Lipotso Tse Tsoang ho Babali

Ke eng se boleloang ke tlhaloso e ho Baheberu 12:4, e reng: “Le ka mohla ha le e-s’o hanyetse ho fihlela maling”?

Polelo ena e reng “hanyetse ho fihlela maling” e fana ka maikutlo a ho mamella khanyetso ho fihlela lefung, ho tšolla mali a bohlokoa.

Moapostola Pauluse o ne a tseba hore ka lebaka la tumelo ea bona, Bakreste ba bang ba Baheberu ba ne ba se ba ‘ile ba mamella ntoa e khōlō tlas’a litlhokofatso.’ (Baheberu 10:32, 33) Ha a hlalosa seo, ho bonahala eka Pauluse o ne a sebelisa puo ea tšoantšetso ea boikitlaetso bo matla tlhōlisanong ea baatlelete ba Bagerike, e neng e ka kopanyelletsa peiso ea maoto, ho kampana, papali ea litebele, papali ea discus le ho akhela lerumo. Ka ho loketseng, ho Baheberu 12:1, o ile a khothatsa Bakreste-’moho le eena a re: “A re hloboleng boima bo bong le bo bong le sebe se re tšoasang habonolo, ’me a re matheng ka mamello peisong e behiloeng ka pel’a rona.”

Litemaneng tse tharo tse latelang, ho Baheberu 12:4, ho bonahala eka Pauluse o ne a qeta ho etsa papiso ka semathi ’me joale a se a etsa e ’ngoe ka tlhōlisano ea papali ea litebele. (Lipapiso tsena ka bobeli li hlaha ho 1 Bakorinthe 9:26.) Bo-ralitebele ba boholo-holo ba ne ba tlama matsoho le manonyeletso a bona ka marapo. Mohlomong marapo ao a ne a phutheloa “ka loto, tšepe kapa likonopo tsa tšepe, ’me li ne li ntša bo-ralitebele likotsi tse mpe haholo.” Litlhōlisano tse mabifi joalo li ne li lutlisa motho mali, ka linako tse ling li ne li mo bolaea.

Leha ho le joalo, Bakreste ba Baheberu ba ne ba e-na le mehlala e tšoanelehang ea bahlanka ba Molimo ba tšepahalang ba ileng ba mamella mahloriso le ho hlekefetsoa ka tsela e mabifi, esita le ho fihlela lefung, “ho fihlela maling.” Hlokomela kamoo Pauluse a lebisang tlhokomelo ho seo ba tšepahalang ba boholo-holo ba ileng ba feta har’a sona:

“Ba ile ba tlepetsoa ka majoe, ba lekoa, ba sakhoa likoto, ba shoa ka ho bolaoa ka sabole, ba phaila ka matlalo a linku, ka matlalo a lipōli, ha ba ntse ba le bohloking, ba le matšoenyehong, ba le tlas’a tšoaro e mpe.” Ka mor’a moo, Pauluse o ile a bua ka Jesu, Mophethahatsi oa tumelo ea rōna, a re: “O ile a mamella thupa ea tlhokofatso, a sa natse lihlong, ’me o lutse ka letsohong le letona la terone ea Molimo.”—Baheberu 11:37; 12:2.

E, ba bangata ba ile ba ‘hanyetsa ho fihlela maling,’ ka mantsoe a mang, ho fihlela lefung. Ho hanyetsa ha bona e ne e se feela boikitlaetso ba ho loantšana le ho lahleheloa ke tumelo. Ba ile ba tšepahala ha ba hlekefetsoa ka mabifi, ba boloka botšepehi ba bona ho fihlela lefung.

Ba bacha phuthehong ea Jerusalema, mohlomong bao e bileng Bakreste ka mor’a hore mahloriso ao a mabifi a kokobele, ho ne ho se mohla ba kileng ba tjamelana le liteko tse mabifi joalo. (Liketso 7:54-60; 12:1, 2; Baheberu 13:7) Leha ho le joalo, liteko tse nyenyane feela li ne li nyahamisa ba bang ba bona ho tsoela-pele tlhōlisanong; ba ile ba ‘khathala eaba ba felloa ke matla meeeng ea bona.’ (Baheberu 12:3) Ba ne ba lokela ho hatela pele ka matla ho fihlela khōlong e feletseng. Ho etsa joalo ho ne ho tla ba fa matla a ho tiisetsa eng kapa eng e ka hlahang, esita le haeba seo se ne se kopanyelletsa ho otloa ho fihlela lefung.—Baheberu 6:1; 12:7-11.

Bakreste ba bangata ba mehleng ea kajeno ba ‘hanyelitse ho fihlela maling,’ ba bolaoa hobane ba ne ba hana ho sekisetsa Bokreste ba bona. Ho e-na le ho lumella hore mantsoe a Pauluse a ho Baheberu 12:4 a re tšose, re lokela ho a nka e le pontšo ea hore na re ikemiselitse hakae ho lula re tšepahala ho Molimo. Hamorao, lengolong lona leo le eang ho Baheberu, Pauluse o ile a ngola, a re: “A re tsoeleng pele ho ba le mosa o sa tšoanelang, oo ka oona ka ho amohelehang re ka etsetsang Molimo tšebeletso e halalelang ka tšabo ea bomolimo le tšabo e nang le tlhompho.”—Baheberu 12:28.