Bohloeki ha e le Hantle bo Bolela’ng?
Bohloeki ha e le Hantle bo Bolela’ng?
KA LEBAKA la litšila tse tšosang tse neng li le Europe le United States lekholong la lilemo la bo18 le la bo19, baromuoa ba mehleng eo ba ne ba ruta seo ho ka thoeng e ne e le “thuto ea motheo ea bohloeki.” Thuto ena e ne e tšoantša litšila le sebe, ’me ho ne ho boleloa hore bohloeki bo atametsa motho haufi le Molimo. Mohlomong lena ke lona lebaka le ileng la tumisa polelo ena e amoheloang e le ’nete e reng “Bohloeki bo haufi le bomolimo.”
Boikutlo bona bo ile ba amoheloa ke Salvation Army, e qaliloeng ke William le Catherine Booth. Ho ea ka buka e bitsoang Health and Medicine in the Evangelical Tradition, le leng la mapetjo a bona a pele le ne le re: “Sesepa, Sopho le Poloko.” Ka mor’a moo, ha Louis Pasteur le ba bang ba fane ka bopaki bo sa belaetseng ba kamano e teng pakeng tsa bokuli le libaktheria, sena se ile sa eketsa tšusumetso ea hore ho be le mekhatlo ea bophelo bo botle e ntlafalitsoeng le e thehiloeng tsebong ea saense.
E meng ea mehato e ileng ea nkuoa hang-hang e ne e akarelletsa hore motho ea fanang ka bopaki lekhotleng la linyeoe a se ke a hlola a aka Bibele le hore lebekere la ho noa la bohle le felisoe likolong le boemelong ba literene. Ho ile ha etsoa le matsapa a hore senoelo se neng se sebelisoa litšebeletsong tsa bolumeli se se hlole se sebelisoa ’me motho e mong le e mong
a fuoe ka komiki ea hae. E, bo-pula-maliboho bao ba pele ho bonahala ba bile le katleho e khōlō ho fetoleng monahano oa batho ka bohloeki. Boitšoaro ba batho bo ile ba fetoha haholo hoo mongoli e mong a ileng a bitsa phello eo “ho ratana le bohloeki.”Leha ho le joalo, kamoo ho bonahalang kateng, “ho ratana le bohloeki” hona e ne e le moritaoke feela. Kapele ka mor’a moo, bahoebi ba ile ba fetola sesepa se tloaelehileng sehlahisoa sa ho iketsa motle. Baphatlalatsi ba masene ba ile ba susumelletsa bareki ho lumela hore ho itlhatsoa ka lintho tse itseng ho ne ho tla etsa hore ea li sebelisang a hlahelle ka mahetla har’a batho ba bang hoo ba neng ba tla tsoa pelo ke eena. Thelevishene e ntšetsa pele ho lora hona. Ha ho mohla batho ba atlehileng le litjaka tse bontšoang liphatlalatsong tsa papatso le ba hlahellang lipaleng tse tsoelang pele ba kileng ba bonoa ba hloekisa ntlo, ba fiela lebala, ba tšolla lithōle, kapa ba tlosa mantle a likatse le lintja tsa bona.
Ho na le ba bolelang hore ba ea mosebetsing hore ba be le chelete ea ho lefa likoloto, athe mosebetsi oa lapeng kapa oa ho hloekisa oona ha o na chelete. ’Me kaha ha ba lefuoe letho, ba ke ke ba hlokomela tikoloho. Phello e ’ngoe ea sena ke hore batho ba bang kajeno ba nahana hore bohloeki ke feela ho hloeka ’meleng.
Maikutlo a Molimo ka Bohloeki
Ha ho pelaelo hore boiteko ba pele ba ho ruta bohloeki ha boa ka ba thusa ho ntlafatsa maemo a batho a bophelo. Ebile e le ka nepo, hobane bohloeki ke tšobotsi e simolohileng ho Molimo ea halalelang le ea hloekileng, Jehova. O re ruta hore re ithuise molemo ka hore re be ba halalelang le ba hloekileng litseleng tsohle tsa rōna.—Esaia 48:17; 1 Petrose 1:15.
Jehova Molimo ke mohlala tabeng ena. Bohloeki hammoho le litšoaneleho tse ling tsa hae tse sa bonahaleng, bo ka bonoa ka ho hlaka pōpong ea Molimo e bonahalang. (Baroma 1:20) Re ka bona hore pōpo ka boeona ha e bake tšilafalo e sa feleng. Lefatše hammoho le letoto la lona la lintho tse phelang le tikoloho ea tsona le itlhoekisa ka mokhoa o hlollang, ’me le reretsoe bophelo bo botle le bo hloekileng. Mosebetsi o hloekileng hakana o ne o ka etsoa feela ke Moqapi ea kelello e hloekileng. Ka lebaka leo re ka phetha ka hore barapeli ba Molimo ba lokela ho hloeka litšobotsing tsohle tsa bophelo ba bona.
Litšobotsi Tse ’nè Tsa Bohloeki
Bibele e tsebahatsa litšobotsi tse ’nè tsa bohloeki tseo barapeli ba Molimo ba lokelang ho li phehella. A re ke re hlahlobeng e ’ngoe le e ’ngoe ea tsona.
Moeeng. Bohloeki bona bo ka nkoa e le ba bohlokoa ka ho fetisisa hobane bo amana le menyetla ea motho ea bophelo bo sa feleng. Leha ho le joalo, ena ke tšobotsi e hlokomolohuoang ka ho fetisisa ea bohloeki. Ha re toba taba, ho hloeka moeeng ho bolela ho qoba ho tlōla meeli eo Molimo a e behileng pakeng tsa borapeli ba ’nete le ba bohata, hobane Molimo o nka mofuta o mong le o mong oa borapeli ba bohata o le litšila. Moapostola Pauluse o ile a ngola a re: “‘Tsoang har’a bona, ’me le ikarole,’ ho bolela Jehova, ‘le khaotse ho ama ntho e sa hloekang’; ‘’me ke tla le amohela.’” (2 Bakorinthe 6:17) Morutuoa Jakobo le eena o toba taba ntlheng ena, ha a re: “Mofuta oa borapeli o hloekileng le o sa silafalang ponong ea Molimo le Ntate oa rōna ke ona: . . . hore motho a ipoloke a se na letheba lefatšeng.”—Jakobo 1:27.
Ka ho hlakileng Molimo o ile a bontša hore o nyatsa ha ho tsoakoa borapeli ba bohata le borapeli ba hae bo hloekileng. Hangata borapeli ba bohata bo kopanyelletsa litloaelo tse litšila, melimo le litšoantšo tse nyonyehang. (Jeremia 32:35) Kahoo, Bakreste ba ’nete ba khothalletsoa ho qoba litšebelisano life kapa life le borapeli bo litšila.—1 Bakorinthe 10:20, 21; Tšenolo 18:4.
Boitšoarong. Le hona mona, Molimo o fana ka phapang e hlakileng pakeng tsa ntho e hloekileng le e litšila. Ka kakaretso, batho ba joalokaha ho boletsoe ho Baefese 4:17-19: ‘Ba lefifing likelellong, ’me ba arohile bophelong ba Molimo . . . Ba feletsoe ke kutlo eohle ea boitšoaro, ba inehetse boitšoarong bo hlephileng ho sebetsa ho se hloeke ha mofuta o mong le o mong ka meharo.’ Boitšoaro bo litšila joalo bo itlhahisa ka litsela tse ngata, tse bonahalang le tse poteletseng, ke kahoo Bakreste ba lokelang ho itebela.
Barati ba Molimo baa tseba hore bootsoa, bosodoma, ho kopanela liphate pele ho lenyalo le ho shebella litšoantšo tsa bootsoa ke ho tlōla melao e hloekileng ea Jehova ea boitšoaro. Leha ho le joalo lipontšo tsa litloaelo tsena li atile haholo boithabisong le lifesheneng. Ka lebaka leo Bakreste ba lokela ho itebela khahlanong le litšekamelo tse kang tsena. Ha motho a e-ea libokeng tsa Bokreste kapa meketjaneng ea boithabiso a apere liaparo tse khutšoanyane haholo tse bonaletsang o senola ’mele ho sa hlokahale ’me o bontša hore o theotse boitšoaro ba hae. Ntle le ho tlisa monahano o litšila oa lefatše ka har’a mokhatlo oa Bokreste, ho apara ka tsela eo ho ka ’na ha etsa hore ba bang ba be le menahano e litšila. Ena ke karolo eo Bakreste ba lokelang ho sebetsa ka thata ho eona e le hore ba ka bontša “bohlale bo tsoang holimo.”—Kelellong. Kelello ea motho ha ea lokela ho ba polokelo ea menahano e litšila. Jesu o ile a lemosa ka monahano o litšila ha a ne a re: “E mong le e mong ea ntseng a tsoela pele ho sheba mosali e le hore a be le takatso e matla bakeng sa hae o se a febile le eena ka pelong ea hae.” (Matheu 5:28; Mareka 7:20-23) Mantsoe ana a sebetsa ka ho lekana tabeng ea ho shebella lifilimi le litšoantšo tsa bootsoa, ho bala libuka tse buang ka liketso tse litšila tsa ho kopanela liphate le ho mamela mantsoe a ’mino a fetisang maikutlo a litšila. Ka lebaka leo, Bakreste ba lokela ho qoba ho itšilafatsa ka ho bulela menahano e litšila sebaka e ka bakang puo le liketso tse sa hloekang le tse sa halaleleng.—Matheu 12:34; 15:18.
’Meleng. Ka Bibeleng khalalelo le bohloeki ’meleng li amana haufi-ufi. Ka mohlala, Pauluse o ile a ngola: “Baratuoa, a re itlhatsoeng litšila tsohle tsa nama le tsa moea, re phethahatse khalalelo ka ho tšaba Molimo.” (2 Bakorinthe 7:1) Ka lebaka leo, Bakreste ba ’nete ba lokela ho leka ka matla ho boloka ’mele ea bona, mahae a bona le tikoloho ea bona li hloekile ebile li le makhethe, ho latela maemo. Esita le moo metsi a ho hlatsoa kapa a ho hlapa a haellang, Bakreste ba lokela ho etsa sohle se matleng a bona hore ba lule ba hloekile ’me ba shebahala.
Ho hloeka ’meleng ho tla thibela le tšebeliso eohle ea koae, ho noa lino tse tahang ho feta tekanyo le tšebeliso eohle e mpe ea lithethefatsi, e silafatsang le e ntšang ’mele kotsi. Molisa eo ho buuoang ka eena Sefeleng sa Lifela o ne a thabela monko o monate oa liaparo tsa moroetsana oa Moshulame. (Sefela sa Lifela 4:11) Ho hloeka ’meleng ke ntho e lerato, hobane ha re batle ho nkhela ba re potolohileng ka menkho e mebe. Linonetso li ka nkha hamonate, empa ha lia lokela ho nka sebaka sa ho hlapa kamehla le liaparo tse hloekileng.
Ho ba le Maikutlo a Leka-lekaneng
Tabeng ea ho hloeka ’meleng, batho ba ka tlōla meeli. Ka lehlakoreng le leng, ho chesehela bohloeki ka ho feteletseng ho ka etsa hore re se ke ra thabela bophelo. Ho ka boela ha re jella nako e ngata ea bohlokoa. Ka lehlakoreng
le leng, ho ka hlokahala chelete e ngata hore ho lokisoe matlo a litšila le a mahleke. Maemong ana a feteletseng re ka fumana tsela e sebetsang le e leka-lekaneng ea ho boloka mahae a rōna a hloekile ebile a le makhethe.Le se ke la tlala ho tlōla. Hangata ho thata ho hloekisa mahae kapa likamore tse nang le thepa e ngata ho tlōla, le litšila li ke ke tsa fumaneha habonolo tikolohong e petetsaneng joalo. Ho bonolo ho hloekisa mahae a boemo bo leka-lekaneng le a sa tlalang ho tlōla. Bibele e buella haholo mokhoa oa bophelo o bonolo: “Ha re e-na le lintho tsa ho iphelisa le liaparo le tšireletso, re tla li khotsofalla.”—1 Timothea 6:8.
Le boloke le le makhethe. Ho boloka lehae le hloekile ke boikarabelo ba e mong le e mong ea lulang ho lona. Mahae a seng makhethe hangata a qala e le likamore tse litšila. Ho ba makhethe ho bolela hore ntho e ’ngoe le e ’ngoe e sebakeng sa eona se loketseng. Ka mohlala, liaparo tse litšila ha lia lokela ho behoa fatše ka kamoreng. Ntho ea bohlokoa le ho feta, lintho tsa ho bapala le lithulusi tse tlohetsoeng hohle li ka ba kotsi haholo. Likotsi tse ngata tse etsahalang malapeng li bakoa ke bohlasoa.
Ho hlakile hore bohloeki le tsela ea Bokreste ea bophelo lia tsamaisana. Malebana le tsela ea bomolimo ea bophelo, moprofeta Esaia o bua ka “Tsela ea Khalalelo.” ’Me o eketsa ka monahano o fatang maikutlo ha a re “ea sa hloekang a ke ke a feta ho eona.” (Esaia 35:8) E, ho hlaolela mekhoa e metle ea bohloeki hona joale ho fana ka bopaki bo tiileng ba tumelo ea rōna tšepisong ea Molimo ea hore haufinyane o tla tloha a hloma paradeise e hloekileng lefatšeng. Ka nako eo, likarolong tsohle tsa lefatše lena le letle, batho bohle ba tla tlotlisa Jehova Molimo ka hore ba sebetse tumellanong le litekanyetso tsa hae tse phethahetseng tsa bohloeki.—Tšenolo 7:9.
[Setšoantšo se leqepheng la 6]
Ho boloka lehae le hloekile ke boikarabelo ba e mong le e mong ea lulang ho lona
[Setšoantšo se leqepheng la 7]
Lefatše lena le itlhoekisa ka mokhoa o hlollang