng ha li sa tsoa khuoa.”
Ka mokhoa o loketseng, Bibele e tšoantša batho ba bang le lifate tsa palema. E le hore e ka ba ea khahlisang mahlong a Molimo, joaloka sefate sa palema se behang litholoana, motho e lokela ho ba ea lokileng ’me a tsoele pele ho hlahisa mesebetsi e metle. (Matheu 7:17-20) Ka lebaka lena, litšoantšo tse fatiloeng majoeng tsa lifate tsa palema li ile tsa sebelisoa ho khabisa tempele ea Solomone hammoho le tempele ea ponong ea Ezekiele. (1 Marena 6:29, 32, 35; Ezekiele 40:14-16, 20, 22) Ka tsela ena, e le hore borapeli ba hae e ka ba bo amohelehang ho Molimo, motho o lokela ho ba le litšobotsi tse lakatsehang tsa sefate sa palema se behang litholoana. Lentsoe la Molimo lea hlalosa: “Ea lokileng o tla hlahisa lithunthung joaloka sefate sa lipalema.”—Pesaleme ea 92:12.