Liphallelo Bakeng sa Tlala li Tseleng!

U KA ’na ua botsa, ua re: ‘Ke tlala ea mofuta ofe?’ Ke tlala ea lijo tsa moea! Moprofeta oa boholo-holo oa Moheberu o ile a bolela esale pele ka tlala ena, a re: “‘Bonang! Matsatsi aa tla,’ ho bolela ’Musi Morena Jehova, ‘’me ke tla romela tlala naheng, tlala, eseng bakeng sa bohobe, le lenyora, eseng bakeng sa metsi, empa bakeng sa ho utloa mantsoe a Jehova.’” (Amose 8:11) E le ho fokotsa tlala ea moea, litho tse 48 tsa sehlopha sa bo112 tsa Sekolo sa Bibele sa Gileade sa Watchtower, se leng Patterson, New York, li ea linaheng tse fapaneng tse 19 lik’honthinenteng tse hlano le lihlekehlekeng tsa leoatle.

Li ea li hlometse, eseng ka nama ea sebele le lijo-thollo, empa li hlometse ka tsebo, phihlelo le koetliso. Ka likhoeli tse hlano li ile tsa fuoa thuto e matla ea Bibele e reretsoeng ho matlafatsa tumelo ea tsona bakeng sa tšebeletso ea boromuoa linaheng tse ling. Ka la 9 March, 2002, batho ba 5 554 ba neng ba le teng lenaneong la kabo ea mangolo ba ne ba mametse ka thabo.

Lenaneo le ile la buloa ka mafolofolo ke Stephen Lett, ea sebeletsang e le setho sa Sehlopha se Busang sa Lipaki tsa Jehova. O ile a amohela baeti ba bangata ba tsoang likarolong tse fapaneng tsa lefatše ka mokhoa o khethehileng. Ka mor’a moo, o ile a bua ka mosebetsi oa baromuoa bana ba nakong e tlang ’me a sebelisa mantsoe a Jesu a reng, “Le leseli la lefatše.” (Matheu 5:14) Ha a hlalosa o ile a re: ‘Likabelong tsa lōna le tla “khantša” litšobotsi tse sa tšoaneng tsa mesebetsi ea Jehova e hlollang, le nolofaletse ba tšepahalang hore ba bone botle ba Jehova le merero ea hae.’ Mor’abo rōna Lett o ile a khothalletsa baromuoa hore ba sebelise leseli la Lentsoe la Molimo ho pepesa lefifi la lithuto tsa bohata le ho tataisa ba batlang ’nete.

Ho Hlokahala Boikutlo bo Nepahetseng Hore Katleho e be Teng

Ka mor’a mantsoe a selelekela a molula-setulo, Baltasar Perla, eo e leng setho sa Komiti ea Lekala la United States, o ile a fana ka puo ea pele letotong la lipuo tse reretsoeng ho thusa ba abeloang mangolo hore e be baromuoa ba atlehang. O ile a haha taba ea hae sehloohong se reng “E-ba Sebete U be Matla ’me U Nke Bohato.” (1 Likronike 28:20) Morena Solomone oa Iseraele ea boholo-holo o ile a fuoa kabelo e boima ea hore a etse ntho eo ho seng mohla a kileng a e etsa, e leng ho haha tempele Jerusalema. Solomone o ile a fela a nka khato, ’me tempele e ile ea phethoa ka thuso ea Jehova. Ha Mor’abo rōna Perla a sebelisa thuto ea ketsahalo ena ho sehlopha, o ile a re: ‘Le filoe kabelo e ncha ea ho ba baromuoa, ’me ho hlokahala hore le be sebete ’me le be matla.’ Ka sebele liithuti li ile tsa tšelisoa ke ho tiisetsoa hore Jehova a ke ke a li tlohela kapa a li furalla hafeela li lula haufi le eena. Mor’abo rōna Perla o ile a ama lipelo tsa bamameli ha a phetha ka ho bolela sena se mo hlahetseng: ‘Le ka finyella se seholo le le baromuoa. ’Na le lelapa leso re ile ra tlisetsoa ’nete ke baromuoa!’

Sehlooho sa puo e ileng ea fanoa ke Samuel Herd, eo e leng setho se seng sa Sehlopha se Busang, se ne se re,  “Itšetlehe ka Jehova Hore U Atlehe.” Liithuti li kena mosebetsing oa boromuoa, ’me katleho ea tsona e itšetlehile haholo ka kamano ea tsona le Jehova. Mor’abo rōna Herd o ile a li eletsa, a re: ‘Le bokeletse tsebo e ngata ea Bibele ka lithuto tsa lōna Gileade. Le ’nile la amohela ka thabo. Empa, e le hore le atlehe ka sebele, ho tla hlokahala hore le qale ho fana ka seo le ithutileng sona.’ (Liketso 20:35) Baromuoa ba tla fumana menyetla e mengata ea ho etsa sena ha ba ntse ‘ba itšolla’ molemong oa ba bang.—Bafilipi 2:17.

Barupeli ba ne ba tšoaretse liithuti keletso efe pele ba arohana? Mark Noumair o ile a theha sehlooho sa hae ho Ruthe 3:18, “Lula U Khutsitse ho Fihlela U Tseba Kamoo Taba e Tla Fella Kateng.” Ha sebui se sebelisa mohlala oa Naomi le Ruthe, se ile sa khothalletsa ba abeloang mangolo hore ba be le tšepo e feletseng litokisetsong tse entsoeng ke mokhatlo o hlophisitsoeng oa Molimo o lefatšeng le hore ba hlomphe bolaoli bo pusong ea Molimo. Mor’abo rōna Noumair o ile a ama lipelo tsa liithuti ha a re: ‘Ho ka ’na ha e-ba le linako tseo ka tsona u sa utloisiseng lebaka leo qeto e itseng e u amang e entsoeng ka lona kapa u ka ’na ua ba le maikutlo a matla a hore ntho e lokela ho etsoa ka tsela e fapaneng. U tla etsa’ng? Na u tla raoha u inkele litaba matsohong kapa u tla “lula u khutsitse,” u behile  tšepo tataisong ea Molimo, u kholisehile hore hamorao o tla hlahisa lintho tse molemo feela.’ (Baroma 8:28) Ha ho pelaelo hore keletso ea hore ‘ba amehe ka ho ntšetsa pele lithahasello tsa ’Muso, ba amehe ka seo mokhatlo o hlophisitsoeng oa Jehova o se etsang ho fapana le batho,’ e tla tsoela baromuoa ba ka moso melemo likabelong tsa bona tsa libakeng lisele.

Wallace Liverance, eo e kileng ea e-ba moromuoa ’me hona joale a sebeletsa e le morupeli oa Gileade, o ile a fana ka puo e phethang letoto la lipuo tse bulang. Sehlooho sa puo ea hae se ne se re, “Lula U Tsepamisitse Mohopolo, Lula Tšebeletsong ea Molimo.” O ile a bontša hore moprofeta Daniele o ile a lemoha hore ho lopolloa ha Baiseraele kholehong ho ne ho le haufi ka lebaka la ho bona ho oa ha Babylona le ka lebaka la seo Jeremia a neng a se boletse esale pele. (Jeremia 25:11; Daniele 9:2) Daniele o ne a ela hloko kemiso ea Jehova ea nako, ’me sena se ile sa mo thusa hore a lule a tsepamisitse mohopolo ho phethahaleng ha morero oa Molimo. Phapang ke hore Baiseraele ba mehleng ea moprofeta Hagai ba ne ba re: “Nako ha e e-s’o fihle.” (Hagai 1:2) Ba ile ba lebala hore na ba phela linakong life, eaba ba tsepamisa mehopolo mabothobothong a bona le ho ikatlehiseng, ’me ba tlohela mosebetsi oo ba neng ba lopolotsoe Babylona ka lebaka la oona, e leng oa ho tsosolosa tempele. Ha Mor’abo rōna Liverance a phetha o ile a re: “Kahoo, lulang le tsepamisitse mohopolo ka ho hopola morero oa Jehova ka linako tsohle.”

Morupeli oa Gileade, Lawrence Bowen, e ile ea e-ba molula-setulo oa lipuisano tlas’a sehlooho se reng “Jehova o Hlohonolofatsa ba Sebelisang Lentsoe le Phelang.” (Baheberu 4:12) Karolo ena e ne e le ea liphihlelo tsa sehlopha tsa tšimong, ’me e ne e totobatsa kamoo Jehova a hlohonolofatsang ba sebelisang Bibele ha ba bolela le ho ruta. Molula-setulo oa lipuisano o ile a bontša hore Jesu Kreste o behetse basebeletsi bohle ba Molimo mohlala o motle, o ile a re: ‘Jesu o ne a ka bolela e le ’nete hore seo a neng a se ruta e ne e se sa hae, empa o ne a bolela Lentsoe la Molimo.’ Batho ba tšepahalang ba ile ba lemoha ’nete ’me ba nka khato. (Johanne 7:16, 17) Ho sa le joalo le kajeno.

Koetliso ea Gileade e Hlomella Motho Bakeng sa Mosebetsi o Mong le o Mong o Molemo

Ka mor’a sena, bao e bileng litho tsa lelapa la Bethele ka nako e telele e leng Richard Abrahamson le Patrick LaFranca ba ile ba buisana le ba tšeletseng ba ileng ba abeloa mangolo Gileade ’me hona joale ba sebeletsa litšobotsing tse sa tšoaneng tsa tšebeletso e khethehileng ea nako e tletseng. Ba abeloang mangolo sehlopheng sa bo112 ba ile ba khothala ha ba utloa hore lilemo hamorao, ho sa tsotellehe hore na bana ba tšeletseng ba sebeletsa likabelong life hona joale, ba ntse ba sebelisa koetliso eo ba neng ba e fumane Gileade ha ba ithuta Bibele, ba etsa lipatlisiso le ha ba sebelisana le batho ba bang.

Theodore Jaracz, setho sa Sehlopha se Busang, o ile a fana ka puo ea sehlooho lenaneong lena. Sehlooho sa eona se ne se re “Se Finyelloang ke ho Mamella Lehloeo la Satane.” Likhoeling tse fetileng tse hlano, liithuti li ne li lula tikolohong e tletseng lerato le e tataisoang ke puso ea Molimo. Leha ho le joalo, joalokaha ho bontšitsoe lithutong tsa bona ha ba le tlelaseng, re phela lefatšeng la sera. Batho ba Jehova ba hlaseloa lefatšeng ka bophara. (Matheu 24:9) A sebelisa litlaleho tse ’maloa tsa Bibele, Mor’abo rōna Jaracz o ile a bontša hore ‘Diabolose o hlasela rōna ka ho khethehileng. Re lokela ho matlafatsa kamano ea rōna le Jehova ’me re matlafatsoe hore re tobane le liteko.’ (Jobo 1:8; Daniele 6:4; Johanne 15:20; Tšenolo 12:12, 17) Mor’abo rōna Jaracz o ile a phetha ka ho re ho sa tsotellehe lehloeo le ntseng le tsoela pele khahlanong le batho ba Molimo, ‘joalokaha Esaia 54:17 e bolela, sebetsa leha e le sefe se tla etsoa khahlanong le rōna, se ke ke sa atleha. Jehova o tla tiisa hore re lopolloa ka nako ea hae le ka tsela ea hae.’

Ntle ho pelaelo, kaha ba abetsoeng mangolo sehlopheng sa bo112 sa Gileade ‘ba hlomeletsoe ka ho feletseng,’ ba tla phetha karolo e khōlō ho fokotseng tlala ea lijo tsa moea linaheng tseo ba tla sebeletsa ho tsona. (2 Timothea 3:16, 17) Re labalabela ho utloa litlaleho tsa kamoo ba fetisetsang molaetsa o tletseng phepo ho batho ba linaha tsena.

[Lebokose le leqepheng la 23]

LIPALO-PALO TSA SEHLOPHA

Palo ea linaha tseo se li emetseng: 6

Palo ea linaha tseo se abetsoeng ho tsona: 19

Palo ea liithuti: 48

Karolelano ea lilemo: 33,2

Karolelano ea lilemo ’neteng: 15,7

Karolelano ea lilemo tšebeletsong ea nako e tletseng: 12,2

[Setšoantšo se leqepheng la 24]

Sehlopha sa Bo112 sa Sekolo sa Bibele sa Gileade sa Watchtower se Abeloang Mangolo

Lethathamong le ka tlaase, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ho le letona moleng ka mong.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.