Ho Hlokahala Bokae ho ba le Letsoalo le Hloekileng?

“’MUSO o Laeloa ho Amohela R$20 000.” Sehlooho sena se makatsang se sa tsoa hlaha koranteng ea Brazil e bitsoang Correio do Povo. Sehloohong sena ho ne ho phetoa taba ea Luiz Alvo de Araújo, motsamaisi oa poso oa sebakeng seo, ea neng a rekiselitse ’muso setša. Ka mor’a ho saenela setša sa hae, Luiz o ile a makalla ho fumana hore o lefiloe R$20,000 (hoo e ka bang R79 000) ka holimo ho chelete ea theko eo ho lumellanoeng ka eona!

E ile ea e-ba bothata ho khutlisetsa chelete eo e ka holimo. Ka mor’a ho ea ka makhetlo a mangata makaleng a ’muso, Luiz o ile a eletsoa hore a hire ’muelli oa molao ’me a lokise taba eo ka lekhotleng. Moahloli ea ileng a ahlola ’muso hore o amohele chelete eo le hore o lefe litšenyehelo o ile a re: “Ho hlakile hore ho na le motho ea ileng a etsa phoso, ’me ka lebaka la ho lieha ha ’muso, ho ne ho se motho ea tsebang hore na taba ena e ka lokisoa joang. Ke qala ho sebetsana le nyeoe ea mofuta ona.”

Luiz, e mong oa Lipaki tsa Jehova, oa hlalosa: “Letsoalo la ka le koetlisitsoeng ka Bibele le ne le sa ntumelle hore ke boloke seo e neng e se sa ka ka tšoanelo. Ke ne ke lokela ho leka ho khutlisa chelete eo.”

Ba bangata ba ka fumana boikutlo bo joalo bo sa tloaeleha kapa ebile e le boo motho a ke keng a bo utloisisa. Empa Lentsoe la Molimo le bontša hore Bakreste ba ’nete ba nka ho boloka letsoalo le hloekileng e le habohlokoa haholo litšebelisanong tsa bona le balaoli ba phahameng ba lefatše. (Baroma 13:5) Lipaki tsa Jehova li ikemiselitse ho boloka ‘matsoalo a tšepahalang, le ho itšoara ka botšepehi linthong tsohle.’—Baheberu 13:18.