Lipotso Tse Tsoang ho Babali

Haeba motho a ipolaea, na ho loketse hore Mokreste a fane ka puo ea lepato?

Mokreste e mong le e mong o tla lokela ho iketsetsa qeto hore na letsoalo la hae le mo lumella ho fana ka puo ea lepato bakeng sa motho eo ho bonahalang a ipolaile. Ha a etsa qeto eo o lokela ho nahana ka lipotso tse latelang: Jehova o nka ho ipolaea joang? Na motho eo e hlile o felisitse bophelo ba hae? Na o ipolaile ka lebaka la ho ferekana kelellong kapa maikutlong? Batho ba sebaka seo ba nka ho ipolaea joang?

Joaloka Bakreste, re thahasella hore na Jehova o nka ho ipolaea joang. Bophelo ba motho ke ba bohlokoa ebile boa halalela ho Jehova. (Genese 9:5; Pesaleme ea 36:9) Ho ipolaea ka boomo ke ho ikamoha bophelo, ’me ka lebaka leo ho hobe mahlong a Molimo. (Exoda 20:13; 1 Johanne 3:15) Na ntlha eo e qhela hore ho ka fanoa ka puo ea lepato bakeng sa motho ea ipolaileng?

Nahana ka taba ea Morena Saule oa Iseraele. Ha a bona hore a ke ke a pholoha ntoeng ea hae ea ho qetela le Bafilista, “Saule [o ile] a nka sabole eaba o itihela holim’a eona” ho e-na le hore a tlohelle sera sa hae se mo hlekefetse. Ha Bafilista ba fumana setopo sa hae, ba ile ba se tlamella lerakong la motse oa Bethe-shane. Ha baahi ba Jabeshe-gileade ba sibolla seo Bafilista ba se entseng, ba ile ba tlosa setopo seo ’me ba se chesa. Ka mor’a moo ba nka masapo a hae ’me ba a epela. Hape ba ile ba itima lijo ka matsatsi a supileng, e leng seo e neng e le moetlo oa ho siama oa Baiseraele. (1 Samuele 31:4, 8-13; Genese 50:10) Davida, e leng motlotsuoa oa Jehova, o ile a tseba se entsoeng ke baahi ba Jabeshe-gileade, ’me a re: “E se eka le ka hlohonolofatsoa ke Jehova, hobane le bontšitse mosa ona o lerato ho morena oa lōna, ho Saule, ka hore ebe le mo patile. Joale e se eka Jehova a ka le bontša mosa o lerato le botšepehi.” (2 Samuele 2:5, 6) Bibele ha e bontše hore baahi ba Jabeshe-gileade ba ile ba nyatsoa ka lebaka la ho etsetsa Morena Saule se neng se ka nkoa e le tšebeletso ea lepato. Bapisa sena le taba ea ba sa kang ba patoa ka lebaka la liphoso tsa bona. (Jeremia 25:32, 33) Mokreste a ka nahana ka tlaleho ea Saule ha a etsa qeto ea hore na o tla fana ka puo ea lepato bakeng sa motho ea ipolaileng.

Hape, Mokreste lokela ho nahana ka morero oa puo ea lepato. Ho fapana le batho ba lumelang hore moea ha o shoe, Lipaki tsa Jehova ha li tšoare tšebeletso ea lepato ka maikutlo a fosahetseng a hore li bulela mofu tsela ea ho ea lefatšeng le leng. Morero o moholo oa ho tšoara tšebeletso ea lepato hase ho ruisa mofu molemo empa ke ho tšelisa ba shoetsoeng le ho pakela ba teng hore na boemo ba bafu ke bofe. (Moeklesia 9:5, 10; 2 Bakorinthe 1:3-5) Lebaka le leng la bohlokoa la ho ba le puo ea lepato ke ho thusa bohle ba teng ho nahana ka hore bophelo bo bokhutšoanyane. (Moeklesia 7:2) Na tšebeletso ea lepato bakeng sa motho ea ipolaileng e tla phetha merero ee?

Ke ’nete hore ba bang ba ka ’na ba nahana hore motho enoa o ipolaile ka morero, a elelloa hantle hore o siteloa Jehova. Empa na hoa khoneha kamehla ho netefatsa maikutlo ao? Na ebe mohlomong e bile ketso ea tšohanyetso? Ba bang ba lekang ho ipolaea baa ikoahlaea ’me ha ba tsoele pele ka hona. E ke ke eare ka mor’a lefu ea e-ba hona motho a bakelang seo a se entseng.

Tšusumetso e ’ngoe e khōlō ke pherekano ea kelello le ea maikutlo eo ba bangata ba bang le eona hore ba ipolaee. Bana ka sebele ho ka thoe  ke baipolai. Lipalo-palo tse ling li bontša hore karolo ea 90 lekholong ea ba ipolaeang ke ba nang le bothata bo itseng ba kelello, ba maikutlo, kapa ba bokhoba ba lithethefatsi. Na Jehova o tla tšoarela ho ipolaea ha batho ba maemong a joalo a kelello? Re ke ke ra tseba hore na mofu o entse sebe se sa tšoareloeng mahlong a Jehova. Mokreste a ka nahanela maemo le histori ea bokuli ea mofu ha a ntse a nahanela hore na a ka tšoara tšebeletso ea lepato bakeng sa motho ea ipolaileng.

Ho na le ntlha e ’ngoe hape e lokelang ho nahaneloa: Batho ba sebakeng seo ba nka ho ipolaea le lefu la motho eo joang? Baholo ke bona ba lokelang ho ameha haholo ka sena hobane ba thahasella botumo ba phutheho ea Lipaki tsa Jehova ea sebakeng sa habo bona. Ho itšetlehile ka hore na batho ka kakaretso ba nka ho ipolaea joang sebakeng seo, haholo-holo ho ipolaea ha motho eo, baholo ba ka ’na ba khetha hore ba se ke ba tšehetsa lepato leo pontšeng kapa hore puo e se ke ea tšoareloa Holong ea ’Muso.

Leha ho le joalo, haeba Mokreste a kōptjoa hore a pate motho eo, a ka ’na a ikhethela ho etsa joalo, a sa emela phutheho. Ha a ikhethela ho etsa joalo, a be masene hore a se ke a bua ka tieo hore motho eo a ka ’na a tsoha. Tšepo eohle ea mofu bakeng sa bokamoso e matsohong a Jehova, ’me ha ho motho ea boemong ba ho bolela hore na mofu o tla tsosoa kapa che. Mokreste a ka bua haholo ka linnete tsa Bibele ka lefu le ho tšelisa ba shoetsoeng.