Itebele Khahlanong le Boikhohomoso

MOTHO ea ikhohomosang, mahlong a hae, o moholo, ebile o phahametse batho ba bang. Ka lebaka leo, hangata motho ea joalo o rata botumo le tlhokomelo e fetang e mo tšoanelang ’me o hlompholla ba bang le ho ba nyatsa.

Boikhohomoso bo fapane le boikokobetso. Mantsoe a Segerike le Seheberu a fetoletsoeng e le “ikhohomosa” le “boikhohomoso” a na le moelelo o tšoanang le ho iketsa “ea hlahelletseng ka mahetla,” “ea phahameng,” “ea ka sehloohong,” le “ea tummeng.”

Boemo ba Pelo

Boikhohomoso ke tšobotsi kapa sebōpeho se sebe se phahametseng kelello. Jesu Kreste o ile a bo akarelletsa hammoho le polao, bosholu, bonyefoli le boitšoaro bo bong bo bobe ’me a re lintho tse joalo li tsoa “ka hare, ka lipelong tsa batho.” (Mareka 7:21, 22) Ha a bua ka Jehova, Maria, ’mè oa Jesu oa lefatšeng o ile a re: “O hasantse hohle ba ikhohomosang boikemisetsong ba lipelo tsa bona.” (Luka 1:51) Davida o ile a ipiletsa ho Jehova, a re: “Pelo ea ka ha ea ikhohomosa.”—Pesaleme ea 131:1.

Esita le motho eo pelo ea hae e sa kang ea ikhohomosa tšebeletsong ea Molimo a ka ikhohomosa ka lebaka la ho fumana leruo, matla kapa ka lebaka la botle ba hae, katleho, bohlale kapa lithoriso tsa ba bang. Morena Uzia oa Juda e ne e le motho ea joalo. O ile a busa ka bokhabane ’me a thabela litlhohonolofatso tsa Jehova ka lilemo tse ngata.—2 Likronike 26:3-5.

Empa tlaleho ea Bibele e re: “Leha ho le joalo, hang ha a le matla, pelo ea hae ea ikhohomosa ho fihlela boemong ba ho baka tšenyo, hoo a ileng a etsa ka ho se tšepahale ho Jehova Molimo oa hae ’me a kena ka tempeleng ea Jehova hore a chese libano holim’a aletare ea libano.” (2 Likronike 26:16) Uzia o ile a iphahamisetsa boemong ba ho etsa mesebetsi ea boprista, e leng tokelo eo ka ho khetheha Molimo a neng a e timme marena a Iseraele, a entse hore borena le boprista e be lintho tse arohaneng.

Ka nako e ’ngoe Morena Ezekiase ea molemo, ka nakoana o ile a ba le pelo e ikhohomosang, ’me kamoo ho bonahalang kateng, boikhohomoso ba hae bo ile ba tšoaetsa bafo ba hae. O ne a phahamisitsoe pusong ka lebaka la tlhohonolofatso ea Jehova,  empa o ile a hlōleha ho utloisisa le ho lemoha hore botumo bohle bo ne bo lokela hore ebe bo ile ba lebisoa ho Molimo. Motlalehi ha a ngola ka eena o re: “Empa ho ea ka molemo oo a neng a o etselitsoe Ezekiase ha aa ka a etsa puseletso, kaha pelo ea hae e ile ea ikhohomosa ’me ha halefeloa eena le Juda le Jerusalema.”

Ka lehlohonolo, o ile a hlaphoheloa boitšoarong bona bo kotsi. Tlaleho eo e tsoela pele ho re: “Leha ho le joalo, Ezekiase a ikokobetsa boikhohomosong ba pelo ea hae, eena le baahi ba Jerusalema, ’me Jehova ha aa ka a ba halefela matsatsing a Ezekiase.”—2 Likronike 32:25, 26.

Molimo o Hanyetsa Boikhohomoso

Hase feela hore batho ba tšepahalang ba nyonya ba ikhohomosang empa, ho hobe le ho feta ke hore Jehova Molimo le eena o khahlanong le bona. (Jakobo 4:6) Boikhohomoso ke booatla le sebe, ’me Jehova o hanyetsa ba ikhohomosang e le hore a ba nyenyefatse.—Liproverbia 14:3; 2 Samuele 22:28; Jobo 40:11.

Ha ho pelaelo hore, haeba bo sa lahloe boikhohomoso bo ka baka tšenyo. Sechaba sa boholo-holo sa Moabe, se ileng sa ikakasetsa Molimo le batho ba hae, se ile sa etsoa lefeela. (Esaia 16:6; 25:10, 11) Esita le meloko e leshome ea ’muso oa Iseraele ha ea ka ea qeneheloa ha e e-ba le pelo e ikhohomosang le e manganga.—Esaia 9:8-12.

Ho Itebela Khahlanong le Boikhohomoso

Ka lebaka leo motho o lokela ho ba le leihlo le nchocho ho hanela boikhohomoso ho kena ka pelong ea hae. O lokela ho falimeha ka ho khethehileng haeba a finyeletse katleho nthong leha e le efe kapa haeba a fuoe boemo bo phahameng kapa ba boikarabelo bo eketsehileng. O lokela ho hopola hore “boikakaso bo etella ho oa pele, ’me moea o ikhohomosang o etella ho khoptjoa pele.”—Liproverbia 16:18.

Haeba a lumella boikhohomoso hore bo hōle, bo tla mo laola hoo Jehova a tla mo beha sehlopheng sa batho bao A ba nehellang boemo ba kelello bo sa amoheleheng, ba tšoaneloang ke lefu. (Baroma 1:28, 30, 32) Temoso e joalo ke e loketseng “matsatsing a ho qetela,” hobane, joalokaha moapostola a ile a lemosa, boikhohomoso e ne e tla ba tšobotsi e ’ngoe e khethollang linako tseo tsa ho qetela.—2 Timothea 3:1, 2.

Ho phaella moo, motho ea batlang ho amoheloa ke Molimo o lokela ho qoba ho rorisa ka mokhoa o tlōlisang, hobane ho etsa joalo ho hlaolela boikhohomoso ka ho ba bang. Maele a re: “Monna ea shahlileng ea rorisang motsoalle oa hae ho tlōlisa o alla mehato ea hae letlooa.”—Liproverbia 29:5.

Hase feela hore motho ea rorisang ho tlōlisa o ntša motsoalle oa hae kotsi, empa hape ha a amoheloe ke Molimo. (Liproverbia 26:28) Moapostola Pauluse o ne a le seli hore a qobe ho rorisa ka mokhoa o tlōlisang le boikhohomoso. (1 Bathesalonika 2:5, 6) Le rōna re lokela ho itebela kamehla hore re se hlaolele tšobotsi ena e sa rateheng.